ᑲᖏᕐᓱᒦᑦᓱᖓ ᓯᑉᑎᒻᐱᕆ 2022ᒥ, ᐅᖃᐅᑎᔭᐅᓚᐅᔪᒐᒪ ᑲᑎᓯᒋᐊᖃᓪᓚᕆᓐᓂᕋᑦᑕᐅᓱᖓ ᒪᕆ-ᓗᐄᔅᒥᒃ.  ᐳᕐᑐᓂᕐᓴᒥ ᓴᓇᑦᑐᓴᐅᑎᓕᕆᐅᑎᓂᒃ ᓱᑯᐃᔦᓂᕐᒥᓗ ᐃᓕᓐᓂᐊᑎᑦᓯᔨᐅᑦᓱᓂ (ᒍᐃᒍᐃᑎᑐᑦ ᐃᓕᓐᓂᐊᕕᒻᒥ) ᐄᕕ ᐃᑭᓪᓗᐊᑉ ᐃᓕᑕᕆᔭᐅᒍᑎᒥᒃ ᐃᓕᑕᕆᔭᐅᒍᑎᑖᕐᓂᑰᑦᓱᓂᓗ 11-ᓂᒃ ᐊᕐᕌᒍᓂᒃ ᐱᒍᑦᔨᓯᒪᓕᕐᓂᒥᓄᑦ.

ᐊᓱᐃᓛ ᑖᑦᓱᒥᖓ ᑲᑎᓯᕕᑦᓴᓯᐊᖑᔪᕆᑦᓯᓕᕐᑎᓗᖓ, ᒪᕆ-ᓗᐄᔅ ᐱᓇᓱᐊᕐᑐᒪᕆᐅᓘᓚᐅᔪᔪᖅ… ᐃᒐᓕᒻᒥ!

“ᑌᒫᑎᒌ ᐱᓇᓱᑦᑐᐹᓘᑎᒋᑦᓱᖔ?  ᐃᖃᓗᒻᒥ ᐃᑭᐊᕐᒥᐅᑕᓕᑦᑐᑕᐅᓚᖓᔪᓂᑐᐊᖅ.  ᒥᑭᓂᕐᓴᐅᒥᔪᓪᓕ ᐊᑐᐃᓐᓇᕈᕐᑎᕆᓂᕆᓲᕋᓂᒃ 3-ᓂᒃ ᐊᑦᔨᒌᖕᖏᑐᓂᒃ ᓂᕆᔭᐅᓂᐊᕐᑐᓂᒃ.  ᐋ, ᐃᓚᖓᓂ ᐊᑐᐃᓐᓇᕈᑎᕆᒋᐊᖃᓲᖑᕗᖓ 3-ᓂᒃ ᐊᑦᔨᒌᖕᖏᑐᓂᒃ ᓂᕆᔭᐅᓂᐊᕐᑐᓂᒃ.  […] ᐊᒥᓲᒍᓐᓇᕕᓕᒫᖏᑎᒍᑦ ᓂᕆᔭᐅᓂᐊᕐᑐᓂᒃ ᓂᕿᓕᐅᕋᓱᓲᖑᕗᖓ ᑌᒫᒃ ᐃᓄᐃᑦ ᓄᓇᓕᒻᒥᑦ ᙯᓕᕈᑎᒃ, ᐊᑐᓂ ᐃᓘᓐᓇᑎᒃ ᓂᕆᔭᑦᓴᖃᕐᓂᐊᒪᑕ.”

ᑕᕐᓂᒧ ᓈᒻᒪᑐᖅ ᓂᕿ ᑲᔪᖏᕐᓭᓂᕐᒥᓗ ᐱᕈᕐᑎᓯᑦᓱᓂ

ᐃᓚᒌᓂ ᐊᒥᓱᓂᑦ ᐱᓯᒪᒐᒥ, ᒪᕆ-ᓗᐄᔅ ᓱᖏᐅᓯᒪᔭᓕᒃ ᓂᕆᒻᒫᒪᕆᒍᓯᓂᒃ ᑲᒪᒋᔭᐅᑦᓯᐊᓂᕐᒥᓗ.  ᐃᒐᒋᐊᒥ ᓇᓗᓇᖕᖏᓯᐊᕐᑐᖅ ᐊᓕᐊᒋᓪᓗᑐᕐᑖ ᑖᑦᓱᒪ.  ᐅᖃᓪᓗᑐᖕᖏᑲᓗᐊᕐᓱᒍ, ᐃᒣᓕᒐᔭᕐᑐᖓ ᑕᒪᓐᓇ ᖁᕕᐊᒋᔭᒻᒪᕆᐊᓗᐊ ᐊᑦᔨᒋᔭᐅᑎᑕᐅᒍᓐᓇᒥᔪᖅ ᐃᓕᓐᓂᐊᓂᕐᒥᒃ ᑕᐅᑐᒍᓯᖓᓄᑦ.

“ᐋᓇᓇᑦᓯᐊᕋ ᐅᖃᖃᑦᑕᓯᒪᒻᒪᑦ, “ᐊᕿᐊᕈ ᐃᓗᓪᓕᓯᒪᑦᓯᐊᑐᐊᕐᒪᑦ, ᐅᖃᓲᖑᔪᒍᑦ ᐱᐅᔪᓂᒃ ᑭᓯᐊᓂ”.

ᑌᒫᑦᓭᓇᖅ ᐃᓕᓐᓂᐊᑎᒥᓂᒃ ᓂᕆᑎᑦᓯᓲᖑᒐᒥ ᓇᖕᒥᓂᖅ ᐊᒃᒐᒥᓄᑦ ᐊᑐᐃᓐᓇᕈᕐᑕᒥᓂᒃ, ᒪᕆ-ᓗᐄᔅ ᐃᓱᒪᓲᖅ ᑲᑦᓱᙰᓕᓭᒍᑎᒋᒍᒪᑦᓱᒋᑦ ᐃᑲᔪᕐᓯᒍᑎᒋᓗᒋᓗ ᐃᓕᓐᓂᐊᑎᒥᑕ ᐱᔭᖃᕈᑎᑦᓴᖏᓐᓄᑦ ᐃᓕᓐᓂᐊᑎᓯᓂᕐᒥᒍᑦ.

ᒪᕆ-ᓗᐄᔅᒧᑦ, ᐃᓕᓐᓂᐊᑎᒥᑕ ᐱᔭᖃᕈᑎᑦᓴᖏᓐᓂᒃ ᐃᑲᔪᕐᓯᓂᐊᕐᑐᓂᒃ ᖃᓄᑐᐃᓐᓇᓕᒫᖅ ᐱᓇᓱᐊᕐᓗᓂ, ᓇᖕᒥᓂᕆᓂᕋᕐᓱᒋᑦ “ᒥᑭᔪᐊᕋᒃᑲ” ᑌᓲᒥᓄᑦ, ᓇᖕᒥᓂᖅ ᐱᓇᓱᐊᕐᑕᖓᓄᐊᖓᔪᖅ, ᐊᒻᒪᓗ ᑲᑦᓱᙰᑦᑑᒍᑎᑦᓭᓂᐊᕐᓇᕋᓂ, ᐃᓱᒪᑦᓴᑖᕈᑎᑦᓭᓂᐊᕐᓇᕋᓂ ᐱᓇᓱᐊᕋᑦᓭᓂᐊᕐᓇᖏᑦᑐᖅ.

ᐃᓕᓐᓂᐊᑎᒥᓂᒃ ᐋᕐᕿᓱᐃᒍᑦᔨᒍᒪᔪᖅ ᑳᒪᕉᓐᒧᑦ ᐊᐅᓪᓚᖃᑎᖃᕈᑎᑦᓴᒥᓂᒃ ᓄᓇᓕᒻᒥ ᐃᑲᔪᕈᒪᔪᓄᑦ ᐃᑲᔪᕐᑕᐅᓗᓂ.

“ᐅᓂᒃᑲᐅᑎᒐᒃᑭᑦ ᐃᓕᓐᓂᐊᑎᒃᑲ ᐅᓂᒃᑳᓴᒃᑲᓂᒃ, ᑲᑦᓱᙰᓕᔪᒻᒪᕆᐅᓚᐅᔪᕗᑦ! […] ᒪᓕᑦᑎᒍᒪᔭᒃᑲ ᑳᒪᕉᓐᒧᑦ ᐊᓯᖏᓐᓂᒃ ᐃᓅᓯᕐᒥ ᐊᑐᕐᑕᐅᔪᓂᒃ ᑕᑯᖁᑦᓱᒋᑦ.  ᖃᓄᖅ ᐱᐊᕃᑦ ᐊᔪᐃᓐᓇᕆᐊᖃᕐᒪᖔᑕ…ᓯᕐᓕᕿᑦᓴᒪᕆᓲᖑᓂᖏᓐᓂᒃ…ᐃᓕᓐᓂᐊᕆᐊᕐᓂᑐᐃᓐᓇᒧᑦ.

ᑭᓯᐊᓂᓕ ᓱᒧᑦ ᐱᓇᓱᐊᕖᖕᖓᓴᕐᓗᓂ ᐃᓕᓐᓂᐊᑎᒥᓂᒃ ᑲᑦᓱᙰᓕᓭᓂᕐᒧᑦ?

“ᐅᑎᕈᒪᒐᒪ ᐅᓪᓗᒥ ᑌᑲᓂ, ᐅᑭᐅᕆᓐᓂᓴᐅᓕᕐᓗᖓ ᐊᔭᐅᑉᐱᐊᑐᐃᓐᓇᒨᓕᕐᓗᖓᓗ, ᑕᑯᓂᐊᕐᓗᖓ ᐃᓕᓐᓂᐊᑎᒃᑲᓂᒃ ᓂᑯᕐᕋᑎᓪᓗᒋᑦ ᐃᓂᒋᖃᑦᑕᓯᒪᔭᕋᓂ ᐃᓕᓐᓂᐊᑎᑦᓯᔨᒋᔭᐅᑦᓱᖓ ᑖᒃᑯᓄᖓ. […] ᐃᓕᓐᓂᐊᑎᒃᑲᓂᒃ ᐅᓪᓗᕆᐊᓄᑦ ᑎᑭᐅᑎᒐᓱᐊᖁᔨᕗᖓ.  ᐱᓂᐊᕐᑎᖑᖁᔭᒃᑲ ᑲᕙᒪᓂᑦ, ᐱᖁᔭᓐᓂᐊᑎᖕᖑᓗᑎᒃ, ᓇᖕᒥᓂᖅ ᖄᖏᕐᓂᑯᓕᐅᕐᑎᖑᕐᓗᑎᒃ… ᓱᒧᓪᓖ ᑌᒣᒐᔭᖕᖏᓚᑦ?  ᓂᕆᐅᒍᒪᒐᓗᐊᕐᑐᖓ ᐊᐅᓪᓚᓗᑯᐊᐱᖃᑦᑕᕈᓐᓀᓂᑦᓴᖏᓐᓂᒃ ᒪᓐᑐᔨᐊᒧᑦ.

ᐃᓅᖃᑎᒌᓐᓂᖅ ᓄᓇᓕᒻᒥ ᐊᒻᒪᓗ ᓱᓇᑐᐃᓐᓇᓂᒃ ᐊᒥᕐᖄᖃᑎᒌᓲᖑᓂᖏᑦ (ᐃᖃᓗᑦᑐᒍᓪᓘᒧᓪᓗ) ᑕᒪᒃᑯᐊ ᐱᑦᔪᑎᒋᑦᓱᒋᑦ ᒪᕆ-ᓗᐄᔅ ᑲᖏᕐᓱᒥ ᐅᖓᓕᕐᓯᒪᓚᕿᒍᑎᖏᑦ ᐃᕐᙯᓇᕐᑐᖁᑎᒋᑦᓱᒋᓗ ᓄᓇᑐᖃᕐᒥᓄᑦ ᑳᒥᕉᓐᒧᑦ…ᓄᓇ ᐅᑎᕐᕕᒋᕋᑕᕈᒪᔭᕋᓗᐊᖓ ᓯᕗᓂᕐᒥ.