ᐱᒐᓱᐊᕐᓂᖅ ᐱᔭᕇᕈᑎᒥᒃ ᐃᓕᓐᓂᐊᑎᑦᓯᔨᐅᑦᓱᓂ ᓄᓇᕕᒻᒥ: ᐋᓕᒃᓵᕐᑐᕇᓐ ᐅᑲᐅᓂᐅᕐ ᓇᒧᖕᖓᕙᓪᓕᐊᓂᖏᑦ
ᓄᓇᕕᒻᒥ,ᑐᓂᓯᒪᑦᓯᐊᓂᖅ ᐊᒻᒪᓗ ᓴᐱᓕᑦᓯᕇᑦᑑᓂᖏᑦ ᐃᓕᓐᓂᐊᑎᓯᔩᑦ ᐃᓱᒣᓐᓇᖅ ᐊᑦᑐᐊᓂᖃᕐᖁᑦ ᐃᓕᓐᓂᐊᑏᑦ ᐱᔭᕇᕈᓯᒍᓐᓇᓚᕿᓂᖏᓐᓂ. ᑕᒪᓐᓇ ᑕᑯᓐᓇᓗᒍ,ᐅᓂᒃᑲᐅᓰᑦ ᐋᓕᒃᓵᓐᑐᕆᓐ ᐅᑯᐊᕐᓃᕐ ᑎᑐᑦ ᓄᐃᑕᑦᓴᐅᕗᑦ.ᑐᓂᓯᒪᑦᓯᐊᓂᖓ ᐱᔭᕇᕈᑎᑖᕋᓱᐊᕐᓂᒧᑦ ᐃᓕᓐᓂᐊᑎᑦᓯᖃᑦᑕᖏᓐᓇᓱᓂ ᓄᐃᑕᑎᑦᓯᓚᕆᒃᑯᖅ ᑌᒫᑎᒋ ᑐᓂᓯᒪᓂᕐᒥᓂ ᐃᓕᓐᓂᐊᑎᑦᓯᓯᐊᕈᓐᓇᓂᕐᒧᑦ ᐊᒻᒪᓗ ᓄᓇᓕᓐᓂ ᐱᓇᓱᐊᕐᕕᒋᕙᑦᑕᖏᓐᓂ.
ᑕᑯᒥᓇᕐᑐᖑᐊᓕᐅᕐᓂᒥᒃ ᑲᑎᒪᓂᐊᕈᓯᖃᕐᑎᓯᓂᕐᒥᒃ ᖃᐅᑕᒫᕐᓯᐅᑎᒧᑦ ᐃᓕᓐᓂᐊᑎᑦᓯᔨᐅᓂᕐᒧᑦ
ᐱᕙᓪᓕᐊᔪᑎᒍᑦ ᐅᖃᐅᓯᐅᖃᑦᑕᓚᐅᕐᑐᑦ ᑯᐯᒃ ᑐᖕᖓᕕᖃᕐᐸᓕᐊᑐᐃᓐᓇᓂᖓᓂ ᐱᔭᕇᕈᑎᖃᖕᖏᑐᑦ ᐃᓕᓐᓂᐊᑎᑦᓯᔩᑦ ᐃᑎᖃᑦᑕᑐᑦ ᖃᕆᐊᕐᓄᑦ ᐃᓓᓐᓈᑐᓂ ᐱᒋᐅᕐᓴᓯᒪᑦᓱᑎᒃ ᐊᒻᒪᓗ ᐱᓇᓱᖏᓐᓇᓱᑎᒃ ᐃᓕᑦᓯᕙᓪᓕᐊᓕᑌᓐᓇᖃᑦᑕᑐᑦ. ᑕᓐᓇ ᑕᑯᓐᓇᓱᒍ ᐊᑦᓱᕈᕐᓇᑐᖅ,ᐊᑕᐅᓯᖅ ᑲᑎᕕᒃ ᐃᓕᓴᕐᓂᓕᕆᓂᒃᑯᓂ ᐃᓕᓐᓂᐊᑎᑦᓯᔨ ᐃᕗᔨᕕᒻᒥ ᑎᒍᓯᓚᐅᕐᐳᖅ ᐱᔭᑦᓴᓕᐊᕆᔭᐅᓯᒪᔪᒥ ᐊᔪᖕᖏᓂᕐᑖᕈᓐᓇᓂᕐᒧᑦ ᐃᓕᓐᓂᐊᑎᑦᓯᔨᐅᒍᑎᒥ,ᓄᐃᑕᑎᑦᓯᓚᕆᓕᕐᓱᓂ ᐱᒍᓐᓇᓂᕐᒥᒃ,ᓲᖑᔪᓪᓚᕆᒻᒥᒃ ᑐᓂᓯᒪᓂᕐᒥᒃ ᐃᓕᓐᓂᐊᑎᑦᓯᔨᐅᑦᓯᐊᕈᓐᓇᓕᕐᓗᓂ ᓄᓇᕕᒻᒥ.
ᐋᓕᒃᓵᕐᑐᕇᓐ ᐅᑯᐊᕐᓂᐅᕐ ᐊᕐᖁᑎᖓ ᐃᓕᓐᓂᐊᑎᑦᓯᔨᖕᖑᕙᓪᓕᐊᓂᕐᒧᑦ ᐱᒋᐊᓚᐅᔪᕗᖅ ᐃᒻᒥᒍᑦᓯᐊᖅ. 2022 ᖑᑎᓪᓗᒍ,ᐃᓚᒋᔭᐅᓗᓂ,ᐊᓪᓚᑎᐅᓂᕐᒧᑦ ᐃᓕᓐᓂᐊᕕᕐᔪᐊᒥ ᑯᐯᒻᒥ ᒪᕐᑐᕆᐊᓪ ᒥ (UQAM)ᓚᔭᐅᓲᖅ, ᙯᖁᔭᐅᓚᐅᕐᓯᒪᔪᖅ ᓄᕝᕕᑎ ᐃᓕᓐᓂᐊᕕᖓᓄᑦ ᓯᕗᓕᕆᐊᕐᑐᖁᔭᐅᑦᓱᓂ ᑲᑎᒪᓂᐊᕈᓯᕐᓂ ᑕᑯᒥᓇᕐᑐᓂ ᐊᓪᓚᑎᖕᖑᓂᕐᒧᑦ ᐊᒻᒪᓗ ᐊᓪᓚᓂᐊᒐᓕᐅᕐᓂᒧᑦ. ᑕᒪᓐᓇ ᐱᔭᑦᓴᓕᐊᖑᓯᒪᔪᖅ ᐃᓱᓕᓚᐅᔪᖅ ᐱᐊᕋᕐᓄᑦ ᐊᓪᓚᓂᐊᒐᓕᐅᕐᓱᑎᒃ ᐊᒻᒪᓗ ᐃᕐᖃᐅᒪᓀᓐᓇᓂᐊᓕᕐᓗᓂ ᐋᓕᒃᓵᕐᑐᕆᓐ ᐊᑦᑐᓂᖃᑦᓯᐊᓂᖓ ᐃᓕᓐᓂᐊᑎᓂᑦ ᐊᒻᒪᓗ ᓄᓇᕐᖃᑎᒌᓂᑦ.
ᖃᐅᔨᒐᒪ ᐊᓕᐊᒋᔭᖃᕆᐊᕋᓂᒃ ᐃᓕᓐᓂᐊᑎᑦᓯᓂᕐᒥᒃ ᐳᒃᑭᓂᕐᓴᓂᑦ,ᐅᒃᑯᐊᕈᒣᑦᓯᐊᓚᐅᔭᕋ ᑕᒪᓐᓇ,ᐊᓱᐃᓛ ᑕᑯᒋᐊᓯᓚᐅᔪᖓ ᓱᓇᓂᒃ ᐱᔪᓐᓇᓂᖃᕐᒪᖔᕐᒪ. ᐊᔪᕐᓇᑐᕋᑕᐅᓚᐅᔪᖅ ᑮᑕ ᐱᔭᑦᓴᓕᐊᖑᓯᒪᔪᑦ ᓀᑦᑑᓈᕐᑎᑐᑦ ᓄᑖᖑᖏᓐᓇᒪᑕ,ᐊᒻᒪᓗ ᐃᓚᐅᒍᓐᓇᐅᑏᑦ ᐃᑎᕈᓐᓇᓯᒍᑏᑦ ᓄᐃᑕᑦᓯᐊᖏᒻᒪᑕ ᐊᒻᒪᓗ ᑭᓇᒃᑯᑦ ᐃᓚᐅᒍᓐᓇᑐᑦ ᓚᓯᒪᔪᑦ ᓄᐃᑕᑦᓯᐊᒥᒐᑎᒃ.
ᐱᔭᕇᕐᓯᒪᓕᕐᓱᓂ master’s degree ᒥᓂᒃ, ᐋᓕᒃᓵᕐᑐᕆᓐ ᑐᑭᑖᓕᓚᐅᔪᕗᖅ ᑲᔪᓯᒍᒪᓕᕐᓱᓂ ᖃᐅᑕᒫᕐᓯᐅᑎᒥᒃ ᐃᓕᓐᓂᐊᑎᑦᓯᔨᐅᒍᒪᓕᕐᓱᓂ ᐳᒃᑭᓂᕐᓴᓃᑦᑐᓂᑦ. ᐅᑭᐊᑦᓴᖅ 2023 ᐅᑎᓕᓚᐅᔪᕗᖅ ᓄᕝᕕᑎ ᐃᓕᓐᓂᐊᕕᖓᓄᑦ.ᒫᓐᓇ ᑖᕙᓂ ᐃᓕᓐᓂᐊᑎᑦᓯᔨᐅᓕᕐᑐᖅ ᐊᒻᒪᓗ ᑲᔪᓯᑦᓯᐊᓱᓂ ᐃᓚᐅᓂᕐᒥᒃ ᓄᓇᓕᒻᒥ.
ᑲᔪᓯᑎᑦᓯᓂᖅ ᐱᔭᕇᕈᑎᑖᕈᓐᓇᓂᕐᒧᑦ ᐃᑲᔪᕐᓯᔭᐅᑦᓯᐊᓱᓂ
ᐊᔪᐃᓐᓇᓂᒃᑯᑦ ᐱᔭᕇᑦᓯᐊᕈᒪᑦᓱᓂ ᐊᔪᖕᖏᑕᓕᐊᕆᔭᒥᓂ,ᐋᓕᒃᓵᕐᑐᕆᓐ ᐱᔭᕇᕐᓯᒪᓕᕐᖁᖅ ᐃᓕᓐᓂᐊᑎᑦᓯᔨᖕᖑᕈᑎᑖᕐᓂᒥᒃ TELUQ ᐃᓕᓐᓂᐊᕕᕐᔪᐊᖓᓂ.ᓇᒧᖕᖓᕙᓪᓕᐊᓂᖅ ᐊᔪᕐᓇᕋᓗᐊᕐᑎᓗᒍ ᓄᓇᓕᐊᕈᕐᓂ ᐃᓕᓐᓂᐊᕋᓱᑦᓱᓂ ᓄᓇᕕᒻᒥ,ᐊᔪᕐᓇᑐᕐᓯᐅᖃᑦᑕᕋᓗᐊᕋᒥ ᐃᓚᐅᒍᓐᓇᕈᑎᓂ ᐱᔭᑦᓴᓴᔭᓕᐊᖑᓯᒪᔪᓄᑦ ᐊᒻᒪᓗ ᐱᓇᓱᕝᕕᓄᑦ ᐊᑦᑐᐊᓂᕆᔭᐅᔪᓂ. ᐊᔪᐃᓐᓇᓂᒃᑯᑦ ᐊᒻᒪᓗ ᐃᑲᔪᕐᓯᔭᐅᓂᒃᑯᑦ ᑲᑎᕕᒃ ᐃᓕᓴᕐᓂᓕᕆᓂᖅ ᐱᓇᓱᑦᑎᓕᕆᕕᖓᓄᑦ ,ᓇᕝᕚᓕᕐᓂᖁᖅ ᓯᕗᒧᐊᕈᑎᑦᓴᒥᓂ.
ᐃᓕᓐᓂᐊᖃᑦᑕᓚᐅᔪᔭᖏᑦ master’s ᑖᕋᓱᓐᓂᒥ ᓄᐊᑦᓯᒍᑎᒋᓐᓂᒥᔭᖏᑦ ᖁᕝᕙᕆᐊᕈᑎᓂᑦ, ᐃᓕᒍᓐᓇᓯᑦᓯᐊᓕᕐᓂᖁᖅ TELUQ ᑯᑦ ᓄᑕᐅᓯᓖᓕᕐᑐᕕᓂᐅᒻᒪᑕ ᐃᓚᐅᒍᓐᓇᐅᑏᑦ ᑕᑕᕐᓴᑕᐅᒍᑎᖏᓐᓂᑦ.ᔭᓄᐊᕆ 2025-ᒥ ᐱᒋᐊᓕᓚᐅᔪᕗᖅ ᐃᓕᓐᓂᐊᑎᑦᓯᔨᙳᕈᑎᑖᕋᓱᐊᕐᓂᒥᒃ,ᑲᔪᓯᑎᑦᓯᓯᐊᕐᓱᓂ ᐊᕐᖁᑎᒥᓂ ᐃᓕᓐᓂᐊᑎᑦᓯᔨᐅᓂᕐᒥᒃ ᐃᓕᓐᓂᐊᑎᐅᓂᕐᒥᓗ,ᐱᓂᐊᕐᓂᖃᕐᓱᓂ ᐊᑦᑐᐃᓯᒪᑦᓯᐊᓂᕐᒧᑦ ᓄᓇᕕᒻᒥ.
ᑖᓐᓇ ᐱᔭᕇᕈᑎᑖᕐᓂᖅ ᓴᓇᔭᐅᓯᒪᕗᖅ ᐃᓕᓐᓂᐊᑎᑦᓯᔨᓄᑦ ᑎᒍᒥᐊᕈᓐᓇᓯᖁᓪᓗᒋᑦ bachelors degree ᓚᔭᐅᓲᒥ ᑭᓯᐊᓂ ᐱᖁᔭᑎᒍᑦ ᐃᓕᓐᓂᐊᑎᑦᓯᔨᐅᒍᓐᓇᐅᑎᖃᕋᑕᖕᖏᑐᑦ. ᖃᕆᑕᐅᔭᑎᒎᕐᑐᖅ ᐃᓘᓐᓇᖓ ᐃᓕᓐᓂᐊᕕᒃ,ᐃᓕᓐᓂᐊᑎᑦᓯᔩᑦ ᐱᒍᓐᓇᓯᖁᓪᓗᒋᑦ ᐃᓕᓐᓂᐊᓂᕐᒥᒃ ᐊᐅᓪᓚᕆᐊᑐᕈᓐᓇᐃᓗᑎᒃ,ᖃᕆᐊᒥᓃᖏᓐᓇᓗᑎᒃ ᐃᓕᓐᓂᐊᕈᓐᓇᓚᕿᓲᑦ ᐊᒻᒪᓗ ᐃᒻᒥᓂᒃ ᑲᐃᕙᓪᓚᒍᓯᕆᒍᒪᔭᒥᓂ ᓂᕈᐊᕈᓐᓇᓱᑎᒃ.
ᐊᑑᑎᖃᓪᓚᕆᒃᑯᖅ ᐃᓕᓐᓂᐊᕕᒃ ᐱᒻᒪᕆᐊᓘᒻᒪᑦ.ᐃᓕᑦᓯᓲᖑᑦᓱᑕᓗ ᓱᓇᑐᐃᓐᓇᓂᑦ ᐊᑑᑎᖃᑦᓴᐅᑎᒋᔪᓂᑦ. ᐊᑦᓱᕉᓚᒋᐊᓪᓚᓇᕐᑑᒐᓗᐊᖅ ᑭᓯᐊᓂ ᓱᒃᑲᐃᓵᕈᑦᑕ ,ᑲᒪᑦᓯᐊᓗᑕᓗ,ᓈᒻᒪᓈᕐᑎᓯᐊᕐᓗᒋᓪᓗ ᐱᓇᓱᑦᑕᕗᑦ,ᐃᓕᓐᓂᐊᑕᕗᑦ ᐊᒻᒪᓗ ᐃᓅᓯᕗᑦ ᓯᓚᑖᓂ,ᐃᖏᕐᕋᓯᐊᑐᐃᓐᓇᕈᓐᓇᖁᒍᑦ ᐃᖏᐅᓕᒃᑯᑦ ᑎᑭᐅᑎᖕᖏᓂᓕᒫᕗᓐᓂ ᐱᒍᓐᓇᓂᕗᓐᓄᑦ.
ᐃᓕᓐᓂᐊᑎᑦᓯᔩᑦ ᓄᓇᕕᒻᒥ,ᐱᒐᓱᐊᕐᐸᐳᑦ ᐊᔪᖕᖏᓂᕐᑖᕋᓱᐊᕐᓂᒥᒃ ᐱᕈᕐᐸᓕᐊᓂᕐᒥᒃ ᐊᑦᓱᕈᕐᓇᑐᐊᓘᒐᓗᐊᕐᑎᓗᒍ,ᑭᓯᐊᓂ ᑲᑎᕕᒃ ᐃᓕᓴᕐᓂᓕᕆᓂᖅ ᑐᓂᓯᒪᑦᓯᐊᖁᖅ ᐃᑲᔪᕐᓯᓂᕐᒥᒃ ᐃᓕᓐᓂᐊᑎᑦᓯᔨᓂᑦ ᐱᔭᕇᑦᓯᐊᖁᔨᑦᓱᑎᒃ ᐱᒐᓱᑦᑕᒥᓂ. ᑮᓇᐅᔭᑎᒍᑦ ᐃᑲᔪᕐᓯᓱᑎᒃ,ᐃᓕᓐᓂᐊᓂᒃᑯᑦ ᐃᒫᙰᕐᓱᑎᒃ ᐊᒻᒪᓗ ᓄᕐᖃᔪᐃᑦᑑᓱᑎᒃ ᐃᑲᔪᕐᐸᑐᑦ,ᑎᓕᐅᕆᓪᓚᕆᒃᑯᒍᑦ ᐱᓇᓱᑦᑎᑎᓐᓂ ᑲᔪᓯᖁᔨᑦᓱᑕ ᐃᓕᓐᓂᐊᕙᑦᑕᒥᓂᑦ ᐊᒻᒪᓗ ᐱᓇᓱᖃᑎᒌᑦᓯᐊᓗᑕ ᑎᑭᐅᑎᓂᕐᒧᑦ. ᓇᑯᕐᒦᕈᒪᕗᒍᑦ ᐋᓕᒃᓵᕐᑐᕆᓐ ᐅᓂᒃᑳᕈᓐᓇᓚᐅᕐᒪᑦ ᐊᕐᖁᑎᒋᕙᑦᑕᒥᓂ ᐊᒻᒪᓗ ᐃᓕᑦᓯᓂᑦ ᙯᖁᔨᕗᒍᑦ ᒪᐅᖓ ᐱᔪᓐᓇᐅᑎᑖᕐᐸᓕᐊᓂᖅ ᖃᕆᑕᐅᔭᑎᒍᑦ ᑕᑯᑦᓴᐅᕕᑐᑦᑕ ᐃᓚᖓ.
ᐃᓕᓐᓂᐊᑎᑦᓯᓂᖅ ᐱᒻᒪᕆᐅᕗᖅ ᐊᒻᒪᓗ ᑐᑭᖃᑦᓯᐊᓱᓂ ᐱᓇᓱᒐᕆᑦᓱᒍ,ᓄᓇᕕᒻᒥᓗᐊᖕᖑᐊᖅ ᐊᑦᑐᐃᓯᒪᓪᓚᕆᓲᖅ ᐃᓕᓐᓂᐊᑎᓂᑦ,ᐃᓚᒌᓂᑦ ᐊᒻᒪᓗ ᓄᓇᓕᒻᒥ. ᐃᓕᓐᓂᐊᑎᑦᓯᔩᑦ ᑕᑯᓐᓇᓱᒋᑦ ᐃᓚᐅᒍᒪᓕᕐᓂᕈᕕᑦ ᐃᓚᐅᒐᓱᒍᓐᓇᓯᐊᕐᖁᑎᑦ ᐃᓕᓐᓂᐊᑎᑦᓯᔨᖕᖑᓂᕐᒥᒃ.
ᐃᓕᓐᓂᐊᑎᑦᓯᔨᐅᑉ ᐃᓂᖏᑦ ᐅᒃᑯᐃᖔᕐᑐᑦ ᐊᒻᒪᓗ ᐱᔪᒥᓇᕐᑐᓂᑦ ᑮᓇᐅᑦᔭᓴᕐᓱᓂ!
ᐃᓕᒐᓱᒍᓐᓇᖁᑎᑦ ᐅᓪᓗᒥ ᐃᓚᐅᓯᓗᑎᓪᓗ ᐱᓇᓱᑦᑎᐅᖃᑎᑦᑎᓄᒃ.