ᒪᓐᑐᕆᐊᓪᒥ (ᓇᑦᓯᐊᓕᐅᑦ 27, 2018) – ᑲᑎᕕᒃ ᐃᓕᓴᕐᓂᓕᕆᓂᐅᑉ ᐃᓕᓐᓂᐊᓂᕐᒥᒃ ᑭᒡᒐᑐᕐᑎᖏᑦ ᐊᓕᐊᓱᑉᐳᑦ ᑐᓴᕐᑎᓯᒍᑎᖃᕆᐊᒥᒃ ᑎᒃᑯᐊᑕᐅᓯᒪᓂᖓᓂᒃ ᖄᔨᐊ ᑭᓕᐅᑕᐅᑉ ᑲᔪᓯᒃᑫᔨᐅᓂᕐᒧᑦ. ᖄᔨᐊ ᐱᓇᓱᒐᕐᑖᒥᓄᑦ ᐃᓕᓛᕐᑐᖅ ᐁᕆᓕ 16, 2018-ᒥ.

ᐱᓇᓱᑦᑎᓴᕐᓯᐅᕈᑏᑦ ᐊᐅᓚᑕᐅᓚᐅᔪᖅ ᑲᑎᕕᐅᑉ ᓯᓚᑖᓂ ᐱᓯᒪᔪᓄᑦ ᐱᓇᓱᑦᑎᓴᕐᓯᐅᑎᓄᑦ Higgings Executive Search Services-ᑯᓐᓄᑦ. ᑎᒃᑯᐊᓯᓂᕐᒥ ᑲᑎᒪᔨᒋᔭᐅᑎᓪᓗᒋᑦ ᐃᓕᓐᓂᐊᓂᕐᒥᒃ ᑭᒡᒐᑐᕐᑏᑦ ᑕᓪᓕᒪᑦ: ᐅᔮᐱ ᒍᐊᑦ (ᑰᑦᔪᐊᖅ), ᐋᓚᓯ ᓈᓚᑦᑑᔭᖅ (ᐃᓄᒃᔪᐊᖅ), ᐋᓐᑕᓂ ᐃᑦᑐᓵᑦ (ᑰᑦᔪᐊᕌᐱᑦ), ᓯᐊᔭ ᐋᓗᐸ (ᖁᐊᕐᑕᖅ) ᐊᒻᒪᓗ ᔨᐊᓯᑲ ᐋᕐᖓᖅ (ᑲᖏᕐᓱᔪᐊᖅ).

ᑭᓇᐅᓂᖓ: ᖄᔨᐊ ᑭᓕᐅᑕᖅ

ᐊᕐᕌᒍᐃᑦ ᐊᕙᑎᑦ ᐅᖓᑖᓄᑦ, ᖄᔨᐊ ᐱᓇᓱᐊᒻᒪᕆᓐᓂᖃᕐᓯᒪᕗᖅ ᐃᓕᓐᓂᐊᓂᕐᒨᓕᖓᔪᓂᒃ. ᑲᑎᕕᒃ ᐃᓕᓴᕐᓂᓕᕆᓂᕐᒥ ᐱᓇᓱᒐᖃᕐᓯᒪᑦᓱᓂ ᐊᑦᔨᒌᖕᖏᑐᓂᒃ, ᐸᐸᑦᓯᔨᐅᓯᒪᒻᒥᓱᓂ 2005-ᒥᑦ 2017-ᒧᑦ. ᐱᓇᓱᐊᕐᓯᒪᓂᖃᒻᒪᕆᑦᓱᓂ ᐃᓄᒃᑎᑑᓕᕐᑎᕆᓂᕐᒥᒃ ᐅᖃᐅᓯᐅᓪᓗ ᐁᑉᐱᐅᑎᖏᓐᓄᑦ ᐊᒻᒪᓗ ᑲᑎᒪᓂᐊᕈᓯᕐᓂᒃ ᐃᓕᓐᓂᐊᑎᑦᓯᓲᖑᒻᒥᓱᓂ ᖄᔨᐊ ᓄᓇᕕᒻᒥᐅᑦ ᐃᓄᒻᒪᕆᖏᓐᓂᒃ ᐱᓇᓱᐊᖃᑎᖃᒻᒪᕆᑦᓯᒪᒻᒥᔪᖅ ᐃᓄᒃᑎᑐᑦ ᐅᖃᐅᓯᕐᓂᒃ ᐅᓕᕐᓀᓯᒍᑎᑦᓴᓕᐅᕐᓂᑯᑦ ᐅᓪᓗᒥ ᐊᑐᕐᑕᐅᓲᖑᓕᕐᑐᓂᒃ ᐃᓕᓴᕐᓂᓕᕆᓂᐅᑉ ᐃᓕᓐᓂᐊᕈᑎᑦᓴᓕᐅᕐᕕᖓᓂ ᐃᓕᓐᓂᐊᕈᑎᖏᓐᓂᓗ. ᖄᔨᐊ ᐃᑎᐅᑦᔨᓚᖓᕗᖅ ᐱᑐᑦᓯᒪᓂᖃᓪᓚᕆᓐᓂᒥᓂᒃ ᐃᓄᓐᓂᒃ ᓄᓇᖃᕐᖄᓯᒪᔪᓂᓪᓗ ᓯᕗᓕᕐᑎᐅᓲᓂᒃ ᓄᓇᓕᒻᒥ, ᓄᓇᓕᓕᒫᓂ, ᑯᐯᒻᒥ ᑲᓇᑕᒥᓪᓗ, ᐱᑐᑦᓯᒣᓐᓇᕕᒋᓲᕆᓕᕐᑕᒥᓂᒃ ᐊᕐᕌᒍᓂ ᐊᓂᒍᕐᑐᓂ ᓇᒻᒥᓂᕐᒥᒍᑦ ᐱᓇᓱᒐᖃᕐᓂᑯᓪᓗ ᐃᓚᐅᕕᒋᓲᕆᑦᓱᒋᑦ ᐊᒥᓱᒻᒪᕆᓐᓂ ᓄᓇᖃᕐᖄᓯᒪᔪᓅᓕᖓᔪᓂᒃ ᐃᓱᐃᓗᑕᐅᓲᓂᒃ, ᐃᓕᓐᓂᐊᓂᖅ ᐃᓚᒋᔭᐅᑎᓪᓗᒍ.

2017-ᒥ, ᑎᒃᑯᐊᑕᐅᓂᕐᒥᓄᑦ ᑎᑭᑦᓱᒍ ᑲᔪᓯᒃᑫᔨᐅᓂᕐᒧᑦ ᑲᑎᕕᒃ ᐃᓕᓴᕐᓂᓕᕆᓂᕐᒥ, ᖄᔨᐊ ᒪᑭᕝᕕᑯᓐᓂ ᐊᐅᓚᑦᓯᓂᓕᕆᔨᐅᖃᑦᑕᓚᐅᔪᖅ.

ᑭᓇᒃᑰᓂᕗᑦ:

ᑲᑎᕕᒃ ᐃᓕᓐᓂᐊᓂᓕᕆᓂᖅ (ᑲᑎᕕᒃ) ᑎᒥᖕᖑᑎᑕᐅᔪᕕᓂᖅ 1975-ᖑᑎᓪᓗᒍ, ᔦᒻᔅ ᐯ ᐊᒻᒪᓗ ᑯᐯᒃ ᑕᕐᕋᖓᑕ ᐊᖏᖃᑎᒌᓐᓂᖓᒍᑦ (ᐊᖏᖃᑎᒌᓐᓂᖅ). 1978-ᒥᓂᑦ ᐱᑕᖃᕐᑎᓯᔪᑐᐊᖑᓯᒪᕗᖅ ᐃᓕᓐᓂᐊᓂᕐᒨᓕᖓᔪᓂᒃ ᐱᒍᑦᔨᐅᑎᓂᒃ ᓄᓇᕕᒻᒥᐅᓄᑦ. ᔦᒻᔅ ᐯ ᐊᒻᒪᓗ ᑯᐯᒃ ᑕᕐᕋᖓᑕ ᐊᖏᖃᑎᒌᓐᓂᖓᒍᑦ, ᐃᓕᓐᓂᐊᓂᓕᕆᓂᖅ ᐱᔪᓐᓇᓂᖃᕐᑎᑕᐅᔪᖅ ᐊᐅᓚᑦᓯᔨᐅᕕᖃᕐᑎᑕᐅᑦᓱᓂᓗ ᐃᓄᐃᑦ ᐃᓗᕐᕈᓯᖓᓂᒃ ᒪᓕᑦᓯᐊᑐᓂᒃ ᐃᓕᓐᓂᐊᕈᑎᑦᓴᓕᐅᕐᓂᒥ ᐃᓕᓐᓂᐊᑎᑦᓯᓂᕐᒥᓗ. ᑐᕌᒐᖓ ᑎᓕᔭᐅᒪᒍᑎᒋᑦᓱᒍ ᑲᑎᕕᒃ ᐃᓕᓐᓂᐊᓂᓕᕆᓂᐅᑉ ᑌᒣᒻᒪᑦ ᒪᕐᕈᐃᓕᕿᖓᕗᖅ. ᓯᕗᓪᓕᖅ, ᓄᓇᓕᓕᒫᓂ ᐃᓕᓐᓂᐊᓂᓕᕆᔨᐅᑦᓱᓂ ᓄᓇᕕᒻᒥᐅᓕᒫᓄᑦ. ᐁᑉᐹᒍᓪᓗ, ᑎᒥᖁᑎᒋᔭᐅᕗᖅ ᐊᑦᔨᒋᔭᐅᖕᖏᑐᓂᒃ ᐱᔪᓐᓇᐅᑎᖃᕐᓱᓂ ᐊᐅᓚᑦᓯᔨᐅᕕᖃᕐᓱᓂᓗ ᓴᐳᑦᔨᒍᑎᐅᒋᐊᕐᑐᓂᒃ, ᐱᑕᖃᕐᑎᓯᖏᓐᓇᕈᑎᐅᒋᐊᕐᑐᓂᒃ, ᐊᒻᒪᓗ ᐱᕙᓪᓕᐊᑎᑦᓯᒍᑎᓂᒃ ᐃᓄᐃᑦ ᐅᖃᐅᓯᖓᓂᒃ, ᐃᓗᕐᕈᓯᖓᓂᒃ, ᐃᓅᑦᔪᓯᖓᓂᓪᓗ. ᐃᓕᓐᓂᐊᕈᑎᑦᓭᑦ ᑲᑎᕕᒃ ᐃᓕᓐᓂᐊᓂᓕᕆᓂᕐᒧᑦ ᐃᓕᓐᓂᐊᕈᑎᓕᐊᑦ ᐃᓕᓐᓂᐊᑎᑦᓯᒍᑎᐅᕗᑦ ᐃᓘᓐᓇᖏᓐᓂᑦ ᑖᒃᑯᐊ 14-ᐃᑦ ᓄᓇᓖᑦ ᐃᓕᓐᓂᐊᕕᖏᓐᓂᑦ, ᐃᓄᒃᑎᑐᑦ ᐅᖃᐅᓯᕐᖄᖓᓂᒃ ᐊᒻᒪᓗ ᐅᐃᒍᐃᑎᑐᑦ ᖃᓪᓗᓈᑎᑐᓪᓗ ᐅᖃᐅᓯᐅᑉ ᐁᑉᐱᐅᑎᖓᓂᒃ. ᐃᓕᓐᓂᐊᓂᓕᕆᓂᖅ ᐊᐅᓚᑦᓯᔪᖅ 17-ᓂᒃ ᐳᒃᑭᓂᕐᓴᓂ ᐳᕐᑐᓂᕐᓴᓂᓪᓗ ᐃᓕᓐᓂᐊᕕᓐᓂᒃ ᐊᒻᒪᓗᑦᑕᐅᖅ 5-ᓂᒃ ᐃᓄᒻᒪᕇᑦ ᐃᓕᓐᓂᐊᕕᖏᓐᓂᒃ. ᑐᑭᓯᒋᐊᓪᓚᕈᑎᑦᓭᑦ ᑕᑯᔭᐅᒍᓐᓇᑐᑦ ᐅᕙᓂ: www.kativik.qc.ca

— 30 —

ᑐᑭᓯᒋᐊᑦᓯᐊᕈᒪᒍᕕᑦ, ᐅᒥᖓ ᐅᖄᕕᖃᕐᓗᑎᑦ:

ᔮᑦ ᑐᓯᓅ-ᐱᐊᕐᓃ
ᐅᖄᖃᑎᒌᓐᓂᒥ ᐊᑕᐅᑦᓯᑰᕐᑎᓯᔨ
514-482-8220 ext. 309 | publicrelations@kativik.qc.ca