ᑲᖏᕐᓱᐊᓗᒃᔪᐊᑉ ᐃᓕᓐᓂᐊᕕᖓᓂ
ᐱᒋᐊᕐᑎᑕᕕᓂᐅᑦᓱᓂ ᐱᓇᓱᐊᕐᑕᐅᔪᖅ
ᑯᕆᔅᑕᕗ ᒪᒃᕘᒃᓴᓐ, ᐃᓕᒃᑯᑦ ᐃᓕᓐᓂᐊᑎᑕᐅᒍᑎᖃᕆᐊᓕᓐᓂᒃ ᐃᓕᓐᓂᐊᑎᑦᓯᔨ ᐅᓪᓗᕆᐊᖅ ᐃᓕᓐᓂᐊᕕᒻᒥ, ᐱᓇᓱᕝᕕᒥᓂ ᐊᒡᓚᓯᒪᔪᖁᑎᖏᓐᓃᑐᓂᒃ ᕿᒥᕐᕈᓱᓂ ᐃᑉᐱᒋᔭᖃᓯᔪᕕᓂᖅ ᐃᒫᒃ ᐃᓕᓐᓂᐊᑏᑦ ᐊᒡᓚᓯᒪᔪᖁᑎᖏᑦ ᐃᓚᑰᒋᐊᖏᑦ ᐱᒻᒪᕆᖑᐊᓂᒃ ᑐᑭᓯᒪᐅᑎᒋᔭᐅᒋᐊᓕᓐᓂᒃ ᐃᓕᓐᓂᐊᑎᐅᑉ ᑐᓵᓂᖓᓄᐊᖓᔪᓂᒃ ᑕᐅᑐᓐᓂᖓᓄᐊᖓᔪᓂᓪᓗ. ᖃᓄᑎᒋᒃ ᐊᖏᓂᖃᕐᒪᖔᑕᐅᖕᖏᑐᖅ ᓴᓇᒻᒪᖃᕐᒪᖔᑕᓘᓐᓃᑦ, ᓂᕐᓕᐅᔭᖕᖑᐊᑑᖅ! 🐣 ᐃᒣᓕᖓᖔᕐᑐᕕᓃᑦ, ᐃᓕᓐᓂᐊᑏᑦ ᑕᐅᑐᓐᓂᖏᓐᓄᐊᖓᔪᓂᒃ ᑐᓵᓂᖏᓐᓄᐊᖓᔪᓂᓪᓗ ᐊᐱᕐᓲᑎᓄᑦ ᐱᒻᒪᕆᖑᐊᓄᑦ ᑭᐅᒍᑎᑦᓴᑕᖃᕐᓂᖏᑦᑐᑦ:
- ᑖᒃᑯᐊ ᐃᓕᓐᓂᐊᑏᑦ ᐃᔨᓕᕆᔨᒧᑦ ᐃᔨᖏᑦ ᖃᐅᔨᓴᕐᑕᐅᓚᐅᕐᓯᒪᓐᓂᖄᑦ? ᐃᔭᐅᑎᑖᕆᐊᓖᑦ?
- ᑐᓵᓂᖏᓐᓄᐊᖓᔪᓪᓕ? ᑐᓵᑦᓯᐊᒍᓐᓀᓕᕐᓯᒪᔪᓖᑦ?
ᐃᓚᖓᓂ ᐊᒡᓚᓯᒪᔪᖁᑏᑦ ᐊᓯᐅᔪᕕᓂᐅᓲᑦ ᐅᕝᕙᓘᓐᓃᑦ ᐋᓐᓂᐊᕕᓐᓂᑦ ᐃᓕᓐᓂᐊᕕᓐᓄᑦ ᑎᑭᐅᑎᒌᑦᓯᐊᑐᕕᓂᐅᓲᖑᒐᑎᒃ. ᐊᒡᓚᓯᒪᔪᖁᑎᑦᑎᓄᐊᖓᔪᑦ ᐊᒻᒪᓂᖏᑦ ᐊᒥᓲᕗᑦ ᐊᒻᒪᓗ ᑖᒃᑯᐊ ᓴᓗᒻᒪᓴᕆᐊᖃᕐᓱᑎᒋᑦ. ᐅᖃᓚᔪᕗᖓ, ᐱᐅᔪᒻᒪᕆᐊᓘᒐᔭᕐᑐᖅ ᐃᓘᓐᓇᓕᒫᖏᑦᑕ ᖃᐅᔨᓴᕐᑕᐅᓂᕆᒐᔭᕐᑕᖏᓐᓂᒃ ᐱᓇᓱᒍᓯᖃᕐᓂᕈᑦᑕ.
ᐃᔨᓕᕆᔨ ᐊᒻᒪᓗ ᑐᓵᓂᓕᕆᔨ ᑎᑭᑐᐊᕋᒥ ᓄᓇᓕᒻᒧᑦ – ᑖᒃᑯᐊᓗ ᒪᕐᕈᕕᑦᓱᑎᒃ ᐊᕐᕌᒍᒥ ᑎᑯᕙᓪᓗᓲᖑᑦᓱᑎᒃ – ᐱᓇᓱᐊᕐᓂᒋᒃ ᐱᕕᑦᓴᑭᑦᑐᒪᕆᐅᓲᒃ ᐊᒥᓱᕕᓐᓂᓴᐅᑦᓱᑎᓗ ᓱᓇᒥᓪᓗᒋᑦ ᐃᓕᓐᓂᐊᑎᓕᒫᓂᒃ ᑕᑯᒌᕈᓐᓇᓯᓲᖑᖕᖏᓱᑎᒃ. ᓱᓕᒋᐊᓪᓚᓗ, ᖃᐅᔨᓴᕈᑎᓂᒃ ᐱᓇᓱᐊᓲᖑᑦᓱᑎᒃ ᑌᒃᑯᓇᓂᓪᓗᑯᐊᐲᓕᑐᐊᕐᒪᑕ ᐊᕐᕌᒍᖏᓐᓂ ᐃᓕᓐᓂᐊᓂᕐᒥᓂ, ᑕᒪᓐᓇᓗ ᐱᐅᓯᕆᔭᐅᓂᖓᓄᑦ ᐃᓚᖏᑦ ᐃᓕᓐᓂᐊᑏᑦ ᑲᒪᒋᔭᐅᒻᒣᑑᓚᕿᒍᑎᒋᒍᓐᓇᓱᓂᐅᒃ.
ᐅᑯᐊ ᖃᐅᔨᓴᕈᑎᓄᑦ ᐱᓇᓱᒍᑏᑦ ᐃᑲᔪᕐᓯᒪᓲᑦ ᖃᐅᔨᒋᐊᕐᑕᐅᒍᑎᖏᓐᓄᑦ ᑐᖕᖓᕕᖃᕈᑎᒋᑦᓱᒋᑦ, ᓇᓗᓀᕐᓯᒐᒥᒃ ᑭᓇᑐᐃᓐᓇᐅᑉ ᑐᓵᓂᖓᑕ ᐊᒻᒪᓗ ᑕᐅᑐᓐᓂᖓᑕ ᖃᓄᐃᓪᓗᐊᑎᒋᓂᖏᓐᓂᒃ.
ᑖᒃᑯᐊ ᖃᐅᔨᓴᕐᑕᐅᑎᑦᓯᒍᑎᑦᓴᓄᑦ ᑐᖕᖓᕖᑦ ᐱᓇᓱᒍᑏᑦ ᐃᓕᓐᓂᐊᕕᓕᒫᒥ ᐊᑐᕐᓯᒪᓕᕐᑕᕗᑦ. ᑕᓪᓕᒪᓂᒃ ᐃᓕᓐᓂᐊᑎᓂᒃ ᖃᐅᔨᔭᐅᑎᑦᓯᒍᓐᓇᓯᓚᐅᔪᕗᒍᑦ ᐃᔭᐅᑎᑖᕆᓕᐊᓐᓂ ᐊᒻᒪᓗ 30-ᓂᒃ ᐃᓕᓐᓂᐊᑎᓂᒃ ᖃᓄᑎᒋᒐᓚᒃ ᑐᓵᑦᓯᐊᖏᓪᓕᓯᒪᔪᓂᒃ.
ᑕᑕᒥᒐᓚᑦᓯᒪᒧᑦ ᑕᒪᒃᑯᓂᖓ ᖃᐅᔨᔭᐅᓚᕿᔪᕕᓂᕐᓂᒃ, ᑯᕆᔅᑕᕗ ᐃᓱᒪᑖᕐᑐᕕᓂᖅ ᑕᒪᒃᑯᐊ ᑐᑭᓯᒪᐅᑎᑦᓭᑦ ᐃᓕᓐᓂᐊᕕᓐᓄᑦ ᐊᓯᖏᓐᓄᑦ ᖃᐅᔨᒪᔭᐅᑎᓗᒋᑦ ᐱᒻᒪᕆᐅᒐᔭᕆᐊᖓ. ᑕᑯᓐᓇᖑᐊᕐᓇᑐᖅ ᐃᒫᒃ ᐃᓕᒃᑯᑦ ᐃᓕᓐᓂᐊᑎᑕᐅᒍᑎᖃᕆᐊᓕᓐᓂᒃ ᐃᓕᓐᓂᐊᑎᑦᓯᔩᑦ ᐱᓇᓱᐊᕋᔭᕐᑎᓗᒋᑦ ᐱᔭᕆᐊᑭᑦᑐᓂᒃ ᐊᒻᒪᓗ ᓇᓗᓇᖕᖏᑐᓂᒃ ᐃᓕᓐᓂᐊᓇᐅᑉ ᐊᕐᕌᒍᖓᑕ ᐱᒋᐊᕐᓂᖓᓂᑕᒫᑦ ᖃᐅᔨᓴᕈᑎᖃᕐᓗᑎᒃ ᐱᐅᓂᕐᐸᐅᒐᔭᕐᓂᖓ! ᑌᒣᓕᖓᓐᓂᐸᑦ ᐱᕕᖃᓕᕋᔭᕐᑐᑦ ᐃᓕᓐᓂᐊᑎᓂᒃ ᓯᕗᓂᖓᓂ ᖃᐅᔨᔭᐅᒻᒣᑑᖏᓐᓇᑐᕕᓂᐅᑐᐃᓐᓇᕆᐊᓕᓐᓂᒃ ᓇᓗᓀᕐᓯᓗᑎᒃ, ᑌᒪᓗ ᐃᓘᓐᓇᖏᓐᓂᒃ ᐱᒍᑦᔭᐅᒍᑎᒥᒃ ᑭᖕᖒᒪᑦᓯᒍᑎᓕᓐᓂᒃ ᓱᓇᒥᑦᓯᓯᐊᕐᓯᒪᓕᕋᕐᓱᑎᒃ. ᐅᖄᒍᑎᖃᕐᓂᕗᒃ ᐃᓱᓕᒍᑎᖃᓚᐅᔪᕗᖅ ᐆᒥᖓ : ᑕᒐᓕ ᐃᓕᓴᕐᓂᓕᕆᓂᒃᑯᑦ ᖃᐅᔨᓴᕈᑎᓄᑦ ᐱᓇᓱᒍᑎᖃᐅᑎᒥᒃ ᐃᓕᓐᓂᐊᕕᓕᒫᓄᑦ ᐊᑐᓂᑦ ᓂᐅᕕᕈᑎᓪᓗᐊᓂᒃ ᑮᓇᐅᔭᖃᕐᓯᑎᔪᕕᓂᐅᑦᓴᐸᑕ?
ᐱᐅᔪᒻᒪᕆᐊᓘᕗᖅ ᐱᓇᓱᐊᕐᑕᐅᒋᐊᕐᓂᖓ. ᐃᑲᔪᕐᑎᒌᒍᑎᖃᕐᓂᓴᐅᓂᕗᑦ ᐃᓗᓯᓕᕆᓂᕐᒥ ᐱᓇᓱᐊᕐᑐᓂᒃ ᐱᐅᓂᖓ ᒪᓕᓪᓗᒍ, ᑌᒫᓪᓗᐊᑕᒐ ᐃᓕᓐᓂᐊᑎᕗᓐᓂᒃ ᖃᐅᔨᕙᓪᓚᒍᑎᒋᓂᐊᕐᑕᕗᑦ ᐱᐅᓂᕐᓴᐅᓂᐊᕐᐳᑦ.
ᕕᑭᐅᑉ ᐅᖃᕐᑕᖓ ᒪᓕᑦᓱᒍ, ᑕᐅᑐᓐᓂ ᒪᓐᓇ ᑐᓵᓂᕐᓗ ᐊᕐᖁᑎᐅᕘᒃ ᐃᓕᑦᓯᓂᕐᒧ. ᑕᒪᑦᓱᒪ ᐱᓇᓱᐊᕐᑕᐅᓂᖓ ᐱᕕᑦᓴᓕᐅᕆᒐᔭᕐᑐᖅ ᐃᓕᓐᓂᐊᑎᓂᒃ ᐃᑲᔪᕐᓯᒣᓐᓇᒍᓐᓇᓯᑎᑦᓯᓗᓂ ᐊᒻᒪᓗ ᐱᔪᓐᓇᐅᑎᓕᒻᒧᑦ ᐃᓘᓐᓇᖏᓐᓂᒃ ᖃᐅᔨᓴᕈᑎᖏᓐᓄᐊᖓᔪᓂᒃ ᐊᑐᕐᓗᑎᒃ ᑭᓇᒃᑯᑦ ᑲᒪᒋᔭᐅᖁᔭᐅᒋᐊᖃᕐᖂᒪᖔᑕ ᖃᐅᔨᓚᕿᒍᑎᐅᓗᓂ.
ᕕᑭ ᐊᒻᒪᓗ ᑯᕆᔅᑕᕗ ᑕᒪᒋᒃ ᐅᖃᕆᐊᓕᕐᕿᑐᕕᓃᒃ ᐊᒥᓱᕕᑦᓱᑎᒃ ᑖᒃᑯᓂᖓ ᐱᓇᓱᒍᑎᓂᒃ ᐱᑕᖃᕆᐊᖃᓪᓚᕆᓐᓂᕃᑦᓱᑎᒃ ᓄᓇᓕᒻᒥ ᖃᐅᔨᓴᕈᓐᓇᓂᕐᒧᑦ, ᑭᓯᐊᓂ ᐅᖃᐅᓯᖃᑦᓯᐊᓕᕐᕿᓱᑎᓗ ᐃᒫᒃ ᑖᒃᑯᐊ ᓱᓇᒥᑦᓯᔪᓂᒃ ᐊᒻᒪᓗ ᐋᓐᓂᐊᓯᐅᕈᒍᑎᓄᐊᖓᓪᓗᑐᕐᑐᓂᒃ ᐱᑕᖃᕐᑎᓯᒍᑎᐅᑦᔭᖏᒻᒪᑕ.
ᐋᕐᕿᓱᐃᒍᓐᓇᕋᔭᕐᑐᒍᑦ ᓀᑦᑐᒥ ᐊᐅᓚᔫᒥᒃ ᑖᒃᑯᐊ ᖃᓄᖅ ᑕᐅᑐᓐᓂᖓᓂᒃ ᖃᐅᔨᓴᕈᑎ Visual Acuity Chart ᐊᒻᒪᓗ ᑐᓵᓂᖓᓂᒃ ᖃᐅᔨᓴᕈᑎᒃ ᐊᑐᕐᑕᐅᓲᖑᒻᒪᖔᓂᒃ ᑕᕐᕋᓕᔮᓕᐊᒥᒃ. ᐃᓕᒃᑯᑦ ᐃᓕᓐᓂᐊᑎᑕᐅᒍᑎᖃᕆᐊᓕᓐᓂᒃ ᐃᓕᓐᓂᐊᑎᑦᓯᔩᑦ ᑕᒡᒎᓇ ᐃᓕᑦᓯᒍᓐᓇᕋᔭᕐᑐᑦ ᖃᐅᔨᓴᖃᑦᑕᓕᕋᔭᕐᓗᑎᓗ ᑕᐅᑐᓐᓂᖓᓂᒃ ᑐᓵᓂᖓᓂᓪᓗ ᐊᑐᓂ ᐃᓕᓐᓂᐊᑎᓂᒃ ᐃᓘᓐᓇᖏᓐᓂᒃ.
ᐱᓇᓱᑦᑕᐅᒍᓯᖏᑦ ᐋᕐᕿᑕᐅᓯᒪᓪᓗᑯᒍᓯᓖᑦ ᒪᓕᒋᐊᓕᑎᓐᓂᒃ ᑖᒃᑯᐊ ᖃᐅᔨᓴᕈᑏᑦ ᐱᓇᓱᐊᕐᑕᐅᓂᖏᑦ ᐊᑐᑦᓯᐊᑕᐅᖁᓪᓗᒋᑦ. ᑌᑦᓱᒪ ᑐᓵᓂᖓᓂᒃ ᖃᐅᔨᓴᕈᑎᐅᑉ ᓂᐱᖃᐅᑎᖏᑦᑕ ᐊᕐᕌᒍᑕᒫᖅ ᓇᐅᑦᓯᑐᕐᑕᐅᒋᐊᖃᓲᖑᓂᖏᑦᑕ ᐊᓯᐊᒍᑦ, ᐱᓇᓱᒍᑎᖏᑦ ᑖᒃᑯᐊ ᐊᑐᕆᐊᖏᑦ ᓇᓗᓇᕐᑐᑕᖃᖕᖏᒪᕆᑦᑐᑦ.
ᑐᑭᓯᒋᐊᓪᓚᒍᒪᒐᔭᕐᐲᑦ ᑖᑦᓱᒥᖓ ᐱᓇᓱᐊᕐᑕᒥᒃ?
ᑖᓐᓈ ᐱᓇᓱᐊᕐᑕᖅ ᐃᓕᓐᓂᐊᕕᑦᓯᓅᕈᒪᕕᐅᒃ? ᖃᕆᑕᐅᔭᒃᑯᑦ ᐊᒡᓚᕕᒋᑎᒍᑦ! ✉