ᐃᓕᓐᓂᐊᑎᑕᐅᓂᖏᑦ ᑎᒍᒥᐊᕐᑕᐅᕕᒻᒥ ᐊᒻᒪᓗ ᒪᒥᓭᕕᓐᓂ

ᐃᓕᓐᓂᐊᑎᑕᐅᓂᖏᑦ ᑎᒍᒥᐊᕐᑕᐅᕕᒻᒥ ᐊᒻᒪᓗ ᒪᒥᓭᕕᓐᓂ

ᐱᒻᒪᕆᐊᓗᒻᒥᒃ ᐱᕙᓪᓕᐊᓂᖃᕐᓯᒪᕗᖅ ᐱᓇᓱᐊᖃᑎᒌᑦᓱᑎᒃ ᓄᓇᓕᓕᒫᓂ ᑎᒥᐅᔪᐃᑦ ᑲᔪᓯᑎᑕᐅᑦᓯᐊᖁᓪᓗᒋᑦ ᐃᓕᓐᓂᐊᑎᑕᐅᓃᑦ ᐱᐊᕋᕐᓄᑦ ᐅᑭᐅᓕᓐᓄᑦ 18 ᐊᑖᓄᓪᓗ ᐅᕕᒃᑲᓂᒃ ᓴᐳᑦᔨᕕᓐᓄᑦ ᐱᒍᑦᔭᐅᕕᒻᒦᑐᓄᑦ, ᑎᒍᒥᐊᕐᑕᐅᕕᒻᒦᑐᓄᑦ ᐅᕝᕙᓘᓐᓃᑦ ᒪᒥᓭᕕᓐᓃᑐᓄᑦ.

ᑐᓄ ᓇᐹᕐᑐᒃ ᑐᑭᒧᐊᕐᑎᓯᔨ ᐱᒍᑦᔨᒋᐊᓪᓛᕕᒻᒥ ᓴᑐᕐᓇᑐᓂᓪᓗ ᐃᓕᓐᓂᐊᕕᖃᕐᓂᒥᒃ
ᐃᓕᓐᓂᐊᑎᑕᐅᓂᖏᑦ ᑎᒍᒥᐊᕐᑕᐅᕕᒻᒥ ᐊᒻᒪᓗ ᒪᒥᓭᕕᓐᓂ

ᐱᐊᕃᑦ ᑲᒪᒋᔭᐅᔪᑦ ᐅᕕᒃᑫᑦ ᓴᐳᑦᔨᕕᖏᑦᑕ ᐱᒍᑦᔨᕕᖏᓐᓄᑦ

ᓄᓇᕕᒻᒥ, ᐊᒥᓱᐊᓗᐃᑦ ᐱᐊᕃᑦ ᑲᒪᒋᔭᐅᕗᑦ ᐅᕕᒃᑫᑦ ᓴᐳᑦᔨᕕᖏᑦᑕ ᐊᑖᒍᑦ, ᑕᒪᒋᓐᓂᒃ ᓄᓇᕕᒻᒥ ᓯᓚᑖᓂᓪᓗ.

ᑖᓐᓇ ᐃᓅᓯᐅᔪᖅ ᓱᕐᕃᓲᖅ ᐃᓕᓐᓂᐊᓂᕆᓲᖏᓐᓂᒃ ᐊᓂᒎᑎᓂᕆᒐᔭᕐᑕᖏᓐᓂᓗ

ᑌᒣᒻᒪᑦ, ᑲᑎᕕᒃ ᐃᓕᓴᕐᓂᓕᕆᓂᒃᑯᑦ ᐱᓇᓱᐊᖃᑎᙯᓐᓇᓕᒫᓲᖅ ᓄᓇᕕᒻᒥ ᑎᒥᐅᔫᔪᓂᒃ ᐊᒻᒪᓗ ᑯᐯᒃᑯᑦ ᑲᓇᑕᐅᓪᓗ ᑲᕙᒪᖏᓐᓂᒃ ᖃᓄᐃᓘᒋᐊᕈᑎᑦᓴᓂᒃ ᐅᓇᑕᒃᑳᕋᓱᐊᕐᓱᑎᒃ ᑐᑭᑖᕋᓱᐊᕈᑎᓂᓪᓗ ᐃᓕᓐᓂᐊᑏᑦ ᑲᔪᓯᑦᓯᐊᖁᓪᓗᒋᑦ.

2010-ᖑᑎᓪᓗᒍ, ᐃᓄᐃᑦ ᐱᔪᓐᓇᐅᑎᒋᕆᐊᓕᖏᓐᓄᑦ ᐅᕕᒃᑫᓗ ᐱᑦᔪᔨᕕᖓᑦ (the Commission des droits de la personne et des droits de la Jeunesse), ᑐᓴᐅᒪᑎᑦᓯᒍᑎᓕᐅᕐᓯᒪᕗᖅ 30% ᐱᐊᕃᑦ ᓄᓇᕕᒻᒥᐅᑉ ᐅᕕᒃᑫᑦ ᓴᐳᒻᒥᕕᖏᑦᑕ (DYP) ᐊᑖᓄᑦ ᑲᒪᒋᔭᐅᓯᒪᕗᑦ.

ᐅᖄᔪᕕᓂᐅᑦᓱᑎᒃ ᐃᓄᓕᒫᕐᓯᓂᖃᕐᑎᓗᒋᑦ ᐱᑦᔪᑎᒋᑦᓱᒋᑦ ᐱᒍᑦᔨᕖᑦ ᓄᓇᖃᕐᖄᓯᒪᔪᓅᓕᖓᔪᓂᒃ ᐊᒻᒪᓗ ᐃᓓᓐᓇᖏᓐᓂᒃ ᐃᓄᓐᓂᒃ ᐱᒍᑦᔨᕕᐅᔪᓄᑦ (Viens Commission) 2018-ᖑᑎᓪᓗᒍ, ᒪᕐᕉᒃ ᑐᑭᒧᐊᕐᑎᓯᔩᒃ ᓄᓇᕕᒻᒥ ᐅᕕᒃᑫᑦ ᓴᐳᒻᒥᕕᖏᓐᓂᒃ ᓇᓗᓀᕐᓯᓯᒪᕗᑦ ᐱᐊᕃᑦ ᐱᖓᓱᐃᑦ ᐃᓗᐊᓂ ᐊᑕᐅᓯᖅ ᑲᒪᒋᔭᐅᑎᑕᐅᓯᒪᓲᖅ ᐱᐊᕃᑦ ᓴᐳᒻᒥᕕᖏᓐᓄᑦ ᐃᓅᓯᖓᑕ ᐃᓗᐊᓂ.

ᐆᒃᑑᐱᕆ 2020-ᐅᑎᓪᓗᒍ, ᑲᑎᕕᒃ ᐃᓕᓴᕐᓂᓕᕆᓂᒃᑯᑦ ᐊᑎᓕᐅᕐᕕᖃᕐᓯᒪᕗᑦ ᑐᓴᐅᒪᑎᑦᓯᒍᑎᒥᒃ ᑐᑭᓯᒪᓂᕐᒧᑦ (MOU) ᓄᓇᕕᒻᒥ ᐃᓗᓯᓕᕆᓂᕐᒧᑦ ᑲᑎᒪᔨᖏᓪᓗ, ᐅᖓᕙᒥ ᑐᓚᑦᑕᕕᒃᑯᓂᒃ ᐊᒻᒪᓗ ᐃᓅᓕᑦᓯᕕᒃᑯᓗ.

ᑐᓴᐅᒪᑎᑦᓯᒍᑎᒥᒃ ᑐᑭᓯᒪᓂᕐᒧᑦ (MOU) ᐱᒍᑦᔨᕗᖅ ᐱᐅᔪᕐᔪᐊᒥᒃ ᐊᓪᓗᕆᐊᕈᑎᖃᕐᓂᒥᒃ.

ᓄᐃᑕᐅᓯᒪᕗᖅ ᑐᕌᒐᖃᖃᑎᒌᓐᓂᖃᕐᓱᑎᒃ ᐱᐊᕃᑦ ᓴᐳᒻᒥᔭᐅᑦᓯᐊᕕᖃᖁᓪᓗᒋᑦ ᐳᕐᑐᔪᒥᒃ ᐱᒍᑦᔭᐅᒋᐊᓪᓛᓕᐅᒥᖁᓪᓗᒋᑦ ᐊᒻᒪᓗ ᓈᒻᒪᓈᕐᑐᒥᒃ ᐱᒍᑦᔭᐅᓯᐊᖁᓪᓗᒋᑦ ᑲᑎᕕᒃ ᐃᓕᓴᕐᓂᓕᕆᓂᒃᑯᑦ, ᐃᓅᓕᑦᓯᕕᒃᑯᑦ ᐊᒻᒪᓗ ᑐᓚᑦᑕᕕᒃᑯᑦ ᒪᓂᒪᔭᖏᑎᒍᑦ ᐱᐊᕋᕐᓄᑦ ᑲᒪᒋᔭᐅᓲᓄᑦ ᐅᕕᒃᑫᑦ ᐱᒍᑦᔨᕕᖏᓐᓄᑦ ᓄᓇᕕᒻᒥ. ᑐᓴᐅᒪᑎᑦᓯᒍᑎᒥᒃ ᑐᑭᓯᒪᓂᕐᒧᑦ (MOU) ᓇᑖᒍᑦᔨᖃᑦᑕᓂᐊᕐᑐᖅ ᑐᑭᒧᐊᑦᓯᐊᑐᒥᒃ ᑐᓴᐅᒪᖃᑎᒌᑦᓯᐊᓂᖃᖃᑦᑕᖁᓪᓗᒋᑦ ᐱᓇᓱᐊᖃᑎᒌᑦᑐᐃᑦ ᐱᐊᕋᖅ ᓴᐳᒻᒥᔭᐅᑦᐊᖁᓪᓗᒍ ᐊᒻᒪᓗ ᐃᓚᒌᑦ ᑭᖕᖒᒪᑦᓯᓕᕐᐸᑕ.

ᑲᑎᕕᒃ ᐃᓕᓴᕐᓂᓕᕆᓂᒃᑯᑦ ᐊᐅᓚᑦᓯᒍᓐᓇᕕᖃᕐᖁᑦ ᐃᓕᓐᓂᐊᑎᑕᐅᓂᐅᔪᓂᒃ ᑯᐯᒃ ᑕᕐᕋᖓᑕ 55 ᐃᑰᑕᖓᑕ ᐅᖓᑖᓃᑦᑐᓂᒃ. ᑲᒪᒋᔭᖃᕆᐊᓪᓚᕕᖃᖕᖏᑐᒍᑦ ᓄᓇᕕᐅᑉ ᓯᓚᑖᓃᑦᑐᓂᒃ.

ᑌᒣᒻᒪᑦ, ᑎᒥᐅᔪᐃᑦ ᓯᓚᑖᓃᑦᑐᑦ ᐱᐊᕋᕐᒥᒃ ᓄᓇᕕᐅᑉ ᓯᓚᑖᓅᕆᔪᑦ ᑲᒪᒋᔭᖃᕆᐊᖃᕐᖁᑦ ᐱᐊᕋᕐᓂᒃ ᐃᓕᒐᓱᐊᕐᑎᓯᓂᒃᑯᑦ ᐃᓕᓐᓂᐊᑎᓂᒃ ᖃᓪᓗᓈᑦ ᓄᓇᖏᓐᓂ ᐃᓕᓐᓂᐊᕕᐅᔪᓄᑦ. ᑕᒪᒃᑯᐊ ᐃᓕᓐᓂᐊᑏᑦ ᐃᓕᓐᓂᐊᑕᒥᓂᒃ ᑲᔪᓯᕆᐊᖃᕋᔭᕐᑐᑦ ᐅᖃᐅᓯᐅᑉ ᐁᑉᐱᐅᑎᖓᓂᒃ ᐃᓕᓐᓂᐊᕕᕆᓲᖏᑦᑕ ᓇᓛᒎᕐᑐᖏᓐᓂᒃ.

ᐃᓕᓐᓂᐊᓕᕈᑎᒃ ᓄᓇᕕᐅᑉ ᓯᓚᑖᓂ, ᑖᒃᑯᐊ ᐃᓕᓐᓂᐊᑏᑦ ᐱᕕᑦᓴᖃᕐᑎᑕᐅᒐᔭᕐᑐᑦ ᑲᑎᕕᒃ ᐃᓕᓴᕐᓂᓕᕆᓂᒃᑯᑦ ᐃᑲᔪᕐᑕᐅᕕᖏᓐᓂᒃ, ᐊᑐᐃᓐᓇᐅᑎᑕᐅᑦᓯᐊᓱᑎᓪᓗ ᑕᒪᒃᑯᐊ ᐃᓄᑐᐃᓐᓇᓄᑦ ᐃᓚᐅᔫᔪᓄᑦ ᓄᓇᕕᐅᑉ ᓯᓚᑖᓃᑦᑐᓄᑦ.

ᐃᓕᓐᓂᐊᑏᑦ ᒪᒥᓭᕕᓐᓃᑐᑦ ᓄᓇᕕᒻᒥ

ᐊᒥᓱᐃᑦ ᐊᓪᓗᒋᐊᕈᑎᐅᓲᖑᕗᑦ ᐃᓕᓐᓂᐊᑎᑕᐅᓂᖃᑦᓯᐊᖁᓪᓗᒋᑦ ᐅᕕᒃᑫᑦ ᐃᓄᒻᒪᕇᓪᓗ ᐃᓕᓐᓂᐊᕕᒻᒦᒍᓐᓇᖏᓐᓂᒥᓂᒃ.

ᑐᕌᒐᖃᕋᓱᐊᕐᖁᒍᑦ ᐃᑲᔪᕐᓯᒐᓱᐊᕐᓂᑯᑦ ᐊᕗᖓᓕᒫᕐᑐᒥᒃ ᒪᒥᓴᑦᓯᐊᖁᓪᓗᒋᑦ ᐃᓄᐃᑦ ᐊᕐᓱᕉᓴᕐᑐᐃᑦ ᐅᐃᕆᓯᒪᐅᑎᓄᑦ ᐱᓇᓱᑦᑎᑖᖃᑦᑕᓂᒃᑯᑦ ᐃᓕᓐᓂᐊᑎᑦᓯᔨᓂᒃ ᐱᓇᓱᕝᕕᖃᓲᓂᒃ ᒪᑯᓂᖓ:

  • ᖁᓪᓕᖅ ᒪᒥᓭᕕᖓᓂ ᐃᓄᑦᔪᐊᒥ
  • ᓴᐳᒻᒥᕕᒃ ᒪᒥᓭᕕᖓᓂ ᓴᓪᓗᓂ.

ᑲᑎᕕᒃ ᐃᓕᓴᕐᓂᓕᕆᓂᒃᑯᑦ ᑲᔪᓯᔪᒥᒃ ᐱᓇᓱᐊᖃᑎᙯᓐᓇᕋᓱᐊᓲᑦ ᐱᓇᓱᐊᖃᑎᒥᓂᒃ ᑲᔪᓯᑎᑕᐅᖁᓪᓗᒋᑦ ᓱᒋᐊᕈᑏᑦ ᐅᕕᒃᑫᑦ ᐃᓄᒻᒪᕇᓪᓗ ᐃᓕᓐᓂᐊᕈᓐᓇᕕᖃᕐᑎᑕᐅᖁᓪᓗᒋᑦ ᒪᒥᓭᕕᓐᓃᑐᑦ ᓄᓇᕕᒻᒥ.

ᐃᓄᒻᒪᕇᑦ ᑎᒍᒥᐊᕐᑕᐅᕕᓐᓃᑐᑦ ᓄᓇᕕᐅᑉ ᓯᓚᑖᓂ

ᐊᕐᕌᒍᓂ ᐊᒥᓲᓕᕐᑐᓂ, ᐃᓕᓐᓂᐊᓂᕐᒧᑦ ᐱᒍᑦᔨᕕᑦᓭᑦ ᒪᓂᒪᔭᐅᒐᔭᕐᑐᑦ ᕿᒥᕐᕈᔭᐅᓂᖃᖃᑦᑕᓯᒪᕗᑦ ᐱᓇᓱᐊᖃᑎᒋᑦᓱᒋᑦ ᐃᓄᓕᒫᑦ ᖃᓄᐃᖕᖏᓯᐊᕐᓂᖏᓐᓄᑦ ᒥᓂᔅᑕᖃᕐᕕᖓᓐᓂᒃ ᑯᐯᒃᒥ ᐊᒻᒪᓗ ᑎᒍᔭᐅᒪᕕᓐᓂ ᑲᓇᑕᒥ, ᑎᒍᔭᐅᒪᕖᑦ ᓄᓇᕕᒻᒥᐅᓄᑦ ᓇᔪᕐᑕᐅᓲᓂᒃ.

ᐃᓕᓐᓂᐊᑎᑕᐅᓃᑦ ᐱᒍᑦᔨᕕᖏᑦ ᐊᓯᑦᔨᑕᕐᑐᑦ ᖃᖓᑐᐃᓐᓇᖅ. ᐊᕐᕌᒍᓂ ᐊᒥᓱᓂᒃ ᑎᒍᔭᐅᒪᕕᒻᒦᑐᐃᑦ ᒪᑯᓂᖓ ᐱᕕᑦᓴᖃᕐᑎᑕᐅᓲᑦ:

  • ᐃᓘᓐᓈᒍᑦ ᐃᓕᓐᓂᐊᑎᑕᐅᓂᖅ
  • ᕿᑐᕐᖓᖃᕐᓂᒥᓄᑦ ᐱᒋᐅᕐᓴᑎᑕᐅᓃᑦ
  • ᐃᓗᕐᖁᓯᕐᒨᓕᖓᔪᓂᒃ ᐱᒋᐅᕐᓴᑎᑕᐅᓃᑦ (ᐱᒋᐊᕐᓱᒍ 2021-2022)
  • ᐱᓇᓱᒐᕐᓂᒃ ᐱᒋᐅᕐᓴᑎᑕᐅᓃᑦ (ᐱᒋᐊᕐᓱᒍ 2021-2022)
  • ᐊᑯᓂᐅᖕᖏᑐᖅ ᐱᒋᐅᕐᓴᑎᑕᐅᓃᑦ ᒪᓂᒪᔭᐅᔪᑦ ᐃᓄᒻᒪᕇᑦ ᐃᓕᓐᓂᐊᑎᑕᐅᓂᖏᑦ ᐱᓇᓱᒐᕐᓂᓗ ᐱᒋᐅᕐᓴᑎᑕᐅᕕᖏᓐᓄᑦ ᑲᔪᓯᖁᓪᓗᒋᑦ ᐃᓕᓐᓂᐊᑎᑕᐅᓃᑦ

ᐊᒥᓱᐃᑦ ᓄᓇᕕᒻᒥᐅᑦ ᑎᒍᔭᐅᒪᕕᒻᒦᑐᑦ ᓭᓐᑦ-ᔨᕉᒻᒥ, ᐁᒪᔅᒥ ᐊᒻᒪᓗ ᓚᕚᓪᒥ. ᐃᓄᒻᒪᕇᑦ ᐃᓕᓐᓂᐊᑎᑕᐅᕕᖏᑦ ᐱᓇᓱᒐᕐᓂᓗ ᐱᒋᐅᕐᓴᑎᑦᓯᕕᖏᑦᑕ ᐊᑖᒍᑦ, ᑲᑎᕕᒃ ᐃᓕᓴᕐᓂᓕᕆᓂᒃᑯᑦ ᐱᓇᓱᐊᖃᑎᖃᓲᑐᖃᐅᕗᖅ ᑎᒍᔭᐅᒪᕕᓐᓂ ᓭᓐᑦ-ᔨᕉᒻᒥ, ᐊᒻᒪᓗ ᒫᓐᓇᖃᒻᒥᖅ ᐁᒪᔅᑯᓗ.