ᐊᕐᖁᓯᐅᕐᓂᕗᑦ ᐃᓕᓐᓂᐊᑏᑦ ᐱᔭᕇᕈᓐᓇᓯᓂᖓᓄᑦ ᐊᒥᓱᓂ ᓂᕈᐊᕋᑦᓴᖃᕐᖁᑦ: ᐊᑦᔨᒌᖕᖏᑐᑦ ᐊᕐᖁᑏᑦ ᓇᒧᑐᐃᓐᓇᖅ ᑐᕌᕐᑐᑦ, ᐃᑲᔪᖃᑦᑕᐅᑎᓂᖅ ᓴᐱᓕᑦᓯᕇᑦᑐᓕᐅᕐᖁᖅ. ᐱᓇᓱᑦᑐᓕᕆᓂᐅᑉ ᐱᔭᑦᓴᓴᔭᖓ ᐃᓚᒋᔭᐅᕗᖅ ᑖᒃᑯᓄᖓ ᑲᑎᖕᖓᓂᐅᔪᓄᑦ ᐃᓗᐃᑦᑐᒧᓪᓗ, ᐊᕐᖁᓯᐅᕐᓂᖅ ᑐᕌᖓᔪᖅ ᐃᓕᓐᓂᐊᑎᓄᑦ ᕿᒥᕐᕈᕈᓐᓇᓯᓂᕐᒧᑦ,ᒪᓕᒍᓐᓇᓂᕐᒧᑦ ᐱᓐᓇᓯᓂᕐᒧᓗ.
“ᐱᕈᕐᐸᓕᐊᓂᖅ ᓄᐃᓲᖑᕗᖅ ᐊᑐᓕᓂᖕᖑᕋᕕᑦ,” ᓈᓐᓯ ᐅᖃᕐᑐᖅ, ᐃᓕᓐᓂᐊᑎᑦᓯᔨ 28 ᐊᕐᕌᒍᓂ ᐱᓇᓱᓕᓂᐅᓕᕐᑐᖅ ᐃᓕᓐᓂᐊᓂᓕᕆᓂᕐᒥ. “ᐱᓇᓱᖃᑎᒋᓲᕆᔭᒋᑦ ᐊᓪᓗᕆᐊᕐᓂᑕᒫᑦ ᓯᕗᓪᓕᒥ, ᑐᕌᕐᓂᖃᕐᓱᑎᑦ ᐃᒻᒥᓂᕐᓱᕈᓐᓇᓯᓂᕐᒧᑦ. ᐊᑐᓕᓂᐅᖕᖏᑯᕕᑦ, ᐃᒻᒥᓂᕐᓱᕆᐅᕐᓂᖅ ᐊᑦᓱᕈᕐᓇᓂᕐᓴᐅᓚᖓᒻᒪᑦ.”
ᓀᓈᖕᖏᑐᖅ,ᑭᓯᐊᓂ ᐊᖏᕐᓯᒪᓂᖅ
ᓈᓐᓯᒥᑦ, ᐱᓇᓱᑦᑐᓕᕆᓂᕐᒥᒃ ᐱᔭᑦᓴᖅ ᑕᑯᓐᓇᑕᖓ ᐃᓕᓐᓂᐊᑏᑦ ᓇᕝᕚᓚᖓᓂᖏᓐᓂ ᑐᑭᒧᐊᕐᓂᒧᑦ. ᑐᖕᖓᕕᖃᕐᓱᓂ ᐊᖏᕐᓯᒪᓂᕐᒧᑦ, ᑐᖕᖓᕕᖃᓪᓚᕆᑦᓱᓂᓗ ᓲᖑᓂᕐᒥᒃ ᓄᐃᖃᑦᑕᓂᕐᓗ 75% ᓂᑦ ᓱᕐᕃᓚᕆᒃᑯᖅ ᑎᑭᐅᑎᒍᓐᓇᓯᓂᕐᒧᑦ.
“ᑲᖕᖑᓱᒍᑎᕐᑕᖃᕆᕗᖅ ᐱᓇᓱᑦᑎᕈᒋᐅᕐᓴᓂᖅ ᐃᓂᒋᔭᐅᓂᕋᕐᑕᐅᒋᐊᖓ ‘ᑲᑌᑐᐃᓐᓇᓂᕐᒧᑦ’ ᓈᒻᒪᓈᑦᓯᐊᓂᖕᖏᑐᐊᕐᒪᑦ ᐱᔭᑦᓴᑖᖓ” ᓈᓐᓯ ᓂᓪᓕᑐᖅ “ᑭᓯᐊᓂ ᒧᒥᖕᖓᖔᕐᑐᖅ. ᐃᓂᒋᔭᑦᓴᔭᐅᒻᒪᑦ ᐱᓇᓱᑦᑎᖑᕈᒪᔪᓄᑦ ᐊᓯᐊᓂ ᓯᓚᑎᒥᓂ. ᐊᑕᐅᓯᐅᓈᕐᑎᑳᖃᑎᐅᓯᑦᓴᑐᕋᒥ ᑲᔪᓯᓕᒫᓯᓲᑦ.”
ᐅᑉᐱᕆᔭᖃᕐᖁᖓ ᖃᕆᐊᑉ ᐃᓗᐊᓂ ᐱᓇᓱᐊᕐᓂᒥᒃ ᐱᔭᑦᓴᓕᐊᖑᓯᒪᔪᓂ. ᐊᑑᑎᓕᓂᖕᖑᑎᑦᓯᓲᖅ ᐃᓕᓐᓂᐊᑎᓂᑦ. ᐱᓇᓱᐊᖏᓐᓇᖃᑦᑕᕆᐊᖃᕐᑐᒍᑦ ᐃᓕᓐᓂᐊᕈᑎᓂᑦ ᐱᓇᓱᑦᑎᖑᕆᐅᕐᓴᕕᒻᒥ ᑌᒫᒃ ᐃᑉᐱᓂᐊᖃᑦᑕᓂᐊᕐᒪᑕ ᐱᔭᕇᕐᓂᒥᒃ.
ᐃᓕᓐᓂᐊᕈᑎᓕᕆᓂᖅ ᐃᓅᓯᕐᒧᐊᖓᔪᓂᓪᓗ ᐃᓕᓐᓂᐊᓂᖅ
ᐱᔭᑦᓴᖅ ᐊᒡᒐᒧᐊᓕᖓᓂᕐᓴᐅᒐᓗᐊᖅ, ᓈᓐᓯ ᑎᒍᒥᐊᓲᖅ ᐃᓕᓐᓂᐊᑎᑦᓯᓂᕐᒥᒃ, ᐃᓕᓐᓂᐊᑏᑦ ᐱᓇᓱᐊᑐᐃᓐᓇᖏᓪᓗᑎᒃ ᐃᓕᓐᓂᐊᕆᐊᖃᕐᒥᒪᑕ. “ᑕᑯᕙᑦᑐᒍᑦ ᐃᓄᓐᓂᑦ ᓇᑭᑐᐃᓐᓇᖅ ᐱᓯᒪᔪᓂᑦ, ᐱᑦᔪᑎᖃᕐᓱᑎᒃ ᐊᑕᐅᓯᕐᒥ ᐊᒥᓱᓂᓪᓘᓃᑦ, ᖃᐅᔨᓚᐅᕐᑐᖓ ᓈᒻᒪᓇᙱᑑᒋᐊᖓ ᐋᕐᕿᓯᒪᒌᕐᓂᖓ. ᑭᓯᐊᓂ ᑌᒣᒐᓗᐊᕐᑎᓗᒍ ᖃᑦᓯᑐᐃᓐᓇᓂᑦ ᐳᕐᑐᓂᖃᕋᓗᐊᕋᕕᑦ ᐃᑎᕐᓱᑎᑦ, ᑭᓇᓕᒫᑦᓯᐊᖅ ᐃᓕᑦᓯᒍᓐᓇᑐᖅ. ᐱᒻᒪᕆᓪᓚᕆᐅᕗᖅ ᐃᓂᑖᕐᑎᒋᐊᖏᑦ ᐃᓕᑦᓯᒍᓐᓇᓯᓂᕐᒥᑦ.”
ᖃᕆᐊᒥᓂ, ᑭᓯᑦᓯᒍᑎᓐᓂᐊᓂᖅ ᑭᓯᑦᓯᒍᑎᑐᐃᓐᓇᐅᖏᓪᓚᖅ; ᐃᓅᓯᕐᒧᑦ ᐱᒋᐅᕐᓴᐅᑎᓪᓚᕆᐅᕗᖅ ᐃᓕᓐᓂᐊᑏᑦ ᖃᐅᑕᒫᕐᓯᐅᑎᖏᓐᓄᑦ. ᐃᓕᓐᓂᐊᑕᖏᑦ ᑮᓇᐅᔭᓕᕆᒍᓐᓇᓯᒍᓐᓇᑐᑦ ᑭᓯᒍᓐᓇᓯᓗᑎᓗ ᐊᑭᓪᓚᕆᖏᓐᓂᑦ ᐱᖁᑏᑦ ᐊᓂᕐᕋᒥ:
ᐃᓕᓐᓂᐊᕋᑦᓴᖅ ᓅᓲᖑᒻᒥᔪᖅ ᓂᕆᓕᒻᒧᑦ ᐃᓕᓐᓂᐊᕖᑦ ᓂᕆᕕᖏᑎᒍᑦ. “ᐃᒐᑐᐃᓐᓇᓲᖑᖕᖏᑐᒍᑦ; ᐊᑭᓖᒍᑎᕕᓃᑦ ᑭᓯᑕᐅᒍᑎᖏᓐᓂ ᐃᓕᑦᓯᓲᖑᔪᒍᑦ ᒪᑭᑕᒐᓱᒍᑏᓪᓗ ᑮᓇᐅᔭᕐᑑᑎᖏᓐᓂᑦ.” ᓈᓐᓯ ᓂᓪᓕᑐᖅ. ᓂᐅᕐᕈᓯᖃᑦᑕᓱᑕ 1$ ᕌᕐᑐᓂ, ᐃᓕᓐᓂᐊᑏᑦ ᐃᓕᑦᓯᓯᒪᔪᑦ ᓇᒧᖕᖓᕆᐊᒥ ᓂᐅᕕᕐᓂᐊᕕᓐᓂ ᓄᓇᓕᒻᒥ ᑲᒪᒍᓐᓇᓯᑦᓱᑎᓗ ᓇᒻᒥᓂᖃᕐᓂᒥ. ᑕᒡᒐᓂ ᐊᕐᕌᒍᒥ, ᐳᕐᑐᓰᒋᐊᓕᕐᒥᔪᑦ ᐊᑑᑎᕙᑦᑕᒥᓂ ᓂᐅᕐᕈᓯᖃᑦᑕᓚᖓᓕᕐᓱᑎᒃ ᕿᑎᕋᓕᒥ ᑭᓇᒃᑯᑐᐃᓐᓇᓄᑦ– ᑲᒪᑦᓱᑎᒃ ᓂᐅᕕᕐᓂᐊᓂᕐᒥᒃ ᐊᖏᔪᓂ ᑎᑭᑦᓱᒍ ᖄᖏᕐᓂᑯᓕᐅᕐᓂᒧᑦ.
ᐃᓕᓐᓂᐊᑎᓕᒫᑦ ᓈᒻᒪᒋᔭᒥᓂ ᐊᕐᖁᑎᑦᓴᑖᕆᐊᖃᕐᖁᑦ
ᑲᔪᓰᓐᓇᕋᓗᐊᕐᐸᑦ ᐱᓇᓱᕝᕕᒧᑦ ᐅᕝᕙᓘᓐᓃᑦ ᐊᓪᓗᕆᐊᕈᑎᐅᓗᓂ ᐃᓕᓐᓂᐊᓂᕐᒧᑦ ᐊᕗᖓᒋᐊᓪᓚᖅ, ᐱᓇᓱᑦᑎᕈᒋᐅᕐᓴᓂᕐᒥᒃ ᐃᓕᑕᕆᔭᐅᒍᑎ ᐅᒃᑯᐃᓯᓲᖑᕗᖅ ᐊᒥᓱᓂᑦ. ᓂᕈᐊᕐᓂᖅ ᑕᒪᑦᓱᒥᖓ ᐊᕐᖁᑎᒥ ᑐᕌᖓᓂᖃᕐᖁᖅ ᐅᕕᒃᑫᑦ ᐱᓇᓱᒍᓐᓇᓯᓂᕐᒧᑦ ᐊᑐᐃᓐᓇᕈᕐᑎᓂᖓᓄᑦ, ᐱᒋᐊᕐᓱᒋᑦ ᐅᖄᖃᑎᒌᓐᓂᖅ ᐃᓚᒌᑎᒍᑦ ᐃᓕᓐᓂᐊᕕᒻᒥᓗ ᐱᓇᓱᖃᑎᒌᓄᑦ ᑐᕌᕐᓂᖃᑦᓯᐊᕈᒪᓗᑕ ᓈᒻᒪᓈᕐᑐᒥ ᐃᓕᑦᓯᒍᑎᑦᓴᖏᓐᓄᑦ.
ᓈᓐᓯ ᐊᐅᓚᔨᔪᖅ ᐃᓕᓐᓂᐊᑎᕕᓂᕐᒥᓂ ᐃᓚᐅᖃᑦᑕᓯᒪᒻᒥᔪᖅᒥ ᐱᓇᓱᑦᑎᖑᕆᐅᕐᓴᓂᕐᒥᒃ ᐃᑳᓚᐅᕐᓯᒪᔪᖅ ᐃᓄᒻᒪᕇᑦ ᐃᓕᓐᓂᐊᕕᖓᓄᑦ ᐊᓱᐃᓛ ᐱᔭᕇᕈᓯᕐᑕᐅᓯᓚᐅᕐᓯᒪᔪᖅ ᐱᐊᕃᑦ ᐱᕈᕐᐸᓕᐊᓂᖓᓄᑦ ᐃᓕᓐᓂᐊᑎᑦᓯᔨᐅᓂᕐᒥᒃ. ᓈᓐᓯ ᐅᖃᕐᑐᖅ “ᐱᔪᓐᓇᓂᖃᑦᓯᐊᕇᕐᓯᒪᔪᖅ; ᐊᓯᐊᓂ ᐃᓂᑖᕆᐊᖃᑐᐃᓐᓇᓯᒪᔪᖅ ᐱᕈᕐᐸᓕᐊᒍᓐᓇᓯᓂᕐᒧᑦ. ᐊᓱᐃᓛ ᑌᒣᓕᕐᓂᖁᖅ..”
ᑭᖑᓪᓕᐹᕐᓯᐅᑎᐅᖕᖏᑐᖅ, ᑕᒪᓐᓇ ᐊᕐᖁᓯᐅᕐᓂᖅ ᑐᕌᕐᓂᖃᕐᖁᖅ ᐃᓕᓐᓂᐊᑏᑦ ᕿᒣᓚᖓᓯᒍᑎᒃ ᐃᓕᓐᓂᐊᕕᒻᒥ ᓄᐃᑕᑦᓯᐊᑐᒥ ᑐᕌᕐᓂᖃᖁᓪᓗᒋᑦ ᐱᔭᕇᕈᓐᓇᓯᓗᑎᓗ ᓴᓇᕙᑦᑕᒥᓂ ᓇᒻᒥᓂᖅ.
ᐃᓚᒌᑦ ᑎᓕᔭᐅᒪᕗᑦ ᕿᒥᕐᕈᕈᓐᓇᓂᕐᒥᒃ ᐊᕐᖁᓯᐅᕐᓂᒥ ᑐᓂᔭᐅᒪᔪᒥ ᓄᓇᕕᓕᒫᖅ ᐃᓕᓐᓂᐊᕕᖏᓐᓄᑦ ᐃᓕᑦᓯᓗᑎᓗ ᖃᓄᖅ ᐊᑕᐅᓯᖅ ᑭᐅᒍᓐᓇᒪᖔᑦ ᐊᑦᔨᒌᙱᑐᓂ ᐱᔪᓐᓇᓂᐅᔪᓂ ᐱᒍᒪᓂᐅᔪᓂᓪᓗ.