ᓄᓇᕕᒻᒥ, ᐊᕙᑎᒥᒃ ᑲᒪᑦᓯᐊᕐᓂᖅ ᐊᕕᑦᑐᕐᓯᒪᒍᓐᓇᖏᑦᑐᖅ ᓄᓇᒥᑦ ᐅᕝᕙᓘᓐᓃᑦ ᐱᓪᓚᕆᐅᕙᑦᑐᓂᒃ ᖃᐅᑕᒫᕐᓯᐅᑎᓂᒃ ᐃᓅᓯᕐᒨᖓᔪᓂᒃ ᐅᑭᐅᕐᑕᑐᒥ ᓄᓇᓕᓐᓂᑦ. ᑲᑎᕕᒃ ᐃᓕᓴᕐᓂᓕᕐᒥ, ᐱᒻᒪᕆᐅᖃᑕᐅᔪᖅ ᑲᒪᒋᔭᒃᓴᖅ ᑕᑯᓐᓇᑕᐅᒐᓂ ᖃᓄᖅ ᓂᐅᕕᕐᑕᐅᕙᖕᒪᖔᑕ, ᐊᑐᕐᑕᐅᕙᒻᒪᖔᑕ, ᓴᓂᕐᕙᑕᐅᓲᖑᒻᒪᖔᑕ, ᓴᓇᔭᐅᕙᖕᒪᖔᑕ ᐊᒻᒪᓗ ᓄᓇᓕᒻᒦᑐᑦ ᐊᐅᓪᓚᐅᔭᐅᓂᖏᑦ ᓄᓇᓕᓐᓂᑦ. ᒫᓯᐅ ᓯᒥᑦᒧᑦ, ᐱᓇᓱᐊᕐᑕᖓ ᐊᓯᑦᔨᓯᒪᔪᖅ ᓴᓗᒻᒪᓭᓂᕐᒥᒃ ᐊᖏᓂᕐᓴᒥᒃ ᐱᓇᓱᐊᕐᓂᒥᒃ ᐊᐅᓚᑦᓯᓂᕐᒥᒃ. ᑲᒪᑦᑎᐊᓂᖅ ᑐᑭᖃᕐᐳᖅ ᒥᑭᓪᓕᒋᐊᕐᑎᑦᓯᓂᕐᒥᒃ ᐊᑦᑕᓇᕐᑐᒥᒃ ᐊᖏᓕᓚᐅᖕᖏᓂᖓᓂ ᐊᒻᒪᓗ ᖃᐅᔨᒪᑦᓯᐊᕐᓂᕐᒥᒃ ᐊᑦᑕᕐᓇᕐᑐᑦ ᓱᓇᒐᓓᑦ ᐱᐅᖕᖏᑑᖏᓐᓇᖏᒃᑲᓗᐊᕐᒪᖔᑕ ᐊᕙᑎᒧᑦ ᐅᕝᕙᓘᓐᓃᑦ ᐃᓄᖕᓄᑦ ᖃᓂᑦᑐᒥᓪᓘᓃᑦ ᓄᓇᓕᓐᓄᑦ ᐱᓇᓱᖃᑦᑕᑐᓄᓪᓗ ᖃᓂᑦᑐᒥᒃ.
ᖃᓄᖅ ᐊᐅᓚᑦᓯᓂᖅ ᐊᑦᑕᓇᕐᑐᓂᒃ ᐃᓕᖓᔪᓂᒃ ᐱᕙᓪᓕᐊᓯᒪᓂᖓ ᐱᓇᓱᐊᕐᑕᐅᒋᐊᖃᓕᕐᓱᓂ ᐱᒋᐅᕐᓴᓂᕐᒧᑦ
ᐊᕐᕌᒍᓂ ᐊᒥᓱᓂ, ᑲᑎᕕᒃ ᐃᓕᓴᕐᓂᓕᕆᓂᖅ ᐊᐅᓚᑦᓯᓯᒪᔪᖅ ᓄᓇᕕᓕᒫᒥ ᑲᔪᓯᑦᓯᐊᑐᒥᒃ ᐊᐅᓚᑦᓯᓂᖃᑦᓯᐊᕋᓂ ᐊᐅᓚᑦᓯᒍᑎᑦᓴᓂᒃ ᐊᑦᑕᓇᕐᑐᓂᒃ ᐊᑐᕐᖃᔦᕐᑐᓂᓘᓐᓃᑦ ᐱᖁᑎᓂᒃ ᓄᓇᓕᓐᓂᒃ ᐱᔪᓂᒃ. ᑌᒣᓐᓂᖓᓄᑦ, ᐱᒋᐅᕐᓴᒍᓰᑦ ᐊᑦᔨᒌᖕᖕᖏᑐᐃᑦ ᓄᓇᓕᓐᓂᑦ, ᓄᑕᐅᖕᖏᕐᓭᓗ ᓄᐊᑉᐸᓕᐊᔪᕕᓂᐅᑦᓱᑎᒃ ᓇᓂᑐᐃᓐᓇᖅ ᓄᓇᓕᓐᓂᑦ. ᐅᕐᓱᐊᓗᐃᑦ ᑯᕕᖃᑦᑕᓂᖏᑦ ᐊᒻᒪᓗ ᐅᓗᕆᓇᕐᑐᑕᓕᓐᓂᒃ ᐃᓕᓐᓂᐊᕐᕕᓐᓂ ᓄᐃᑦᓯᓚᐅᕐᑐᑦ ᑭᖕᖒᒪᓇᕐᓂᖓᓂᒃ ᐋᕐᕿᓱᑦᓯᒪᑦᑎᐊᓂᕐᓴᐅᔭᒋᐊᖃᕐᓂᖏᓐᓂᒃ ᐊᒻᒪᓗ ᐃᑯᓪᓚᑎᑦᓯᕋᓱᐊᒋᐊᖃᕐᓂᖏᓐᓂᒃ.
ᒫᓯᐅ ᐱᓇᓱᒋᐊᖕᖓᓱᓂ ᑖᑦᓱᒥᖓ ᐱᓇᓱᒐᕐᒥᒃ, ᐱᔭᕆᐊᑐᔫᓂᕐᐸᐅᓚᐅᕐᑐᒎᖅ ᖃᐅᔨᒐᓱᐊᕐᓂ ᖃᓄᖅ ᓱᓀᑦ ᐱᑕᖃᒌᕐᒪᖔᑕ. ᐃᓚᖏᑦ ᓱᒃᑯᓇᕐᑐᐃᑦ ᐊᑦᑐᑕᐅᓚᐅᕐᓯᒪᖕᖏᑐᑦ ᐊᕐᕌᒍᓂ 20-ᓂ ᐅᕝᕙᓘᓐᓃᑦ 30-ᓂ, ᐊᓪᓚᓯᒪᖕᖏᑐᓪᓘᓃᑦ ᓇᓗᓀᒃᑯᑕᖏᑦ, ᐊᒻᒪᓗ ᑕᑯᔭᐅᓯᒪᔪᑦ ᓴᓗᒻᒪᓭᔩᑦ ᐃᓪᓗᐊᕈᓯᖏᓐᓂ, ᐃᓪᓗᐃᑦ ᓴᓂᖓᓂ, ᐅᕝᕙᓘᓐᓃᑦ ᐃᓪᓗᑐᙯᑦ ᓄᖃᐅᖕᖏᑐᑦ ᐊᑖᓂ. ᑌᒣᑦᑐᑎᒍᑦ, ᐊᕙᑎᒥᒃ ᑲᒪᑦᓯᐊᒋᐊᕐᓂᖅ ᐅᖓᓯᑦᑑᓚᐅᖕᖏᑐᖅ ᐃᓱᒪᒋᔭᐅᓂᖓ. ᐱᒋᐊᕐᓯᒪᔪᖅ ᓇᓗᓀᕐᓯᓂᕐᒥᒃ ᐃᓕᒪᓇᕐᑐᓂᒃ ᐊᑦᑕᓇᕐᑐᓂᒃ, ᐱᐅᓯᒋᐊᕐᓯᒪᓂᕐᒥᒃ ᓴᓂᕐᕓᓯᒪᒍᓯᓂᒃ, ᐊᒻᒪᓗ ᐱᓇᓱᕝᕕᓂᒃ ᐊᑦᑕᓇᖕᖏᓂᕐᓴᒦᑦᑎᓯᓂᕐᒥᒃ.
ᐅᕙᓐᓄᑦ ᐱᒻᒪᕆᐅᓂᕐᐹᖑᔪᖅ, ᓱᓇᒐᓚᓕᒫᑦ ᓂᐅᕕᐊᕆᕙᑦᑕᕗᓐᓄᑦ ᐊᑐᕐᐸᑦᑕᑦᑎᓄᓪᓗ ᓄᐃᖃᑦᑕᒪᑕ. ᐃᕐᖃᐅᒪᒋᐊᖃᕐᑐᒍᑦ ᐃᓘᓐᓈᒍᑦ ᐱᑐᑦᓯᒪᓂᖃᕐᓂᖓᓂᒃ. ᑌᒫᑐᐃᓐᓈᖏᒻᒪᑦ. ‘ᓂᐅᕕᓚᐅᕐᑕᕗᑦ, ᐊᑐᕐᓱᒍᓗ, ᐱᕐᖃᔦᑐᖅ.
ᑲᑐᑦᔨᖃᑎᒌᖑᔪᓕᒫᓂ, ᐃᓄᐃᑦ ᑕᑯᑦᓴᐅᑎᒋᓚᐅᕐᑐᑦ ᐱᒻᒪᕆᐅᓂᖓᓂ ᑖᑦᓱᒪ ᐱᓇᓱᒐᐅᑉ. ᒫᓯᐅ ᐅᖃᓯᒪᔪᖅ ᓄᓇᓕᓐᓂ ᐱᓇᓱᖃᑎᒌᑦ ᐊᑦᑕᓇᕐᑐᐃᑦ ᓱᒃᑯᓇᕐᑐᑕᓕᓐᓂᒃ ᓄᖑᑎᕆᓯᒪᓂᖏᓐᓂᒃ ᓄᓇᓕᒻᒥᓂᒃ ᕿᒣᓐᓇᑕᐅᑐᐃᓐᓇᖏᒻᒪᑕ ᓄᓇᕕᓕᒫᑉ ᓴᐅᓂᖃᐅᑎᐊᓗᖏᓐᓂ ᐅᕝᕙᓘᓐᓃᑦ ᐱᓇᓱᕝᕕᐅᔪᓂ. ᓴᓗᒻᒪᓭᓂᐅᑉ ᐅᖓᑖᒍᑦ, ᑖᓐᓇ ᐊᓯᑦᔨᓂᖅ ᐃᑲᔪᕐᓯᓯᒪᒻᒥᔪᖅ ᓄᐃᑦᓯᓂᕐᒥᒃ ᓴᓗᒪᓂᕐᓴᓂᒃ, ᐊᑦᑕᓇᖕᖏᑐᓂᒃ ᐊᕙᑎᖃᕐᑎᓗᒋᑦ ᐱᓇᓱᑦᑎᓄᑦ ᐱᓇᓱᐊᓲᓄᑦ ᑌᒣᑦᑐᓂᒃ ᐅᓪᓗᑕᒫᑦ.
ᐊᑑᑎᔭᐅᓂᖓ ᐃᑯᓪᓚᑎᑦᒐᓱᐊᕐᓂᐅᑉ ᐊᕙᑎᑦᑎᓂ ᐊᑦᑕᓇᕐᓯᒍᓐᓇᑐᓂᒃ
ᐊᕐᕌᒍᓂ ᓯᑕᒪᓂᒃ, ᑲᑎᕕᒃ ᐃᓕᓴᕐᓂᓕᕆᓂᖅ ᐊᐅᓚᑦᔭᕆᐊᕐᓯᒪᔪᖅ ᑲᒪᒋᔭᖃᕐᓂᒥᒃ ᐃᑯᓪᓚᑎᑦᓯᒋᐊᕐᓂᒥᒃ ᐊᑐᕐᓱᑎᒃ. ᓄᓇᕕᒻᒥ, ᓄᓇᓖᑦ ᐅᖓᓯᑦᑐᒦᑎᓪᓗᒋᑦ ᐊᒻᒪᓗ ᐃᓕᓐᓂᐊᓂᓕᕆᓂᐅᑉ ᐊᐅᓚᓂᖏᑦ ᓴᖅᑮᕙᑦᑐᑎᒃ ᐊᒥᓱᓂᒃ ᐊᔾᔨᒌᖏᑦᑐᓂᒃ ᐊᑦᑕᑯᓂᒃ, ᑕᒪᓐᓇ ᐊᓯᔾᔨᕐᓂᐅᔪᖅ ᐱᒻᒪᕆᐅᕗᖅ. ᒫᓯᐅᑉ ᐅᖃᕐᓂᖓᒍᑦ, ᐱᐅᓯᐅᒥᓪᓚᕆᓂᕐᐹᖅ ᐃᑉᐱᒋᔭᖃᕐᓂᓴᐅᓂᖓ ᒥᑭᓪᓕᑎᕆᓂᕐᒥᒃ ᐱᓀᓗᑕᐅᓲᓂᒃ ᓄᐃᓚᐅᕐᑎᓇᒋᑦ. ᑌᒣᓐᓂᒥᓄᑦ ᐃᓚᖃᕐᒥᔪᖅ ᓂᐅᕕᒋᐊᖃᕐᓂᒥᒃ ᐱᐅᓂᕐᓴᓂᒃ ᐊᐅᓚᐅᑎᓂᒃ ᐅᑭᐅᕐᑕᑑᑉ ᓂᓪᓕᓇᕐᓂᖓᓄᑦ, ᐅᕐᓱᐊᓗᖃᐅᑎᓕᓐᓂᒃ ᑯᓯᕐᖃᔭᖕᖏᓂᕐᓴᓂᒃ ᐊᐅᓚᐅᑦᔮᐸᑦ ᐊᐳᕐᑐᕕᓂᐅᕐᓗᓂ ᓯᖁᒥᑦᓴᐸᑦ, ᐊᒻᒪᓗ ᓱᕐᖁᐃᓂᖅ ᓄᓇᓕᓕᒫᑦ ᐊᑐᐃᓐᓇᖃᖁᓪᓗᒋᑦ ᐊᖏᔪᓂᒃ ᐅᕐᓱᐊᓗᓂᒃ ᑯᕕᔪᖃᕐᐸᑦ ᐊᑐᕐᑕᐅᒐᔭᕐᑐᓂᒃ.
ᑌᒫᑦᓴᐃᓐᓇᖅ ᐃᑉᐱᒋᔭᐅᓂᕐᓴᐅᓕᕐᑐᖅ ᓴᓂᕐᕓᓂᕐᒧᑦ ᑲᒪᒋᔭᖃᕐᓂᕐᒧᓪᓗ ᐱᒋᐅᕐᓴᓂᕐᓄᑦ. ᐱᐅᓂᕐᓴᓂᒃ ᓇᓗᓀᒃᑯᑕᓕᐅᕐᓗᑎᒃ, ᑐᑭᓯᓇᑦᓯᐊᓕᐅᒥᓗᑎᒃ ᓴᓂᕐᕙᑕᐅᓯᒪᒍᓯᖏᑦ, ᐊᒻᒪᓗ ᐅᖄᖃᑎᒌᑦᓯᐊᓗᑎᓪᓗ ᓄᓇᓕᐅᑉ ᐱᓇᓱᑦᑎᖏᑦ ᐊᒻᒪᓗ ᐱᓇᓱᖃᑎᒌᑦᑐᑦ ᐊᐅᓚᑦᓯᓂᕐᒥᒃ ᐃᖏᕐᕋᑎᑦᓯᓂᕐᒥᒃ ᐃᓘᓐᓇᑎᒃ ᑕᒪᑐᖓ ᐱᕙᓪᓕᐊᑕᐅᓯᓚᔪᑦ. ᒫᓯᐅ ᐅᖃᕐᓯᒪᔪᖅ ᓈᒻᒪᓈᕐᑐᓂᒃ ᓴᓇᕐᕈᑎᖃᑦᓯᐊᓂᖅ ᐱᒻᒪᕆᐅᒻᒪᑦ, ᑭᓯᐊᓂ ᐃᓕᑦᓯᕙᓪᓕᐊᓂᖅ ᐱᒻᒪᕆᐅᒻᒥᔪᖅ. ᐃᓄᐃᑦ ᑐᑭᓯᒪᒋᐊᓖᑦ ᐊᑦᑕᓇᕐᑑᒍᓐᓇᑐᓂᒃ ᐱᓇᓱᕝᕕᖓᓂ ᐃᓱᕐᕆᓗᑎᓪᓗ ᐊᐱᕆᒍᓐᓇᕆᐊᓖᑦ ᑐᑭᒧᐊᕐᑕᐅᒍᒪᓂᕐᒥᒃ ᐱᐅᒃᑯᑏᑦ ᓴᓂᕐᕙᑕᐅᕈᓐᓇᒪᖔᑕ ᓄᓇᓕᒻᒥ ᐅᑎᕐᕕᐅᓛᕐᑎᓗᒋᑦ ᑲᒪᒋᔭᐅᑦᓯᐊᖏᓐᓂᖏᓐᓂ.
ᑕᒪᑐᒪ ᐱᓇᓱᐊᕐᑕᐅᓂᖓ ᐊᑦᑐᐊᔭᐅᑦᓯᐊᑐᖅ ᓄᓇᐅᑉ ᐱᐅᓯᕐᓲᑎᖏᓐᓂᒃ ᓄᓇᕕᐅᑉ ᐃᓗᐊᓂ. ᒫᓯᐅ ᐅᖃᕐᓯᒪᔪᖅ ᐅᓗᕆᐊᓇᕐᑐᑦ ᐱᐅᒃᑯᑏᑦ ᐊᐅᓚᑕᐅᓂᖏᑦ ᑲᒪᒋᔭᐅᑦᓯᐊᖏᑦᑐᑦ, ᐃᑯᐊᓪᓚᑕᐅᒍᓐᓇᑐᑦ, ᓄᓇᒦᓯᑐᐃᓐᓇᓗᑎᒃ, ᐅᕝᕙᓘᓐᓃᑦ ᑯᕕᒐᕐᓗᑎᒃ ᓄᓇᐅᑉ ᐃᑭᐊᖓᓄᑦ ᐊᑦᑐᐃᓗᑎᒃ ᓱᕐᕃᓗᑎᓪᓗ ᐆᒪᔪᓂᒃ. ᑌᒣᑦᑎᓗᒍ, ᓄᕐᖃᖓᑎᑦᓯᒐᓱᐊᕐᓂᑐᐃᓐᓇᐅᖏᒻᒪᑦ ᐊᑑᑎᖃᑦᓯᐊᓂᐅᒻᒥᔪᖅ. ᐊᒻᒪᓗ ᐃᑯᓪᓚᑎᑦᓯᒋᐊᒐᓱᕐᓂᐅᒥᔪᖅ ᓱᒃᑯᑎᕆᑐᐃᓐᓇᕆᐊᖃᕐᓂᖓᓂᒃ ᐱᐅᒃᑯᑎᒃ ᐃᓱᓕᓐᓂᐅᔭᓕᕐᐸᑦ ᐊᑐᕐᑕᐅᒍᓐᓇᓂᖓ.
ᑲᒪᑦᑎᐊᕐᓂᖅ ᐱᒋᐊᓲᖑᕗᖅ ᓄᖑᑎᕐᑕᐅᓚᐅᕐᑎᓇᒋᑦ
ᑲᑎᕕᒃ ᐃᓕᓴᕐᓂᓕᕆᓂᕐᒧᑦ, ᑲᒪᑦᑎᐊᓗᓂ ᓄᖑᑎᕆᓂᖅ ᐃᓀᓐᓇᖓᓂ ᓄᐃᑎᑦᓯᔪᖅ. ᒫᓯᐅ ᐅᑉᐱᕆᔭᖃᕐᑐᖅ ᑲᒪᒋᔭᖃᑦᓯᐊᓂᖅ ᐱᒋᐊᓲᖑᒋᐊᖓ ᓯᕗᓂᖓᒍᑦ, ᓇᓪᓕᑳᑦᓱᑎᒃ ᐱᓇᓲᑎᑦᓴᓂᒃ ᓂᐅᕕᕐᓂᐊᓕᕈᑎᒃ ᐊᒻᒪᓗ ᐊᑐᕐᑕᐅᓕᕐᐸᑕ. ᑕᒪᓐᓇ ᑐᑭᓕᒃ ᓇᓪᓕᑳᕆᓂᕐᒥᒃ ᐱᐅᓂᕐᐸᐅᒐᔭᕐᑐᓂᒃ ᐅᓯᔭᐅᒍᓐᓇᑐᓂᒃ, ᐊᑦᑕᓇᖕᖏᑐᓂᒃ ᓴᓂᕐᕙᖃᑦᑕᕈᓐᓇᑐᓂᒃ, ᐊᑦᑕᓀᑦᑑᓂᕐᓴᓂᒃ ᓱᒃᑯᑲᓪᓚᐸᑕ, ᐊᒻᒪᓗ, ᕆᐊᖃᓕᑐᐊᕈᓂ, ᐃᔭᕆᐊᑐᔫᖕᖏᑐᓂᒃ ᑲᒪᒋᒐᓱᐊᕐᓗᒋᑦ. ᒥᑭᓕᒋᐊᕐᑎᓯᓂᖅ ᐱᐅᓕᓂᐊᒐᕐᓂᒃ ᐱᒋᐊᓲᖑᕗᖅ ᓄᓇᓕᒻᒥᑦ ᐊᐅᓪᓚᓂᐅᔭᓕᕐᐸᑦ.
ᐅᑭᐅᖅᑕᖅᑐᒥ, ᐊᑐᒋᐊᓪᓚᑖᓂᒃ ᐊᑑᑎᖃᑦᓯᐊᑐᖅ. ᑭᖑᕝᕙᓯᒋᐊᕐᑎᓯᔪᖅ, ᐃᑲᔪᕐᓯᒪᑎᑦᓯᒍᑎᐅᑦᓱᓂ ᐊᓯᐊᓂᒃ ᓂᐅᕕᕐᓂᒥᒃ, ᐃᒋᑦᓯᖏᓐᓂᓴᐅᑎᑦᓯᓱᓂᓗ. ᒫᓯᐅ ᐆᑦᑑᑎᖃᓚᐅᕐᑐᖅ ᐊᑐᕐᑕᐅᒍᓐᓇᑐᒥᒃ ᐃᓚᑦᓴᒥᒃ ᐲᕐᑕᐅᓱᓂ ᐁᑦᓯᕋᐅᑎᒥᒃ ᐊᐅᓪᓚᑎᑕᐅᑦᓱᓂᓗ ᓴᓪᓗᓄᑦ ᑎᑭᓭᖕᖏᖔᕐᓱᑎᒃ ᓄᑖᒥᒃ. ᒫᓯᐅᒧᑦ, ᑕᒪᓐᓇ ᑕᑯᑦᓴᐅᑎᑦᓯᔪᖅ ᐊᖏᓂᕐᓴᒥᒃ ᑲᒪᒋᔭᑦᓴᕆᔭᐅᔪᒥᒃ: ᐃᓕᑕᕐᓯᓂᕐᒥᒃ ᐱᓇᓱᕝᐅᔪᖅ ᓂᐅᕕᕐᓂᒥᑕ ᓱᓇᓕᒫᖏᑦ ᓱᕐᕃᓂᖃᓚᖓᒋᐊᖏᓐᓂᒃ ᓇᓂᑐᐃᓐᓇᖅ, ᐊᑐᕐᑕᐅᖏᓐᓇᖃᑦᑕᓂᐊᕐᐸᑕ, ᐃᒋᑕᑦᓴᐅᑎᑕᐅᑉᐸᑕᓘᓐᓃᑦ, ᐅᓪᓗᒥ ᖃᓪᓗᓈᓅᑦᑕᐅᐱᒋᐊᖃᑉᐸᑦ, ᓱᒃᑯᑎᕐᑕᐅᓴᐅᑎᒋᓗᑎᓪᓘᓃᑦ.
ᓄᓇᒃᑰᔫᒃ ᐊᐅᓪᓚᑎᑕᐅᖕᖏᓂᖓᓂ ᖃᓪᓗᓈᓄᑦ, ᐱᓇᓱᖃᑎᒌᑦ ᕿᒥᕐᕈᖄᓲᖑᕗᑦ ᓱᓀᑦ ᐃᓚᑦᓴᐅᒐᔭᕐᑐᑦ ᐱᐅᓕᔭᐅᒍᓐᓇᒪᖔᑕ, ᐅᑦᑑᑎᒋᓗᒋᑦ ᐃᑯᒪᖏᑦ, ᓯᖁᒥᑎᑦᓯᒌᒃᑯᑏᑦ ᑎᒥᖓᓂ, ᐅᕝᕙᓘᓐᓃᑦ ᐊᓯᖏᑦ ᐲᔭᕐᑕᐅᒍᓐᓇᑐᑦ ᐃᓚᑦᓴᐅᒍᓐᓇᑐᑦ. ᐃᓚᖏᑦ ᐃᓚᑦᓴᖑᒍᓐᓇᑐᑦ ᐊᓯᐊᓄᑦ ᓄᓇᓕᓐᓄᑦ, ᒥᑭᔪᐃᓪᓗ ᐱᐅᔫᓂᓖᑦ ᓱᓕ ᓂᐅᕕᐊᖑᕙᒃᑐᑦ ᓄᓇᓕᓐᓂ ᒪᓂᒪᑎᑕᐅᔪᓐᓇᕆᕗᑦ ᐃᒋᑕᐅᖕᖏᖔᕐᓗᑎᒃ.
ᒫᓯᐅ ᑕᑯᓐᓇᒥᔪᖅ ᑲᒪᔨᐅᓂᕐᒥᒃ ᓄᓇᓕᓐᓂ ᐱᓇᓱᖃᑎᒌᑦ ᑲᔪᓯᒍᓐᓇᓯᐊᕐᓂᖏᓐᓂᒃ. ᐊᐅᓚᔨᔪᖅ ᐅᑎᕐᑕᑐᕕᓂᐅᑦᓱᓂ ᖁᐊᕐᑕᒧᑦ ᐱᓇᓱᖃᑎᕕᓂᕐᒥᓄᑦ ᓄᓇᓕᓐᓂ ᖃᐅᔨᔪᕕᓂᖅ ᐊᑐᐃᓐᓇᕈᕐᑎᓯᒪᒌᕐᑐᓄᑦ ᓇᖕᒥᓂᖅ, ᓱᓇᓕᒫᑦ ᐊᑐᐃᓐᓇᐅᑎᑕᑦᓯᐊᓯᒪᑦᓱᑎᒃ ᖃᓄᐃᓕᖓᒋᐊᖃᕐᓂᖏᓐᓄᑦ. ᒫᓯᐅᒧᑦ, ᑕᒪᓐᓇ ᑐᑭᖃᑦᓯᐊᓚᕐᑐᖅ ᐱᓇᓱᑦᑕᐅᔪᖅ ᓄᓇᓕᓐᓂ ᑐᖕᖓᕕᖃᕐᓂᓴᐅᓕᕐᓂᖓᓂ ᐊᒻᒪᓗ ᐱᓇᓱᖃᑎᒌᑦ ᐃᓱᕐᕆᓂᕐᓴᐅᓕᕐᓱᑎᒃ ᐱᕙᓪᓕᐊᓂᖓᓂ.
ᑲᑎᕕᒃ ᐃᓕᓴᕐᓂᓕᕆᓂᖅ ᐅᐱᒍᓱᑉᐳᖅ ᐃᓚᐅᒋᔭᒋᐊᒥᒃ ᐊᓯᑦᔨᕙᓪᓕᐊᓂᕐᒧᑦ ᐊᑯᓃᕐᑐᒧᑦ ᓱᕐᕃᓂᐅᒐᔭᕐᑐᒧᑦ ᓯᕗᓂᑦᓴᒧᑦ ᓯᕗᓂᐅᒐᔭᕐᓱᒧᑦᓄᓇᕕᒻᒥᐅᓄᑦ. ᐱᒍᓐᓇᑐᐊᕐᒪᑦ, ᐱᐅᒃᑯᑎ ᐊᑐᒋᐊᓚᒍᓐᓇᓲᕗᑦ ᐃᒋᑕᐅᖕᖏᖔᕐᓱᓂ. ᐊᕙᑎᐅᑉ ᓱᕐᕋᑕᐅᓂᖓ ᐃᓱᒪᒋᔭᐅᑦᓯᐊᕆᐊᓕᒃ ᓴᓗᒻᒪᓴᑦᑕᐅᔪᖃᕐᓂᓕᒫᖓᓂ, ᓄᓇᓕᒻᒥᓗ ᐊᑐᕆᐊᓪᓚᑖᕐᑎᓯᓂᕐᒧᑦ ᐱᓇᓱᐊᕈᑎᐅᔪᑦ ᐃᑲᔪᕐᓯᒪᒍᑎᐅᒻᒥᔪᑦ ᐃᓕᓐᓂᐊᑎᑦᓯᓂᕐᒥᒃ ᐅᕕᒃᑲᓂᒃ ᖃᓄᖅ ᓴᐳᒻᒥᒍᓐᓇᒪᖔᑕ ᓄᓇᒥᒃ ᐃᓅᓯᑦᑎᓂᓪᓗ.
ᓯᕗᒧᑦ ᑕᑯᓐᓇᓱᓂ, ᒫᓯᐅ ᐅᑉᐱᕈᓱᑦᑐᖅ ᐱᔪᓐᓇᓯᐊᓚᖓᓂᖏᓐᓂᒃ ᓄᓇᕕᒻᒥᐅᑦ ᓇᓗᕐᖁᑎᖕᖏᓯᐊᕐᓗᑎᒃ ᐊᐅᓚᑦᓯᒍᓐᓂᖏᓐᓂᒃ ᐱᒋᐊᕐᓂᖓᓂᒃ ᐃᓱᐊᓄᑦ. ᑕᑯᓐᓇᒥᔪᖅ ᐃᓕᓐᓂᐊᑎᑦᓯᓂᖅ ᑕᒪᑦᓱᒥᖓ ᑲᔪᓯᒍᓐᓇᓂᖓᓂᒃ ᐊᒻᒪᓗ ᓂᐅᕕᕐᓂᒥᒃ ᐊᑦᑕᓇᖕᖏᓂᕐᓴᓂᒃ, ᓲᖑᓂᕐᓴᓂᒃ ᐱᐅᒃᑯᑎᓂᒃ ᐊᑐᕐᓗᑎᒃ ᐱᒋᐊᖃᕐᓂᖏᓐᓂᒃ ᑭᖕᖒᒪᓇᕐᑐᓂᒃ. ᑕᒪᓐᓇ ᐱᑦᔪᑎᒋᓗᒍ, ᐊᕙᑎᒥᒃ ᑲᒪᑦᓯᐊᓂᖅ ᐊᑕᐅᓯᐊᑐᐃᓐᓇᑲᓪᓚᓗᓂ ᓴᓗᒻᒪᓭᓂᐅᖕᖏᒪᑦ. ᑲᔪᓰᓐᓇᓯᐊᕐᑐᒥᒃ ᐊᖏᕐᓯᒪᐅᑎᒋᓂᐊᕐᓗᒍ ᐅᑯᓄᖓ ᐱᐅᓂᕐᓴᑎᒍᑦ ᓇᓪᓕᑳᖃᑦᑕᓂᖅ, ᐃᑯᓪᓚᑎᑦᓯᒐᓱᐊᕐᓂᖅ ᐊᑦᑕᓇᕐᑐᒦᑦᑌᓕᓂᕐᒥᒃ, ᓲᓱᑦᓴᓂᕐᓗ ᓄᓇᒥᒃ ᓄᓇᕕᓕᒫᒥ ᐃᓅᓯᕐᒥᒃ ᐱᓪᓚᕆᐅᑎᑕᐅᒻᒪᑦ.
ᖃᐅᔨᒋᐊᓪᓚᕈᒪᕖᑦ ᑖᑦᓱᒥᖓ ᐅᓂᒃᑳᑕᐅᔪᒥᒃ? ᐅᑯᐊ ᐊᓕᐊᒋᒐᔭᕐᖂᑕᑎᑦ ᐊᓪᓚᓂᐊᕐᓗᒋᑦ:
ᑲᑎᕕᒃ ᐃᓕᓴᕐᓂᓕᕆᓂᒃᑯᑦ ᐊᖏᕐᑐᑦ ᐱᓇᓱᒍᑦᔨᓂᕐᒧᑦ ᐊᖏᕐᓯᒪᐅᑎᒥᒃ ᓴᓇᔭᐅᓂᑦᓴᖓᓄᑦ ᐃᓕᓐᓂᐊᕕᑦᓴᐅᑉ ᖁᐊᕐᑕᒥ ➔
ᐱᓇᓱᑦᑎᑖᕈᒪᔪᒍᑦ, ᐃᓱᕐᕆᐅᑎᑦᓴᓂᓪᓗ ᑐᓂᓯᒍᓐᓇᓱᑕ !
ᐃᓚᐅᓚᐅᕆᑦ ᐱᓇᓱᖃᑎᑦᑎᓄᑦ, ᐅᓪᓗᒥ ᐱᒐᓱᒍᓐᓇᖁᑎᑦ.