ᐱᒐᓱᒍᑎᒋᑦᓱᒋᑦ ᓄᐃᑕᑎᑦᓯᓂᕐᓴᐅᓂᕐᒥᒃ ᐱᓇᓱᑦᑕᐅᔪᓂᒃ, ᐱᔭᖃᕈᑎᐅᖃᑦᑕᑐᓂᓪᓗ ᐊᓕᐊᒋᒻᒪᕆᑦᑕᖏᓐᓂᓗ ᐱᓇᓱᑦᑎᖁᑎᑦᑕ, ᐊᑐᐊᒐᑦᓴᓕᐅᕐᓂᒥᒃ ᐱᓇᓱᖃᑎᒌᑦᑐᖁᑎᕗᑦ ᓄᑖᓂᒃ ᐅᓂᒃᑳᑐᐊᕈᓯᕐᓂᒃ ᓄᐃᑦᓯᓯᒪᓕᕐᖁᑦ: ᐊᓪᓚᓯᒪᔪᓕᐅᖃᑦᑕᓚᖓᓕᕐᓱᑎᒃ ᑭᖑᓕᕇᑦᑐᓂᒃ ᓀᑦᑐᖑᐊᓂᒃ ᐅᓂᒃᑲᐅᓯᕐᓂᒃ ᐅᓂᒃᑳᑐᓂᒃ ᐱᓇᓱᒐᕆᔭᐅᔪᓂᒃ, ᐱᑦᔪᔨᒍᑎᐅᔪᓂᒃ ᐃᓚᖓᓂᐊᓪᓛᑦ ᓱᑯᑦᓯᒦᕝᕕᐅᔪᓂᒃ ᐊᓪᓚᓂᐊᕐᑐᓄᑦ ᑐᑭᓯᒪᑦᓯᐊᕆᐊᓪᓚᒍᑎᐅᖃᑦᑕᓚᖓᔪᓂᒃ ᐃᓱᒪᒋᔭᐅᔪᑦ ᐃᓚᖏᓐᓂᒃ.

ᑖᒃᑯᐊᑕᒃᒐ ᐊᓪᓚᑕᐅᔪᑦ ᓯᕗᓪᓕᐹᖑᓕᕐᖁᑦ ᐃᓕᖓᑦᓱᑎ ᐃᓕᓐᓂᐊᑏᑦ ᐱᔪᓐᓇᐅᑎᓕᓐᓂᒃ ᐃᑲᔪᕐᑎᖃᓕᕐᓂᖏᓐᓂᒃ ᐅᓂᒃᑳᑐᑦ.

ᐱᕙᓪᓕᐊᓯᒪᓃᑦ

ᑖᓐᓇ ᐱᔪᓐᓇᐅᑎᖃᕐᓱᑎᒃ ᐃᓕᓐᓂᐊᑎᓂᒃ ᐃᑲᔪᕐᑏᑦ ᐱᓇᓱᒐᖓᑦ ᑲᑎᕕᒃ ᐃᓕᓴᕐᓂᓕᕆᓂᕐᒦᑐᖅ ᓴᕐᕿᑎᑕᐅᓂᖃᓚᐅᕐᓯᒪᕗᖅ 2015-2016-ᒥ ᐃᓕᓐᓂᐊᓇᐅᑉ ᐊᕐᕌᒍᖓᓂ ᑭᐅᑦᔪᑎᐅᓯᑦᓱᓂ ᐃᒻᒥᓂᐊᖃᑦᑕᓂᕐᒥᒃ ᑲᑉᐱᐊᓇᕐᑐᓯᐅᕐᓂᖃᓕᕐᑐᓂᒃ ᓄᓇᖁᑎᑦᑎᓂ. ᑖᓐᓇ ᐱᓇᓱᒐᖅ ᐃᓚᒋᔭᐅᓪᓚᕆᓕᕐᑐᖅ ᐱᑦᔪᔨᒍᑎᑦᑎᓄᑦ ᑌᒪᖕᖓᑦ 2020-ᒥ ᐱᕙᓪᓕᐊᓂᖃᓯᓚᐅᕐᓯᒪᓱᓂ.

ᑕᒃᑯᐊ ᐱᑦᔪᔨᒋᐊᓪᓛᒍᑏᑦ ᐊᒥᓱᐃᓂᒃ ᐱᔪᓐᓇᐅᑎᓕᓐᓂᒃ ᐱᓇᓱᑦᑎᖃᕐᐳᖅ: ᐃᓚᐅᔫᖃᑎᒌᑦᑐᖁᑎᖏᑦ ᐊᒥᓱᐃᓂᑦ ᐊᑦᔨᒌᑦᑎᖏᑦᑐᓂᑦ ᐱᓇᓱᒐᕐᓂᑦ ᐱᓯᒪᒻᒪᑕ – ᐱᕙᓪᓕᐊᓯᒪᓂᕐᒥᒍᓪᓗ ᐊᒻᒪᓗ ᐱᔪᓐᓇᐅᑎᖃᕐᓱᑎᒃ ᐊᑑᑎᓕᓂᐅᓂᖏᑦ ᐊᒥᓱᐃᖑᔪᑦ.

ᓲᕐᓗ ᐅᖃᕋᔭᕈᑦᑎᒍ, ᑖᓐᓇ ᐱᓇᓱᒐᖅ ᐱᒍᓐᓇᕈᓐᓇᐅᑎᐅᕗᖅ ᓴᖑᔭᕋᕈᓐᓇᓂᕐᓴᒥᒃ ᖃᓄᑐᐃᓐᓇᓗ ᑲᒪᒋᐊᕈᑎᐅᒍᓐᓇᓂᕐᓴᐅᓱᓂ. ᐱᔪᓐᓇᐅᑎᓖᑦ ᑎᓕᐅᕐᑕᐅᔪᑦ ᐊᑐᑎᖃᑦᑕᖁᔭᐅᑦᓱᑎᒃ ᐃᒻᒥᒍᑦ ᖃᐅᔨᒪᔭᒥᓐᓂᒃ, ᐱᒋᐅᕐᓯᒪᔭᒥᓐᓂᒃ, ᐃᒻᒥᒍᓪᓗ ᐱᓇᓱᒐᕐᒥᒍᓪᓗ ᐊᑑᑎᓯᒪᔭᒥᓐᓂᒃ ᐃᓕᓐᓂᐊᕕᓐᓂᒃ ᐃᑲᔪᕐᓯᒍᑎᒋᓗᒋᑦ.

ᓱᓇᐅᕚᑦ ᑕᒃᒐ ᐱᔪᓐᓇᐅᑎᓖᑦ ᐃᓕᓐᓂᐊᑎᓂᒃ ᐃᑲᔪᕐᑏᑦ?

ᐱᔪᓐᓇᐅᑎᓖᑦ ᓲᕐᓗ ᐅᖃᕐᑕᐅᒐᒥᒃ ᐱᓇᓱᒐᕐᒥ ᓱᓇᐅᓂᖓᒍᑦ, ᐱᑕᖃᕐᐳᑦ ᐱᑕᖃᕐᑎᓯᔪᑦᓴᐅᓱᑎᒃ ᓴᐳᒻᒥᓂᕐᒥᒃ ᐃᓕᓐᓂᐊᑎᓂᒃ. ᐱᓇᓱᑦᑕᖏᑦ ᐃᓕᖓᓪᓚᕆᑦᑐᑦ ᐱᔪᖃᕐᑎᓯᑦᑌᓕᓂᕐᒧᑦ, ᐋᕐᕿᒋᐊᕆᓇᓱᓐᓂᒧᑦ ᐊᒻᒪᓗ ᑐᖔᓂ ᐃᑲᔪᕐᓯᒪᒐᓱᖏᓐᓇᓂᕐᓄᑦ.

ᖃᓄᐃᓘᕈᑎᒋᓲᖏᑦ ᐊᒥᓲᔪᑦ: ᖃᓄᐃᑐᑐᐃᓐᓇᓂᓪᓗ ᐱᔭᖃᕐᓯᒪᑦᓱᑎᒃ ᐱᕙᓪᓕᐊᑎᑦᓯᒋᐊᕐᓂᓂᑦ ᑎᑭᑦᓱᒋᑦ ᐊᑐᓕᕐᑎᓯᓂᐅᔪᑦ ᐱᓇᓱᒍᑎᑦᓴᓂᒃ ᓴᐳᒻᒥᒍᑎᑦᓴᒥᓂᒃ ᐃᓕᓐᓂᐊᑎᓂᒃ ᐃᓅᓯᕐᒥᓂ ᐃᓱᒻᒪᓯᖏᑎᒍᑦ (ᐃᑉᐱᓂᐊᕐᓂᖏᑎᒍᑦ, ᑲᒪᒋᔭᖃᕐᓂᖏᑎᒍᑦ, ᐃᓅᖃᑎᒥᓂᒃ ᐃᓅᖃᑎᖃᕈᓯᖏᑎᒍᑦ, ᐱᐅᓯᕐᒥᒍᑦ ᐅᖁᒣᓪᓕᐅᕈᑎᖏᑎᒍᑦ, ᐊᑦᑕᓇᕐᑐᒥᒃ ᐃᓱᒪᒥᒍᑦ ᖃᓄᐃᖕᖏᓯᐊᕆᐊᖃᕐᓂᖏᑎᒍᑦ, ᕿᕕᓯᓐᓇᐅᒍᓇᐅᑉᐸᑕ/ᐃᒻᒥᓂᐊᑐᐃᓐᓇᕆᐊᖃᕈᓇᐅᑉᐸᑕ, ᐊᓯᖏᑎᒍᓪᓗ) ᐃᑲᔪᕐᓯᔭᐅᓃᑦ ᐱᑎᑦᓯᒍᑎᐅᒍᓐᓇᑐᑦ ᐃᓄᑐᓇᕐᑎᔪᓂᒃ, ᐊᒥᓱᐃᖑᓗᑎᒃ ᑲᑎᖕᖓᔪᓂᒃ ᐅᕝᕙᓘᓐᓃᑦ ᑐᑭᓯᓂᐊᕐᓂᒥᒃ ᐱᐅᓯᖃᕐᓗᑎᒃ ᐃᓕᓐᓂᐊᕕᓐᓂ ᐱᓇᓱᖃᑎᒌᑦᑐᓂᒃ ᐃᓚᖃᕐᓗᑎᒃ (ᐃᓕᓐᓂᐊᑎᑦᓯᔨᓂᒃ, ᐱᓪᓗᑯᒋᐊᓕᑎᒍᑦ ᐃᓕᓐᓂᐊᑎᑦᓯᔨᓂᒃ, ᐋᕐᕿᒋᐊᕐᓯᒪᔪᓂᒃ ᐃᓕᓐᓂᐊᑎᑦᓯᒍᑎᖃᕈᓐᓇᑐᓂᒃ, ᐊᓯᖏᓐᓂᓗ)

ᐱᔪᓐᓇᐅᑎᓖᑦ ᐊᑑᑎᖃᓪᓚᕆᐊᓗᓱᖑᒻᒥᔪᑦ ᐱᓇᓱᖃᑎᖃᕐᓱᑎᒃ ᐃᓕᓐᓂᐊᕖᑦ ᐃᓕᓴᕐᓂᓕᕆᔨᖏᓐᓂᒃ, ᐅᕕᒃᑫᑦ ᓴᐳᒻᒥᔨᖏᓐᓂᒃ ᐊᒻᒪᓗ ᓄᓇᕐᖃᑎᒥᓐᓂᒃ ᐱᓇᓱᖃᑎᖃᕐᓱᑎᒃ, ᐃᓓᓐᓇᖏᑦ ᐅᖃᕐᑕᐅᔪᑦ, ᐱᑕᖃᕐᑎᓯᒍᑎᖃᕐᐸᑐᑦ ᓴᐳᑦᔨᓯᒪᒍᑎᓂᒃ ᐃᓕᓐᓂᐊᑎᑦ ᑭᖕᖒᒪᑦᓯᒍᑎᖏᓐᓄᑦ ᓈᒻᒪᓯᐊᕐᑐᓂᒃ.

ᐱᓇᓱᑦᑕᖏᑦ ᐃᓚᒋᔭᐅᔪᑦ ᐱᑦᔪᔨᒋᐊᓪᖓᓛᕈᑎᓄᑦ ᐊᒻᒪᓗ ᐃᓚᑦᔪᒍᓱᓐᓂᓕᓐᓂᒃ ᐱᑦᔪᔨᒍᑎᑎᒍᑦ ᐊᑕᐅᑦᓯᑯᕐᑎᑕᐅᑦᓱᑎᒃ ᓄᓇᓕᓕᒫᓄᓕᖓᔪᑦ ᐱᓇᓱᑦᑕᐅᔪᑦ ᒥᓪᓕ-ᔮᑦ ᐳᓓᓐᒧᑦ, ᑲᑎᕕᒃ ᐃᓕᓴᕐᓂᓕᕆᓂᖅ ᐱᓇᓱᑦᑎᖃᕐᐳᖅ 13-ᓂᒃ ᐱᔪᓐᓇᐅᑎᖃᕐᓱᑎᒃ ᐃᓕᓐᓂᐊᑎᓂᒃ ᓴᐳᒻᒥᔨᓂᒃ ᓄᓇᕕᒻᒥ. ᑖᒃᑯᐊ ᓯᕗᓂᖃᕈᑎᐅᕗᑦ ᐱᓇᓱᑦᑎᑖᕆᐊᓪᓚᒐᔭᕐᓱᑎᒃ 5-ᓂᒃ ᑲᑎᓪᓗᑎᒃ 18-ᖑᓛᕐᒪᑕ.

ᑌᒪᓕ ᑐᓴᕐᑕᐅᑎᒐᑦᑎᒍ ᑕᒪᓐᓇ, ᑐᑭᓯᒪᓂᕐᓴᐅᓚᖓᓕᕐᓱᑎᓪᓗ ᓱᓇᐅᒻᒪᖔᑕ, ᑖᒃᑯᐊ ᓯᕗᓪᓕᐹᕆᔭᐅᑐᐃᓐᓇᓚᖓᕗᑦ ᓯᕗᓂᑦᓴᑎᓐᓂ ᐅᓂᒃᑲᐅᓯᕆᖃᑦᑕᓛᓕᕐᒥᒐᑦᑎᒋᑦ. ᑐᓴᓴᕈᒪᖕᖏᓚᑎᓪᓖ ᓱᓇᓂᒃ ᐅᖃᐅᓯᑦᓴᖃᓛᕐᒪᔭᖓᑕ?

ᐊᑐᐊᕋᑦᓴᓂᒃ ᓄᐃᑦᓯᒋᐊᓪᓚᖏᓐᓂᑎᓐᓄ, ᑐᑭᓯᓂᐊᕈᓐᓇᕆᕗᑦ ᑕᑯᓇᓱᓪᓗᒋᑦ ᐱᑦᔪᔨᒍᑎᒋᒍᓐᓇᑕᕗᑦ ᓄᓇᓕᓐᓂᓗ ᓄᓇᓕᓕᒫᓂᓗ ᐱᑦᔪᔨᒋᐊᓪᓛᕕᐅᑉ ᐊᒻᒪᓗ ᐃᓚᑦᔪᒍᓱᓐᓂᑕᓕᓐᓂᒃ ᐱᑦᔪᔨᒍᑎᖃᕐᓂᐅᑉ ᖃᓄᐃᓘᕈᑎᒋᓱᖏᓐᓂᒃ ᑕᑯᒋᐊᕐᓗᒋᑦ ᖃᕆᑕᐅᔭᑎᒍᑦ ᑕᑯᓇᓱᑦᑕᐅᕕᑦᑎᓂ.