ᑲᑎᕕᒃ ᐃᓕᓴᕐᓂᓕᕆᓂᕐᒥ ᐱᔭᕇᕈᑎᑖᕐᑐᑦ ᐊᒥᓲᓂᕐᐹᖑᒋᐅᕐᑐᑦ ᓄᓇᒃᑰᔫᕐᓚᓂᒃ ᐊᖁᑦᑏᑦ

2019 | 05 | 6
ᐅᓂᒃᑳᑦ

ᐃᓕᓴᕐᓂᓕᕆᓂᖅ ᐅᐱᒍᓱᑉᐳᖅ ᖃᐅᔨᑎᑦᓯᒋᐊᒥᒃ ᐱᔭᕇᕈᑎᑖᕋᑖᓚᐅᕐᑐᓂᒃ ᖁᓕᓪᓗ ᒪᕐᕈᓗᓂᒃ ᐃᓕᓐᓂᐊᑎᓂᒃ ᐱᔭᕇᓚᐅᕐᑐᐃᑦ 900-ᓂᒃ ᑫᕙᓪᓚᒍᓯᕐᓂᒃ ᐱᒋᐅᕐᓴᑎᑕᐅᓂᕐᒥᒃ ᐃᓚᒋᔭᐅᑎᓪᓗᒍ ᓄᓇᒃᑰᔫᕐᓚᓂᒃ ᐊᖁᑦᑎᐅᓂᕐᒧᑦ ᐃᓄᒻᒪᕇᑦ ᐃᓕᓐᓂᐊᑎᑕᐅᓂᖏᑦ ᐊᒻᒪᓗ ᐱᓇᓱᒐᕐᒧᑦ ᐱᒋᐅᕐᓴᑎᑦᓯᓂᕐᒧᑦ ᐃᓕᓐᓂᐊᑎᑦᓯᒍᑎᖏᓐᓂ.

“ᑖᒃᑯᐊ ᐊᒥᓲᓂᕐᐸᐅᒋᐅᕐᑐᑦ ᐱᔭᕇᕈᑎᑖᓱᓂ,” ᐅᖃᕐᑐᖅ ᑌᕝ ᒪᒃᒪᓚᓐ, ᑐᑭᒧᐊᑦᑎᓯᔨ ᐃᓄᒻᒪᕇᑦ ᐃᓕᓐᓂᐊᑎᑕᐅᓂᖏᑦ ᐊᒻᒪᓗ ᐱᓇᓱᒐᕐᒧᑦ ᐱᒋᐅᕐᓴᑎᑦᓯᓂᕐᒧᑦ ᐱᓇᓱᕝᕕᖓᓂ. “ᖃᐅᔨᒪᓂᕐᒥᒃ ᐊᒻᒪᓗ ᐱᒍᓐᓇᓯᓂᕐᒥᒃ ᐱᒐᓱᐊᒻᒪᕆᖃᑦᑕᓚᐅᕐᓂᖏᑦ ᑖᒃᑯᐊ ᐃᓕᓐᓂᐊᑏᑦ ᐱᒍᑦᔨᔪᑦ ᐱᒍᒪᔭᐅᓂᖏᓐᓂᒃ ᓄᓇᕕᒻᒥ ᐱᓇᓱᒐᕐᓄᑦ,” ᐅᖃᕆᐊᓪᓚᑐᖅ. ᐱᔭᕇᕈᑎᑖᕐᑎᑕᐅᓚᐅᕐᑐᑦ ᐃᓄᑦᔪᐊᒥ ᒫᑦᔨ 15-ᖑᑎᓪᓗᒍ ᓄᓇᕕᒻᒥ ᐱᒋᐅᕐᓴᕕᖓᓂ ᐃᓄᒻᒪᕇᑦ ᐃᓕᓐᓂᐊᕕᖓᓂ.

ᐊᒥᓱᓂᒃ ᐱᓇᓱᕝᕕᑖᕈᓐᓇᑐᑦ ᓇᒻᒥᓂᖅ ᐱᒋᔭᐅᔪᓂ ᐊᒻᒪᓗ ᓄᓇᓕᓐᓂ ᑲᕙᒫᐱᒃᑯᖏᓐᓄᑦ ᑖᒃᑯᓄᖓ ᐱᔭᕇᕈᑎᑖᕐᑐᓄᑦ ᓄᓇᒃᑰᔫᕐᓚᓂᒃ ᐊᖁᑦᑎᐅᓂᕐᒧᑦ. ᐅᖄᖃᑎᖃᓚᐅᕐᑐᒍᑦ ᐃᓓᓴ ᐅᕿᑦᑐᒥᒃ, ᑲᒪᔨᒋᔭᐅᔪᒥᒃ ᐃᓄᐃᑦ ᐱᓇᓱᑦᑎᑖᕆᔭᐅᓂᖏᓐᓄᑦ ᐊᒻᒪᓗ ᐱᒋᐅᕐᓴᑎᑕᐅᓂᖏᓐᓄᑦ ᐅᔭᕋᓐᓂᐊᑎᓄᑦ Canadian Royalties-ᑯᓐᓄᑦ, ᐊᒻᒪᓗ ᐅᖃᓚᐅᕐᓱᓂ ᐱᔭᕇᕈᑎᑖᕐᑐᑦ ᓄᓇᒃᑰᔫᕐᓚᓂᒃ ᐊᖁᑦᑎᐅᓂᕐᒧᑦ ᐃᓕᓐᓂᐊᓂᕐᒥᒃ ᐱᐅᔪᒻᒪᕆᐅᒋᐊᖏᓐᓂᒃ ᐱᓇᓱᑦᑎᑖᕆᔭᐅᓗᑎᒃ ᐱᓇᓱᕝᕕᐅᔪᓄᑦ ᐅᔭᕋᓐᓂᐊᓂᕐᒥ. “Canadian Royalties-ᖁᓐᓂᑦ, ᐱᒍᒪᖏᓐᓇᓲᖑᔪᒍᑦ ᐱᓇᓱᑦᑎᑖᕆᐊᒥᒃ ᐱᔭᕇᕈᑎᑖᕐᓯᒪᔪᓂᒃ ᑖᑦᓱᒥᖓ ᐃᓕᓐᓂᐊᑕᐅᓲᒥᒃ,” ᐅᖃᕐᑐᖅ.

“ᓄᓇᒃᑰᔫᕐᓚᓂᒃ ᐊᖁᑦᑎᐅᓂᖅ ᐊᖑᑎᕙᓪᓗᓄᑦ ᐱᓇᓱᒐᕐᑖᕆᔭᐅᓲᖑᕗᖅ. ᐅᐱᒍᓱᒻᒪᕆᑦᑐᖓ ᐱᒍᓐᓇᓯᐊᖃᑦᑕᓂᑦᑎᓂᒃ ᐱᒍᒪᓕᕐᑎᓯᒋᐊᒥᒃ ᐊᒻᒪᓗ ᐱᔭᕇᕈᑎᑖᕐᑐᓂᒃ ᐊᕐᓇᓂᒃ ᐱᒋᐊᓚᐅᕐᓯᒪᑎᓪᓗᑕ ᑖᑦᓱᒥᖓ ᐃᓕᓐᓂᐊᑎᑦᓯᒍᑎᒥᒃ,” ᐅᖃᕐᑐᖅ ᒫᒃᒪᓚᓐ. ᑖᒃᑯᓇᓂ ᐱᔭᕇᕐᑐᓂ ᖁᓕᓪᓗ ᒪᕐᕈᓗᓂ, ᒪᕐᕉᒃ ᐊᕐᓈᒃ. “ᓯᕗᓪᓕᐹᒥ ᐱᓇᓱᐊᖃᑎᖃᕐᓱᑕ ᐃᓕᓴᕐᓂᓕᕆᓂᕐᒥᒃ ᐃᓕᓐᓂᐊᑎᑦᓯᓂᕐᒥᒃ ᓄᓇᒃᑰᔫᑐᐃᓐᓇᓂᒃ ᐊᖁᒍᓐᓇᐅᑎᒥᒃ ᐳᕐᑐᓂᕐᓴᒋᐊᒧᑦ ᐱᓇᓱᑦᑎᓄᑦ ᐊᖁᒍᓐᓇᐅᑎᒧᑦ Class 5-ᓚᔭᐅᔪᒧᑦ. ᕿᑎᕐᖃᓗᐊᖏᑦ ᐃᓕᓐᓂᐊᕆᐊᕐᑐᑦ ᐊᕐᓇᐅᓯᒪᔪᑦ,” ᐊᐅᓚᔨᓂᕐᒥᓂᒃ ᐅᖃᕐᑐᖅ ᐅᕿᑦᑐᖅ. ᐅᖃᕐᓱᓂᓗ ᐱᓇᓱᐊᓕᕇᕐᑐᓄᑦ ᑕᒃᑲᓂ, Class # ᐅᕝᕙᓘᓐᓃᑦ Class 1-ᒥᒃ ᐊᖁᒍᓐᓇᐅᑏᑦ ᐱᕙᓪᓖᓚᕆᒍᓐᓇᑐᑦ ᐱᐅᓯᐅᒥᑎᑦᓯᓗᑎᒃ ᑮᓇᐅᑦᔭᓵᖏᓐᓂᒃ ᐊᒻᒪᓗ ᐱᓇᓱᕝᕕᖓᑕ ᖃᓄᐃᑦᑑᓂᖓᓂᒃ. “ᐅᓐᓂᑑᑦᔨᓚᕆᑦᑐᖓ ᐊᕐᓇᓂᒃ ᐃᓱᒪᖁᔨᑦᓱᖓ ᐱᓇᓱᒐᕐᒥᒃ ᓄᓇᒃᑰᔫᕐᓚᓂᒃ ᐊᖁᑦᑎᐅᓂᕐᒥᒃ. ᐅᖃᓚᕕᒋᒍᓐᓇᖃᑦᓯᒋ ᖃᐅᔨᒋᐊᑦᓯᐊᕈᒪᒍᕕᑦ ᐅᕝᕙᓘᓐᓃᑦ ᐱᒍᒪᓂᖃᕈᕕᑦ ᑕᒃᑲᓂ ᐱᓇᓱᒐᕐᒥ. ᐱᓇᓱᑦᑎᑖᖏᓐᓇᓲᖑᔪᒍᑦ ᒫᓐᓇᐅᔪᒧᑦ ᐅᕝᕙᓘᓐᓃᑦ ᓯᕗᓂᕐᒧᑦ ᐱᓇᓱᒐᕐᓄᑦ,” ᐅᖃᕐᑐᖅ ᐅᕿᑦᑐᖅ.

ᓄᓇᒃᑰᔫᕐᓚᓂᒃ ᐊᖁᑦᑎᐅᒋᐅᕐᓴᓂᕐᒧᑦ ᐃᓕᓐᓂᐊᓂᖅ ᖁᓕᓪᓗ ᓯᑕᒪᐅᔪᕐᑐᓗᓐᓂᒃ ᐊᑐᕐᓱᑎᒃ ᐃᓕᓐᓂᐊᕈᑎᓂᒃ ᐱᒋᐅᕐᓴᑎᑦᓯᓲᑦ, ᐃᓕᓐᓂᐊᑎᑦᓯᒍᑎᐅᑦᓱᑎᒃ ᐱᖓᓱᓂᒃ ᑲᔪᓯᔪᓂᒃ ᐃᓕᓐᓂᐊᓇᕐᓂᒃ. ᑕᒃᑲᓂ ᐊᕐᕌᒍᒥ, ᐃᓕᓐᓂᐊᑎᑦᓯᒍᑎ ᐃᓕᓐᓂᐊᑎᑦᓯᓂᐅᔪᕕᓂᖅ ᐃᓄᑦᔪᐊᒥ, ᐊᐅᐸᓗᒃ ᐊᒻᒪᓗ ᑲᖏᕐᓱᐊᓗᑦᔪᐊᒥ ᐱᓇᓱᐊᖃᑎᖃᕐᓱᑎᒃ ᓄᓇᓕᓐᓂᒃ ᐊᑯᓐᓂᖏᓐᓂ ᒣ ᐊᒻᒪᓗ ᓅᕕᒻᐱᕆ 2018-ᒥ. ᐃᓚᒋᐊᕈᑎᐅᑎᓪᓗᒍ, ᐃᓕᓐᓂᐊᓂᕐᒧᑦ ᐱᓇᓱᐊᕐᓱᑎᒃ, ᐃᓕᓐᓂᐊᑎᑦᓯᓂᖅ ᐱᑕᖃᕐᑎᑕᐅᓲᖑᒻᒥᔪᖅ ᐊᑐᕐᓱᑎᒃ ᓱᓕᔫᔮᕐᑎᓯᔪᒥᒃ ᐊᖁᒋᐅᕐᓴᐅᑎᒥᒃ. ᑖᓐᓇ ᐱᕕᖃᕐᑎᓯᓲᖅ ᐃᓕᓐᓂᐊᑎᓂᒃ ᓱᖏᐅᓯᓴᕐᑎᓯᑦᓱᓂ ᐊᐅᓚᐅᑎᓂᒃ ᐊᑐᕆᐊᓚᐅᖕᖏᓂᖏᓐᓂ.

ᓄᓇᒃᑰᔫᕐᓚᓂᒃ ᐊᖁᒋᐅᕐᓴᓂᕐᒧᑦ ᐃᓕᓐᓂᐊᓂᖅ ᐊᑐᐃᓐᓇᐅᓲᖑᓕᕐᑐᖅ ᐊᕐᕌᒍᓂ ᑕᓪᓕᒪᐅᓕᕐᑐᓂ ᐃᓚᐅᑦᓱᓂ ᐃᓄᒻᒪᕇᑦ ᐃᓕᓐᓂᐊᑎᑕᐅᓂᖏᑦ ᐊᒻᒪᓗ ᐱᓇᓱᒐᕐᒧᑦ ᐱᒋᐅᕐᓴᑎᑕᐅᓂᕐᒧᑦ ᐱᓇᓱᒐᑦᓴᑐᐃᓐᓇᓄᑦ ᐱᔭᕆᐅᕐᓴᑎᑕᐅᒍᑎᖃᕐᓂᒧᑦ ᐱᒍᑦᔨᓂᕐᒧᑦ ᐱᑕᖃᕐᑎᓯᓂᖅ. ᐃᓕᓐᓂᐊᑎᑦᓯᒍᑎ ᓄᐃᑎᑕᐅᔪᕕᓂᖅ ᐱᒍᒪᓂᖏᓐᓄᑦ ᓄᓇᕕᒻᒥ ᑎᒥᐅᔪᐃᑦ ᐊᒻᒪᓗ ᐱᓇᓱᕝᕖᑦ ᐊᒻᒪᓗ ᑮᓇᐅᔭᕐᑎᒍᑦ ᐃᑲᔪᕐᑕᐅᒍᑎᖃᕐᓱᓂ ᑲᑎᕕᒃ ᓄᓇᓕᓕᒫᑦ ᑲᕙᒪᒃᑯᖏᓐᓂᑦ. 2014–2015-ᒥᓂᑦ ᐃᓕᓐᓂᐊᓇᐅᑉ ᐊᕐᕌᒍᖓᓂ, ᑲᑎᑦᓱᑎᒃ ᐅᓄᕐᓂᓖᑦ 55-ᓂᒃ ᓄᓇᕕᒻᒥᐅᑦ ᐱᔭᕇᕈᑎᑖᕐᓯᒪᓕᕐᑐᑦ ᑖᑦᓱᒥᖓ ᐃᓕᓐᓂᐊᑎᑦᓯᒍᑎᒥᒃ.

ᖃᐅᔨᒋᐊᑦᓯᐊᕈᒪᒍᕕᑦ ᓄᓇᒃᑰᔫᕐᓚᓂᒃ ᐊᖁᒋᐅᕐᓴᓂᕐᒧᑦ, ᑕᑯᒋᐊᕈᓐᓇᖁᑎᑦ ᖃᕆᑕᐅᔭᑎᒍᑦ ᓄᐃᑕᑎᑦᓯᕕᕗᓐᓂ.