ᐱᔭᖃᕋᓱᑦᓱᑕ ᐊᑎᕐᒥᒃ ᑮᓇᕐᑕᓰᒋᐊᒥᒃ ᑲᑎᕕᒃ ᐃᓕᓴᕐᓂᓕᕆᓂᐅᑉ ᐱᓇᓱᑦᑎᖏᓐᓂᒃ, ᐊᑐᐊᒐᑦᓴᓕᐅᕐᓂᒥᒃ ᐱᓇᓱᖃᑎᒌᑦᑐᖁᑎᕗᑦ ᐃᓱᒪᑕᓚᐅᔪᕗᑦ ᐱᕙᓪᓕᐊᑎᑦᓯᒍᑎᖃᕐᑐᓴᐅᓂᕐᒥᒃ ᓄᑖᒥᒃ ᕿᒥᕐᕈᐊᑎᒍᑦ ᑕᑯᔭᐅᕙᓐᓂᐊᓕᕐᑎᓗᓯ, ᐱᕙᓪᓕᐊᓯᒪᓂᓯᓗ ᐱᔭᕆᐅᕈᑎᒋᓯᒪᔭᓯᓗ. ᖃᑦᓯᐅᒐᓗᐊᕐᐸᑕ ᐱᑦᔪᔨᓂᖃᕐᕕᒋᓯᒪᓕᕐᑕᑎᑦ ᐊᕐᕌᒍᑦ, ᖃᐅᔨᒋᐊᓪᓚᒍᒪᕗᒍᑦ ᐃᓕᓐᓂᒃ.

ᑖᒃᑯᓇᓂ ᐊᓪᓚᑕᑦᑎᓂ, ᖃᐅᔨᓚᖓᕗᑎᑦ ᐆᒧ ᑳᕝᕕᒥᒃ ᐊᐱᕐᓱᓚᐅᔪᔭᑦᑎᓂᒃ ᑕᕐᖀᓂ ᒪᕐᕈᐊᐱᑐᐃᓐᓈᓂ ᓄᓇᕕᒻᒦᓕᕐᑎᓗᒍ.

ᒫᓂᑑᐸᒥᑦ ᓄᓇᕕᒻᒧᑦ – ᐊᐱᕐᓱᓂᕐᓂᖅ ᐆᒧ ᑲᕝᕕᒥᒃ ᑕᕐᕋᒥ ᐃᓕᓐᓂᐊᑎᑦᓯᔨᑖᕐᖃᒥᕐᒥᒃ

ᐃᓕᓐᓂᐊᑎᑦᓯᔨ ᐱᓯᒪᑦᓱᓂ ᒫᓂᑑᐸᒥᑦ ᐃᓕᓐᓂᐊᑎᑦᓯᔨᐅᕕᒋᓯᒪᔭᒥᓂᒃ ᖃᑦᓯᑐᐃᓐᓇᓂᒃ ᐅᑭᐅᓕᓐᓂᒃ. ᐆᒧ ᒫᓐ ᐃᓕᓐᓂᐊᑎᑦᓯᔨᐅᓕᕐᖁᖅ ᓄᓇᕕᒻᒥᐅᑦ ᐅᕕᒃᑲᖏᓐᓂᒃ (ᐅᑭᐅᓕᓐᓂᒃ 7 – 8-ᓂᒃ) ᐃᓱᒻᒪᓴᕐᕕᒃ ᐃᓕᓐᓂᐊᕕᒻᒥ ᖁᐊᕐᑕᒥ.

ᐊᐱᕐᓱᑎ: ᑌᒪᓖᑦ ᑎᑭᓚᐅᕐᓯᒪᓚᐅᔪᖕᖏᓇᕕᑦ ᓯᕗᓂᖓᒍᑦ, ᖃᓄᖅ ᑲᑎᕕᒃ ᐃᓕᓴᕐᓂᓕᕆᓂᕐᒥᒃ ᖃᐅᔨᓐᓂᕿᑦ?

ᐆᒧ ᑲᕝᕕ: ᐃᓕᓐᓂᐊᓯᒪᕗᖓ ᐋᑐᒑᑉ ᐃᓕᓐᓂᐊᕕᕐᔪᐊᖓᓂ ᐃᓕᓐᓂᐊᕇᕐᑎᓗᖓᓗ ᑲᑎᕕᒃ ᐃᓕᓴᕐᓂᓕᕆᓂᖅ ᑌᑲᓃᓚᐅᔪᕗᖅ, ᐃᓕᓐᓂᐊᕕᕐᔪᐊᒥ, ᐃᓕᓂᐊᑎᑦᓯᔨᑦᓴᓯᐅᕐᓱᓂ. ᐃᓚᓐᓈᒪ ᐃᓚᖓᑦ ᑲᑎᕕᒃ ᐃᓕᓴᕐᓂᓕᕆᓂᕐᒧᑦ ᐊᐱᕐᓱᑕᐅᓚᐅᔪᖅ ᑭᖑᓂᐊᒍᓪᓗ ᐱᓇᓱᒐᕐᑖᓱᓂ. ᑌᑲᓂᓕ ᐅᓇᒻᒥᓱᓐᓂᐅᔭᓚᐅᔪᖕᖏᑐᖓ. [ᐃᓚᓐᓈᕋᓄᑦ] ᐅᖃᐅᑎᔭᐅᓚᐅᔪᖓ ᐃᒣᓕᔭᐅᑦᓱᖓ, “ᐋ, ᐊᓕᐊᓇᕐᖁᖅ ᑕᒫᓂ, ᐊᑏᓕ ᑕᑯᓂᐊᓚᐅᓛᕐᙯᑦ”

ᐃᓚᒃᑲ ᑳᑦᑎᓅᒥᐅᑦ. ᑌᒣᒻᒪᑦ ᒫᓂᑑᐸᒥ ᐱᓇᓱᑦᓱᖓ, ᐊᓂᕐᕋᓚᐅᕐᑐᑫᓐᓇᕈᒪᓕᑐᐊᕋᒪ ᐃᓚᒃᑲᓂᒃ ᑕᑯᔭᕐᑐᓗᖓ, ᒪᕐᕉᓂᒃ ᖃᖓᑦᑕᐅᑎᑦᓴᓯᒋᐊᖃᓱᖑᒐᒪ. ᐃᓚᓐᓈᒪ ᑭᓯᐊᓂ ᑭᐅᓚᐅᔪᔮᖓ ᐃᒫᒃ “ᑭᓯᐊᓂᓕ ᒫᓂ ᐊᑯᓕᓲᑦ ᖃᖓᑦᑕᐅᑎᑦᑎᓂᒃ.” ᑌᒣᒻᒪᑦ ᐱᓇᓱᒐᓱᓯᓚᕿᓚᐅᔪᕗᖓ.

ᐅᖃᕐᑐ ᐃᒣᓕᑦᓱᓂ ᐃᓱᒻᒪᓴᕐᕕᒃ ᐃᓕᓐᓂᐊᕕᐅᑉ ᐱᓇᓱᖃᑎᒌᑦᑐᖁᑎᖏᑦ ᑐᖕᖓᓇᕐᑐᒪᕆᐅᔪ ᐱᓇᓱᖃᑎᖃᑦᓯᐊᖃᑦᑕᓱᑎᓪᓗ ᑌᒪᖕᖓᑦ ᑎᑭᓚᐅᔪᒐᒪᓂᑦ:

ᑎᑭᓚᐅᔪᑦᓱᖓ ᐊᐅᒡᒍᓯᒥ, ᐅᖃᕐᑐᖅ ᐆᒧ ᓱᖏᐅᓯᓴᖏᓐᓇᖁᖓ ᐃᓕᓐᓂᐊᑎᑦᓯᔨᐅᒋᐊᒥᒃ: “ᐋ, ᐋ, ᑌᒣᑉᐳᖅ ᑕᒐ ᑭᓯᐊᓂ ᐃᓕᓐᓂᐊᑎᑦᓯᒍᑎᑦᓴᓯᐊᒻᒪᕆᓐᓂᒃ ᐱᑕᓕᒃ [Nunavik-IcE]. ᕿᓂᕐᕆᕕᒋᓱᒻᒪᕆᒐ [Nunavik-IcE] ᐊᓪᓚᓯᒪᔪᖕᖑᐃᒍᑎᓯᒪᔪᓯᐅᒪᑦᓱᖓ ᐊᒻᒪᓗ ᐃᓕᓐᓂᐊᑎᑦᓯᒍᑎᑦᓴᓯᐅᕐᓱᖓ. ᑕᒃᑲᓂ ᐃᓕᓐᓂᐊᕈᑎᑕᖃᕐᒥᔪᑦ…ᑖᒃᑯᓄᖓ ᐃᓘᓐᓇᖏᓐᓄᑦ ᐸᕐᓇᓱᖓ ᐃᑲᔪᕐᑕᐹᓗᓱᖑᔪᖓ.
[…]ᐃᓕᓐᓂᐊᑎᑦᓯᕕᒐᓂᓕ, ᐃᓚᖓᓂᒃ ᐱᔭᕐᓂᓕᐅᒥᔭᓲᖅ, ᑌᒣᓕᑐᐊᕐᒪᑦ ᐃᓕᓐᓂᐊᑎᑦᓯᒍᑎᒃᑲᓂᒃ ᓄᕐᖃᑫᓐᓇᕆᐊᖃᓱᖑᔪᖓ. 45-ᒥᓇᑦᓯᓂ ᐃᓱᒪᒐᓱᓐᓂᖃᕐᓂᖅ ᓈᒻᒪᑐᖅ ᐅᖓᑖᓄᖕᖏᑐᖅ […] ᑌᒣᓕᑐᐊᕋᑦᑕ, ᐃᓕᓐᓂᐊᑏᑦ ᓈᓚᒍᒪᓂᖃᑦᓯᐊᖏᑦᑐᕈᑐᐊᕐᒪᑕ ᐃᓕᓐᓂᐊᑏᓪᓗ ᑕᖃᒍᓇᐅᓕᑐᐊᕐᒪᑕ…ᑕᑯᓐᓇᑎᓚᐅᕐᑐᓲᒃᑲ Youtube-ᒦᑐᓂᒃ “ᑌᒣᓗᖃᑎᒋᒌᑐᕋᒃᑭᓗ ᐃᓕᓐᓂᐊᒐᖏᓐᓄᑦ ᐅᑎᕐᑎᓯᒻᒥᓱᒋᑦ!”

ᐆᒧᒥ ᑲᑎᓯᓚᐅᔪᔪᒍᑦ, ᕿᓂᕐᓗᒍ ᐃᓕᓐᓂᐊᑎᑦᓯᒍᑎᑦᓴᓂᒃ ᓄᑖᓂᒃ ᐃᓕᓐᓂᐊᑎᒥ ᐃᓕᓐᓂᐊᓚᖓᔭᖏᓐᓂᒃ. ᐃᓕᓐᓂᐊᑎᒥᓂᒃ ᐱᔪᕆᒪᒍᑎᓕᐹᓗᓚᐅᔪᖅ ᐃᒫᓪᓗ ᓂᓪᓕᕈᑎᒋᑦᓱᒋᑦ. “ᐃᓕᓐᓂᐊᑏᑦ ᐃᓚᖏᑦ ᐃᓕᓐᓂᐊᓯᑎᒻᒪᕇᑦ ᐃᓕᓐᓂᐊᑎᑦᓯᐊᑦ. ᑕᓯᐅᕐᓯᔭᐅᑦᓯᐊᑐᐊᕋᒥᒃ ᐃᑉᐱᒋᔭᐅᑦᓯᐊᓱᑎᒃᓗ…ᐃᓕᑦᓯᒍᐊᕐᑐᒪᕇᑦ.”

ᐃᓕᓐᓂᐊᑎᑦᓯᔨᓂᒃ ᑎᑭᔨᐊᑦᑎᓂᒃ ᓂᕆᐅᕝᕕᖃᕖᖕᖓᓱᖑᕗ ᑎᑭᓲᖑᑦᓱᑎᓪᓗᒪᑕ ᐱᔪᑦᓴᐅᔮᕐᓱᑎᒃ. ᐅᒨ ᑐᖕᖓᓱᑦᓯᐊᕆᑦ ᖁᐊᕐᑕᒥ!