ᐊᕐᕌᒍᑕᒫᑦ, ᐊᒥᓲᖕᖏᑐᑦ ᐊᔪᐃᓐᓇᓂᓖᑦ ᓄᓇᕕᒻᒥᐅᑦ ᒪᓐᑐᔨᐊᓕᐊᓲᑦ ᐃᓚᐅᒋᐊᕐᑐᓱᑎᑦ ᐃᓅᓯᕐᒥᒃ-ᐊᓯᔩᕈᓐᓇᑐᒥᒃ ᐊᑑᒋᐊᕐᑐᓱᑎᑦ: ᐳᕐᑐᓂᕐᓴᒋᐊᓪᓚᒥ-ᐃᓕᓐᓂᐊᑎᑕᐅᓂᕐᒥᒃ ᐃᑉᐱᒋᔭᖃᓗᐊᖕᖑᐊᑐᒥᒃ ᓄᓇᕕᒻᒥᑦ-ᑐᖕᖓᕕᓕᒻᒥᒃ ᖃᐅᔨᒪᔭᖏᓐᓂᒃ ᐃᓕᕐᖁᓯᖓᓂᓪᓗ.
ᓄᓇᕕᒃ ᓯᕗᓂᑦᓴᕗᑦ (NS) ᐊᑦᔨᐅᖏᑦᑑᓱᓂ ᐃᓕᓐᓂᐊᑎᑦᓯᒍᑎᐅᕗᖅ ᐅᒃᑯᐃᖔᕐᕕᖃᕐᓱᓂ ᐊᖏᖃᑎᒌᓐᓂᐅᑉ ᐃᓚᐅᔫᔪᖏᓐᓄᑦ. ᑐᕌᒐᖃᕐᓱᑎᑦ ᐱᒍᓐᓇᓯᑎᑦᓯᓂᕐᒥᒃ ᐊᑐᕐᓂᖃᓚᖓᔪᓂᒃ ᐃᓅᓯᓕᒫᕐᓅᕕᑦ, ᓱᓇᑐᐃᓐᓇᐅᓚᖓᒐᓗᐊᕐᐸᑦ ᐊᓪᓗᕆᐊᒍᑎᑦᓴᕆᓚᖓᔦᑦ! ᓄᓇᕕᒃ ᓯᕗᓂᑦᓴᕗᑦ ᑕᑯᔭᐅᒍᓐᓇᑐᖅ ᐱᒋᐊᑦᓯᐊᒍᑦᑎᑦᓴᐅᒋᐊᖓ ᐅᕝᕙᓘᓐᓃᑦ ᒥᓯᒋᐊᕈᑎᐅᑎᓪᓗᒍ ᐊᓪᓗᕆᐊᒍᑎᕆᓂᐊᓕᕐᒥᔭᕐᓄᑦ, ᐊᒻᒪᓗ ᐃᓕᓐᓂᐊᑕᕕᓂᓕᒫᑎᑦ ᐱᔭᕕᓂᑎᑦ ᓅᑕᐅᒍᓐᓇᕕᖃᑦᓯᐊᓱᑎᑦ ᐃᓘᓐᓇᖏᓐᓄᑦ ᐃᓕᓐᓂᐊᕕᒻᒪᕇᑦ ᐃᓕᓐᓂᐊᑎᑦᓯᒍᑎᖏᓐᓄᑦ ᑯᐯᒃᒥ.
ᐃᓚᐅᔫᔪᐃᑦ ᐊᖏᖃᑎᒌᓐᓂᒧᑦ, ᐃᓚᐅᓕᕐᓯᒪᔪᑦ ᐃᓕᓐᓂᐊᑏᑦ ᐱᕚᓪᓕᕈᓐᓇᒥᔪᑦ ᑲᑎᕕᒃ ᐃᓕᓴᕐᓂᓕᕆᓂᐅᑉ (KI) ᐃᓕᓐᓂᐊᓂᕐᒥᒃ ᐊᑭᓕᕐᑐᐃᒍᓐᓇᓂᖏᓐᓂᒃ. ᑐᓂᔨᓲᖅ ᐃᒻᒥᓄᑦ ᐋᕐᕿᓱᕐᓯᒪᐅᑎᐅᒍᓐᓇᑐᓂᒃ ᐊᒻᒪᓗ ᓱᓇᒥᑦᓯᐊᑐᒥᒃ ᓴᐳᑦᔨᓂᕐᒥᒃᐃᓕᓐᓂᐊᑎᓂᒃ ᐊᐅᓪᓚᕆᐊᖃᓲᓄᑦ ᓄᓇᕕᒻᒥᒃ ᐃᓕᓐᓂᐊᕆᐊᕐᑐᓱᑎᑦ ᐳᕐᑐᓂᕐᓴᒋᐊᓪᓚᒥᒃ ᐃᓕᓐᓂᐊᓂᕐᒥᒃ ᓯᓚᑖᖏᓐᓃᑐᓄᑦ ᓄᓇᓕᒥᑦᑕ. ᐃᓕᓐᓂᐊᑎᑦᓯᒍᑎᒃ ᐊᒥᓱᓂᒃ ᐃᑲᔪᕐᓯᐅᑎᑦᓴᓕᒃ ᐆᑦᑑᑎᒋᓗᒋᑦ: ᐃᑉᐱᐊᔪᒻᒥᒐᑦᓴᑖᕐᑎᑕᐅᓯᒪᓂᕐᒥᒃ ᑮᓇᐅᔭᓂᒃ, ᐊᒥᓱᐃᑦ ᐱᒐᓗᐊᕐᒥᑎᓪᓗᒋᑦ, ᖃᐅᑕᒫᕐᓯᐅᑎᓂᒃ ᐊᑭᓖᒍᓐᔭᐅᓂᒃᑯᑦ ᐆᑦᑑᑎᒋᓗᒋᑦ ᓂᕆᔭᑦᓴᓯᒍᑏᑦ, ᐅᖄᓚᐅᑎᒃ, ᖃᕆᑕᐅᔭᕈᑎᒃ ᐊᒻᒪᓗ ᐃᓕᓐᓂᐊᕕᒻᒥ ᓂᐅᕕᐊᕆᔭᐅᒋᐊᖃᕐᐸᑐᑦ ᐃᓕᓐᓂᐊᕈᑎᑦᓴᓄᑦ. ᐃᓪᓗᖃᕐᑎᑕᐅᓂᕐᒧᑦ ᐃᑲᔪᕐᓯᔭᐅᒍᑎᖏᑦ ᐋᕐᕿᓱᕐᓯᒪᔪᑦ ᐃᓕᓐᓂᐊᑎᓄᑦ ᐃᓕᒃᑯᑦ, ᓴᐳᑎᔭᐅᒍᓐᓇᓱᑎᓪᓗ ᐃᓄᑑᑦᔨᓱᑎᑦ-ᐊᖓᔪᕐᖄᕆᔭᐅᔪᑦ ᕿᑐᕐᖓᓕᐅᑦᓱᑎᑦ ᐊᒻᒪᓗ ᐊᓯᖏᓐᓂᒃ.
ᐅᐱᕐᖓᓴᖓᓂᑦ 2024, ᑲᑎᓯᓚᐅᔪᒍᑦ ᓯᐊᔭ ᓵᒥᓵᒃᒥᑦ (ᐃᓄᒃᔪᐊᖅ), ᕕᑭ ᕉᓯᐊᓪ (ᑰᑦᔪᐊᕌᐱᒃ) ᐊᒻᒪᓗ ᐃᓖᓇ ᓇᓴᖅ (ᑲᖏᕐᓱᔪᐊᖅ) ᐱᔭᕇᕐᐸᓕᐊᑎᓪᓗᒋᑦ ᐃᓕᓐᓂᐊᑕᕐᒥᓂᒃ ᓄᓇᕕᒃ ᓯᕗᓂᑦᓴᕗᑦᒥ. ᐅᑯᐊ ᑕᒐ ᓂᓪᓕᕈᑎᕕᓂᖏᑦ ᖃᓄᖅ ᐋᕐᕿᒋᐊᕐᓯᒪᒋᐊᖃᕐᓂᒪᖔᒻᒥ ᐃᓕᓐᓂᐊᑎᑕᐅᒍᑎᒥᓄᑦ ᐃᓚᒥᑕ ᑭᖕᖒᒪᒋᔭᖏᓐᓄᑦ.
ᓯᐊᔭ ᐃᓄᒃᔪᐊᒥᐅᔭᖅ. ᐅᕙᑦᑎᓄᑦ ᐅᖃᓕᒪᓚᐅᕐᑐᖅ ᓇᓗᓇᕐᑑᒋᐊᖓᓂᒃ ᐊᐅᓪᓚᓯᒪᒋᐊ ᓄᓇᓕᒻᒥᓂᒃ ᐊᒻᒪᓗ ᓅᑦᑎᓂᕕᓂᕐᒥᓂᒃ ᒪᓐᑐᔨᐊᒧᑦ ᐱᐊᕋᕐᒥᓂᒃ ᒪᓕᑦᑎᐊᖃᕐᓱᓂ ᐃᓕᓐᓂᐊᕆᐊᕐᓯᒪᓂᕐᒥᓄᑦ ᐊᑕᐅᓯᕐᒥᒃ ᐊᕐᕌᒍᕐᒥ. ᐊᕐᖁᓯᐅᕆᑦᓱᖓ ᐱᐊᕋᒃᑲᓂ ᒪᓕᒐᔭᕐᑕᖏᓐᓂᒃ. ᑌᒫᑐᐃᓐᓈᖏᑦᑐᕋᑕᖅ. ᐱᑦᓯᐊᓛᕐᖁᖔᕐᓯᒪᓐᓇᑐᕋᑕᖅ ᑲᔪᓯᓗᓂᓗ. ᐱᒍᓐᓇᓯᑎᒋᐊᓖᑦ. ᐱᕚᓪᓕᓚᐅᕐᑐᖓ ᓴᐳᑎᔭᐅᓯᒪᓂᕐᒥᒃ ᐱᒋᐊᓕᕐᓂᕋᒪ. ᐯᕆᑦᓯᕕᓕᕆᔭᐅᒍᑎᒃᑲ ᐊᑭᓕᕐᑐᑕᐅᑎᓪᓗᒋᑦ, ᐊᒻᒪᓗ ᐅᑎᕐᑎᓯᕕᐅᒍᓐᓇᓱᑎᓗ ᐊᑭᓖᒍᑎᕕᓂᕐᓂᒃ ᐃᓕᓐᓂᐊᕕᒻᒥ ᐱᑦᓴᑕᖃᕈᑎᕗᓐᓂᒃ. ᑌᒪᖕᖓᑦ ᐊᑦᓱᕈᕐᓇᑐᕐᑕᖃᓚᖓᔪᖅ, ᑭᓯᐊᓂ ᐱᒍᓐᓇᑐᑎᑦ. ᖁᔭᓈᕐᓯᓯᒪᒋᐊᖃᕐᓇᑐᖅ, ᑭᓯᐊᓂ ᐃᓱᐊᓂ ᓗᑯᑦᑐᕕᓂᐅᕐᓯᒪᓐᓇᓛᕐᑐᖅ”
ᐃᓖᓇ, ᑲᖏᕐᓱᔪᐊᒥ ᐱᓯᒪᔪᖅ ᐊᒻᒪᓗ ᑰᑦᔪᐊᒥᐅᖑᓯᒪᑦᓱᓂ ᑲᖏᕐᓱᒥᓗ, ᐊᐅᓪᓚᑐᕕᓂᐅᓐᓂᒥᔪᖅ ᒪᓐᑐᔨᐊᒧᑦ ᐱᐊᕋᕐᒥᓂᒃ ᐃᓚᖃᕐᓱᓂ.
ᓯᕗᓪᓕᒥ ᐊᑦᓱᕈᕐᓇᓚᐅᕐᑐᖅ ᐅᕙᓐᓄᑦ, ᑭᓯᐊᓂ ᐱᒍᓐᓇᓗᑯᓚᐅᕐᑐᖓ, ᐊᒻᒪᓗ ᐊᑦᓱᕈᕐᓇᖏᓐᓂᓴᐅᓕᕐᓱᓂᓗ ᒫᓐᓇ. ᐱᐊᕋᒃᑲ ᐱᕚᓪᓕᓯᒪᔪᑦ ᐃᓕᓐᓂᐊᓇᐅᕇᕐᑎᓗᒍ ᐱᓇᓱᐊᕐᑎᑕᐅᒍᑎᓂᒃ ᑮᓇᐅᔭᖃᕐᑎᑕᐅᑎᓪᓗᒍ ᑲᑎᕕᒃ ᐃᓕᓴᕐᓂᓕᕆᓂᕐᒧᑦ, ᐅᕙᓐᓂᒃ ᐱᕕᑦᓴᖃᕐᑎᓯᓚᕿᖃᑦᑕᑐᖅ ᑐᓂᓯᒍᓐᓇᓯᓂᕐᒥᒃ ᐱᓇᓱᐊᕐᑕᕕᓂᒃᑲᓂᒃ ᑭᖑᕃᖕᖏᑑᑎᓗᒋᑦ. ᐊᑦᓱᕈᕐᓇᑐᖅ ᐃᓚᖓᓂ, ᑭᓯᐊᓂ ᒫᓐᓇ ᖃᐅᔨᒪᓂᕐᓴᐅᓕᕐᑐᖓ ᐃᓕᕐᖁᓯᕋᓂᒃ ᖃᓄᐃᓕᖓᓂᕕᓂᑦᑎᓂᓪᓗ. ᐅᐃᓕᐅᒥᓐᓇᑐᕋᑕᖅ.
ᕕᑭ, ᑰᑦᔪᐊᕌᐱᒻᒥᐅᔭᖅ, ᐅᑎᓕᕐᓂᒥᔪᖅ ᐃᓕᓐᓂᐊᑕᕐᒥᓄᑦ ᐃᓚᓕᐅᕐᓯᒪᓚᐅᑲᑦᑐᕕᓂᐅᑦᓱᓂ. “ᐱᑐᖃᑎᖃᕆᐊᓪᓛᕈᒪᓚᐅᕋᒪ ᐃᓕᕐᖁᓯᕋᓂᒃ ᐊᒻᒪᓗ ᐃᒻᒥᓂᒃ ᐃᕐᙯᑎᒋᐊᕈᒪᑦᓱᖓᓗ ᓱᒧᑦ ᑕᐅᓄᖕᖓᓚᐅᕐᒪᖔᒻᒪ. ᑭᖑᕃᔪᖃᕐᓂᐅᔭᖕᖏᑐᖅ ᐃᓕᓐᓂᐊᕕᒻᒥ ᐱᒋᐊᕆᐊᓪᓚᒐᓱᒋᐊ. ᑕᒫᓂ, ᐊᒥᓱᓂᒃ ᐃᓕᑦᓯᓇᕐᑐᕋᑕᖅ ᐃᓕᓐᓂᐊᖃᑦᑕᓂᖕᖏᑕᕗᓐᓂᒃ ᓄᓇᕕᒻᒥ. ᐊᑯᓂᐅᓂᕐᓴᖅ ᐅᖃᓕᒪᖃᑎᖃᕈᓐᓇᓕᕐᑐᖓ ᐃᓄᒃᑎᑐᑦ ᒫᓐᓇ,” ᐃᓱᒐᓚᑦᓱᓂᓗ.
ᓄᓇᕕᒃ ᓯᕗᓂᑦᓴᕗᑦ ᐱᓇᓱᖃᑎᒌᑦᑐᑕᓕᒃ ᐃᓕᓐᓂᐊᓂᕐᒥᒃ ᐃᓱᐊᕐᓭᔨᓂᒃ ᐊᒻᒪᓗ ᐃᓱᒪᓕᕆᔭᐅᓂᒃᑯᑦ ᐃᑲᔪᕐᑎᖃᕐᓱᓂ ᐱᓇᓱᑦᑎᓂᒃ ᐊᑐᐃᓐᓇᐅᖏᓐᓇᓕᒫᓲᑦ ᐃᑲᔪᕐᓯᓂᕐᒥᒃ ᐃᓕᓐᓂᐊᑎᓂᒃ. ᑕᒪᒃᑯᐊ ᐊᓯᐊᒍᑦ ᐋᕐᕿᑕᐅᒪᓯᒪᔪᒃᑯᑦ ᐱᒍᑦᔭᓂᕐᒧᑦ, ᐃᓕᓐᓂᐊᑎᐅᑦᓱᑎᑦ ᑲᑎᕕᒃ ᐃᓕᓴᕐᓂᓕᕆᓂᕐᒧᑦ ᑮᓇᐅᔭᕐᑕᓯᒪᔭᐅᑦᓱᓂ, ᐃᑲᔪᕐᓯᔭᐅᖃᑦᑕᓚᖓᔪᑎᑦ ᐯᕆᑦᓯᕕᖃᕐᑎᑕᐅᓂᒃᑯᑦ, ᓯᓂᑦᑕᕕᖃᕐᑎᑕᐅᓂᒃᑯᑦ, ᐃᓕᓐᓂᐊᕕᓐᓄᓗ ᐃᓚᐅᑎᑕᐅᑎᑦᓯᓂᒃᑯᑦ ᐱᐊᕋᑦᑎᓄᑦ ᐅᕝᕙᓘᓐᓃᑦ ᑮᓇᐅᔭᕐᑎᒍᑦ ᐃᑲᔪᕐᓯᔭᐅᓂᒃᑯᑦ.
ᖃᐅᔨᒋᐊᓪᓛᕈᒪᒍᕕᑦ ᐃᓕᓐᓂᐊᑎᑦᓯᒍᑏᑦ ᒥᑦᓵᒍᑦ ᓄᓇᕕᒃ ᓯᕗᓂᑦᓴᕗᑦ, ᐅᕗᖓ ᖃᕆᑕᐅᔭᒃᑯᑦ ᑕᑯᓂᐊᕈᓐᓇᑐᑎᑦ ᐱᑐᕝᕕᖓᓄᑦ.
ᖃᐅᔨᒋᐊᓪᓛᕈᒪᒍᕕᑦ ᑲᑎᕕᒃ ᐃᓕᓴᕐᓂᓕᕆᓂᐅᑉ ᐳᕐᑐᓂᕐᓴᒋᐊᓪᓚᒥ ᐃᓕᓐᓂᐊᓂᐅᑉ ᒥᑦᓵᓄᑦ, ᐅᕗᖓ ᖃᕆᑕᐅᔭᒃᑯᑦ ᑕᑯᓂᐊᕈᓐᓇᑐᑎᑦ ᐱᑐᕝᕕᖓᓄᑦ.