ᐱᓇᓱᑦᑎᑕ ᑮᓇᖏᓐᓂᑦ ᑕᑯᔭᐅᑲᑦᑕᕈᓐᓇᓯᖁᔨᑦᓱᑕ ᑲᑎᕕᒃ ᐃᓕᓴᕐᓂᓕᕆᓂᕐᒥᒃ ᒪᑭᑕᑎᑎᑦᓯᖃᑕᐅᔪᓂᑦ, ᐊᑐᐊᒐᓕᐅᕐᑎᐅᓱᑕ ᓄᐃᑦᓯᒍᒪᒋᐊᒥᒃ ᐃᓱᒪᑖᓚᐅᔪᕗᒍᑦ ᐅᓂᒃᑳᑐᓂᒃ ᐱᓇᓱᑦᑎᓄᐊᖓᔪᓂᒃ ᓄᐃᑦᓯᕕᑦᓴᒥᒃ:  ᐊᓪᓚᓯᒪᔪᓂᒃ ᐃᓕᓐᓄᐊᖓᑦᓱᑎᒃ, ᑭᓇᐅᓂᕐᓂ, ᐃᓅᓯᕐᓂ ᐊᑐᕐᓯᒪᔭᕐᓃᕕᑦ, ᖃᒐᓪᓗᐊᑎᒋᑦ ᐱᓇᓱᐊᕐᓯᒪᒐᓗᐊᕈᕕᑦ ᖃᓄᐃᑦᑐᑐᐃᓪᓇᒥᓪᓘᓃᑦ ᐱᓇᓱᐊᕐᓯᒪᒐᓗᐊᕈᕕᑦ, ᐃᓕᓐᓂᑦ ᑐᑭᓯᔫᒥᒍᒪᑦᓱᑕ.

ᑕᕝᕙᓂ ᐊᑐᐊᕋᑦᓴᒥ, ᓗᐃᓴ ᖁᒫᓗᒃ ᐅᕝᕙᐅᒥᑦ ᑲᑎᓯᒋᐅᖁᔨᕗᒍᑦ, ᐊᑯᓂ ᐊᕐᒑᒍᓂ ᐊᒥᓱᐃᓂ ᐱᓇᓱᐊᕐᓯᒪᓕᕐᑐᒥᒃ ᐊᑦᔨᒌᖏᑐᓂ ᑕᑯᓐᓇᓯᒪᑦᓱᓂᓗᒍ ᑎᒥᖁᑎᕗᑦ ᐱᕙᓪᓕᐊᑎᓪᓗᒍ.

ᐃᓕᓴᕐᕕᒥ/ᐃᓕᓐᓂᐊᕕᒻᒥ ᐊᓪᓚᑎᕕᓂᐅᑦᓱᓂ ᑲᒪᔨᒻᒪᕆᖕᖑᓯᒪᔪᖅ ᐊᐱᕐᓱᑕᐅᔪᖅ ᓗᐃᓴ ᖁᒫᓗᒃ ᐅᕝᕙᐅᑦ

ᓗᐃᓴ ᖁᒫᓗᒃ ᐅᕝᕙᐅᑦ ᐱᓇᓱᓯᓚᐅᕐᓯᒪᕗᖅ ᑲᑎᕕᒃ ᐃᓕᓴᕐᓂᓕᕆᔨᒃᑯᓂ 1989ᒥ ᐊᓪᓚᑎᖕᖑᓱᓂ ᐃᓱᒻᒪᓴᕐᕕᒃ ᐃᓕᓐᓂᐊᕕᒻᒥ, ᖁᐊᕐᑕᒥ. ᕿᒣᓚᐅᕐᓯᒪᔪᖅ ᐃᓱᒻᒪᓴᕐᕕᒃ ᐃᓕᓐᓂᐊᕕᒻᒥ 1992ᒥ ᐃᓕᓐᓂᐊᕆᐊᓪᓚᕆᐊᕐᑐᓱᓂ ᐊᕐᒑᒍᓕᒫᒥ ᐊᓪᓚᑎᐅᓂᕐᒥᒃ ᑰᑦᔪᐊᒥ.

ᑌᒣᒐᓗᐊᕐᑎᓗᒍ, ᐃᓕᓵᕇᕈᑎᑖᕐᓯᒪᓕᕋᓗᐊᕐᓱᓂ ᐅᑎᑦᓴᐅᑎᒋᓚᐅᕐᓯᒪᑦᔭᖏᓪᓚᖅ ᑲᑎᕕᒃ ᐃᓕᓴᕐᓂᓕᕆᔨᒃᑯᓄᑦ. ᓄᓇᓕᐅᑉ ᐊᓯᐊᓄᑦ ᓅᒋᐊᓪᓚᓯᒪᒐᒥ, ᐊᖑᑎᖓ ᐱᓇᓱᒐᕐᑖᖃᒻᒥᒥᓄᑦ ᐊᐅᓚᑕᐅᑦᓱᓂ ᓅᑦᑎᓗᒍ  ᒪᓕᖔᓯᓚᐅᕐᓯᒪᒐᒥ. ᐅᑎᓕᓚᐅᕐᓯᒪᕗᖅ ᐱᓇᓱᒍᑦᔨᓯᓱᑦᓂ ᐃᓱᒻᒪᓴᕐᕕᒃ ᐃᓕᓐᓂᐊᔨᒻᒥ 1995ᒥ ᐊᒥᓲᐃᓂᓪᓗ ᐱᔭᑦᓴᓂᒃ ᑲᒪᒋᔭᖃᑦᓴᐅᑎᒋᓯᑦᓱᓂ:

“ᐱᓇᓱᒐᒃᑲ ᐊᒥᓲᓯᒪᔪᐃᑦ. ᐃᓕᓐᓂᐊᑎᓂᒃ ᐃᓱᐊᕐᓭᔨᐅᑦᓱᖓ; ᐊᓪᓚᕕᒻᒥ ᐊᐅᓚᑦᓯᔨᒥᒃ ᐃᑲᔪᕐᑎᐅᓯᒪᑦᓱᖓ ᐊᒻᒪᓗ ᑲᒪᔨᒻᒪᕆᐅᑉ ᐃᓂᖓ ᒪᓂᔭᐅᒻᒪᑦ ᑲᒪᔨᒻᒪᕆᐅᓯᓯᒪᕗᖓ ᐊᕐᒑᒍᓂ ᖁᓕᓪᓗ ᐊᑕᐅᓯᒥᕐᓗ.”

ᐅᖄᖃᑎᒌᖏᓐᓇᓱᒍ, ᐃᑉᐱᓇᓚᐅᔪᕗᖅ ᓗᐃᓴ ᑕᑯᓯᒪᓕᕆᐊᖓ ᐃᓱᐊᕆᔭᒥᓂᒃ ᐃᓕᓐᓂᐊᕕᐅᑉ ᐃᓗᐊᓂ, ᐃᑦᓯᕙᐅᑕᑯᑖᒥ ᐃᑦᓯᕙᒐᓱᐊᕐᓱᓂ. ᐃᓱᕐᕆᓕᕋᒥ, 2001ᒥ ᐃᓕᑕᕆᔭᐅᒍᑎᑖᓚᐅᔪᕗᖅ ᓄᓇᖃᕐᖄᑐᕕᓃᑦ ᐃᓄᐃᓪᓗ ᐃᓕᓴᕐᓂᒧ/ᐃᓕᓐᓂᐊᓂᕐᒧᑦ ᓯᕗᓕᕐᑎᐅᒍᑎᒥᒃ ᒥᑭᐊᓪ ᔫᓂᕗᓯᑎ-ᒥᓂᑕᕐᒥᒃ (McGill University). ᐱᓇᓱᐊᓯᑦᓱᓂᓗ ᑲᒪᔨᒻᒪᕆᐅᓂᕐᒥᒃ.

“ᑕᒪᑦᓱᒧᖓ ᐃᓕᑕᕆᔭᐅᓯᓚᐅᔪᒐᒪ, ᐊᐅᓚᑦᓯᔨᐅᓂᕐᒧᑦ. ᐊᕐᒑᒍᐃᑦ ᖁᓖᑦ ᐊᑕᐅᓯᕐᓗ ᓈᓕᕐᑎᓗᒋᑦ ᑲᒪᔨᒻᒪᕆᐅᑦᓱᖓ, ᑲᔪᖏᕐᓴᑕᐅᒐᓛᐱᓚᐅᔪᒐᒪ ᐊᑕᐅᑦᓯᑰᕐᑎᓯᔨᐅᖁᔭᐅᑦᓱᖓ ᑲᒪᔨᒻᒪᕆᓐᓂᒃ ᐃᑲᔪᕐᓯᒪᖃᑦᑕᓂᐊᕐᓗᖓ ᑲᒪᔨᒻᒪᕆᖕᖑᖃᒻᒥᓂᒃ. ᐱᒋᐊᓚᐅᔪᕗᖓ 2011ᒍᑎᓪᓗᒍ ᐅᓪᓗᒥᒧᓪᓗ ᐱᓇᓱᖏᓐᓇᓱᒍ!”

ᓗᐃᓴᐅᑉ ᐅᖃᐅᓯᕆᓲᖏᑦ ᐱᓇᓱᑦᑎᐅᓂᕐᒥᓄᑦ ᑲᑎᕕᒃ ᐃᓕᓴᕐᓂᓕᕆᔨᒃᑯᓄᑦ ᓄᐃᑦᓯᓲᒍᕗᑦ ᐃᓅᓯᖓᓂᒃ. ᓗᐃᓴ ᐊᓯᒥᓂᒃ ᑲᒪᑦᓯᐊᓲᒍᕗᖅ, ᓴᑑᒪᑦᓯᐊᓱᓂᓗ, ᐃᓄᑐᐃᓐᓇᐅᓂᕐᒥᓂᓗ ᐅᐱᒋᔭᖃᕐᓱᓂ ᐃᓄᑐᐃᓐᓀᑦ ᐱᔪᓐᓇᐅᑎᖏᓐᓂᒃ ᐱᒐᓱᐊᒻᒪᕆᐅᑎᖃᓲᒍᑦᓱᓂ ᑭᒡᒐᑐᑦᓯᐊᕋᓱᐊᓲᒍᑦᓱᓂᓗ ᑲᑎᕕᒃ ᐃᓕᓴᕐᓂᓕᕆᔨᒃᑯᓂ.

ᐊᐱᕐᓱᓕᑐᐊᕋᑦᑕ ᓱᓇᒥᑦ “ᓯᕗᓂᖃᕈᒪᒻᒪᖔᑦ” ᐃᓱᒪᑐᐊᖃᓚᐅᔪᕗᖅ ᐃᓕᓐᓂᐊᕕᒻᒥ, ᐃᓕᓐᓂᐊᑎᓂᒃ ᓄᓇᓕᒻᒥᓗ:

“ᐱᓇᓱᑦᑎᓕᒫᑦᓯᐊᓂᒃ ᐃᓄᑐᐃᓐᓇᐅᖁᔨᕗᖓ. ᐊᓕᐊᓇᕋᔭᕐᑐᖅ, ᐊᒥᓲᓂᕐᐸᐅᑐᐊᕐᐸᑕ. […] ᐃᓕᓐᓂᐊᑎᑦᓯᔨᕗᑦ ᐃᓄᑐᐃᓐᓇᐅᕙᓪᓗᑐᐊᕐᐸᑕ. ᑕᒪᓐᓇ ᐱᒍᒪᓪᓚᕆᒐᔭᕐᑕᕋ.”

ᓱᓕᑦᓯᐊᑐᖅ, ᓗᐃᓴ ᐊᓕᐊᓇᕐᑐᑎᒍᓗ ᐊᓕᐊᓇᖕᖏᑐᕐᑎᒎᕐᓯᒪᕗᖅ. ᑭᓯᐊᓂ ᓯᕗᓂᕐᒧᐊᖏᓐᓇᕋᓱᐊᕐᓯᒪᕗᖅ ᐱᒍᒪᔭᒥᓂᒃ ᐃᓱᒪᙯᓐᓇᓱᓂ: ᕿᑐᕐᖓᒥᓂᒃ, ᐃᕐᖑᑕᕐᒥᓂᓪᓗ ᐊᑑᑎᖁᔨᓯᒪᖕᖏᓇᒥ ᐊᑑᑎᒋᐊᖃᕐᓯᒪᔭᒥᓂᒃ ᐃᓕᓐᓂᐊᑎᐅᑦᓱᓂ.

“ᐱᒐᓱᐊᒻᒪᕆᖃᑦᑕᓯᒪᕗᖓ… ᐃᓕᓐᓂᐊᑎᓂᒃ ᐊᒥᓱᓂᒃ ᐱᓐᓀᓗᑕᓕᓐᓂᒃ ᑲᒪᖃᑦᑕᓱᖓ. ᐱᓐᓀᓗᑕᓕᓐᓂᒃ ᑲᒪᔨᖃᕐᓯᒪᖕᖏᒪᑦ ᑌᑦᓱᒪᓂ, ᐃᓕᓐᓂᐊᑎᓂᒃ ᐃᑲᔪᕐᑎᖃᕐᓯᒪᑦᔭᖏᑦᑐᖅ. ᐱᑕᖃᕐᓯᒪᖕᖏᑐᖅ ᐃᑲᔪᕐᑎᓴᖃᕐᓯᒪᑦᔭᖏᑦᑐᖅ. ᐃᓄᑑᑦᓱᖓ, ᐃᓕᓐᓂᐊᑏᑦ, ᐃᓕᓐᓂᐊᑎᑦᓯᔩᑦ, ᓴᓗᒻᒪᓭᔨᓪᓗ. ᖃᐅᔨᒪᕗᑎᑦ… ᐃᓚᖓᓐᓂ ᓴᐱᕆᐊᕆᐊᕐᖃᔭᖃᑦᑕᓯᒪᕗᖓ, ᑭᓯᐊᓂ… ᐊᐅᑲ ᓚᖃᑦᑕᓱᖓ ᐃᓕᓐᓂᐊᑎᓅᑦ ᑖᕙᓃᑉᐳᖓ!”

ᐃᓱᒪᔪᖓ ᑕᒪᓐᓇ ᐃᑉᐱᓂᐊᕐᓂᕆᓲᕗᑦ ᐅᕙᑦᑎᓂ ᑲᑎᒣᓐᓇᑎᑦᓯᓲᒍᕐᖂᑐᖅ.

ᐊᐱᕐᓱᑎ: ᖃᓄᖅ ᐅᖃᐅᑦᔨᒐᔭᕐᕿᑦ ᐱᓇᓱᒍᒪᔪᒥᒃ ᐃᓕᓐᓂᐊᓂᕐᒥᒃ ᐃᓕᓐᓂᐊᕕᒻᒥᓘᓐᓃᑦ?

ᐊᐱᕐᓱᑎ: ᖃᓄᓪᓗᐊᑎᒋᒃ ᐃᓕᓴᕐᓂᓕᕆᔨᒃᑯᑦ ᐱᕈᕐᓯᒪᔪᕆᓕᕐᖃᑎᑦ?

ᓗᐃᓴ ᖁᒫᓗᒃ ᐅᕝᕙᐅᑦ: ᓴᐳᒻᒥᔭᐅᑦᓯᓂᕐᓴᓚᕆᐊᓘᓕᕐᑐᐃᑦ ᐱᓇᓱᑦᑏᑦ, ᐃᓕᓐᓂᐊᑎᒐᓭᑦ ᐃᓚᖏᓪᓗ.

ᓇᑯᒦᑦ ᓗᐃᓴ. ᑕᑯᒋᐊᓪᓚᓚᕆᐊᒥᒃ ᐃᓕᓐᓂᒃ ᕿᓚᓈᕐᐳᒍᑦ ᖁᐊᕐᑕᒥ!