ᒪᓐᑐᔨᐊ, ᑯᐯᒃ (ᔫᓂ 12, 2018) – ᑲᑎᕕᒃ ᐃᓕᓴᕐᓂᓕᕆᓂᖅ ᐅᐱᒍᓱᑉᐳᖅ ᖃᐅᔨᑎᑦᓯᒋᐊᒥᒃ ᑯᐯᒃᑯᑦ ᐃᓕᓐᓂᐊᓂᓕᕆᓂᕐᒥᒃ ᑐᕐᖃᑕᕐᕕᖓ ᐊᒻᒪᓗ ᐳᕐᑐᓂᕐᓴᒧᑦ ᐃᓕᓐᓂᐊᓂᓕᕆᓂᖅ (MEES) ᐊᖏᕐᓯᒪᒻᒪᑕ ᑮᓇᐅᔭᖃᕐᑎᓯᓂᕐᒥᒃ ᓴᓇᔭᐅᓂᖓᓄᑦ ᓄᑖᖅ ᐳᕐᑐᓂᕐᓴᒥ ᐃᓕᓐᓂᐊᕕᒃ ᐃᓄᑦᔪᐊᒥ ᐊᒻᒪᓗ 6 ᓄᑖᑦ ᐃᓪᓗᔪᐊᑦ ᐳᕕᕐᓂᑐᒥ.

“ᐊᓕᐊᓱᒻᒪᕆᑉᐳᒐ ᓱᓕᑎᑦᓯᒋᐊᒥᒃ ᖃᐅᔨᑎᑦᓯᒍᑎᒥᒃ ᐅᖃᐅᑦᔭᒍᑎᒋᓚᐅᕐᑕᑎᓐᓄᑦ ᐱᓇᓱᐊᕈᓯᐅᓚᐅᕐᑐᒥ ᐃᓕᓴᕐᓂᓕᕆᓂᒥ ᑭᒡᒐᑐᕐᑎᖏᑦ ᑲᑎᖕᖓᓂᖃᕐᑎᓗᒋᑦ ᒪᓐᑐᔨᐊᒥ,” ᐋᓚᓯ ᓈᓚᑦᑑᔭᖅ ᐅᖃᕐᑐᖅ, ᐊᖓᔪᕐᖄᑉ ᑐᖓᓕᖓ ᑲᑎᕕᒃ ᐃᓕᓴᕐᓂᓕᕆᓂᕐᒥ. “ᐊᖏᕐᑕᐅᓂᖓ ᓄᑖᖅ ᓴᓇᔭᐅᓚᖓᔫᑉ ᓄᐃᑎᑕᖓ ᐃᑲᔪᕐᓯᓯᒪᓂᖓᓄᑦ ᐊᔪᐃᓐᓇᓱᑎᒃ ᐃᓕᓴᕐᓂᓕᕆᓂᕐᒥ. ᓇᑯᕐᒦᕈᒪᔪᖓ ᐃᓄᑦᔪᐊᒥᐅᓂᒃ ᐅᑉᐱᕈᓱᑦᓯᐊᓂᖏᓐᓄᑦ ᑖᑦᓱᒪ ᐊᑯᓂ ᐱᔭᐅᒐᓱᐊᕐᓂᕕᓂᖓᓄᑦ,” ᐅᖃᕆᐊᓪᓚᒥᔪᖅ.

ᑯᐯᒻᒥ ᐃᓕᓴᕐᓂᓕᕆᓂᕐᒧᑦ ᑐᕐᖃᑕᕐᕕᖓ ᐊᖏᓯᒪᔪᖅ ᑮᓇᐅᔭᓂᒃ $36,856,234 ᑲᑎᑦᓱᑎᒃ ᓴᓇᔭᐅᓂᑦᓴᖓᓄᑦ ᓄᑖᖅ ᐳᕐᑐᓂᕐᓴᒥ ᐃᓕᓐᓂᐊᕕᐅᑉ ᐃᓄᑦᔪᐊᒥ, ᐊᒻᒪᓗ ᑲᑎᑦᓱᑎᒃ $4,563,450 ᑮᓇᐅᔦᑦ 6-ᓄᑦ ᐃᓪᓗᔪᐊᓄᑦ ᐳᕕᕐᓂᑐᒥ. ᐱᓇᓱᐊᕈᓯᐅᓚᐅᔪᒥ, ᐃᓕᓐᓂᐊᓂᕐᒥ ᑭᒡᒐᑐᕐᑏᑦ ᐊᖏᓚᐅᔪᑦ ᓇᓪᓕᑳᕐᑕᐅᓂᖏᓐᓄᑦ ᐋᕐᕿᓱᕐᓯᒪᓂᑦᓴᖓᓄᑦ ᐊᒻᒪᓗ ᖃᐅᔨᒪᔨᒻᒪᕆᑦᓴᓂᒃ ᓴᓇᓂᕐᒧᑦ ᐃᓄᑦᔪᐊᒥ ᐃᓕᓐᓂᐊᕕᒻᒧᑦ ᐱᓇᓱᐊᕐᑕᐅᓂᕆᓚᖓᔭᖓᓄᑦ. ᓴᓇᔭᐅᓂᑦᓴᖏᑦ ᐳᕕᕐᓂᑐᒥ ᐃᓪᓗᔪᐊᑦ ᐱᒋᐊᓚᖓᔪᑦ ᑕᒃᑲᓂ ᐅᐱᕐᖔᖑᓚᖓᔪᒥ.

“ᐃᓕᓴᕐᓂᓕᕆᓂᖅ ᐃᓚᐅᑎᑦᓯᓚᖓᔪᖅ ᓄᓇᓕᖏᓐᓂᒃ ᖃᓄᐃᓘᕐᓂᐅᓚᖓᔪᓂ, ᐱᓗᐊᕐᑐᒥ ᐋᕐᕿᓱᕐᑕᐅᓂᖓᓄᑦ ᐃᓕᓐᓂᐊᕕᐅᑉ; ᓇᓃᓐᓂᓴᖓ ᓇᓪᓕᑳᕐᑕᐅᒌᕐᑐᕕᓂᖅ ᓄᓇᓕᖓᓄᑦ ᐃᓄᑦᔪᐊᒥ ᐊᒻᒪᓗ ᐃᓕᓴᕐᓂᓕᕆᓂᕐᒧᑦ ᐊᕐᕌᒍᐃᑦ ᐱᖓᓱᑦ ᓈᓕᕐᑐᑦ,” ᐅᖃᕐᑐᖅ ᓈᓚᑦᑑᔭᖅ.

ᐃᓄᑦᔪᐊᒥᐅᑦ ᙯᖁᔭᐅᔪᑦ ᐃᓚᐅᓗᑎᒃ ᓄᓇᓕᒻᒥ ᑲᑎᖕᖓᓂᖓᓄᑦ ᓯᑕᒪᖓᓐᓂ ᔫᓂ 14, 6:30-ᖑᐸᑦ ᐅᓐᓄᑯᑦ, ᐁᓐᓇᓕᒃ ᐃᓕᓐᓂᐊᕕᒻᒥ, ᐃᓱᒪᒋᔭᒥᓂᒃ ᐅᖄᒋᐊᕐᑐᓗᑎᒃ ᒪᓂᔭᐅᒪᔪᒧᑦ ᐋᕐᕿᓱᕐᓯᒪᐅᑎᑦᓴᖓᓄᑦ ᓄᑖᖅ ᐃᓕᓐᓂᐊᕕᒃ.

2014-ᖑᓕᕐᓂᒪᓂᑦ, ᖁᓕᓪᓗ ᐱᖓᓱᐃᑦ ᐱᓇᓱᐊᕐᑕᐅᔪᑦ ᐃᓕᓐᓂᐊᕖᑦ ᓴᓇᔭᐅᓂᖏᓐᓄᑦ, ᐃᓕᓐᓂᐊᕖᑦ ᐊᖏᓕᒋᐊᕐᑕᐅᓂᖏᓐᓄᑦ ᐊᒻᒪᓗ ᐃᓪᓗᐃᑦ ᓴᓇᔭᐅᓂᖏᓐᓄᑦ ᑐᓂᔭᐅᒪᓕᕐᑐᑦ ᑐᕐᖃᑕᕐᕕᖓᓄᑦ ᐃᓕᓐᓂᐊᓂᓕᕆᓂᕐᒧᑦ ᑯᐯᒻᒥ. ᑖᒃᑯᓇᓂ, ᐱᖓᓱᐃᓐᓈᐲᑦ ᐊᖏᕐᑕᐅᒪᔪᑦ. ᐱᓇᓱᐊᕐᑕᐅᔪᑦᓴᑦ ᑐᕐᖃᑕᕐᕕᒧᑦ ᐊᖏᕐᑕᐅᓂᑦᓴᒥᓂᒃ ᒪᓐᓇ ᐅᑕᕐᕿᔪᑦ ᐅᑯᐊᖑᕗᑦ: ᐊᖏᓕᒋᐊᕐᑕᐅᓂᖓ ᐃᑯᓯᒃ ᐃᓕᓐᓂᐊᕕᐅᑉ ᓴᓪᓗᓂ, ᐊᖏᓕᒋᐊᕐᑕᐅᓂᖓ ᑐᑭᓯᓂᐊᕐᕕᐅᑉ ᐃᓕᓐᓂᐊᕕᖓ ᐊᑯᓕᕕᒻᒥ, ᐃᓪᓗᔪᐊᑦᓴᖏᑦ ᐱᓇᓱᑦᑏᑦ ᑰᑦᔪᐊᒥ, ᐊᑯᓕᕕᒻᒥ, ᐊᐅᐸᓗᒻᒥ, ᑕᓯᐅᔭᓂ, ᑲᖏᕐᓱᒥ ᐊᒻᒪᓗ ᐳᕕᕐᓂᑐᒥ, ᓴᓇᔭᐅᓂᑦᓴᖏᑦ ᐅᕐᖂᓯᓴᐅᑎᓖᑦ ᐅᓯᑲᑦᑕᐅᑎᖃᐅᑏᑦ ᑰᑦᔪᐊᒥ, ᐳᕕᕐᓂᑐᒥ, ᑰᑦᔪᐊᕌᐱᒻᒥ ᐊᒻᒪᓗ ᐅᒥᐅᔭᒥ, ᐊᒻᒪᓗ ᓅᑕᐅᓂᑦᓴᖓ ᐃᓕᓴᕐᓂᓕᕆᓂᐅᑉ ᒪᓐᑐᔨᐊᒦᑦᑐᖅ ᐊᓪᓚᕕᐅᑉ ᓄᓇᕕᒻᒧᑦ.

ᑭᓇᒃᑰᓂᕗᑦ:

ᑲᑎᕕᒃ ᐃᓕᓐᓂᐊᓂᓕᕆᓂᖅ (ᑲᑎᕕᒃ) ᑎᒥᖕᖑᑎᑕᐅᔪᕕᓂᖅ 1975-ᖑᑎᓪᓗᒍ, ᔦᒻᔅ ᐯ ᐊᒻᒪᓗ ᑯᐯᒃ ᑕᕐᕋᖓᑕ ᐊᖏᖃᑎᒌᓐᓂᖓᒍᑦ (ᐊᖏᖃᑎᒌᓐᓂᖅ). 1978-ᒥᓂᑦ ᐱᑕᖃᕐᑎᓯᔪᑐᐊᖑᓯᒪᕗᖅ ᐃᓕᓐᓂᐊᓂᕐᒨᓕᖓᔪᓂᒃ ᐱᒍᑦᔨᐅᑎᓂᒃ ᓄᓇᕕᒻᒥᐅᓄᑦ. ᔦᒻᔅ ᐯ ᐊᒻᒪᓗ ᑯᐯᒃ ᑕᕐᕋᖓᑕ ᐊᖏᖃᑎᒌᓐᓂᖓᒍᑦ, ᐃᓕᓐᓂᐊᓂᓕᕆᓂᖅ ᐱᔪᓐᓇᓂᖃᕐᑎᑕᐅᔪᖅ ᐊᐅᓚᑦᓯᔨᐅᕕᖃᕐᑎᑕᐅᑦᓱᓂᓗ ᐃᓄᐃᑦ ᐃᓗᕐᕈᓯᖓᓂᒃ ᒪᓕᑦᓯᐊᑐᓂᒃ ᐃᓕᓐᓂᐊᕈᑎᑦᓴᓕᐅᕐᓂᒥ ᐃᓕᓐᓂᐊᑎᑦᓯᓂᕐᒥᓗ. ᑐᕌᒐᖓ ᑎᓕᔭᐅᒪᒍᑎᒋᑦᓱᒍ ᑲᑎᕕᒃ ᐃᓕᓐᓂᐊᓂᓕᕆᓂᐅᑉ ᑌᒣᒻᒪᑦ ᒪᕐᕈᐃᓕᕿᖓᕗᖅ. ᓯᕗᓪᓕᖅ, ᓄᓇᓕᓕᒫᓂ ᐃᓕᓐᓂᐊᓂᓕᕆᔨᐅᑦᓱᓂ ᓄᓇᕕᒻᒥᐅᓕᒫᓄᑦ. ᐁᑉᐹᒍᓪᓗ, ᑎᒥᖁᑎᒋᔭᐅᕗᖅ ᐊᑦᔨᒋᔭᐅᖕᖏᑐᓂᒃ ᐱᔪᓐᓇᐅᑎᖃᕐᓱᓂ ᐊᐅᓚᑦᓯᔨᐅᕕᖃᕐᓱᓂᓗ ᓴᐳᑦᔨᒍᑎᐅᒋᐊᕐᑐᓂᒃ, ᐱᑕᖃᕐᑎᓯᖏᓐᓇᕈᑎᐅᒋᐊᕐᑐᓂᒃ, ᐊᒻᒪᓗ ᐱᕙᓪᓕᐊᑎᑦᓯᒍᑎᓂᒃ ᐃᓄᐃᑦ ᐅᖃᐅᓯᖓᓂᒃ, ᐃᓗᕐᕈᓯᖓᓂᒃ, ᐃᓅᑦᔪᓯᖓᓂᓪᓗ. ᐃᓕᓐᓂᐊᕈᑎᑦᓭᑦ ᑲᑎᕕᒃ ᐃᓕᓐᓂᐊᓂᓕᕆᓂᕐᒧᑦ ᐃᓕᓐᓂᐊᕈᑎᓕᐊᑦ ᐃᓕᓐᓂᐊᑎᑦᓯᒍᑎᐅᕗᑦ ᐃᓘᓐᓇᖏᓐᓂᑦ ᑖᒃᑯᐊ 14-ᐃᑦ ᓄᓇᓖᑦ ᐃᓕᓐᓂᐊᕕᖏᓐᓂᑦ, ᐃᓄᒃᑎᑐᑦ ᐅᖃᐅᓯᕐᖄᖓᓂᒃ ᐊᒻᒪᓗ ᐅᐃᒍᐃᑎᑐᑦ ᖃᓪᓗᓈᑎᑐᓪᓗ ᐅᖃᐅᓯᐅᑉ ᐁᑉᐱᐅᑎᖓᓂᒃ. ᐃᓕᓐᓂᐊᓂᓕᕆᓂᖅ ᐊᐅᓚᑦᓯᔪᖅ 17-ᓂᒃ ᐳᒃᑭᓂᕐᓴᓂ ᐳᕐᑐᓂᕐᓴᓂᓪᓗ ᐃᓕᓐᓂᐊᕕᓐᓂᒃ ᐊᒻᒪᓗᑦᑕᐅᖅ 5-ᓂᒃ ᐃᓄᒻᒪᕇᑦ ᐃᓕᓐᓂᐊᕕᖏᓐᓂᒃ. ᑐᑭᓯᒋᐊᓪᓚᕈᑎᑦᓭᑦ ᑕᑯᔭᐅᒍᓐᓇᑐᑦ ᐅᕙᓂ: www.kativik.qc.ca

— 30 —

ᑐᑭᓯᒋᐊᑦᓯᐊᕈᒪᒍᕕᑦ, ᐅᒥᖓ ᐅᖄᕕᖃᕐᓗᑎᑦ:

ᔮᑦ ᑐᓯᓅ-ᐱᐊᕐᓃ
ᐅᖄᖃᑎᒌᓐᓂᒥ ᐊᑕᐅᑦᓯᑰᕐᑎᓯᔨ
514-482-8220 ext. 309 | publicrelations@kativik.qc.ca