ᑰᔾᔪᐊᖅ ᓇᔪᕐᑕᐅᓯᕗᖅ ᓄᓇᕕᒻᒥ ᓄᓇᓕᓕᒫᑦ ᐃᓱᒪᑕᕈᑎᓂᒃ ᑕᑯᑎᑦᓯᓂᖓᓄᑦ

2015 | 02 | 23
ᑐᓴᕋᑦᓴᖅ

ᑰᔾᔪᐊᖅ, ᓄᓇᕕᒃ, ᑯᐯᒃ (ᕕᕈᐊᕆ 23, 2015) – ᓄᓇᕕᒻᒥ ᓄᓇᓕᓕᒫᑦ ᐃᓱᒪᑕᕈᑎᓂᒃ ᑕᑯᑎᑦᓯᓂᖓᑦ ᐊᑐᕐᑕᐅᓚᖓᓯᔪᖅ ᕕᕈᐊᕆ 24-ᒥ ᐊᒻᒪᓗ 25-ᒥ, 2015-ᒥ, ᐱᑕᑲᓪᓚᐅᑉ ᐃᓕᓐᓂᐊᕕᖓᓂ ᑰᔾᔪᐊᒥ. ᑖᒃᑯᓈᓂ ᐅᓪᓘᓂ ᒪᕐᕉᓂ, ᐃᑲᔪᕐᑎᒌᑦᑎᑐᑦ 20 ᒥᑦᓵᓃᑦᑐᑦ ᐃᓅᓱᑦᑑᓱᑎᒃ ᐃᓱᒪᑕᕐᑎᐊᐲᑦ ᐱᓇᓱᑦᑕᕕᓂᕐᒥᓂᒃ ᑕᑯᔭᐅᑎᑦᓯᒋᐊᕐᑐᓛᕐᑐᑦ ᐱᑦᓯᐊᓯᒪᔪᕐᓂᐊᑎᓄᑦ.

ᑕᒡᒐᓂ ᐊᕐᕌᒍᒥ, ᓄᓇᕕᒻᒥ ᓄᓇᓕᓕᒫᑦ ᐃᓱᒪᑕᕈᑎᓂᒃ ᑕᑯᑎᑦᓯᑎᓂᒐᑦ ᐊᑐᕐᑕᐅᓚᖓᔪᖅ ᐃᓕᓐᓂᐊᕕᓐᓄᑦ ᐅᖓᕙᐅᑉ ᓯᓂᖓᓂ. ᓄᓇᓖᑦ ᐃᓚᐅᔪᑦ ᒪᑯᐊᖑᔪᑦ ᑲᖏᕐᓱᐊᓗᒃᔪᐊᖅ, ᑰᔾᔪᐊᖅ, ᑕᓯᐅᔭᖅ, ᐊᐅᐸᓗᒃ, ᑲᖏᕐᓱᒃ ᐊᒻᒪᓗ ᖁᐊᕐᑕᖅ. ᐊᕐᕌᒍ, ᓄᓇᕕᒻᒥ ᓄᓇᓕᓕᒫᑦ ᐃᓱᒪᑕᕈᑎᓂᒃ ᑕᑯᑎᑦᓯᓂᖓᑦ ᑲᑎᕐᓱᐃᒍᑕᐅᒍᒫᕐᑐᖅ ᐃᓕᓐᓂᐊᕕᓐᓂᒃ ᑕᓯᐅᔭᕐᔪᐊᒥ (2015-2016).

“ᑖᓐᓇ ᓄᓇᓕᓕᒫᓅᓕᖓᔪᖅ ᓇᓪᓕᐅᓂᕐᓱᓂᖅ ᐃᓱᒪᑖᕐᓇᑐᕋᑕᐅᕗᖅ ᐊᓕᐊᓱᑦᓴᖑᐊᕐᖁᒍᓪᓗ ᓇᔪᕐᑕᐅᓚᖓᒋᐊᒥᒃ ᑕᒪᑐᒧᖓ,” ᐅᖃᕐᖃᐅᔪᖅ ᓲᓯ ᖁᖏᐊᖅ, ᐊᖓᔪᕐᖄᖅ ᐱᑕᑲᓪᓚᐅᑉ ᐃᓕᓐᓂᐊᕕᖓᓂ. “ᐃᓕᓐᓂᐊᑏᑦ ᐱᔪᑦᓴᐅᔮᕐᑐᒪᕆᐅᕗᑦ ᑕᒪᑐᒥᖓ ᐱᔪᓐᓇᓯᒍᑎᒥᒃ ᖃᓄᐃᓘᖃᑎᖃᕐᓂᒥᒃ ᐃᓅᓱᑦᑑᒥᔪᓂᒃ ᐊᓯᖏᓐᓂ ᓄᓇᓕᓐᓂᒃ ᐃᓱᒪᑕᕈᑎᓂᒃ ᐊᓕᐊᖃᑎᒥᓂᒃ,” ᑌᒣᓕᒻᒥᓱᓂ.

ᐃᑲᔪᕐᑎᒌᑦ ᐃᒻᒧᐊᓂ ᓄᐃᑦᓯᔪᕕᓂᕐᓂ ᐱᓇᓱᐊᒐᕐᓂᒃ ᐱᑦᓯᐊᓯᒪᓂᕐᐹᓂᒃ, ᐃᓚᖏᑦ ᐆᑦᑐᕈᓐᓇᓯᓛᕐᑐᑦ ᓄᓇᕕᒻᒧᑦ ᑭᒡᒐᐅᓂᕐᒥᒃ ᑯᐯᒻᒥᐅᓕᒫᑦ ᑌᒣᓘᓕᕐᐸᑕ, 2015-ᒥ ᑯᐯᒻᒥ ᓄᓇᖃᕐᖄᓯᒪᔪᑦ ᐃᓱᒪᑕᕈᑎᓂᒃ ᑕᑯᑎᑦᓯᓂᖓᓂ (ᒫᑦᔨ 24-ᒥᒃ 26-ᒧᑦ, ᑳᓇᒍᐊᑭᒥ, ᑯᐯᒻᒥ).

ᐱᓕᐅᑎᔪᑦ ᖃᓄᐃᓕᖓᑦ ᐅᖃᕐᑕᐅᓛᕐᑐᖅ ᕕᕈᐊᕆ 25, 2015-ᒥ, ᐅᓐᓄᑯᑦ ᐅᒃᑯᐊᓯᓂᕐᒥᒃ ᐊᑑᑎᓚᖓᓕᕐᐸᑕ, ᑕᕐᕋᒥᐅᑦ ᓄᓇᓕᖓᑕ ᑰᔾᔪᐊᒥ ᐃᓗᕐᖁᓯᓕᕆᕕᖓᓂ.

ᑕᒡᒐᓂ ᐊᕐᕌᒍᒥ ᓄᑖᖑᓕᕐᒥᑎᓪᓗᒍ, ᐃᓕᓐᓂᐊᑏᑦ ᑭᓐᑕᑳᑕᓐᒥᒃ ᐱᒋᐊᕐᓱᒍ ᐳᕐᑐᓂᕐᒧᑦ 3-ᒧᑦ ᑎᑭᑦᓱᒍ ᐃᓚᐅᓛᓕᕐᒥᔪᑦ ᓄᑲᕐᓯᐊᐲᑦ ᐃᓱᒪᑕᕈᑎᓂᒃ ᑕᑯᑎᑦᓯᓂᖓᓄᑦ ᐅᓪᓛᑯᑦ ᕕᕈᐊᕆ 25-ᒥ. ᑖᓐᓇ ᐊᑦᔨᐅᖏᑦᑐᒥᒃ ᐊᑐᕐᑎᓯᒍᑎ ᐃᓚᖃᓛᕐᑐᖅ ᓄᐃᑕᑦᓯᓂᕐᒥᒃ ᐃᓕᓐᓂᐊᖃᑎᒌᑦ ᐱᓇᓱᑦᑕᕕᓂᖏᓐᓂᒃ ᐊᒻᒪᓗ ᐃᓚᐅᒍᑎᖏᓐᓂᒃ ᐊᒥᓱᐃᓂ ᐃᓱᒪᑕᕈᑎᒥᒃ ᐱᓇᓱᐊᕈᑎᓂ.

ᑐᑭᒧᐊᑦᑎᑕᐅᑎᓪᓗᒍ ᑲᑎᕕᒃ ᐃᓕᓐᓂᐊᓂᓕᕆᓂᕐᒥ ᐃᓕᓐᓂᐊᕈᑎᓂᒃ ᐱᒍᑦᔨᔨᓄᑦ, ᓄᓇᕕᒻᒥ ᓄᓇᓕᓕᒫᑦ ᐃᓱᒪᑕᕈᑎᓂᒃ ᑕᑯᑎᑦᓯᓂᖓᑦ ᐃᓱᐊᖁᑎᖃᓲᖑᒻᒥᔪᖅ ᑮᓇᐅᔭᓂᒃ ᑐᓂᕐᕈᓯᐊᓂᒃ ᑲᑎᕕᒃ ᓄᓇᓕᓕᒫᑦ ᑲᕙᒪᖓᓂᒃ.

ᐅᕙᒍᑦ ᒥᑦᓵᓄᑦ:

ᑲᑎᕕᒃ ᐃᓕᓐᓂᐊᓂᓕᕆᓂᖅ (KSB) ᐱᖕᖑᑎᑕᐅᓯᒪᔪᖅ 1975-ᒥ, ᔦᒻᔅ ᐯᒥ ᐊᒻᒪᓗ ᑯᐯᒃ ᑕᕐᕋᖓᓂ ᐊᖏᖃᑎᒌᒍᑎᐅᑉ ᐊᑖᒍᑦ. 1978-ᒥᓂᒃ, ᐱᒍᑦᔨᔨᑐᐊᖑᓯᒪᔪᖅ ᐃᓕᓐᓂᐊᑎᑦᓯᓂᒃᑯᑦ ᐱᒍᑦᔨᒍᑎᓂᒃ ᒪᓂᔪᓂᒃ ᓄᓇᕕᐅᑉ ᐃᓄᖏᓐᓄᑦ. ᐃᓕᓐᓂᐊᑎᑦᓯᒍᑏᑦ ᓴᓇᔭᐅᓯᒪᔪᑦ ᑲᑎᕕᒃ ᐃᓕᓐᓂᐊᓂᓕᕆᓂᕐᒧᑦ ᐃᓕᓐᓂᐊᑎᑦᓯᒍᑕᐅᕗᑦ ᐃᓕᓐᓂᐊᕕᓐᓂ ᓄᓇᕕᐅᑉ ᓄᓇᓕᖏᓐᓂ 14-ᓂ. ᐃᓄᒃᑎᑐᑦ ᓯᕗᓪᓕᐸᐅᑦᓱᓂ ᐅᖃᐅᓯᐅᔪᖅ ᐊᒻᒪᓗ ᐅᐃᒍᐃᑎᑐᑦ ᖃᓪᓗᓈᑎᑐᓪᓗ ᐅᖃᐅᓰᑦ ᑐᖓᓪᓕᐅᓱᑎᒃ. ᑐᑭᓯᒋᐊᕈᒪᒍᕕᑦ ᐅᕙᑦᑎᓂᒃ, ᑕᑯᒋᐊᕐᓗᑎᑦ ᖃᕆᑕᐅᔭᓄᑦ ᐅᒃᑯᐃᖔᕐᕕᑎᓐᓂᒃ ᐅᕙᓂ: www.kativik.qc.ca

— 30 —

ᑐᑭᓯᒋᐊᕈᒪᕈᕕᑦ, ᐅᕗᖓ ᐅᖃᕐᓗᑎᑦ:

ᔮᑦ ᑐᔅᓅ ᐱᐊᕐᓃ
ᑭᓇᒃᑯᑐᐃᓐᓇᓄᑦ ᑐᓴᐅᒪᖃᑎᒌᒍᑎᓕᕆᔨ
(514) 482-8220
publicrelations@kativik.qc.ca