ᐱᒋᐊᖕᖓᑎᑕᐅᓂᖓ ᐃᓄᒃᑎᑑᕐᓂᒥᒃ ᖁᕝᕙᕆᐊᕐᓯᒪᑎᑦᓯᓂᕐᒧᑦ ᐱᓇᓱᐊᕐᑕᐅᔪᒥᒃ

2015 | 09 | 15
ᑐᓴᕋᑦᓴᖅ

ᑰᑦᔪᐊᖅ, ᑯᐯᒻᒥ (ᓯᑎᐱᕆ 15, 2015) – ᐅᓪᓗᒥ, ᑲᑎᕕᒃ ᐃᓕᓐᓂᐊᓂᓕᕆᓂᖅ ᐊᓕᐊᓱᒃᑯᒃ ᑐᓴᕐᑎᓯᒍᑎᖃᕐᓂᒥᒃ ᐱᒋᐊᖕᖓᑎᑕᐅᓂᖓᓂᒃ ᐱᓇᓱᐊᕐᑕᐅᔫᑉ ᐃᓅᖃᑎᒃᑳ ᐅᖃᐅᓰᕐᓯᑌᓕᑕ !

“ᖁᕝᕙᕆᐊᕐᓯᒪᑎᑦᓯᓂᖅ ᑐᕌᖓᔪᖅ ᓄᓇᕕᒻᒥᐅᓕᒫᓄᑦ ᓇᓂᓕᒫᖅ”, ᐅᖃᕐᑐᖅ ᐅᔩᑕ ᓄᕙᓕᖕᖓᖅ ᑲᔪᓯᒃᑫᔨᐅᑉ ᐃᑲᔪᕐᑎᖓ ᑲᑎᕕᒃ ᐃᓕᓐᓂᐊᓂᓕᕆᓂᕐᒥ ᐱᓇᓱᖃᑎᐅᑦᓱᓂᓗ ᐱᒋᐊᖕᖓᑎᑕᐅᔪᒥᒃ.

ᑕᒪᓐᓇ ᖁᕝᕙᕆᐊᕐᓯᒪᑎᑦᓯᓂᖅ ᐊᑐᕐᓗᒍ, ᐃᓕᓐᓂᐊᓂᓕᕆᓂᖅ ᖃᐅᔨᒪᔭᐅᓂᕐᓴᕈᕐᑎᓯᒍᒪᕗᖅ ᐅᖃᐅᓯᐅᑉ ᐱᓪᓚᕆᐅᓂᖓᓂᒃ ᐊᓯᐅᔨᑦᑌᓕᓂᕐᒧᑦ. “ᐃᓕᓐᓂᐊᓂᓕᕆᓂᐅᑦᓱᑕ, ᐱᐊᕋᕐᓂᒃ ᐅᕕᒃᑲᓂᓪᓗ ᐱᓇᓱᖃᑎᖃᓲᖑᔪᒍᑦ ᓱᓕᓂᕃᒍᓐᓇᓱᑕᓗ ᐱᒻᒪᕆᐅᓂᖓᓂᒃ ᐃᓄᐃᑦ ᐃᓕᑦᓯᕙᓪᓕᐊᒋᐊᖃᕐᓂᖏᓐᓂᒃ ᐅᖄᒋᐊᖃᕐᓱᑎᓗ ᐅᖃᐅᓯᕐᖄᒥᓂᒃ ᐃᓕᓐᓂᐊᑎᖕᖑᓚᐅᕋᑎᒃ. ᐅᖃᐅᓯᖅ ᐃᓕᓐᓂᐊᕕᒻᒥ ᐃᓕᓐᓂᐊᑎᑦᓯᒍᑎᐅᓲᖅ, ᑭᓯᐊᓂ ᐊᓂᕐᕋᒥ ᐱᒋᐊᕐᑎᓲᕗᑦ, ᑐᖕᖓᕕᑦᓯᐊᖑᑦᓱᓂ ᐱᔭᕆᐊᑭᓐᓂᓴᐅᑎᑦᓯᓱᓂᓗ ᐃᓕᑦᓯᕙᓪᓕᐊᓂᓕᒫᓂᒃ,” ᐅᖃᕐᑐᖅ ᐅᔩᑕ.

ᐱᓇᓱᐊᕈᓯᐅᖃᑦᑕᓚᖓᔪᓂ, ᐃᓕᓐᓂᐊᓂᓕᕆᓂᖅ ᐁᑦᑐᑑᑎᖃᖃᑦᑕᓚᖓᔪᖅ ᐅᖃᐅᓯᕐᒥᒃ ᖁᕝᕙᕆᐊᕐᓯᒪᑎᑦᓯᐅᑎᓂᒃ ᐃᓕᓐᓂᐊᕕᓐᓄᑦ ᓄᓇᕕᒻᒥᓗ ᑲᕙᒫᐱᓕᒫᓄᑦ.

ᑖᓐᓇ ᐱᒋᐊᖕᖓᑎᑕᐅᔪᖅ ᓄᐃᑕᐅᓚᕿᓯᒪᔪᖅ ᐸᕐᓇᓯᒪᐅᑎᒃᑯᑦ ᑭᓪᓕᓯᓂᐊᖃᑦᑕᓚᐅᕐᑎᓗᒋᑦ ᓄᓇᕕᒻᒥᐅᑦ ᐅᖄᒍᑎᖃᖃᑦᑕᓚᐅᕐᑎᓗᒋᑦ ᐃᓱᒫᓘᑎᖃᕐᓂᒥᓂᒃ ᐅᖃᐅᓰᕐᓯᑌᓕᒋᐊᖃᕐᓂᒥᒃ ᐃᓄᒃᑎᑐᑦ ᐱᓪᓚᕆᐅᓂᖓᓂᒃ. ᐊᒻᒪᓗ, ᐃᓪᓕᕆᔭᕗᑦ ᑐᓴᕐᑎᓯᒍᑎᖏᑦ (ᐊᕙᑕᒃᑯᑦ 2012) ᐅᖃᕐᓱᑎᒃ ᓱᒋᐊᕈᑎᐅᑦᓴᐅᑎᒋᒋᐊᖃᓕᕐᓂᖓᓂᒃ ᐃᓄᒃᑎᑑᕐᓂᒥᒃ ᐅᖃᐅᓰᕐᓯᑌᓕᒪᓂᖅ.

ᐅᕙᑦᑎᓅᓕᖓᔪᑦ:

ᑲᑎᕕᒃ ᐃᓕᓐᓂᐊᓂᓕᕆᓂᖅ (KSB) ᐱᖕᖑᑎᑕᐅᓯᒪᔪᖅ 1975-ᒥ, ᔦᒥᓯ ᐯᑉ ᑯᐯᓪᓗ ᑕᕐᕋᖓᑕ ᐊᖏᖃᑎᒌᒍᑎᖓᑎᒍᑦ. 1978-ᒥᓂᑦ, ᐱᒍᑦᔨᔨᑐᐊᖑᓲᖑᓕᕐᑐᖅ ᐃᓕᓐᓂᐊᑎᑦᓯᓂᕐᒥᒃ ᓄᓇᕕᒻᒥᐅᓄᑦ. ᐃᓕᓐᓂᐊᕈᑏᑦ ᑐᕌᒐᖏᑦ ᐱᖕᖑᑎᑕᐅᓯᒪᔪᑦ ᑲᑎᕕᒃ ᐃᓕᓐᓂᐊᓂᓕᕆᓂᕐᒧᑦ ᐃᓕᓐᓂᐊᑎᑦᓯᒍᑎᐅᕗᑦ ᓄᓇᕕᐅᑉ ᐃᓕᓐᓂᐊᕕᖏᓐᓂ ᓄᓇᓕᓐᓂ 14-ᓂ, ᐃᓄᒃᑎᑐᑦ ᐅᖃᐅᓯᕐᖄᖓᓂ ᐊᒻᒪᓗ ᐅᐃᒍᐃᑎᑐᑦ ᖃᓪᓗᓈᑎᑐᓪᓗ ᐅᖃᐅᓯᐅᑉ ᐁᑉᐱᐅᑎᒋᔭᖏᓐᓂᒃ. ᑐᑭᓯᒋᐊᕐᕕᓴᖅ: www.kativik.qc.ca

— 30 —

ᑐᑭᓯᒋᐊᕈᒪᕈᕕᑦ, ᐅᖄᓚᕕᒋᓗᒍ:

ᔮᑦ ᑐᔅᓅ ᐱᐊᕐᓃ

ᑭᓇᒃᑯᑐᐃᓐᓇᓄᑦ ᑐᓴᐅᒪᖃᑎᒌᒍᑎᓕᕆᔨ

(514) 482-8220

publicrelations@kativik.qc.ca