ᐃᓕᓐᓂᐊᓂᕐᒥᒃ ᓄᓇᓕᓐᓂ ᑭᒡᒐᑐᕐᑏᑦ ᑐᓴᕐᑎᓯᕗᑦ ᐊᖏᖃᑎᒌᒍᑎᐅᑉ ᑐᖕᖓᓂᓕᕐᑕᐅᓂᖏᓐᓂᒃ ᑲᑐᑦᔨᖃᑎᒌᓐᓂᖅ ᐃᑲᔪᕐᑎᓂᒃ ᐱᓇᓱᑦᑎᖏᓐᓂᒃ ᑭᒡᒐᑐᕐᑐᖅ ᐃᓚᒋᑦᓱᒍ

2022 | 03 | 24

ᒪᓐᑐᔨᐊᓪ, ᑯᐯᒃ (ᒫᑦᔨ 24, 2022) – ᑕᒡᒐᓂ ᐱᓇᓱᐊᕈᓯᒥ ᑐᓴᕐᑎᓯᒍᑎᐅᓂᖏᑦᑕ ᑭᖑᓂᖓᒍᑦ 2015-2020 ᐱᓇᓱᑦᑏᑦ ᑲᑐᑦᔨᖃᑎᒌᓐᓂᖏᑦᑕ ᐊᖏᖃᑎᒌᓐᓂᖏᑦᑕ ᓄᑕᐅᓯᓕᕐᓂᖏᓐᓄᑦ ᐃᓕᖓᔪᓂᒃ ᑲᑐᑦᔨᖃᑎᒌᓐᓂᒧᑦ ᐃᓚᐅᔪᓄᑦ ᐱᓇᓱᑦᑎᒥᓄᑦ, ᑲᑎᕕᒃ ᐃᓕᓴᕐᓂᓕᕆᓂᖅ ᖁᕕᐊᒋᔭᓕᒃ ᐱᔪᓐᓇᐅᑎᓖᑦ ᑲᑐᑦᔨᖃᑎᒌᓐᓂᖓᓗ ᐊᖏᖃᑎᒌᒍᑎᐅᑉ ᑐᖕᖓᓂᓕᕐᑕᐅᒍᑎᖏᓐᓂᒃ.  ᑖᒃᑯᐊ ᐊᖏᖃᑎᒌᒍᑎᐅᑉ ᑐᖕᖓᓂᓕᕐᑕᐅᒍᑎᖏᑦ ᓱᓕᓕᕐᑎᑕᐅᒋᐊᖃᓚᖓᔪᑦ ᑲᑐᑦᔨᖃᑎᒌᓐᓂᒧᑦ ᐃᓚᐅᔪᓄᑦ.

“ᐅᓪᓗᒥ ᐊᑑᑎᔭᕗᑦ ᐊᖏᖃᑎᒌᒍᑎᐅᑉ ᑐᖕᖓᓂᓕᕐᑕᐅᒍᑎᖏᑦ ᓇᓗᓀᕆᔪᖅ ᐊᖏᔪᒥᒃ ᐊᓪᓗᕆᐊᕈᑎᒥᒃ ᑲᑐᑦᔨᖃᑎᒌᓐᓂᓂᒃ ᐊᖏᖃᑎᒌᒐᓱᐊᖃᑎᖃᕐᓂᕆᖃᑦᑕᑕᕗᓐᓂᒃ ᑖᒃᑯᐊᓗ ᐊᖏᔪᑲᓪᓚᓂᒃ ᐱᕙᓪᓕᖁᑎᑖᕈᑎᐅᓚᖓᑦᓱᑎᒃ ᑲᑐᑦᔨᖃᑎᒌᓐᓂᒧᑦ ᐃᓚᐅᑦᓱᑎᒃ ᐱᓇᓱᑦᑎᕗᓐᓄᑦ ᐋᒥᑕᐅᒍᑎᖃᓲᕕᓂᕐᓂᒃ ᐊᑯᓂᐊᓘᓕᕐᑐᖅ.  ᐃᓕᓐᓂᐊᓂᕐᒥᒃ ᓄᓇᓕᓐᓂ ᑭᒡᒐᑐᕐᑏᑦ ᐱᓇᓱᐊᖏᓐᓇᓚᖓᔪᑦ ᐱᓇᓱᑦᑎᓕᒫᒥᑕ ᐱᕙᓪᓕᖁᑎᑖᖏᑦᑕ ᐱᓇᓱᒐᖏᑦᑕᓗ ᖃᓄᐃᓕᖓᓂᖏᑦᑕ ᓇᓪᓕᖁᐊᕇᓕᕐᓂᖏᓐᓄᑦ ᑎᑭᐅᑎᒍᑎᑦᓴᓂᒃ,” ᐅᖃᕐᑐᖅ ᓯᐊᔭ ᐋᓗᐸ, ᑲᑎᕕᒃ ᐃᓕᓴᕐᓂᓕᕆᓂᒃᑯᑦ ᐊᖓᔪᕐᖄᖓ.

ᐱᕙᓪᓕᖁᑎᑖᕈᑏᑦ ᐊᑦᔨᒌᖕᖏᑐᑦ ᐱᓇᓱᒍᑦᔨᓂᕐᒧᑦ ᐊᖏᖃᑎᒌᒍᑎᓃᑦᑐᑦ ᐃᓕᓐᓂᐊᑎᑦᓯᔨᓄᑦ, ᐃᓚᐅᑎᓪᓗᒍ ᓂᕿᓂᒃ ᐅᓯᔭᐅᑎᑦᓯᒍᑏᑦ ᑮᓇᐅᔭᐅᑎᓪᓗᒍ ᐊᑭᓕᕐᑕᐅᒍᓐᓇᖃᑦᑕᓂᐊᓕᕐᓂᖓ. ᐊᐅᓚᑦᓯᓂᓕᕆᓂᕐᑎᒍᑦ ᐱᓇᓱᐊᕈᑏᑦ ᑲᑎᕕᒃ ᐃᓕᓴᕐᓂᓕᕆᓂᐅᑉ ᐊᑑᑎᔭᐅᑎᑕᖏᑦ ᐱᕙᓪᓕᖁᑎᐅᒌᕐᑐᓂᒃ ᐃᓚᒋᐊᕆᓚᖓᔪᑦ ᓄᓇᕕᒻᒥ ᐱᓇᓱᑦᑎᑖᖑᓲᓄᑦ. ᐱᓇᓱᒐᕐᒥᒃ ᓄᕐᙯᓇᕐᑎᓯᑦᑌᓕᒍᑏᑦ, ᐊᐅᓪᓚᕈᓐᓇᐅᑏᑦ ᐊᒻᒪᓗ ᓄᓇᓕᒻᒥ ᐱᓇᓱᑦᑎᑖᖑᓯᒪᓂᕐᒥᓄᑦ ᐱᕙᓪᓕᖁᑎᑖᕈᑎᑦ. ᑖᒃᑯᐊᓗ ᐊᐅᓚᑦᓯᓂᕐᒧᑦ ᐱᒍᓐᓇᐅᑎᑖᕆᔭᐅᔪᑦ ᐊᕐᕌᒍᑕᒫᑦ ᑮᓇᐅᔭᖃᕐᑎᑕᐅᒍᓐᓇᓂᐊᓕᕐᓱᑎᒃ.

ᐃᓕᓴᕐᓂᓕᕆᓂᖅ:

ᑲᑎᕕᒃ ᐃᓕᓴᕐᓂᓕᕆᓂᖅ, ᐃᓕᓐᓂᐊᓂᓕᕆᔨᒃᑯᑦ ᓄᓇᕕᒻᒥ, ᓄᐃᑕᐅᔪᕕᓂᖅ 1975-ᖑᑎᓪᓗᒍ, ᔦᒻᔅ ᐯ ᐊᒻᒪᓗ ᑯᐯᒃ ᑕᕐᕋᖓᑕ ᐊᖏᖃᑎᒌᓐᓂᖓᒍᑦ (ᐊᖏᖃᑎᒌᓐᓂᖅ). 1978-ᒥᓂᑦ ᑲᑎᕕᒃ ᐃᓕᓴᕐᓂᓕᕆᓂᖅ ᑖᓐᓇᑐᐊᖑᑦᓱᓂ ᐱᑕᖃᕐᑎᓯᔪᖅ ᐃᓕᓐᓂᐊᓂᕐᒨᓕᖓᔪᓂᒃ ᐱᒍᑦᔨᐅᑎᓂᒃ ᓄᓇᕕᒻᒥᐅᓄᑦ.  ᐃᓕᓐᓂᐊᓂᕐᒨᓕᖓᔪᑦ ᐱᓇᓱᐊᕐᑕᐅᔪᑦ ᐱᕙᓪᓕᐊᑎᓯᒪᔭᖏᑦ ᐃᓕᓐᓂᐊᓂᓕᕆᓂᐅᑉ ᐊᑐᐃᓐᓇᐅᑎᑕᐅᕗᑦ ᐃᓘᓐᓇᖏᓐᓂᑦ ᐃᓕᓐᓂᐊᕕᖏᓐᓂᑦ 14-ᓂᑦ ᓄᓇᕕᒻᒥ ᓄᓇᓕᓐᓂ, ᐃᓄᒃᑎᑑᕐᖄᓱᑎᒃ ᐅᖃᐅᓯᕐᖄᒥᓂᒃ ᐊᒻᒪᓗ ᐅᐃᒍᐃᑎᑐᑦ ᖃᓪᓗᓈᑎᑐᓪᓗ ᐁᑉᐱᐅᑎᖃᕐᑎᓪᓗᒍ ᐅᖃᐅᓯᖓ.  ᐃᓕᓐᓂᐊᓂᓕᕆᓂᖅ ᐊᐅᓚᑦᓯᔪᖅ 17-ᓂᒃ ᐃᓕᓐᓂᐊᕕᓐᓂᒃ ᐳᒃᑭᓂᕐᓴᓂᒃ ᐳᕐᑐᓂᕐᓴᓂᓪᓗ ᐊᒻᒪᓗᑦᑕᐅ 6-ᓂᒃ ᐃᓄᒻᒪᕇᑦ ᐃᓕᓐᓂᐊᕕᖏᓐᓂᒃ. ᑐᑭᓯᒋᐊᑦᓯᐊᕕᑦᓴᖅ ᖃᕆᑕᐅᔭᒃᑯᑦ: kativik.qc.ca.

— 30 —

ᑐᑭᓯᒋᐊᕐᕕᓴᖅ:

ᔮᑦ ᑐᓯᓅ-ᐱᕐᓀ
ᑐᓴᕋᑦᓴᓕᕆᕕᒻᒥ ᐊᑕᐅᑦᓯᑰᕐᑎᓯᔨ
514 797-8220
publicrelations@kativik.qc.ca