ᑰᑦᔪᐊᖅ, ᓄᓇᕕᒃ, ᑯᐯᒃ (ᒫᑦᔨ 17, 2014) ᐊᓪᓕᖏᓱᖓᕐᑐᓂ, ᒫᑦᔨ 15, 2014-ᒥ, ᑕᕐᓴᑲᓪᓚᒃ ᐃᓕᓐᓂᐊᕕᒃ ᐊᐅᐸᓗᒻᒥ ᐃᑯᐊᓪᓚᑐᖅ.

ᐃᑯᐊᓪᓚᒪᑦ ᐃᓕᓐᓂᐊᕕᒻᒥᐅᑦ ᕿᑲᑫᓐᓇᓯᓪᓗᐊᑎᓪᓗᒋᑦ ᒫᑦᔨᐅᑎᓪᓗᒍ ᑕᙯᕐᓯᓇᕐᒥ, ᑲᑎᕕᒃ ᐃᓕᓐᓂᐊᓂᓕᕆᓂᖅ ᐊᑐᐃᓐᓇᕈᕐᑎᒍᓐᓇᕕᖃᓚᕿᔪᖅ ᐱᓇᓱᐊᕈᓯᓕᒫᕐᒥ ᐃᓕᓐᓂᐊᑏᑦ ᐅᑎᕐᓂᓴᖏᓐᓂᒃ. ᐃᑯᐊᓪᓚᑐᒥ ᐱᓂᕐᓗᑐᕐᑕᖃᓐᓂᖏᑦᑐᖅ.

“ᑐᕌᒐᖃᕐᑐᒍᑦ ᐃᓕᓐᓂᐊᑏᑦ ᐃᓕᓐᓂᐊᓂᖏᓐᓂᒃ ᐅᓚᐱᑕᐅᑎᑦᓯᑌᓕᓂᕐᒥᒃ ᐃᓕᓐᓂᐊᖏᑦᑑᑎᑦᓯᓂᒃᑯᑦ ᐃᓕᓐᓂᐊᓗᐊᖕᖏᑑᑎᑦᓯᓂᒃᑯᓘᓐᓃᑦ”, ᐅᖃᕐᑐᖅ ᐋᓂ ᐴᐳᑦ, ᑲᔪᓯᒃᑫᔨ.

ᐊᐅᐸᓗᒻᒥ, ᒫᓐᓇᐅᑎᓪᓗᒍ ᐃᓕᓐᓂᐊᓂᓕᕆᓂᖅ ᖃᐅᔨᓴᕐᑐᖅ ᐃᓕᓐᓂᐊᑎᑦᓯᕕᐅᑫᓐᓇᓚᖓᔪᓂᒃ ᑐᑭᑖᕐᓯᒪᖁᓇᕐᓱᑎᓗ ᐅᓪᓘᑉ ᓄᖕᖑᐊᓂ ᐅᓪᓗᒥ. ᓱᕐᖁᐃᑕᐅᑐᐊᕐᐸᑦ, ᓴᓇᔭᐅᒋᐊᓖᑦ ᐃᓪᓗᓂ ᐊᑐᕐᑕᐅᓚᖓᔪᓂ, ᑲᑎᕐᓱᑕᐅᓂᖏᓪᓗ ᐊᒻᒪᓗ ᑎᑭᑎᑕᐅᓂᖏᑦ ᐃᓕᓐᓂᐊᕈᑏᑦ ᐱᐅᓕᓂᐊᒐᖏᑦ ᐱᒋᐊᕐᑕᐅᓚᖓᑦᓱᑎᒃ.

ᐅᐱᕐᖔᒥ ᐅᐃᒍᔭᐅᓚᖓᓕᓚᐅᒐᓗᐊᕐᑎᓗᒍ ᓄᑕᐅᓯᓕᕐᑎᑕᐅᓗᓂᓗ, ᐃᓕᓐᓂᐊᕕᑦᑖᕆᐊᖃᓛᓕᕐᑐᑦ ᓄᑖᒥᒃ. ᑕᒪᓐᓇ ᐱᑦᔪᑎᒋᑦᓱᒍ, ᓴᓇᓂᕐᒧᑦ ᑮᓇᐅᔦᓪᓗ ᑐᕌᒐᖏᓐᓄᑦ ᐸᕐᓀᕈᑕᐅᔪᑦ ᒫᓐᓇᐅᑎᓪᓗᒍ, ᐱᓇᓱᖃᑎᒋᑦᓱᒋᑦ ᐃᓕᓐᓂᐊᓂᕐᒥᒃ ᑐᕐᖃᑕᕐᕕᑯᑦ ᑯᐯᒻᒥ.

ᐃᓕᓐᓂᐊᓂᓕᕆᓂᖅ ᐳᓖᓯᒃᑯᑦ ᓱᕐᖁᐃᓯᑎᑦᓯᓂᑦᓴᖏᓐᓂᒃ ᓱᓇᒧᑦ ᐃᑯᐊᓪᓚᓂᕐᒪᖔᑦ ᐅᑕᕐᕿᔪᑦ.

ᑲᑎᕕᒃ ᐃᓕᓐᓂᐊᓂᓕᕆᓂᖅ ᓇᑯᕐᒦᑐᖅ ᓄᓇᕕᒻᒥ ᐃᓕᓐᓂᐊᕕᓕᒫᓂᒃ ᓄᓇᓕᓕᒫᓂᓪᓗ ᐃᑲᔪᕐᓯᒍᒪᓂᖃᖃᑦᑕᑐᓂᒃ ᓴᐳᑦᔨᓱᑎᓗ.

ᐅᕙᑦᑎᓅᓕᖓᔪᑦ:

ᑲᑎᕕᒃ ᐃᓕᓐᓂᐊᓂᓕᕆᓂᖅ (KSB) ᐱᖕᖑᑎᑕᐅᓯᒪᔪᖅ 1975-ᒥ, ᔦᒥᓯ ᐯᑉ ᑯᐯᓪᓗ ᑐᕐᕋᖓᑕ ᐊᖏᖃᑎᒌᒍᑎᖓᑎᒍᑦ. 1978-ᒥᓂᑦ, ᓄᓇᕕᒻᒥᐅᓂᒃ ᐃᓕᓐᓂᐊᓂᖃᕐᑎᓯᓲᑐᐊᖑᑦᓱᓂ. ᐃᓕᓐᓂᐊᕈᑏᑦ ᑐᕌᒐᖏᑦ ᐱᖕᖑᑎᑕᐅᓯᒪᔪᑦ ᑲᑎᕕᒃ ᐃᓕᓐᓂᐊᓂᓕᕆᓂᕐᒧᑦ ᐃᓕᓐᓂᐊᑎᑦᓯᒍᑕᐅᓲᑦ ᓄᓇᓕᓐᓂ 14-ᓂ ᓄᓇᕕᒻᒥ. ᐃᓄᒃᑎᑐᑦ ᐅᖃᐅᓯᕐᖄᖃᕐᓱᓂ, ᐁᑉᐱᐅᑎᖃᕐᓱᓂ ᖃᓪᓗᓈᑎᑐᑦ ᐅᐃᒍᐃᑎᑐᓪᓗ. ᑐᑭᓯᒋᐊᕈᒪᒍᕕᑦ ᖃᕆᑕᐅᔭᕐᑎᒍᑦ ᐊᑐᐃᓐᓇᖃᕐᕕᑎᓐᓄᑦ ᕿᒥᕐᕈᒋᐊᕈᓐᓇᑐᑎᑦ ᐅᕗᖓ: www.kativik.qc.ca

— 30 —

ᑐᑭᓯᒋᐊᕐᕕᐅᒍᓐᓇᑐᖅ:

ᔮᑦ ᑐᔅᓅ-ᐱᐊᕐᓃ
ᑭᓇᒃᑯᑐᐃᓐᓇᓄᑦ ᑐᓴᐅᒪᖃᑎᒌᑦᑎᓯᔨ
ᑲᑎᕕᒃ ᐃᓕᓐᓂᐊᓂᓕᕆᓂᖅ
514-482-8220