ᖃᐅᔨᒪᓕᕐᐸᓕᐊᓂᖅ ᐱᓇᓱᑦᑎᑎᓐᓂᒃ – ᐊᐱᕐᓱᑕᐅᔪᖅ ᐋᓕᒃ ᑲᓪᓚᒃ
ᐱᒍᑎᒋᒍᒪᒧᑦ ᑮᓇᖏᓐᓂᒃ ᐃᓕᖓᑎᑦᓯᓂᕐᒥᒃ ᐊᑎᖏᓐᓄᑦ ᐊᒥᓱᐊᓗᐃᑦ ᐃᓄᐃᑦ ᑲᑎᕕᒃ ᐃᓕᓴᕐᓂᓕᕆᓂᕐᒥᒃ (KI) ᓄᐃᑕᑎᑦᓯᔪᑦ, ᐊᓪᓚᓂᐊᒐᓕᐅᕐᑎᕗᑦ ᐋᕐᕿᓱᐃᓯᒪᓕᕐᑐᑦ ᓄᑖᒥᒃ ᐊᓪᓚᒍᑎᒥᒃ ᓵᖕᖓᓯᑎᓪᓗᒍ ᐃᓕᑦᓯᓂᒃ, ᓇᑭᒥᐅᔭᐅᓂᓯᓐᓂᒃ ᐊᒻᒪᓗ ᖃᐅᑦᔨᓴᐅᑎᒋᓯᒪᔭᓯᓐᓂᒃ. ᖃᑦᓯᓂᒃ ᐅᑭᐅᓂᒃ ᐱᓇᓱᒐᓗᐊᕈᕕᑦ, ᐃᓕᑦᓯᓂᒃ ᖃᐅᔨᒪᑦᓯᐊᓂᕐᓴᕈᒍᒪᕗᒍᑦ. ᑖᒃᑯᐊ ᐊᓪᓚᓯᒪᔪᑦ ᐃᓗᐊᓂ, ᑲᑎᓚᖓᔭᓯ ᐋᓕᒃ ᑲᓪᓚᒃ, ᖃᓄᑐᐃᓐᓇᖅ ᐱᓯᑎ ᑲᒪᔨᒻᒪᕆᐊᐱᒃ ᓴᐅᑦᔪᐃᑦ ᐃᓕᓐᓂᐊᕕᒻᒥ ᑲᖏᕐᓱᒥ.
ᓇᓗᕐᖁᓇᖕᖏᑐᖅ ᐊᒻᒪᓗ ᖃᓄᕐᑑᓯᑎᒃ ᐊᖑᑦ
“ᐃᓱᒫᓗᑦᓴᓇᒃ, ᑲᒪᒋᓚᖓᒐᒃᑯ!”
ᑖᒃᑯᐊ ᐅᖃᕐᑕᐅᒪᑕ ᐃᓱᕐᕆᓕᐅᒥᑦᓯᐊᓚᐅᔪᕗᖓ. ᓱᓕᑦᓯᐊᓚᐅᕐᓚᙰ: ᐊᓕᐊᑦᓴᐅᑎᒋᔪᒥᒃ ᐃᓱᒪᖃᕐᖁᖓ ᐋᓕᐅᑉ ᒥᑦᓵᓄᑦ. ᐱᐅᓕᓚᐅᔪᒻᒫᖓ ᐊᑦᓱᕈᕐᓇᑐᐹᓗᓐᓂᒃ ᐅᖁᒣᓪᓕᐅᓇᕐᑐᓂᓪᓗ ᑎᑭᓯᒪᓂᕋᓂ ᑲᖏᕐᓱᒥ. ᖁᓚᖕᖏᓂᖓᓄᑦ ᐊᒻᒪᓗ ᖁᖓᓐᓂᖓᓄᑦ ᑕᒉᓐᓈᐱᒃ ᑐᑦᔫᑎᑕᐅᓚᐅᔪᒐᒪ.
ᐋᓕᒃ ᑲᓪᓚᒃ ᑲᒪᔨᒻᒪᕆᐊᐱᐅᓕᕐᑐᖅ ᑲᖏᕐᓱᒥ 2014-ᒥᓂᒃ. ᐋᓕᒃ ᓄᑖᖑᑦᔭᖏᑦᑐᖅ ᐃᓕᓐᓂᐊᕕᒻᒥ ᐱᓇᓱᑦᑎᐅᓂᕐᒧᑦ; ᓱᓕᒻᒪᑦ, ᐱᓇᓱᒋᐊᓯᓐᓂᒪᑦ 1985-ᒥ ᐃᓕᓐᓂᐊᕕᐅᑉ ᐱᖕᖑᐊᕕᖓᓂ ᐃᓕᓐᐊᓂᑎᑦᓯᔨᐅᑦᓱᓂ. ᐊᕐᕌᒍᐃᑦ ᐊᓂᒍᕐᐸᓕᐊᓂᖏᓐᓂ, ᐋᓕᒃ ᐱᓇᓱᒐᖃᕐᓯᒪᔪᖅ ᐊᒥᓱᓂᒃ ᐱᖕᖑᐊᕕᒻᒥ ᐃᓕᓐᓂᐊᑎᑦᓯᔨᐅᑉ ᐊᒻᒪᓗ ᑲᒪᔨᒻᒪᕆᐊᐱᐅᑉ ᐃᓂᖏᑦᑕ ᐊᑯᓐᓂᖓᓂ.
“ᐱᓇᓱᖃᑦᑕᓯᒪᕗᖓ ᐊᑦᔨᒌᖕᖏᑐᓄᑦ ᑎᒥᐅᔪᓄᑦ ᑕᒡᒍᖓᓚᐅᕐᓇᖓ, ᐊᒻᒪᓗ ᓄᑦᑎᓚᐅᕐᓯᒪᒻᒥᓱᖓ ᐃᓄᐃᑦ ᖃᖓᑦᑕᔫᖏᓐᓄᑦ, ᐊᓪᓚᑎ-ᑮᓇᐅᔭᓕᕆᔨᐅᑦᓱᖓ ᑲᕙᒫᐱᒃᑯᓄᑦ…”
ᓱᒧᓪᓖ ᐅᑎᑦᓴᓂᕆᕙ ᓴᐅᑦᔪᐃᑦ ᐃᓕᓐᓂᐊᕕᖓᓄᑦ?
ᐱᔪᑦᓴᐅᔮᓕᕈᑎᖃᓚᐅᕐᓯᒪᕗᖓ ᐱᓇᓱᒐᑦᓯᐊᖑᒍᓇᐅᓂᖓᓂᒃ. ᐱᔪᓐᓇᓚᐅᕐᓯᒪᒐᒃᑯ, ᐊᑦᓱᕈᕐᓇᑐᕐᑕᖏᑦ ᑲᒪᒋᒍᓐᓇᓱᒋᑦ. ᐊᓕᐊᒻᒥᔪᖓ ᐱᓇᓱᖃᑎᖃᕆᐊᒥᒃ ᐃᓕᓐᓂᐊᑎᓂᒃ ᐱᐊᕋᕐᓂᓗ. ᑕᒐ. ᐋ, ᐅᑎᕈᒪᓚᐅᕐᓯᒪᕗᖓ ᐱᓇᓱᓐᓂᒧᑦ ᐱᐊᕋᕐᓅᓕᖓᔪᓂᒃ. ᑲᒪᒋᒋᐊᖏᑦ ᐱᔭᕐᓂᓂᕐᓴᐅᒪᑕ. Hahaha!
ᐱᓇᓱᒐᕐᒥᓂᒃ ᐊᔪᕐᓇᖏᑦᑐᐊᐱᐅᔮᕐᑎᓯᔪᖅ ᐊᓕᐊᓇᑐᐃᓐᓇᑑᔮᕐᑎᓱᒍᓗ, ᑭᓯᐊᓂ ᑌᒣᖕᖏᑐᖅ. ᓱᓕᓗᓂ, ᒧᒥᓪᓗᑐᐊ ᓱᓕᖔᕐᑐᖅ. ᐅᖃᕐᑕᕕᓂᖓ ᒪᓕᑦᓱᒍ: ᐋᓕᒃ ᐊᖏᔪᒥᒃ ᖃᐅᑕᒫᑦ ᐊᑦᓱᕈᓂᕐᒥ ᐊᖏᓂᕐᓴᖓᓂᒃ ᑐᕌᖓᑎᑦᓯᕗᖅ ᓇᐅᓕᒫᓂᒃ – ᐱᓇᓱᑦᑎᓂᒃ, ᐃᓕᓐᓂᐊᑎᓂᒃ, ᐊᒻᒪᓗ ᐱᐊᕋᓕᓐᓂᒃ ᐃᓘᓐᓀᓂᒃ – ᓂᐳᕐᑎᓯᓂᕐᒧᑦ.
ᓇᓚᐅᑦᓯᐊᓗᒍ, ᑖᓐᓇ ᐅᕙᒍᑦ, KI-ᑯᓂ, ᑌᓲᕗᑦ ᑲᒪᔨᒻᒪᕆᐊᐱᒻᒥᒃ, ᐃᓂᐅᕗᖅ ᓄᓇᓕᒻᒥ ᑐᑦᑕᕕᓪᓚᕆᒻᒧᑦ:
“ᐱᒻᒪᕆᐊᓘᕗᖅ ᓄᓇᓕᒻᒥᐅᑦ ᖃᐅᔨᒪᑉᐸᑕ ᓱᓕᕐᒪᖔᑕ ᐃᓕᓐᓂᐊᕕᐅᑉ ᐃᓗᐊᓂ. […] ᐆᑦᑑᑎᒋᑦᓱᒍ, ᐃᓕᓐᓂᐊᕈᑎᓂᒃ ᑐᓴᕐᑎᓯᒍᑎᐊᐲᑦ ᐊᓪᓚᖏᑦ ᓄᐃᒋᐊᖃᓕᕐᒪᑕ ᐅᕝᕙᓗᓘᓐᓃᑦ ᐱᖕᖑᐊᓂᖃᓚᖓᓕᕐᒪᑦ ᐸᕐᓇᕈᑎᒋᓯᒪᔭᑦᑎᓂᒃ, ᐱᐊᕋᓕᓐᓂᒃ ᙯᖁᔨᓲᖑᕗᒍᑦ ᑕᑯᓐᓇᐅᒐᖁᔨᑦᓱᑕᓗ ᐊᒻᒪᓗ ᐃᓚᐅᖁᔨᑦᓱᑕ ᓱᒐᓚᑦᑐᓄᑦ.”
ᑕᒪᓐᓇ ᑲᒪᒋᐅᑎᓂᖓᑦ ᐃᓪᓗᐃᓈᓂᒃ ᐱᑦᔭᖏᒻᒥᔪᖅ. ᐋᓕᒃ ᑕᑯᓐᓇᑕᖓ ᐃᓕᓐᓂᐊᕕᒻᒧᑦ ᐊᒻᒪᓗ ᓄᓇᓕᒻᒥᐅᓄᑦ ᐱᓇᓱᖃᑎᒌᑦᓂᑎᑐᑦ. ᐆᑦᑑᑎᒋᓗᒍ, ᐃᓄᒻᒪᕇᑦ ᐃᓕᓐᓂᐊᕕᒻᒧᑦ ᙯᖁᔭᐅᓲᖑᒻᒥᔪᑦ ᐃᓗᕐᖁᓯᕐᒧᐊᓕᖓᔪᓂᒃ ᑲᒪᖃᑕᐅᑦᓱᑎᒃ, ᓲᕐᓗ ᐋᑦᑐᓂᖅ “ᑐᒃᑐᒥᒃ, ᐃᒐᓂᖅ, ᐱᑦᓯᓕᐅᕐᓂᖅ, ᑌᒫᒐᓚᒃ. ᐃᓕᓐᓂᐊᑎᓂᓪᓘᓃᑦ ᑐᓵᖁᔨᑐᐃᓐᓇᓱᓂ ᐅᓂᒃᑳᓴᖏᓐᓂᒃ.”
ᑕᒪᓐᓇᓭᓐᓇᖅ ᐆᒻᒪᑎᒻᒥᐅᑕᕆᑦᓱᒍ ᐃᓕᓐᓂᐊᕕᒃ ᓱᒍᑎᑦᓴᓂᒃ ᐃᓕᓐᓂᐊᕕᐅᑉ ᓯᓚᑖᓂ ᐋᕐᕿᓱᐃᓲᖑᒻᒥᔪᖅ, ᐆᑦᑑᑎᒋᓗᒍ ᓄᓇᒥ ᒪᙯᑦᑎᓯᕙᑦᓱᓂ ᐃᓕᓐᓂᐊᑎᓂᒃ.
ᐊᓕᐊᖏᓐᓇᓲᑦ ᒪᙯᓐᓂᒥᒃ. ᑮᓇᖏᑦ ᑕᑯᒐᒃᑭᑦ… ᑕᑕᑕᐅᓲᖑᔪᖓ ᐃᑉᐱᒍᓱᐊᓂᕐᒧᑦ ᐱᐅᔪᒥᒃ ᐊᑐᕐᑎᓯᒋᐊᑦᑕ. ᐋ, ᑕᒪᓐᓇ ᐱᓂᕐᐹᒥᒃ… ᐱᐅᔪᕆᐅᑎᒋᓂᕐᐹᕋ ᑌᒣᓕᕐᒪᑕ. ᒪᙯᖕᖑᐊᑎᑦᓯᓕᕋᑦᑕ. ᓄᓇᒦᓕᕋᑦᑕ, ᐃᖃᓗᓐᓂᐊᓱᑕ, ᐆᒪᔪᕐᓂᐊᖃᑎᖃᕐᓱᑕ ᐃᓕᓐᓂᐊᑎᓂᒃ…
ᐅᖃᕋᓗᐊᕐᖁᖔ ᐃᓕᓐᓂᐊᕕᒻᒥ ᐹᔅᑭᑦᐹᓪᑎᓂᒃ ᓴᖑᐊᑦᓯᔨᐅᒋᐊᖓ? ᐋᓕᒃ ᑕᒪᑐᒥᖓ ᐊᑐᓲᖑᒻᒥᔪᖅ ᑲᑎᓯᒍᑎᒋᑦᓱᒍ ᐊᓯᒥᓂᒃ ᑕᒪᑐᒧᖓ ᐊᑦᑐᐊᒥᔪᓂᒃ ᐊᓯᖏᓐᓂ ᓄᓇᓕᓐᓂ. ᐆᑦᑑᑎᒋᓗᒍ, ᐊᕐᕌᓂ, ᐋᕐᕿᓱᐃᖃᑕᐅᓚᐅᔪᔪᖅ ᐹᔅᑭᑦᐹᓪᓂᕐᒥᒃ ᐃᓕᓐᓂᐊᕈᑎᓂᒃ ᐊᒻᒪᓗ ᐱᖕᖑᐊᓕᐅᑎᒍᑎᓂᒃ ᓄᓇᕕᒻᒥ, ᐊᒻᒪᓗ ᐃᓕᓐᓂᐊᕆᐊᕐᓯᒪᑎᑦᓯᓂᕐᒥᒃ ᒪᓐᑐᔨᐊᓪᒥ.
“ᑌᒣᓲᖑᕗᒍᑦ ᐃᓕᓐᓂᐊᑏᑦ ᓂᕆᐅᒋᔭᑦᓴᖃᖁᑦᓱᒋᑦ. ᑲᑦᓱᙰᓕᓇᕐᑑᒪᑦ. ᐃᓕᓐᓂᐊᕆᐊᕐᓂᓴᐅᖃᑦᑕᓂᐊᕐᒪᑕ ᐊᑐᕈᓐᓇᖃᑦᑕᑐᐊᕈᑎᒃ ᑌᒣᑦᑐᓂᒃ ᐱᖕᖑᐊᓂᕐᒥᒃ ᐊᑑᑎᒍᑎᓂᒃ. ᐃᓕᒌᓄᑦ ᐃᓚᐅᑐᐊᕈᑎᒃ. […] ᐃᓱᒪᔪᖓ ᑌᒣᓘᕐᑐᓂᒃ ᑕᑯᒍᐊᕐᓂᓴᐅᔪᑦᓴᐅᓂᑦᑎᓂᒃ.”
ᑕᒪᓐᓇ ᓈᒻᒪᖏᓗᐊᑦᓴᒪᑦ, ᑲᒪᒋᒋᐊᓕᖏᑦ ᐊᒥᓱᑦ ᐃᓚᑲᕐᒥᔪᑦ ᐊᐅᓚᑦᓯᓂᕐᒥᒃ KI-ᑯᑦ ᐃᓪᓗᔪᐊᖏᓐᓂᒃ.
“ᐆᑦᑑᑎᒋᓗᒍ, ᐃᓕᓐᓂᐊᑎᑦᓯᔨ ᓈᒻᒪᖏᔨᐊᖃᕐᐸᑦ ᐃᓪᓗᒥᓂᒃ, ᐱᑦᓴᐅᑎᒋᒍᓐᓇᕕᓕᒫᖓᓄᑦ ᐋᕐᕿᓴᐅᑎᒋᒐᓱᓲᕗᑦ. ᐃᑲᔪᕐᑐᕋᓱᓲᖑᔪᒍᑦ; ᐋᕐᕿᖃᔭᖕᖏᑐᐊᕋᑦᑎᒍ, ᐱᓀᓗᑕᖅ ᐅᖃᕈᑎᒋᑦᓴᐅᑎᒋᓲᕗᑦ ᓄᓇᓕᓕᒫᓂ ᓴᓇᔨᓂᒃ ᐊᐅᓚᑦᓯᔨᓄᑦ ᐊᒻᒪᓗ ᑎᑭᑎᑦᓯᓲᖒᑦᓱᑎᒃ ᓴᓇᔨᒥᒃ ᐅᕝᕙᓗᓘᓐᓃᑦ ᐃᓕᑦᓴᒥᒃ ᐱᒋᐊᓕᑦᑎᓂᒃ. ᐋᕐᕿᕈᓐᓇᕈᑦᑎᒍ ᑕᒫᓂ, ᐋᕐᕿᖃᑦᑕᓚᖓᔭᕗᑦ.”
ᓄᐃᑕᑦᓯᓂᕐᒥᒃ ᐱᒍᑦᔨᒍᑎᓂᒃ ᐃᑲᔪᕐᓯᒪᐅᑎᓂᓪᓗ ᐱᓇᓱᑦᑎᓂ ᐃᓚᐅᔪᓄᑦ ᐃᑉᐱᒋᒋᐊᓕᖏᓐᓄᑦ ᐃᓚᐅᓕᑦᓯᒥᔪᖅ. ᑭᓯᐊᓂ, ᑖᓐᓇ ᐱᓇᓱᐊᑦᓴᖅ ᒪᓕᑦᑎᖃᓲᖑᒻᒥᔪᖅ ᐃᓛᒃᑯᑦ ᐊᑦᓱᕈᕐᓇᒥᔪᓂᒃ. ᐱᓇᓱᑦᑎᑖᕐᓂᖅ, ᐊᓐᓀᖏᓐᓂᖅ, ᐱᒋᐅᕐᓴᑎᑦᓯᓂᖅ… ᑖᓐᓇ ᑭᖑᓪᓕᐹᖅ ᐱᓗᐊᕐᓱᓂ ᐱᒻᒪᕆᖁᑎᒋᔭᖓᓂ:
“ᐱᓇᓱᑦᑎᑖᕋᑦᑕ, ᓄᓇᓕᒻᒥᐅᖅ ᐃᓄᒃ ᐱᓇᓱᒐᕐᒥᒃ ᐱᓇᓱᒍᓐᓇᓲᖅ, ᑭᓯᐊᓂ ᐱᒋᐅᕐᓴᑎᑕᐅᔭᕆᐊᖃᕐᒥᔪᖅ. ᖃᓄᖅ ᓱᓇᒐᓚᓐᓂᒃ ᐱᓇᓱᒋᐊᖃᕐᓂᑯᑦ, ᖃᓄᖅ ᓱᓇᒐᓚᓐᓂᒃ ᐋᕐᕿᓱᐃᓂᒃᑯᑦ. ᓲᑭᐊᖑᒐᓗᐊᕐᑎᓗᒍ, ᑕᒪᓐᓇ ᐃᓚᑰᔪᕆᔭᕋ. ᐱᒋᐅᕐᓴᑎᑦᓯᒋᐊᓪᓚᕈᓐᓇᓴᓚᐅᕐᑕᑐᖅ ᐃᑲᔪᕐᓯᒋᐊᓪᓚᕈᓐᓇᓗᑕᓗ ᓄᓇᓕᓐᓂ ᐱᓇᓱᑦᑎᑖᓂᒃ, ᓄᓇᓕᐅᑉ ᐃᓗᐊᓂ ᐱᓇᓱᓐᓂᓴᐅᒍᓐᓇᕋᔭᕋᑦᑕ, ᐃᓓ?”
ᐋᓕᒃ ᑲᓪᓚᐅᑉ ᐱᓇᓱᓐᓂᖓ ᐊᒻᒪᓗ ᐃᓄᑦᑕᖓᑕ ᐱᐅᓯᖓ ᐅᖃᕆᐊᑭᓪᓕᑎᕐᓗᒍ ᑭᓯᐊᓂᐅᒐᔭᕐᐸᑦ, ᐅᖃᕋᔭᕐᑐᖓ ᐊᒥᓱᓂᒃ ᓇᓴᕐᓯᒪᓲᖑᒋᐊᖓ – ᓄᓇᓕᒻᒧᑦ ᑐᑦᑕᕕᐅᑦᓱᓂ ᐊᒻᒪᓗ ᓴᓇᔨᓂᒃ ᑲᒪᔨᒻᒪᕆᐅᑦᓱᓂ. ᐱᓇᓱᑦᑐᖅ ᓴᓇᒐᓱᐊᕐᓱᓂ ᐃᑲᔪᕐᑎᒌᑦᓯᐊᓂᕐᒥᒃ, ᑐᕌᒐᖃᕐᓂᒥᒃ, ᐊᒻᒪᓗ ᐃᓚᐅᓇᓱᒋᓂᑉᒥᒃ ᓄᓇᕕᒻᒥᐅᑎᒍᑦ.
ᐊᓕᐊᓇᓚᐅᔪᔪᖅ ᐃᓕᓐᓂᒃ ᑲᑎᓯᑦᓱᓂ, ᐋᓕ!