ᑰᒃᔪᐊᖅ (ᓯᑉᑎᒻᐱᕆ 11, 2017) – ᐊᕐᕌᒍᓂᒃ 40-ᑲᓴᐅᓕᕐᑐᓂᒃ ᑎᒥᐅᔫᓯᒪᓕᕐᓱᓂ, ᑲᑎᕕᒃ ᐃᓕᓐᓂᐊᓂᓕᕆᓂᖅ ᓄᐃᑦᓯᒋᐊᖕᖓᓛᕐᑐᖅ ᑕᕐᓴᑖᕐᖃᒥᒥᓂᒃ ᐱᓂᐊᕐᓂᖃᕈᑎᒋᓗᒍ ᐅᓪᓗᒥ ᔮᓂᒻᒪᕆ ᐃᓕᓐᓂᐊᕕᒻᒥ, ᑰᒃᔪᐊᒥ.

“ᐱᕙᓪᓕᐊᔭᐅᓂᖓ ᑎᒥᐅᔫᑦ ᑕᕐᓴᑖᕐᖃᒥᖓᑕ ᐋᕐᕿᑕᐅᕙᓪᓕᐊᓯᓚᐅᔪᔪᖅ ᐃᓕᓐᓂᐊᓂᓕᕆᓂᐅᑉ ᖃᓄᐃᓘᕈᑎᑦᓴᓄᑦ ᐸᕐᓀᒍᑎᖏᑦ ᐱᓇᓱᐊᕐᑕᐅᑎᓪᓗᒋᑦ 2014-ᒥᑦ 2017-ᒧᑦ,” ᐅᖃᓚᐅᔪᔪᖅ ᐋᓚᓯ ᓈᓚᑦᑑᔭᒃ, ᑲᑎᕕᒃ ᐃᓕᓐᓂᐊᓂᓕᕆᓂᕐᒥ ᐊᖓᔪᕐᖄᖅ. ᐃᓕᓐᓂᐊᓂᕐᒥ ᑭᒡᒐᑐᕐᑎᓄᑦ ᐊᖏᕐᑕᐅᓚᐅᔪᑦᓱᓂ ᐊᕐᕌᓂ, ᖃᓄᐃᓘᕈᑎᑦᓴᓄᑦ ᐸᕐᓀᒍᑎᖓ ᐃᓕᓐᓂᐊᓂᓕᕆᓂᐅᑦ ᐊᑐᐃᓐᓇᐅᓕᕐᑐᖅ ᓄᓇᕕᒻᒥᐅᓄᑦ ᐃᓕᓐᓂᐊᓂᓕᕆᓂᐅᑉ ᖃᕆᑕᐅᔭᒃᑯᑦ ᐱᑐᑦᓯᒪᖃᑎᒌᕝᕕᒥ ᑕᑯᑦᓴᐅᑎᑦᓯᔨᖓᓂ.

“ᑖᓐᓇ ᓄᑖᖅ ᑕᕐᓴᖅ ᓇᓗᓀᕐᓯᕗᖅ ᐱᒋᐊᑦᓯᐊᕈᑎᓂᒃ. ᑕᑯᑦᓴᐅᑎᑦᓯᒥᔪᖅ ᑕᐅᑐᕐᖂᕈᑎᕗᓐᓂᒃ ᐃᓕᓐᓂᐊᓂᖅ ᐱᓪᓗᒍ ᖃᓄᐃᓘᕈᑎᑦᓴᓄᓪᓗ ᑐᕌᕐᑕᐅᔪᓂᒃ ᓇᓗᓀᕐᑕᐅᓯᒪᔪᓂᒃ ᐃᓕᓐᓂᐊᓂᓕᕆᓂᕐᒧᑦ, ᐃᓄᐃᑦ ᐅᖃᐅᓯᖓ, ᐃᓪᓕᕆᔭᖏᑦ ᓇᓗᓀᕐᓯᒪᒍᑎᖓᓗ ᑐᖕᖓᕕᖏᓐᓃᖃᑎᐅᓪᓚᕆᒻᒪᑕ ᐃᓕᓐᓂᐊᕈᑎᑦᓭᑦ ᐱᐅᔫᓂᖏᓐᓄᑦ ᐱᒍᓐᓇᓯᑎᑦᓯᒍᑎᐅᔪᓄᑦ ᐃᓕᓐᓂᐊᑎᓂᒃ ᑎᑭᐅᑎᒍᑎᒍᓗᒋᑦ ᐱᒍᓐᓇᑕᓕᒫᒥᓂᒃ ᓄᓇᕐᔪᐊᒥᐅᖑᖃᑎᐅᓂᖏᑦ ᐃᑉᐱᒋᑦᓱᒋᑦ,” ᐅᖃᕆᐊᓪᓚᒥᑦᓱᓂ ᐋᓚᓯ ᓈᓚᑦᑑᔭᒃ.

ᐱᓇᓱᐊᕐᑕᐅᓯᒪᓕᕐᑐᑦ ᐃᓕᓐᓂᐊᓂᓕᕆᓂᕐᒧᑦ ᐊᕐᕌᒍᓂᑦ ᐱᖓᓱᓂᑦ ᖄᖏᕐᑐᓂᑦ ᓱᓕᑎᑦᓯᒍᑎᐅᕗᑦ ᑖᑦᓱᒥᖓ ᑕᐅᑐᕐᖂᒍᑎᖓᓂᒃ. “ᐆᒃᑐᕋᐅᑎᒋᓗᒍ, ᐱᓇᓲᑎᑦᓭᑦ ᐱᓇᓱᑦᑎᒪᕆᖃᕈᑏᓪᓗ ᐱᓇᓱᐊᕈᑎᐅᓪᓚᕆᖃᑦᑕᓂᕐᒪᑕ ᑖᒃᑯᓂᖓ ᓄᑖᓃᒃ ᖃᕆᑕᐅᔭᒃᑰᑐᓂᒃ ᐱᓇᓲᑎᓂᒃ ᐃᓄᒃᑎᑐᑦ ᐃᓕᓐᓂᐊᕕᓐᓅᔭᕐᑕᐅᓂᖏᑦ ᐊᑐᕐᑕᐅᓂᖏᑦᑕ 2014-ᒥᓂᑦ,” ᐅᖃᕐᓱᓂ ᐋᓚᓯ ᓈᓚᑦᑑᔭᒃ. ᐃᓕᓐᓂᐊᓂᓕᕆᓂᖅ ᓴᓇᓚᐅᔪᒻᒥᔪᖅ ᓇᕿᑦᑕᕈᑎᒥᒃ iNaqittaq App-ᒥᒃ, ᖃᕆᑕᐅᔭᒃᑯᑦ ᓇᕿᑦᑕᕈᑎᐅᓲᓂᒃ ᐃᓄᒃᑎᑐᑦ ᐊᑐᕐᑕᐅᒍᓐᓇᑐᒥᒃ ᓄᓇᕕᒻᒥᐅᓄᑦ ᐊᑭᖃᕋᓂ Mac App Store-ᒥᑦ ᐱᔭᐅᒍᓐᓇᓱᓂ. ᑖᓐᓇ iNaqittaq ᐊᒡᒐᒧᑦ ᐊᒡᓚᑐᒥᒃ ᐃᓕᑕᕐᓯᒍᓐᓇᐅᑎᓕᒃ ᐊᑐᕐᑐᓄᑦ ᖃᓕᐅᔮᕐᐯᑎᑐᑦ ᐊᒡᓚᒍᑎᐅᒍᓐᓇᑐᖅ ᑐᕃᓐᓇᓗᒍ ᐃᒐᓛᖑᔭᖓᓂ ᐳᑦᔪᒥᓄᑦ ᐊᒡᓚᓗᓂ. ᓱᓕᒋᐊᓪᓚᒃ, ᐳᕐᑐᓂᓖᑦ 1-ᒥᑦ 3-ᒧᑦ ᐃᓕᓐᓂᐊᑐᐃᑦ ᐱᓇᓱᕝᕕᓂᒃ ᖃᕆᑕᐅᔭᓕᓐᓂᒃ ᓵᖑᑦᓱᑎᒃ ᐱᑕᖃᓕᕐᒥᔪᑦ ᑲᑎᓕᒫᕐᓱᒋᑦ 1,570-ᓂᒃ ᓱᓇᓱᐊᕐᑎᓯᒍᑎᐅᒍᓐᓇᑐᓂᒃ ᐃᓕᓐᓂᐊᓂᓕᕆᓂᐅᑉ ᓴᓇᓯᒪᔭᖏᓐᓂᒃ ᐃᓗᓕᖃᕐᓱᑎᒃ ᐃᓓᒋᐊᕈᑎᐅᑎᓪᓗᒋᑦ ᐃᓕᓐᓂᐊᕈᑎᑦᓴᓂᒃ ᐳᕐᑐᓂᓕᓐᓄᑦ 1, 2, ᐊᒻᒪᓗ 3-ᒥ. ᑖᒃᑯᐊ ᓱᓇᓱᐊᕐᑎᓯᒍᑎᑦᓭᑦ ᐱᕙᓪᓕᐊᒍᓯᖃᕐᑎᑕᐅᔪᑦ ᐅᖃᐅᓯᕐᖄᒥᓂᑦ ᓅᑉᐸᓕᐊᓂᖏᓐᓂᒃ ᒪᓕᑦᓱᑎᒃ ᐅᖃᐅᓯᐅᑉ ᐁᑉᐹᓂᒃ ᐃᓕᓐᓂᐊᐸᓪᓕᐊᓂᖏᑦ ᒪᓕᑦᓱᒋᑦ ᐊᒻᒪᓗ ᑭᓯᑦᔪᑎᓐᓂᐊᕈᑎᓄᑦ ᑌᒎᓯᕐᓂᒃ ᐃᓕᓐᓂᐊᕈᑎᒋᐊᓪᓚᖃᕐᓱᑎᒃ. “ᐃᓕᓐᓂᐊᕈᑎᑦᓴᕗᑦ ᐋᕐᕿᓱᒋᐊᑦᓯᐊᑕᐅᓯᒪᒻᒥᔪᑦ ᒪᓕᐅᑎᑦᓯᐊᕆᐊᕐᑎᑕᐅᑎᓪᓗᒋᑦ ᐃᓕᑦᓯᔭᐅᒋᐊᓖᑦ ᐊᒻᒪᓗ ᐅᖃᐅᓯᐅᑉ ᐁᑉᐸᖓᓄᑦ ᓅᑉᐸᓕᐊᓂᖓ ᑭᑦᑐᕋᕐᓂᖃᖕᖏᑎᓪᓗᒋᑦ,” ᐅᖃᕐᑐᖅ ᐋᓚᓯ ᓈᓚᑦᑑᔭᒃ.

ᐱᓇᓱᐊᕐᑕᐅᖏᓐᓇᓂᖏᑦ ᓄᓇᕕᒻᒥ ᐃᕐᖃᓇᕐᑐᖁᑎᖏᑦᑕ ᐃᓕᓐᓂᐊᕈᑎᑦᓴᓕᐊᕆᔭᐅᓂᖏᑦ ᐃᓕᓐᓂᐊᕕᑐᐃᓐᓇᓂ ᐃᓄᒻᒪᕇᑦ ᐃᓕᓐᓂᐊᕕᖓᓂᓗ, ᐳᕐᑐᓂᕐᓴᓂ 4-ᒥ ᓴᓇᑦᑐᓴᐅᑎᓕᕆᐅᑎᓄᑦ ᐃᓕᓐᓂᐊᒉᑦ ᖁᕝᕙᕆᐊᕈᑎᑖᕈᓐᓇᓯᑎᑕᐅᓂᕆᕐᖃᒥᓚᐅᕐᑕᖏᑦ, ᐳᕐᑐᓂᕐᓴᓂ ᓱᑯᐃᔦᓂᕐᒥ ᖃᕆᑕᐅᔭᒃᑰᑐᓂᓪᓗ ᐃᓕᓐᓂᕈᑎᑦᓭᑦ, ᐃᓚᒋᔭᐅᒻᒥᑎᓪᓗᒋᑦ ᓄᓇᕕᒃ ᓯᕗᓂᑦᓴᕗᑦ ᐃᓕᓐᓂᐊᕈᑎᑦᓭᑦ ᐆᒃᑐᕋᐅᑎᑦᓯᐊᖑᕗᑦ ᐱᔭᖃᕈᑎᐅᑦᓯᐊᖃᑦᑕᑐᓂᒃ ᐃᓕᓐᓂᐊᓂᓕᕆᓂᐅᑉ ᐱᒋᐊᕐᑎᓯᒪᔭᖏᓐᓂᒃ, ᐃᑲᔪᕐᑕᐅᓱᑎᒃ ᓄᓇᕕᐅᑉ ᑎᒥᐅᔪᖏᓐᓄᑦ. 18-ᓂᒃ ᐃᓕᓐᓂᐊᑎᓂᒃ ᓄᓇᕕᒃ ᓯᕗᓂᑦᓴᕗᒻᒥ ᐃᓕᓐᓂᐊᑐᓕᒃ ᑕᒐᑕᒐᐅᔪᖅ. “ᑖᓐᓇ ᐱᒋᐊᕐᑎᑕᐅᔪᖅ ᐃᑲᔪᕐᓯᓚᖓᔪᖅ ᐳᕐᑐᓂᕐᓭᑦ ᑭᖑᓪᓕᖏᓐᓂᒃ ᐃᓕᓐᓂᐊᑐᑦ ᐃᓕᓐᓂᐊᕕᒻᒦᖏᓐᓇᕈᓐᓇᓂᖏᓐᓂᒃ. ᐃᑲᔪᕐᓯᔪᖅ ᐊᑦᔨᒌᖕᖏᓕᕇᖑᓂᕐᓴᓂᒃ ᐳᕐᑐᓂᕐᓭᑦ-ᑭᖑᓪᓕᖏᓐᓂᒃ ᐃᓕᓐᓂᐊᕈᑎᑦᓴᖃᕐᑎᓯᑦᓱᓂ ᓄᓇᕕᐅᑉ ᐃᓅᓱᑦᑐᖏᓐᓂᒃ,” ᐅᖃᕐᑐᕕᓂᖅ ᐋᓚᓯ ᓈᓚᑦᑑᔭᒃ.

“ᑲᔪᓯᓗᓂ ᑭᓯᐊᓂᐅᕗᖅ ᐊᒻᒪᓗ ᖃᐅᔨᒪᓇᕐᓱᓂ ᐱᕕᑦᓴᖃᑦᓯᐊᕆᐊᖃᕐᓱᑎᒃ ᐊᑐᓕᕐᑎᑕᐅᓂᑦᓴᖏᑦ ᑖᒃᑯᐊ ᐊᓯᑦᔨᑐᐃᒍᑏᑦ ᐃᓕᓐᓂᐊᓂᕐᒥᒃ,” ᐅᖃᕐᑐᕕᓂᖅ ᓈᓚᑦᑑᔭᒃ. “ᐃᓕᓐᓂᐊᓂᓕᕆᓂᐅᑉ ᖃᓄᐃᓘᕈᑎᑦᓴᖃᕈᑎᓄᒃ ᐸᕐᓀᒍᑎᖓ ᐊᑐᕐᓂᖃᓪᓚᕆᓚᖓᔪᖅ, ᑐᕌᑦᓯᐊᑎᑦᓯᓗᓂ ᐅᕙᑦᑎᓂᒃ ᓯᕗᓂᕐᒥ ᑐᕌᒐᓕᐊᕆᓯᒪᔭᕗᓐᓄᑦ,” ᐃᓱᓕᒍᑎᖃᕐᓱᓂ ᐅᖃᕐᑕᒥᓂᒃ.

ᓂᕈᐊᓕᕐᓱᑎᒃ ᓄᑖᒦᒃ ᑕᕐᓴᒥ, ᐃᓕᓐᓂᐊᓂᕐᒥᒃ ᑭᒡᒐᑐᕐᑏᑦ ᐊᖏᓚᐅᔪᒻᒥᔪᑦ ᑐᑭᑖᕈᑎᒥᒃ ᐊᓯᑦᔨᒋᐊᖃᕐᓂᕃᔪᒥᒃ ᐃᓕᓐᓂᐊᓂᓕᕆᓂᐅᑉ ᐊᑎᖓᓂᒃ ᐅᓇᐅᓚᖓᓕᕐᑎᓗᒍ ᓄᓇᕕᒻᒥ ᐃᓕᓴᕐᓂᓕᕆᓂᖅ ᓇᓗᓀᕐᓯᒋᐊᑦᓯᐊᒍᑎᐅᑎᓪᓗᒍ ᓄᓇᖕᖑᐊᑎᒍᑦ ᓇᓃᓐᓂᖏᓐᓂᒃ ᐃᓄᐃᑦ ᐱᒍᑦᔭᐅᔪᑦ ᑖᑦᓱᒧᖓ ᐃᓕᓴᕐᓂᓕᕆᓂᕐᒧᑦ. ᐱᓇᓱᐊᕐᑕᐅᒋᐊᓖᑦ ᐊᑎᖓᑕ ᐊᓯᑦᔨᓂᖓᓄᑦ ᐊᕐᕌᓂ ᐱᒋᐊᕐᑕᐅᓚᐅᔪᔪᑦ. ᐊᖏᕐᑕᐅᓂᑦᓴᖏᓐᓂᒃ ᐊᖓᔪᕐᖃᐅᑎᓄᑦ ᐅᑕᕐᕿᓂᕐᒥᓂ, ᐃᓕᓐᓂᐊᓂᓕᕆᓂᖅ ᐊᑐᖏᓐᓇᓚᐅᑲᓚᖓᔪᖅ ᐊᑎᑐᖃᕐᒥᓂᒃ: ᑲᑎᕕᒃ ᐃᓕᓴᕐᓂᓕᕆᓂᖅ.

ᑖᑦᓱᒧᖓ ᑕᕐᓴᑖᕐᖃᒥᒧᑦ ᐃᓚᒋᔭᐅᑎᓪᓗᒍ, ᐃᓕᓐᓂᐊᓂᓕᕆᓂᖅ ᐊᑐᓚᖓᓕᕐᑐᖅ ᐃᓄᒃᑎᑐᑦ ᐊᑎᕐᒥᓂᒃ, ᖃᓕᐅᔮᕐᐯᑎᑐᑦ ᖃᓂᐅᔮᕐᐯᑎᑐᓪᓗ ᐊᒡᓚᓯᒪᑎᓪᓗᒍ. ᑕᒪᓐᓇ ᐅᖃᕐᑎᓯᒍᑎᐅᑦᓱᓂᓗ ᐃᓕᓐᓂᐊᓕᕆᓂᐅᑉ ᒪᕐᕈᐃᓕᕿᖓᔪᒥᒃ ᑎᓕᔭᐅᒪᒍᑎᖓᓂᒃ ᔦᒻᔅ ᐯ ᐊᒻᒪᓗ ᑯᐯᒃ ᑕᕐᕋᖓᑕ ᐊᖏᖃᑎᒌᓐᓂᖓᒍᑦ. ᐅᖃᕐᑎᓯᒍᑎᐅᒻᒥᓱᓂ ᐃᓕᓐᓂᐊᓂᓕᕆᓂᐅᑉ ᐃᓕᑕᕐᓇᕈᑎᖓᓂᒃ ᑎᒥᐅᔫᑦᓱᓂ ᐱᓇᓱᐊᖃᑎᓕᒃ ᐱᓇᓱᐊᕈᑦᔨᓱᓂᓗ ᓄᓇᓕᓐᓂᒃ ᐊᓂᕐᕋᕆᔭᐅᔪᓂᒃ 10,755-ᓄᑦ ᐃᓄᓐᓄᑦ (ᑲᓇᑕᒥ ᑭᓯᑦᓯᔩᑦ, 2017 ᐊᒻᒪᓗ ᓄᓇᕕᒻᒥ ᑭᓯᑕᐅᒪᔪᑦ, 2015).

ᑭᓇᒃᑰᓂᕗᑦ:

ᑲᑎᕕᒃ ᐃᓕᓐᓂᐊᓂᓕᕆᓂᖅ (ᑲᑎᕕᒃ) ᑎᒥᖕᖑᑎᑕᐅᔪᕕᓂᖅ 1975-ᖑᑎᓪᓗᒍ, ᔦᒻᔅ ᐯ ᐊᒻᒪᓗ ᑯᐯᒃ ᑕᕐᕋᖓᑕ ᐊᖏᖃᑎᒌᓐᓂᖓᒍᑦ (ᐊᖏᖃᑎᒌᓐᓂᖅ). 1978-ᒥᓂᑦ ᐱᑕᖃᕐᑎᓯᔪᑐᐊᖑᓯᒪᕗᖅ ᐃᓕᓐᓂᐊᓂᕐᒨᓕᖓᔪᓂᒃ ᐱᒍᑦᔨᐅᑎᓂᒃ ᓄᓇᕕᒻᒥᐅᓄᑦ. ᔦᒻᔅ ᐯ ᐊᒻᒪᓗ ᑯᐯᒃ ᑕᕐᕋᖓᑕ ᐊᖏᖃᑎᒌᓐᓂᖓᒍᑦ, ᐃᓕᓐᓂᐊᓂᓕᕆᓂᖅ ᐱᔪᓐᓇᓂᖃᕐᑎᑕᐅᔪᖅ ᐊᐅᓚᑦᓯᔨᐅᕕᖃᕐᑎᑕᐅᑦᓱᓂᓗ ᐃᓄᐃᑦ ᐃᓗᕐᕈᓯᖓᓂᒃ ᒪᓕᑦᓯᐊᑐᓂᒃ ᐃᓕᓐᓂᐊᕈᑎᑦᓴᓕᐅᕐᓂᒥ ᐃᓕᓐᓂᐊᑎᑦᓯᓂᕐᒥᓗ. ᐃᓕᓐᓂᐊᕈᑎᑦᓭᑦ ᑲᑎᕕᒃ ᐃᓕᓐᓂᐊᓂᓕᕆᓂᕐᒧᑦ ᐃᓕᓐᓂᐊᕈᑎᓕᐊᑦ ᐃᓕᓐᓂᐊᑎᑦᓯᒍᑎᐅᕗᑦ ᐃᓘᓐᓇᖏᓐᓂᑦ ᑖᒃᑯᐊ 14-ᐃᑦ ᓄᓇᓖᑦ ᐃᓕᓐᓂᐊᕕᖏᓐᓂᑦ, ᐃᓄᒃᑎᑐᑦ ᐅᖃᐅᓯᕐᖄᖓᓂᒃ ᐊᒻᒪᓗ ᐅᐃᒍᐃᑎᑐᑦ ᖃᓪᓗᓈᑎᑐᓪᓗ ᐅᖃᐅᓯᐅᑉ ᐁᑉᐱᐅᑎᖓᓂᒃ. ᐃᓕᓐᓂᐊᓂᓕᕆᓂᖅ ᐊᐅᓚᑦᓯᔪᖅ 17-ᓂᒃ ᐳᒃᑭᓂᕐᓴᓂ ᐳᕐᑐᓂᕐᓴᓂᓪᓗ ᐃᓕᓐᓂᐊᕕᓐᓂᒃ ᐊᒻᒪᓗᑦᑕᐅᖅ 5-ᓂᒃ ᐃᓄᒻᒪᕇᑦ ᐃᓕᓐᓂᐊᕕᖏᓐᓂᒃ. ᑐᑭᓯᒋᐊᓪᓚᕈᑎᑦᓭᑦ ᑕᑯᔭᐅᒍᓐᓇᑐᑦ ᐅᕙᓂ: www.kativik.qc.ca

— 30 —

ᑐᑭᓯᒪᐅᑎᑦᓴᓄᑦ, ᐅᓇ ᖃᐅᔨᒋᐊᕐᓗᒍ :

ᔮᑦ ᑑᓯᓅ-ᐱᐊᕐᓂᐁᕐ

ᑐᓴᐅᒪᖃᑎᒌᒍᑎᓄᐊᖓᔪᓂᒃ ᐊᑕᐅᑦᓯᑰᕐᑎᓯᔨ

(514) 482-8220 ext. 309