ᐃᑰᑕᕐᑎᐅᖃᑎᒌᑦ ᑐᖕᖓᓱᑦᑎᓯᔪᑦ ᑕᓪᓕᒪᓂᒃ ᐱᔪᓐᓇᐅᑎᑖᕐᖃᒥᑦᑐᓂᒃ ᓄᓇᕕᒻᒥᐅᖑᑦᓱᑎᒃ ᐱᓇᓱᑦᑎᓂᒃ ᐱᔪᓐᓇᓯᔭᐅᔪᓂᒃ ᐃᓕᓐᓂᐊᕈᑎᓄᑦ ᓄᐃᑕᐅᓯᒪᔪᓄᑦ ᐱᓇᓱᖃᑎᒌᒍᑕᐅᑦᓱᑎᒃ ᐊᕙᑖ ᕉᐃᓪᓖ ᐃᑰᑕᕐᑎᓄᑦ ᐊᒻᒪᓗ ᑲᑎᕕᒃ ᐃᓕᓴᕐᓂᓕᕆᓂᕐᒧᑦ

PHOTO: Avataa Rouillier Drilling
2022 | 12 | 19
ᑐᓴᕋᑦᓴᖅ

ᑰᔾᔪᐊᖅ, ᑎᓯᒻᐱᕆ 19, 2022. — ᐊᕙᑖ ᕉᐃᓪᓖ ᐃᑰᑕᕐᑏᑦ ᐊᒻᒪᓗ ᑲᑎᕕᒃ ᐃᓕᓴᕐᓂᓕᕆᓂᖅ ᐊᓕᐊᓱᑉᐳᑦ ᐅᓐᓂᓯᐅᕈᑎᖃᕆᐊᒥᒃ ᓯᕗᓪᓕᐹᑦ ᑕᓪᓕᒪᑦ ᐃᓕᓐᓂᐊᑐᑦ ᓄᑖᒥᒃ ᐱᓇᓱᒐᕐᒥᒃ ᐃᓕᓐᓂᐊᕈᑎᒥᒃ (DVS) ᐊᑐᕆᐅᕐᑐᒥᒃ ᓄᓇᕕᒻᒥ ᐱᔭᖃᑦᓯᐊᓱᑎᒃ ᐃᓕᓐᓂᐊᕈᑎᒥᓂᒃ ᐱᔭᕇᕐᓯᒪᓕᕐᓂᖓᓂᒃ. ᐅᓪᓗᒥᐅᔪᖅ ᐱᐅᓯᑎᓪᓗᒋᑦ ᐱᑕᖃᖕᖏᓗᐊᕐᓂᖅ ᐱᔪᓐᓇᓂᖃᑦᓯᐊᑐᓂᒃ ᐱᓇᓱᑦᑎᓂᒃ, ᐊᔪᕐᓇᒐᓐᓂᖅ ᓄᓱᑦᓯᒐᓱᒋᐊᒥᒃ ᐃᓅᓱᑦᑐᓂᒃ, ᐊᒻᒪᓗ ᐱᓇᓱᑦᑎᐅᓕᕇᕐᑐᑦ ᐃᓄᒻᒪᕆᖕᖑᐸᓪᓕᐊᓂᖓ, ᐱᒻᒪᕆᐅᕗᖅ ᖁᕕᐊᒍᑎᖃᕈᑦᑕ ᑕᒪᑐᒥᖓ ᐃᓱᒣᓐᓇᖅ ᐱᒍᑎᓪᓚᕆᐊᓗᒻᒥᒃ. ᓇᑯᕐᒫᐳᒍᑦ ᑖᒃᑯᓂᖓ ᐃᓕᓐᓂᐊᕇᕐᑐᕕᓂᕐᓂᒃ ᐱᓇᓱᑦᑎᐅᓂᕐᒧᑦ ᐃᓚᐅᓕᕇᕐᑐᓂᒃ!

ᐃᓚᐅᓪᓚᕆᒃᑲᒥᒃ ᑭᖑᓪᓕᓴᓂᒃ ᐱᓇᓱᑦᑎᓴᓕᐅᕐᓂᒧᑦ ᐊᒻᒪᓗ ᐃᓄᐃᑦ ᓄᓇᓕᖏᓐᓄᑦ ᕉᐃᓪᓖ ᑎᒥᐅᖃᑎᒌᖏᑦ ᐃᓚᑖᕐᓯᒪᔪᑦ ᐊᕙᑖ ᕉᐃᓪᓖ ᐃᑰᑕᕐᑎᓂᒃ ᐊᒻᒪᓗ ᑲᑎᕕᒃ ᐃᓕᓴᕐᓂᓕᕆᓂᕐᒥᒃ ᒪᑭᑦᓯᖃᑕᐅᑦᓱᑎᒃ ᐃᓕᓐᓂᐊᕈᑎᑦᓴᒥᒃ ᐊᑐᕐᓗᒍ ᐃᓕᓐᓂᐊᑐᓄᑦ ᖃᐅᔨᒍᑎᑦᓴᒥᒃ ᖃᐅᔨᒪᒋᐊᓕᖏᓐᓂᒃ ᐱᓇᓱᑦᑎᕈᕐᓂᐊᓗᑎᒃ ᐃᑰᑕᕐᑏᑦ ᐱᓇᓱᐊᒐᖓᑕ ᐃᓗᐊᓂ. ᑲᑐᑦᔨᓱᑎᒃ, ᑖᒃᑯᐊ ᐱᓇᓱᖃᑎᒌᑦ ᐊᑐᕐᓯᒪᔪᑦ ᐃᓱᐊᖁᑕᐅᒋᐊᓕᓕᒫᓂᒃ ᑫᓪᓗᐊᓚᖓᓗᓂ ᐱᓇᓱᑦᑎᑖᕐᓂᒥᒃ ᓄᓇᓕᓐᓂᒃ ᑯᐯᒃ ᑕᕐᕋᒪᕆᖓᓂ, ᑕᒪᓐᓇᓗ ᐃᑲᔪᕐᓯᕗᖅ ᓄᓇᓕᓐᓂ ᒪᑭᑕᐅᑎᖃᕐᓂᐅᑉ ᐱᕙᓪᓕᐊᓂᖓᓂᒃ.

ᐱᓇᓱᖃᑎᖃᕐᓂᕗᑦ ᐊᕙᑖ ᕉᐃᓪᓖ ᐃᑰᑕᒃᑎᓂᒃ ᐱᑦᓯᐊᑐᒻᒪᕆᐅᕗᖅ ᐃᓘᓐᓇᓯᐊᖓᑎᒍᑦ. ᐱᕕᑖᕐᑎᑕᐅᓯᒪᔪᒍᑦ ᐃᓕᓐᓂᐊᕈᑎᖃᑦᑎᓯᓂᕐᒥᒃ ᑐᕌᕐᓇᑐᒥᒃ DVS-ᑖᕐᓂᒧᑦ, 100%-ᖏᑦ ᐃᓕᓐᓂᐊᕇᕐᑐᑦ ᐱᓇᓱᒐᕐᑖᖃᑦᑕᑎᓪᓗᒋᑦ. ᐃᓕᑦᓯᓂᖅ ᐊᒡᒐᒧᑦ ᐊᐅᓚᒪᑦᓯᓂᕐᒥᒃ ᐊᑐᕐᑐᖅ ᐊᒻᒪᓗ ᐊᓐᓀᑲᑦᑕᖏᓐᓂᖅ ᓯᕗᓪᓕᐹᓂᒃ ᐃᓕᓐᓂᐊᑎᑕᑦᑎᓂᒃ ᐃᑉᐱᒋᔭᑦᓴᐅᒥᑦᓱᓂ: ᐃᓕᓐᓂᐊᑐᓕᒫᑦ ᐱᒋᐅᕐᓴᐅᑎᖏᓐᓂᒃ ᐊᑐᓚᖓᓯᒪᔪᑦ ᐃᓕᓐᓂᐊᓂᕐᒥᓂᒃ ᐊᓂᒍᐃᖃᑦᑕᑐᑦ ᐱᔪᓐᓇᓯᑦᓯᐊᒪᕆᐊᓗᑦᓱᑎᒃ,” ᐅᖃᕐᑐᖅ ᒪᒪᑑ ᑎᐊᑉ ᑐᑭᒧᐊᑦᑎᓯᔨ ᐃᓄᒻᒪᕆᓐᓂᒃ ᐃᓕᓐᓂᐊᑎᑦᓯᓂᕐᒥᒃ ᐊᒻᒪᓗ ᐱᓇᓱᒐᕐᓂᒃ ᐃᓕᓐᓂᐊᓂᕐᒥᒃ ᑲᑎᕕᒃ ᐃᓕᓴᕐᓂᓕᕆᓂᕐᒥ.

ᐊᕐᕌᒍᐃᑦ ᐱᖓᓱᑦ ᐊᓂᒍᓕᕐᑐᑦ, ᐱᓚᐅᕐᓯᒪᑎᓪᓗᑕ ECOLOGO® UL 2724 ᐱᔪᓐᓇᐅᑎᖓᓂᒃ ᐃᓕᖓᔪᒥᒃ ᐱᒍᑦᔨᐅᑎᓂᒃ ᓄᐃᑕᑦᓯᔨᐅᓂᕐᒧᑦ ᐅᔭᕋᓐᓂᐊᕕᑦᓴᓂᒃ ᕿᓂᕐᓂᐅᑉ ᑐᑭᐊᒍᑦ. ᐅᓪᓗᒥ, ᑖᓐᓇ ᓄᐃᑕᒋᐊᓪᓚᓕᕐᑐᖅ ᐊᕐᖁᑎᖃᕐᓱᓂ ᓇᓪᓕᑳᕈᑎᓂᒃ ᐊᒻᒪᓗ ᐱᒋᐅᕐᓴᑎᑦᓯᒍᑎᓂᒃ ᓄᓇᓕᓐᓂ ᐱᓇᓱᑦᑎᓂᒃ ᑌᒫᒃ ᐱᕕᓕᒫᕐᑎᓯᓚᖓᓗᓂ ᒪᑭᑕᐅᑎᑎᒍᑦ ᐱᕙᓪᓕᖁᑎᓂᒃ ᐊᒻᒪᓗ ᑫᓪᓗᐊᒥᓗᓂ ᓄᓇᓕᓐᓂ ᐱᕙᓪᓕᐊᓂᕐᒥᒃ.”— ᒫᕆᐅ ᕉᐃᓪᓖ, ᐊᖓᔪᕐᖄᒪᕆᐅᑉ ᑐᖓᓕᐊ ᐊᕙᑖ ᕉᐃᓪᓖ ᐃᑰᑕᕐᑎᓂ.

ᓇᑯᕐᒦᒋᐊᓪᓚᐳᒍᑦ ᒪᑯᓂᖓ ᐅᐱᓐᓇᓗᑐᑦᓯᐊᑐᓂᒃ ᐃᑲᔪᕐᑐᑎᑦᑎᓂᒃ, ᐱᑕᖃᕐᓂᖏᑉᐸᑕ ᑕᒪᓐᓇ ᐃᓕᓐᓂᐊᑎᑦᓯᓂᖅ ᐱᕕᖃᕋᔭᓚᐅᔪᖕᖏᒪᑦ: CSMO ᐅᔭᕋᓐᓂᐊᕕᖏᑦ, ᕌᒡᓚᓐ ᐅᔭᕋᓐᓂᐊᕕᖏᑦ, ᓵᓕ ᒍᐊᑦ ᐊᒻᒪᓗ ᑯᔅᑏᓇ ᓈᑯᓛᖅ ᐊᕙᑖ ᕉᐃᓪᓖ ᐃᑰᑕᕐᑎᑯᓐᓂ ᐊᒻᒪᓗ ᐃᓕᓐᓂᐊᑎᑦᓯᔨᖓᑦ ᕆᓵ ᐳᕋᓴᐅᑦ.

ᐃᓚᐅᔪᑦᓴᓕᐊᖑᓂᖅ ᖃᑯᓪᓕᓂᒃ ᓇᕐᖁᓕᓐᓂᒃ ᐃᑰᑕᕐᓂᒃ ᐃᓕᓐᓂᐊᕈᑎᒥ

ᑐᖓᓕᕆᓕᐅᑎᔪᑦ ᐃᓕᓐᓂᐊᑐᑦᓭᑦ ᐅᓪᓗᒥ ᑎᒍᓚᔭᐅᔪᑦ ᐃᓕᓐᓂᐊᕈᑎᖏᑦ ᐱᒋᐊᓛᕐᑎᓗᒋᑦ ᒣ 2023-ᒥ. ᖃᐅᔨᒋᐊᕈᒪᒍᕕᑦ ᐃᓕᓐᓂᐊᕈᑎᐅᑉ ᒥᑦᓵᓄᑦ ᐅᕝᕙᓗᓘᓐᓃᑦ ᐃᓚᐅᒍᒪᒍᕕᑦ, ᐅᕗᖓ ᑕᑯᓂᐊᕐᓗᑎᑦ:
https://www.kativik.qc.ca/en/vocational-training/diamond-drilling/.

 

ᐅᕙᒍᑦ:

ᐊᕙᑖ ᕉᐃᓪᓖ ᐃᑰᑕᕐᑏᑦ, ᐃᓚᒋᔭᐅᔪᑦ ᕉᐃᓪᓖ ᑎᒥᐅᖃᑎᒌᖏᓐᓂ, ᒪᓂᔨᓯᒪᔪᑦ ᓱᓇᒥᑦᑐᓂᒃ ᖃᑯᓪᓕᓂᒃ ᓇᕐᖁᓕᓐᓂᒃ ᐃᑰᑕᕐᓂᑯᑦ ᐋᕐᕿᕈᑎᑦᓴᓂᒃ ᓄᓇᕕᒻᒥ 2015-ᒥᓂᒃ, ᐱᖃᑎᖃᕈᑎᒋᑦᓱᒍ ᐃᓄᐃᑦ ᓄᓇᓕᖏᓐᓂᒃ.

ᑲᑎᕕᒃ ᐃᓕᓴᕐᓂᓕᕆᓂᖅ ᐱᖕᖑᑎᑕᐅᓯᒪᔪᖅ 1975-ᒥ, ᔦᒻᔅ ᐯᒥ ᐊᒻᒪᓗ ᑯᐯᒃ ᑕᕐᕋᖓᓂ ᐊᖏᖃᑎᒌᓐᓂᐅᑉ (JBNQA) ᐊᑖᒍᑦ. 1978-ᒥᓂᒃ, ᑖᓐᓇᑑᑦᓱᓂ ᐃᓕᓐᓂᐊᕈᑎᓄᑦ ᐱᒍᑦᔨᒍᑎᓂᒃ ᓄᐃᑕᑦᓯᔨᐅᔪᖅ ᐃᓄᓐᓄᑦ ᓄᓇᕕᒻᒥᐅᓄᑦ. ᐃᓕᓴᕐᓂᓕᕆᓂᖅ ᐃᖏᕐᕋᑎᑦᓯᔪᖅ 18-ᓂᒃ ᓯᕗᓪᓕᐹᒥᒃ ᐳᕐᑐᓂᕐᓴᒥᓪᓗ ᐃᓕᓐᓂᐊᕕᓐᓂᒃ ᐊᒻᒪᓗ 6-ᓂᒃ ᐃᓄᒻᒪᕇᑦ ᐃᓕᓐᓂᐊᕕᖏᓐᓂᒃ.  ᖃᐅᔨᒪᔭᑦᓴᒋᐊᓓᑦ ᑕᑯᑦᓴᐅᔪᑦ ᐅᕙᓂ: www.kativik.qc.ca

– 30 —

ᐱᕕᖏᑦ ᐊᒻᒪᓗ ᖃᐅᔨᒋᐊᕐᕕᓭᑦ:

ᐊᕙᑖ ᕉᐃᓪᓖ ᐃᑰᑕᕐᑏᑦ
ᓯᐹᔅᑎᐊᓐ ᕈᐊ
sebastien.roy@rouillier.ca
418-780-5391, ext 208

ᑲᑎᕕᒃ ᐃᓕᓴᕐᓂᓕᕆᓂᖅ
ᔦᑦ ᑐᓯᓄ-ᐱᐊᕐᓃ
ᑐᓴᐅᒪᑎᑦᓯᒍᑎᓂᒃ ᑐᑭᒧᐊᑦᑎᓯᔨ
514-797-8220 (cell) ᐅᕝᕙᓗᓘᓐᓃᑦ 1-800-361-2244, ext 309
publicrelations@kativik.qc.ca