ᐅᐱᒍᓱᑉᐳᒍᑦ ᓄᓇᕕᒻᒥ ᓄᓇᓕᓕᒫᓂᑦ ᐱᓯᒪᔪᑦ ᓱᑯᐃᔭᕐᓯᒪᔭᒥᓂᒃ ᑕᑯᓐᓇᑕᐅᑎᑦᓯᑎᓪᓗᒋᑦ ᓵᓚᓐᓃᔪᕕᓂᕐᓂᒃ!

2014 | 02 | 26
ᑐᓴᕋᑦᓴᖅ

ᓴᒡᓗᓂ, ᓄᓇᕕᒻᒥ, ᑯᐯᒻᒥ (ᕕᐳᐊᕆ 26, 2014) – ᑲᑎᕕᒃ ᐃᓕᓐᓂᐊᓂᓕᕆᓂᕐᒥ ᐱᓇᓱᑦᑎᐅᓱᑕ ᐅᐱᒍᓱᑉᐳᒍᑦ ᑐᓴᕐᑕᐅᑎᑦᓯᒋᐊᒥᒃ ᓄᓇᕕᒻᒥ ᓄᓇᓕᓕᒫᓂᑦ ᐱᓯᒪᔪᑦ ᓱᑯᐃᔭᕐᓯᒪᔭᒥᓂᒃ ᑕᑯᓐᓇᑕᐅᑎᑦᓯᑎᓪᓗᒋᑦ ᓵᓚᓐᓃᔪᕕᓂᕐᓂᒃ:

  • ᓯᕗᓪᓕᐹᖅ: ᔨᓂ ᐸᒃᓯᓕ (ᓴᓪᓗᒥᐅᖅ, ᐳᕐᑐᓂᕐᓴᒥ 5-ᒥ), ᐱᓇᓱᐊᕐᑕᕕᓂᕐᒥᓄᑦ ᐊᓂᕐᕋᒥ ᓴᓇᔭᕕᓂᕆᑦᓱᒍ ᑕᙯᕐᓯᒍᑎ.
  • ᑐᖓᓕᖓ: ᓯᐊᔭ ᑳᓐ (ᐃᓄᒃᔪᐊᒥᐅᖅᒪ ᐳᕐᑐᓂᕐᓴᒥ 1) ᐱᓇᓱᐊᕐᑕᕕᓂᕐᒥᓄᑦ ᖃᐅᔨᓴᕐᓱᓂ ᐃᓄᐃᑦ ᐱᐅᓯᑐᖃᖏᒍᑦ ᐋᓐᓂᐊᓯᐅᕆᒍᑕᐅᓲᕕᓂᕐᓂᒃ.
  • ᐱᖓᔪᖓ: ᑭᐊᓪ ᑳᒧᕋᓐ ᐊᒻᒪᓗ ᐋᑕᒥ ᑭᐊᑌᓐᓇᖅ (ᓴᓪᓗᒥᐅᒃ, ᐳᕐᑐᓂᕐᓴᒥ 1) ᐱᓇᓱᐊᕐᑕᕕᓂᕐᒥᓄᑦ ᐊᓂᕐᕋᒥ ᐃᑯᒪᐅᑎᓕᐅᕈᑎᐅᒍᓐᓇᕋᔭᕐᑐᓂᒃ.

ᐱᐅᓯᐅᓪᓗᑯᖕᖏᑐᒃᑯᑦ ᓇᑯᕐᒦᑕᐅᓚᐅᕐᒥᔫᒃ ᐱᓇᓱᐊᕐᓂᕕᓂᕐᒥᓄᑦ ᐹᓴ ᒪᖏᐅᖅ (ᐳᕐᑐᓂᓕᓐᓂ 5ᒥᒃ, ᐳᕐᑐᓂᓕᓐᓂ 6ᒥᒃ), ᐱᐊᑦᓯ ᖃᕙᕙᐅᓪᓗ ᐃᕗᔨᕕᒻᒥᐅᒃ. ᐱᓇᓱᐊᕐᑐᕕᓂᐅᑦᓱᑎᒃ ᒥᑏᑦ ᒥᕐᖁᖏᑦᑕ ᖃᐅᓯᓕᕐᖃᔭᖕᖏᓂᖏᓐᓂᒃ ᖃᐅᓯᓕᕈᓐᓇᓂᖏᓐᓂᓗ.

ᓵᓚᓐᓃᔪᕕᓃᑦ ᐊᑎᖏᑦ ᐅᖄᔭᐅᔪᕕᓃᑦ ᐅᒡᓗᒥ ᐅᒃᑯᐊᕈᓯᕐᑐᓂ, ᓴᒡᓗᓂ.

ᐁᑦᑐᑐᕐᑕᐅᔪᑦ, ᐃᓕᓵᑦ ᐅᐱᒍᓱᑦᑐᒪᕆᐅᑦᓱᑎᒃ ᓄᓇᕕᒻᒥᒃ ᑭᒡᒐᑐᕆᐊᕐᑐᑐᑦᓴᓕᐊᕆᔭᐅᓚᐅᑲᑉᐳᑦ ᑯᐯᒻᒥᐅᑦ ᓄᓇᓕᑐᙯᑦ ᓱᑯᐃᔭᕐᓯᒪᔭᒥᓂᒃ ᑕᑯᓐᓇᑕᐅᑎᑦᓯᒋᐊᕐᑐᓕᕐᐸᑕ ᒍᐃᓐᑖᑭᒥ, ᒫᑦᓯ 25-26, 2014).

ᒍᐃᓐᑖᑭᒦᓕᕐᐸᑕ ᐅᐱᒋᒻᒪᕆᓛᕐᑕᕗᑦ !

ᐊᑕᐅᑦᓯᑰᕐᑎᑕᐅᑦᓱᑎᒃ ᑲᑎᕕᒃ ᐃᓕᓐᓂᐊᓂᓕᕆᓂᕐᒧᑦ, ᑕᒪᓐᓇ ᐱᓂᐊᕐᓂᖅ ᓴᐳᑦᔨᔭᐅᓯᒪᓲᖅ ᑲᑎᕕᒃ ᓄᓇᓕᓕᒫᑦ ᑲᕙᒪᖓᓄᑦ, ᓴᓪᓗᐃᑦ ᑲᕙᒫᐱᖓᓄᑦ ᓄᑖᓂᓪᓗ ᐊᕐᖁᓯᐅᕐᓂᓄᑦ ᐃᓕᓐᓂᐊᓂᕐᒨᓕᖓᔪᓂᒃ (ᐃᓄᓕᕆᔨᑐᙯᑦ ᐅᑭᐅᕐᑕᑐᒥᓪᓗ ᑲᓇᑕᒥ ᐱᕙᓪᓕᐊᓂᕐᒥ ᑐᕐᖃᑕᕐᕕᑯᑦ).

ᐅᕙᑦᑎᓅᓕᖓᔪᑦ:

ᑲᑎᕕᒃ ᐃᓕᓐᓂᐊᓂᓕᕆᓂᖅ ᓄᐃᑕᐅᓯᒪᔪᖅ 1975-ᒥ, ᔦᒥᓯ ᐯᑉ ᑯᐯᓪᓗ ᑕᕐᕋᖓᑕ ᐊᖏᖃᑎᒌᒍᑎᖓᑎᒍᑦ. 1978-ᒥᓂᑦ, ᐱᒍᑦᔨᔨᑐᐊᖑᓯᒪᓕᕐᓱᓂ ᐃᓕᓐᓂᐊᓂᕐᒨᓕᖓᔪᓂᒃ ᓄᓇᕕᒻᒥᐅᓄᑦ. ᐃᓕᓐᓂᐊᕈᑎᓕᐊᖑᓯᒪᔪᑦ ᑲᑎᕕᒃ ᐃᓕᓐᓂᐊᓂᓕᕆᓂᕐᒧᑦ ᓄᓇᓕᓐᓂ 14-ᓂ ᐃᓕᓐᓂᐊᑎᑦᓯᕈᑕᐅᔪᑦ. ᐃᓄᒃᑎᑐᑦ ᐅᖃᐅᓯᕐᖄᖅ ᐁᑉᐱᐅᑎᒋᔭᐅᑎᓪᓗᒋᒃ ᖃᓪᓗᓈᑎᑑᕐᓂᖅ ᐅᐃᒍᐃᑎᑐᓪᓗ. ᑐᑭᓯᒋᐊᕈᑎᖃᕈᒪᒍᑦᓯ, ᖃᕆᑕᐅᔭᒃᑯᑦ ᐊᑐᐃᓐᓇᖃᕐᕕᑎᓐᓄᑦ ᑕᑯᓂᐊᕈᓐᓇᑐᓯ ᐅᕗᖓ: www.kativik.qc.ca

— 30 —

ᑐᑭᓯᒋᐊᕈᒪᒍᑦᓯ ᐅᓇ ᐅᖄᓚᕕᐅᑦᑌᓕᖕᖏᑐᖅ:

ᔮᑦ ᑐᔅᓅ-ᐱᐊᕐᓃ
ᑭᓇᒃᑯᑐᐃᓐᓇᓄᑦ ᑐᓴᐅᒪᖃᑎᒌᑦᑎᓯᔨ
ᑲᑎᕕᒃ ᐃᓕᓐᓂᐊᓂᓕᕆᓂᖅ
514-482-8220