ᐳᕐᑐᓂᕐᓴᒋᐊᓪᓚᒥ ᐃᓕᓐᓂᐊᓂᖅ
ᑕᒃᑲᓂ ᐊᕐᕌᒍᒥ ᐱᓇᓱᐊᕐᓂᖃᑦᓴᖑᐊᖃᑦᑕᓚᐅᕐᖁᑦ ᐳᕐᑐᓂᕐᓴᒋᐊᓪᓚᒥᒃ ᐃᓕᓐᓂᐊᑎᓄᑦ ᔮᓐ ᐋᐸᑦ ᐊᒻᒪᓗ ᐃᓕᓐᓂᐊᕕᖓᓂ ᒫᓐᑦᒧᐊᔨᓐᓯ. ᓄᓇᕕᐅᑉ ᓯᓚᑖᓄᑦ ᓅᓐᓂᒧᑦ, ᓱᖏᐅᓯᓴᕐᓂᒧᑦ ᓄᑖᒥ ᐊᖏᕐᕋᑖᒥᓂᒃ ᐊᒻᒪᓗ ᓄᑖᓂᒃ ᐱᓇᓱᐊᕆᐊᖕᖓᓂᕐᒧᑦ, ᐱᔭᕆᐊᑭᑦᑑᑐᐃᓐᓇᖃᑦᑕᓚᐅᖕᖏᓚᖅ. ᐃᑲᔪᕐᓯᓂᕐᒧᑦ ᓅᓐᓂᖏᓐᓂᒃ ᐊᒻᒪᓗ ᐊᖏᕐᕋᓯᒪᑦᓯᐊᑑᔮᕐᑎᓯᒐᓱᐊᕐᓂᒧᑦ, ᐳᕐᑐᓂᕐᓴᒋᐊᓪᓚᓂ ᐃᓕᓐᓂᐊᑎᓂᒃ ᓱᖃᑦᓯᑎᑦᓯᔩᑦ, ᔩᒥ ᐅᕿᑦᑐᖅ ᐊᒻᒪᓗ ᐋᓕᒃ ᕆᑦᓱᑦᓴᓐ ᐃᑲᔪᕐᓯᓂᖃᓲᖑᕗᑦ ᐃᓕᓐᓂᐊᑎᓂᒃ ᓅᓐᓂᖏᓐᓄᑦ ᖃᓪᓗᓈᑦ ᓄᓇᖓᓐᓄᑦ. ᐃᑲᔪᓲᖑᕗᑦ ᐸᕐᓀᓂᕐᒧᑦ ᑕᕐᕿᑕᒫᑦ ᑲᑎᓐᓂᖏᓐᓄᑦ ᐃᓕᓐᓂᐊᑎᓂᒃ ᐃᓕᓐᓂᐊᕕᕐᔪᐊᒥ ᐊᒻᒪᓗ ᐳᕐᑐᓂᕐᓴᒋᐊᓪᓚᒥ ᒪᓐᑐᔨᐊᒥ. ᐃᓕᓐᓂᐊᑏᑦ ᑲᑎᖃᑎᒌᓐᓂᖓ ᐃᓕᑕᕐᓇᑐᓂᒃ ᑲᑎᖃᑎᒌᑦᑎᓯᓂᖃᓲᖑᕗᖅ, ᐱᖃᑎᑖᕐᑎᓯᓂᕐᒥᓗ ᓄᑖᓂᒃ ᐊᒻᒪᓗ ᓄᕐᖃᖓᑫᓐᓇᓂᕐᒥᒃ ᐃᓕᓐᓂᐊᓂᕐᒥᒃ ᐊᒻᒪᓗ ᐊᖏᕐᕋᒥ ᐃᓕᓐᓂᐊᕈᑎᓂᒃ ᐱᓇᓱᐊᕆᐊᓕᖏᓐᓂᒃ!
ᑕᕐᕿᓂ ᐊᓂᒍᕐᑐᓂ ᐃᓕᓐᓂᐊᑏᑦ ᒪᙯᖕᖑᐊᑎᑕᐅᓂᖃᓚᐅᔪᕗᑦ ᒫᑦ ᑕᕋᒻᑉᓛ ᓴᓂᐊᓄᑦ, ᐋᐳᑕᕆᐊᕐᓱᑎᒃ ᐅᑭᐊᑦᓴᒥ, ᐃᕐᓯᓇᕐᑐᖑᐊᖃᐅᑎᒥ ᐳᓛᕆᐊᕐᓱᑎᒃ ᑐᕋᒪᓐᕕᐅᓪᒥ, ᐆᑦᑐᕋᕐᓱᑎᓪᓗ ᐱᑎᑦᓯᓂᒃ ᐊᒻᒪᓗ ᐃᓚᐅᑦᓱᑎᒃ ᐳᕐᑐᓂᕐᓴᒋᐊᓪᓚᒥ ᐃᓕᓐᓂᐊᑏᑦ ᕿᑎᖕᖑᒥ ᑲᑎᓐᓂᖏᓐᓄᑦ. ᔩᒥᓗ ᐋᓕᒃᔅᓗ ᑌᑲᓃᖕᖏᓛ ᐊᓕᐊᓱᖕᖑᐊᑐᐃᓐᓇᓂᕐᒧᑦ ᐱᖕᖑᐊᑐᐃᓐᓇᓂᕐᒧᓗ, ᐃᑲᔪᕐᑎᐅᓂᖃᓲᖑᒋᕘᒃ ᐃᓕᓐᓂᐊᑎᓂᒃ ᐃᑲᔪᕐᓱᑎᒃ ᓇᒧᖕᖓᕆᐊᖃᕐᓂᖏᓐᓂᒃ ᓄᑖᒥ ᐃᓂᒥᓄᑦ ᐊᒻᒪᓗ ᐱᒋᐅᕐᓴᑎᑦᓯᓱᑎᒃ ᖃᓪᓗᓈᓂ ᐃᓅᓯᖃᕐᓂᒧᑦ. ᓴᐳᒻᒥᓂᖃᓲᖑᕗᑦ ᐊᒻᒪᓗ ᐃᑲᔪᕐᑎᐅᓱᑎᒃ ᐃᓅᓯᕐᒥ ᐱᒍᓐᓇᓂᕐᒥᒃ (ᑮᓇᐅᔭᓂᒃ ᑲᒪᑦᓯᐊᕆᐅᕐᓴᓂᕐᒧᑦ, ᐅᓪᓗᖁᑎᒥᓂᒃ ᑲᒪᒋᔭᖃᑦᓯᐊᓂᕐᒧᑦ, ᐅᖁᒣᓪᓕᐅᓂᕐᒧᑦ ᖃᓄᐃᓘᕈᓐᓇᓂᖏᓐᓂᒃ, ᐊᓯᖏᓐᓂᓗ), ᐃᓅᓯᖏᓐᓄᑦ ᐊᒻᒪᓗ ᐱᓇᓱᐊᕆᐊᓕᖏᓐᓄᑦ ᖃᓄᐃᓘᕆᐊᖃᕐᓂᖏᓐᓂᒃ ᐃᑲᔪᕐᑎᐅᓱᑎᒃ, ᐱᓗᐊᖕᖑᐊᑐᒥ, ᐃᑲᔪᐃᓐᓇᓲᖑᑦᓱᑎᒃ ᐃᓕᓐᓂᐊᑏᑦ ᐃᑲᔪᕐᑕᐅᒋᐊᖃᓕᑐᐊᕐᒪᑕ. ᑕᑯᒋᐊᕆᐊᓪᓚᕈᒪᑐᐊᕈᕕᑦ ᐊᑦᔨᖑᐊᓂᒃ ᐊᒻᒪᓗ ᖃᓄᐃᓘᕐᓂᖏᓐᓂᒃ ᖃᐅᔨᒪᖃᑦᑕᕈᒪᑐᐊᕈᕕᑦ? Facebook-ᑯᑦ ᓄᐃᑕᑎᑦᓯᕕᖓᓄᑦ ᐃᓚᐅᒍᓐᓇᖁᑎᑦ ᖃᓄᐃᓘᕈᑎᒋᕋᑖᕐᓂᐹᖏᓐᓄᑦ ᐊᒻᒪᓗ ᑐᓴᕋᑦᓴᖏᓐᓄᑦ.