ᒪᓐᑐᔨᐊᒥ, (ᐁᕆᓕ 1, 2016) – ᐱᓇᓱᐊᕈᓯᐅᓛᕐᑐᒥ, ᑕᓪᓕᒪᑦ ᓄᓇᓕᓕᒫᓂ ᓱᑯᐃᔦᓂᕐᒨᓕᖓᔪᓂᒃ ᓴᕐᕿᔮᕐᑎᓯᓂᖃᕐᑎᓗᒋᑦ ᓵᓚᓕᕕᓃᑦ ᓄᓇᕕᒻᒥᒃ ᑭᒡᒐᑐᕆᐊᕐᑐᓛᕐᑐᑦ ᓴᕐᕿᔮᕐᑎᓯᑎᓪᓗᒋᑦ ᑯᐯᒻᒥᐅᑦ. ᐁᕆᓕ 5-ᒥ 6-ᒥᓪᓗ, ᓴᕐᕿᔮᕐᑎᓯᓛᕐᑐᑦ ᓱᑯᐃᔦᓂᕐᒨᓕᖓᔪᓂᒃ ᐱᓇᓱᐊᕐᑕᒥᓂᒃ 2016-ᒥ ᑯᐯᒻᒥᐅᑦ ᓄᓇᖃᕐᖄᓯᒪᔪᑦ ᓱᑯᐃᔦᓂᕐᒨᓕᖓᔪᓂᒃ ᓴᕐᕿᔮᕐᑎᓯᓂᖏᓐᓂ, ᒥᔅᑎᓯᓂ ᑯᐯᒻᒥ. ᑕᒪᓐᓇ ᑯᐯᒻᒥ ᐱᓇᓱᐊᕐᑕᐅᔪᖅ ᓄᓇᕕᒻᒥᐅᑦ ᐃᓕᓐᓂᐊᑎᖏᓐᓄᑦ ᐱᕕᑦᓴᓯᐊᒻᒪᕆᐅᕗᖅ ᐊᓕᐊᒋᑦᓯᐊᑕᒥᓂᒃ ᐱᔭᖃᕋᓱᐊᕐᓂᒧᑦ ᓱᑯᐃᔦᓂᕐᒨᓕᖓᔪᓂᒃ ᑲᑎᓯᕕᑦᓴᓯᐊᒻᒪᕆᐅᑦᓱᓂᓗ ᓄᓇᖃᕐᖄᓯᒪᔪᓂᒃ ᐃᓕᓐᓂᐊᑎᓂᒃ ᓄᓀᑦ ᐊᓯᖏᓐᓂᒃ ᐱᓯᒪᔪᓂᒃ.

ᕕᕈᐊᕆ 24-ᒥ, ᓄᓇᕕᒻᒥ ᓄᓇᓕᓕᒫᑦ ᓱᑯᐃᔦᓂᕐᒥᒃ ᓴᕐᕿᔮᕐᑎᓯᑎᓪᓗᒋᑦ, ᓘᑲᓯ ᐊᒫᒪᑦᑐᐊᖅ ᓴᓪᓗᒥᐅᖅ ᓯᕗᓪᓕᐹᖑᑦᓱᓂ ᓵᓚᖃᐅᑎᑖᓚᐅᔪᖅ ᐱᓇᓱᐊᕐᑕᒥᓄᑦ “ᓂᑦᔮᔫᓐᓂᖅ ᐃᓱᒪᑐᔫᓂᕐᓗ”. ᐱᓇᓱᐊᕐᑕᒥᓂ ᐃᑉᐱᒋᔭᖃᓚᐅᔪᖅ ᓂᑦᔮᔫᕐᓂᐅᑉ ᓱᕐᕃᓲᖑᓂᖓᓂᒃ ᖃᕆᑕᕐᒥᒃ: ᐃᑉᐱᓂᐊᕐᓂᕗᑦ, ᐃᓱᒪᒍᓐᓇᓂᕗᑦ ᓴᓇᑦᑐᓴᐅᑎᓕᕆᐅᑎᓕᕆᓂᕐᓗ. ᑐᖓᓕᖕᖑᑎᓪᓗᒋᒃ ᔨᓂ ᐅᕿᑦᑐᖅ ᐃᓚᖃᕐᓱᓂ ᐃᓓᑦᔭ ᐁᓯᒥᒃ ᓴᓪᓗᒥᐅᓂᒃ. ᐱᓇᓱᐊᕐᓱᑎᒃ “ᖁᓪᓕᖅ 2.0” ᓇᓪᓕᑳᕈᑎᒋᑦᓱᒍ ᐱᑦᓯᐊᕈᓐᓇᓂᖏᓐᓂᒃ ᐱᐅᔫᓂᖃᕈᓐᓇᓂᖏᓐᓂᓗ ᐊᑦᔨᒌᖕᖏᑐᑦ ᐅᕐᓱᐃᑦ ᐊᑐᕐᑕᐅᓲᑦ ᖁᓪᓕᓄᑦ. ᐊᒦᓕᐊ ᑐᑲᓚᒃ-ᒧᕃᖕ ᑫᓕ ᑯᐊᓐᓇᓈᕐᓗ ᐳᕕᕐᓂᑐᒥᐅᒃ ᐱᖓᔪᒋᔭᐅᑦᓱᑎᒃ ᓵᓚᖃᓚᐅᔪᒻᒥᔫᒃ ᓱᑯᐃᔦᓂᕐᒨᓕᖓᔪᓂᒃ ᐱᓇᓱᐊᕐᓂᒥᓄᑦ ᓇᓪᓕᑳᕆᑦᓱᑎᒃ ᐅᕐᖂᓗᑕᐅᕈᓐᓇᑐᓂᒃ ᐃᓚᒋᔭᐅᑎᓪᓗᒋᑦ ᐃᓪᓘᑉ ᐃᓗᐊᓂ ᐊᐳᑎᒥᒃ ᐊᐅᑦᑎᓯᑦᑌᓕᓂᕐᒧᑦ ᖃᐅᔨᓴᕐᓱᒋᑦ.

ᑐᑭᑖᕆᔩᑦ ᓄᓇᕕᒻᒥ ᓄᓇᓕᓕᒫᑦ ᓱᑯᐃᔦᓂᕐᒥ ᓴᕐᕿᔮᕐᑎᓯᓂᖏᓐᓂ ᑕᐯᕐᓯᒪᓂᕋᕐᑐᐃᓇᐅᓚᐅᔪᑦ ᐱᐅᓂᓪᓚᕆᖏᓐᓂᒃ ᑕᒡᒐᓂ ᐊᕐᕌᒍᒥ ᐱᓇᓱᐊᕐᑕᐅᔪᓂ. “ᐃᓕᓐᓂᐊᑏᑦ ᐱᓇᓱᐊᒻᒪᕆᑦᑐᕕᓃᑦ. ᓇᓗᕐᖁᑎᓂᖃᕋᑎᒃ ᐅᐱᒍᓱᓐᓂᖃᑦᓯᐊᓱᑎᓗ ᐱᓇᓱᐊᕐᑕᒥᓂᒃ ᓴᕐᕿᑎᑦᓯᓂᖃᓕᕋᒥᒃ. ᐊᒥᓱᒻᒪᕆᐅᓚᐅᔪᑦ ᐱᓇᓱᐊᕐᑕᐅᔪᑦ! ᐱᔭᕆᑐᔪᒻᒪᕆᐅᑎᑦᓯᓚᕿᑦᓱᑎᒃ ᓇᓪᓕᖏᓐᓂᒃ ᓵᓚᖃᕐᑐᓴᓕᐅᒐᓱᐊᕆᐊᒥᒃ,” ᑐᑭᑖᕆᔩᑦ ᐃᓚᖓ ᓚᔪᖅ.

ᑲᑎᕕᒃ ᐃᓕᓐᓂᐊᓂᓕᕆᓂᖅ ᓇᑯᕐᒦᕈᒪᕗᖅ ᓄᓇᕕᒻᒥ ᓄᓇᓕᓕᒫᑦ ᓱᑯᐃᔦᓂᕐᒨᓕᖓᔪᓂᒃ ᓴᕐᕿᓵᕐᑎᓯᓂᖓᓂᒃ ᓵᓇᖃᐅᑎᖏᓐᓂᓗ ᓄᓇᕕᒻᒥᐅᓄᑦ ᐱᑕᖃᕈᓐᓇᑎᑕᐅᓚᐅᔪᒻᒪᑕ ᑮᓇᐅᔭᖃᕐᑎᒍᑦ ᐃᑲᔪᕐᓯᓂᖃᕐᑎᓗᒋᑦ ᑲᑎᕕᒃ ᓄᓇᓕᓕᒫᑦ ᑲᕙᒪᖓᑕ.

ᐅᕙᑦᑎᓅᓕᖓᔪᑦ:

ᑲᑎᕕᒃ ᐃᓕᓐᓂᐊᓂᓕᕆᓂᖅ ᐱᖕᖑᑎᑕᐅᓯᒪᔪᖅ 1975-ᒥ, ᔦᒥᓯ ᐯᑉ ᑯᐯᓪᓗ ᑕᕐᕋᖓᑕ ᐊᖏᖃᑎᒌᒍᑎᖓᑎᒍᑦ. 1978-ᒥᓂᑦ, ᐱᒍᑦᔨᔨᑐᐊᖅ ᐃᓕᓐᓂᐊᑎᑦᓯᓂᒃᑯᑦ ᐱᒍᑦᔨᒍᑎᓂᒃ ᓄᓇᕕᒻᒥᐅᓄᑦ. ᐃᓕᓐᓂᐊᑎᑦᓯᒍᑏᑦ ᓴᓇᔭᐅᓯᒪᔪᑦ ᑲᑎᕕᒃ ᐃᓕᓐᓂᐊᓂᓕᕆᓂᕐᒧᑦ ᐃᓕᓐᓂᐊᑎᑦᓯᒍᑕᐅᕗᑦ ᐃᓕᓐᓂᐊᕕᓐᓂ ᓄᓇᕕᒻᒥ ᓄᓇᓕᓐᓂ 14-ᓂ. ᐃᓄᒃᑎᑐᑦ ᐅᖃᐅᓯᕐᖄᖑᑎᓪᓗᒍ, ᐅᐃᒍᐃᑎᑐᑦ ᖃᓪᓗᓈᑎᑐᓪᓗ ᐅᖃᐅᓯᐅᑉ ᐁᑉᐱᐅᑎᒋᔭᖏᓐᓂ. ᑐᑭᓯᒋᐊᕈᒪᒍᕕᑦ ᐅᕙᑦᑎᓂᒃ, ᑕᑯᒋᐊᕐᓗᑎᑦ ᖃᕆᑕᐅᔭᕐᑎᒍᑦ ᐅᒃᑯᐃᖔᕐᕕᑎᓐᓂᒃ ᐅᕙᓂ: www.kativik.qc.ca

— 30 —

ᑐᑭᓯᒋᐊᕈᒪᕈᕕᑦ, ᐅᕗᖓ ᐅᖃᕐᓗᑎᑦ:

ᔮᑦ ᑐᔅᓅ ᐱᐊᕐᓃ

ᑭᓇᒃᑯᑐᐃᓐᓇᓄᑦ ᑐᓴᐅᒪᖃᑎᒌᒍᑎᓕᕆᔨ

(514) 482-8220

publicrelations@kativik.qc.ca