ᐱᖁᑎᓕᕆᕕᒻᒥ ᐱᓇᓱᐊᕐᑐᒪᕇᑦ ᖃᓄᐃᓘᕈᑎᑦᓴᓄᑦ ᐃᓕᓐᓂᐊᓂᕐᒥ ᐱᒍᑦᔨᐅᑎᓄᑦ ᐃᓂᑦᓭᓕᐅᕐᓂᐅᖃᑦᑕᑐᒥᒃ

ᐃᓂᑦᓭᓂᐊᓕᕐᐸᓕᐊᓂᕗᑦ ᐃᓕᓐᓂᐊᓂᕐᒥ ᐱᒍᑦᔨᐅᑎᓄᑦ ᐱᓀᓗᑕᐅᒋᐊᖓ ᖃᐅᔨᒪᔭᐅᑦᓯᐊᑐᖅ.  ᐃᒻᒪᖄ ᖃᐅᔨᒪᔭᐅᓪᓗᐊᖏᓐᓂᓴᐅᑐᐃᓐᓇᕆᐊᓕᒃ ᐃᒫᒃ ᐱᖁᑎᓕᕆᕕᒻᒥ ᐱᓇᓱᐊᕐᒪᑕ ᑕᒪᑦᓱᒪ ᐊᓯᑦᔨᓂᑦᓴᖓᓄᑦ.  ᑕᒡᒐᓂ ᐱᓇᓱᕝᕕᒥ ᒪᕐᕈᐃᓕᕿᖓᔫᓐᓂᒃ ᐱᓇᓱᐊᕐᑐᖅ, ᓄᑕᐅᓯᓕᕐᑎᕆᓂᕐᒥᒃ, ᐊᒻᒪᓗ ᓴᓇᓂᕐᒥᒃ ᐃᓕᓐᓂᐊᕕᓐᓂᒃ.  ᐅᑯᐊ ᐃᓘᓐᓇᖏᓐᓂᒃ ᑕᑯᑦᓴᐅᑎᑦᓯᔪᑦ ᐅᓪᓗᒥᐅᑎᓪᓗᒍ ᐱᓇᓱᐊᕐᑕᕗᓐᓂᒃ*.

ᓄᑖᖅ ᐃᓕᓐᓂᐊᕕᒃ ᐃᓄᒃᔪᐊᒥ

2019-ᖑᑎᓪᓗᒍ, ᓴᓇᒋᐊᓯᓚᐅᔪᕗᑦ ᓄᑖᒥᒃ ᐅᖂᑕᖅ ᐳᕐᑐᓂᕐᓴᓂ ᐃᓕᓐᓂᐊᕕᒻᒥᒃ ᐃᓄᒃᔪᐊᒥ.  ᑲᔪᓯᑦᓯᐊᑐᐊᕐᐸᑕ ᐸᕐᓇᑕᐅᓯᒪᔪᑦ, ᐃᓕᓐᓂᐊᕕᒃ ᑖᓐᓇ ᐊᑐᐃᓐᓇᐅᓛᕐᑐᖅ ᐅᑭᐊᒥ 2021-ᒥ.

ᓄᑖᖅ ᐃᓂ ᓇᓯᕝᕕᒃ ᐃᓄᒻᒪᕇᑦ ᐃᓕᓐᓂᐊᕕᖓᓂ

ᐊᒥᓱᖕᖑᕙᓪᓕᐊᔪᓂᒃ ᐃᓕᓐᓂᐊᕈᑎᑦᓴᖃᕐᓱᑎᒃ, ᐃᓕᓐᓂᐊᕕᒋᐊᓪᓚᓂᒃ ᐃᓕᓐᓂᐊᑏᑦ ᐃᓂᑦᓴᖏᓐᓂᒃ ᑭᖕᖒᒪᑦᓯᔪᑦ ᑲᖏᕐᓱᔪᐊᒥ ᖃᖕᒥᑯᑦ ᖃᐅᔨᒪᓇᓕᕐᑐᑦ.  ᐅᐱᕐᖔᖑᓚᐅᔪᔪᖅ, ᓯᑕᒪᑦ ᖃᕆᐊᑦ ᐱᓇᓱᑦᑕᐅᓂᖏᑦ ᐱᒋᐊᕐᑕᕕᑦ ᑖᒃᑯᐊᓗ ᐃᓕᓐᓂᐊᑎᑦᓯᕕᖏᓐᓂᒃ ᐃᓚᒋᐊᕆᒍᑎᐅᓛᕐᓱᑎᒃ ᓇᓯᕝᕕᒃ ᐃᓕᓐᓂᐊᕕᒻᒥ.  ᑐᕌᒐᖓ:  ᐃᓚᒋᐊᕐᑕᐅᓂᖓ ᐱᔭᕇᕐᑕᐅᓗᓂ 2022-ᒥ ᐅᑭᐊᒥ.

ᐊᕐᓴᓂᖅ ᐃᓕᓴᕐᕕᐅᑉ ᐃᓚᔭᐅᒋᐊᕐᓂᖓ ᐱᔭᕇᑕᔪᖅ

ᓴᓇᔭᐅᔪᖅ ᐊᕐᓴᓂᖅ ᐃᓕᓴᕐᕕᒃ ᑲᖏᕐᓱᔪᐊᒥ, ᐃᓚᔭᐅᒋᐊᓛᓱᓂ ᐃᓕᓴᕐᕕᒃ ᐱᔭᕇᕐᑕᐅᓚᐅᔪᔪᖅ ᐃᓕᓴᕐᓇᐅᑉ ᐊᕐᕌᒍᖓᑕ ᐱᓇᓱᐊᕈᓯᖓᑕ ᐱᒋᐊᖕᖓᓂᖓᓂ. ᐃᓕᓴᕐᓂᒧᑦ ᓱᖃᑦᓯᐅᑎᑦᓴᓕᒫᑦᓯᐊᑦ ᐊᑑᑎᑦᑎᓯᐊᑎᑕᐅᒐᓱᐊᕐᑐᐃᑦ ᐃᓕᓴᕐᕕᒃ ᓄᑕᐅᓯᒋᐊᕐᑕᐅᒐᓗᐊᕐᑎᓗᒍ.

ᐅᐃᒍᔭᐅᓂᖓ ᐊᒻᒪᓗ ᓄᑕᐅᓯᓕᕐᑕᐅᓂᖓ ᐊᑯᓕᕕᒻᒥ

ᑐᑭᓯᓂᐊᕐᕕᒃ ᐃᓕᓐᓂᐊᕕᒃ ᐊᑯᓕᕕᒻᒥ ᐊᖏᔪᕐᓚᖑᐊᓂᒃ ᐱᓇᓱᐊᕐᑕᐅᔪᖅ.  ᐃᓕᓐᓂᐊᕕᐅᑉ ᐅᐃᒍᔭᐅᓂᖓᓄᑦ ᓄᑕᐅᓯᓕᕐᑕᐅᓂᖓᓄᓪᓗ ᐱᓇᓱᓯᓚᐅᔪᕗᑦ ᐅᐱᕐᖔᖑᓚᐅᔪᔪᒥ, ᐊᒻᒪᓗ ᐱᖁᑎᓕᕆᕕᒻᒥ ᓂᕆᐅᑦᓱᑎᒃ ᑖᒃᑯᐊ ᐱᔭᕇᕐᑕᐅᓛᕆᐊᖏᑦ 2023-ᒥ ᐅᑭᐅᒃᑯᑦ.

ᒪᕐᕉᒃ ᐱᓇᓱᐊᕐᑖᒃ ᐱᒋᐊᕐᓯᒪᓕᕐᑑᒃ ᓴᓪᓗᓂ

ᐱᒋᐅᕐᕕᒃ ᐃᓕᓐᓂᐊᕕᒃ ᓄᑕᐅᓯᓕᒻᒪᕆᑦᑕᐅᓂᖓ ᐱᓇᓱᐊᕐᑕᖅ.  ᐱᓇᓱᑦᑕᐅᔪᑦ ᐃᓚᖃᕐᓱᑎᒃ ᐅᖁᕐᑌᔦᓂᕐᒥᒃ, ᐱᒋᐊᕐᑕᕕᓃᑦ ᔪᓓ 2021-ᖑᑎᓪᓗᒍ, ᐱᔭᕇᕐᑕᐅᓴᐅᑎᒋᓛᕈᓇᖁᑎᒋᔭᐅᓕᕐᓱᑎᓗ.

ᐃᑯᓯᒃ ᐃᓕᓐᓂᐊᕕᒻᒥ, ᐃᓕᓐᓂᐊᓇᐅᑉ ᐊᕐᕌᒍᖓᑕ ᐱᒋᐊᕐᓂᖓ ᓄᑕᐅᓯᓕᕐᑎᑕᐅᔪᓄᑦ ᓈᒻᒪᓈᕐᓯᒪᒋᐊᓕᕕᓂᐅᒐᓗᐊᑦ.  ᑭᓯᐊᓂ, ᐊᑦᑕᓇᕐᑌᓕᒪᑦᔪᑏ ᐱᑦᔪᑎᐅᑎᓪᓗᒋᑦ, ᐋᕐᕿᒋᐊᕐᑕᐅᒋᐊᓕᑦᑕᖃᓚᐅᔪᑦᓱᑎᒃ ᓯᑉᑎᒻᐱᕆ ᓈᓕᕐᑎᓗᒍ.  ᐃᓕᓐᓂᐊᑏᑦ ᐱᓇᓱᑦᑏᓗ ᐃᓂᑖᒥᓂᒃ ᓄᑖᒥᒃ ᐊᑐᓯᑦᓯᐊᕈᓐᓇᓯᓛᕐᑐᐃᑦ ᐆᒃᑑᐱᕆᐅᑉ ᓈᓂᖓᓂ ᑌᑲᓂ ᐱᓇᓱᐊᕐᑕᐅᔪᑦ ᐱᔭᕇᕐᓯᒪᓛᕈᓇᖁᑎᒋᔭᐅᒻᒪᑕ.

*ᑖᒃᑯᐊ ᐱᓇᓱᐊᕐᑌᑦ ᓴᓇᖕᖑᐊᑕᐅᓯᒪᓂᖏᓐᓄᑦ ᑲᔪᓯᑎᑕᐅᒍᑎᖏᓐᓄᓗ, ᐱᖁᑎᓕᕆᕕᒃ ᐱᓇᓱᐊᖃᑎᓕᕕᓂᖅ ᐃᒡᓗᔪᐊᓂᒃ ᐊᒡᓚᖑᐊᕐᓯᒪᔪᓕᐅᕐᑎᓂᒃ ᓴᓇᓂᕐᒥᓗ ᐱᓇᓱᑦᑎᒪᕆᓕᓐᓂᒃ ᑎᒥᐅᔪᓂᒃ ᑯᐯᒃ ᓯᕿᓂᖓᓃᑦᑐᓂᑦ ᓄᓇᓕᓐᓂᑦ ᐊᑦᔨᒌᖕᖏᑐᓂ ᐱᓯᒪᔪᓂᒃ (ᕙᓪ-ᑐᐊ, ᒑᑎᓅ, ᑯᐯᒃ ᐊᒻᒪᓗ ᒪᓐᑐᔨᐊᓪ).  ᓱᓕᒋᐊᓪᓚᒃ, ᐃᓂᑦᓴᒋᐊᓪᓚᓂᒃ ᓴᓇᓂᕐᒥ ᐱᓇᓱᐊᕐᑕᓄᑦ ᐊᑐᓂ, ᐃᓄᐃᑦ ᓴᓇᖕᖑᐊᓯᒪᔭᖏᓐᓂᒃ ᐃᓚᐅᑎᑦᓯᒍᑎᑦᓴᓄᑦ ᐱᓕᐅᑎᑎᑦᓯᒍᑎᓂᒃ ᐃᓗᕐᕈᓯᒧᐊᖓᔪᓄᑦ ᑐᓴᐅᒪᖃᑎᒌᓐᓂᓄᓪᓗ ᑐᕐᖃᑕᕐᕕᑯᓐᓄᑦ ᐱᒋᐊᕐᑎᑕᐅᓚᐅᔪᕗᑦ. ᓴᓇᖕᖑᐊᑏᑦ ᓂᕈᐊᕐᑕᐅᔪᑦ ᐅᖃᐅᓯᕆᔭᐅᓂᕆᓛᕐᑕᖏᑦ ᖃᐅᔨᒪᒐᓱᑦᓯᐊᓛᖃᓯᒋᑦ!