ᑰᑦᔪᐊᖅ, ᓄᓇᕕᒃ ᑯᐯᒻᒥ (ᓄᕕᐱᕆ 23, 2015) – ᐃᓄᒃᑎᑑᕐᓂᐅᑉ ᖁᕝᕙᕆᐊᕐᓯᒪᑎᑕᐅᓂᖓᓂ ᐱᒋᐊᕐᑕᐅᓚᐅᔪᒥ ᓯᑎᐱᕆ 15, 2015-ᒥ, ᑲᑎᕕᒃ ᐃᓕᓐᓂᐊᓂᓕᕆᓂᖅ ᐅᐱᒍᓱᑦᓱᓂ ᑐᓴᕐᑎᓯᒍᑎᖃᓕᕐᑐᖅ ᐱᓇᓱᐊᕐᑕᐅᖃᑦᑕᑐᖅ ᓇᕿᑦᑕᕈᑎ ᐃᓄᒃᑎᑐᑦ iNaqittaq, ᐊᑐᐃᓐᓇᐅᓕᕐᒪᑦ ᖃᕆᑕᐅᔮᕈᕈᑏᑦ ᓂᐅᕕᐊᑦᓴᖃᕐᕕᖓᓂ Apple app store-ᒥ.

“ᐃᓄᒃᑎᑑᕐᓂᖅ ᑌᒪᖕᖓᑦ ᐱᓕᐅᑦᔨᖃᑎᙯᓐᓇᓲᖑᕗᖅ ᖃᓪᓗᓈᑎᑑᕐᓂᒥᒃ, ᐊᑐᕐᑕᐅᓂᕐᐹᖑᒻᒪᑦ ᖃᕆᑕᐅᔭᕈᑎᓂ ᐃᓱᕐᖂᑎᓂᓪᓗ ᐆᑦᑑᑎᒋᑦᓱᒋᑦ iPads, iPods ᐊᒻᒪᓗ iPhones,” ᓚᔪᖅ ᐅᔩᑕ ᓄᕙᓕᖕᖓᖅ, ᑲᔪᓯᒃᑫᔨᐅᑉ ᑐᖓᓕᖓ ᐃᓕᓐᓂᐊᓂᓕᕆᓂᕐᒥ ᐅᖃᕐᑎᒋᔭᐅᑦᓱᓂᓗ ᐱᒍᑦᔨᓱᓂ ᐃᓄᒃᑎᑑᕐᓂᐅᑉ ᖁᕝᕙᕆᐊᕐᓯᒪᑎᑕᐅᓂᖓᓂᒃ. “ᐃᓕᓐᓂᐊᑎᕗᑦ ᐊᖓᔪᕐᖄᑯᖏᓪᓗ ᐃᓱᕐᖂᑎᓂᒃ ᐊᑐᓲᑦ. ᐃᓕᑦᓯᕙᓪᓕᐊᓇᕐᑐᑦ ᖃᕆᑕᐅᔮᕈᕈᑏᑦ ᐊᑐᕐᑕᐅᕙᓪᓕᐊᑐᐃᓐᓇᒥᔪᑦ ᐃᓕᓐᓂᐊᕕᑦᑎᓄᑦ. iNaqittaq ᐃᑲᔪᕐᓯᓚᖓᕗᖅ ᐃᓄᒃᑎᑐᑦ ᐃᓕᑦᓯᕙᓪᓕᐊᓂᕐᓂᒃ ᐃᓕᓐᓂᐊᕕᒻᒥ. ᐊᓂᕐᕋᒥ ᐊᓯᖏᓐᓂᓗ ᐃᓅᖃᑎᒌᑦ ᐅᐸᒐᖏᓐᓂ, iNaqittaq ᐱᓪᓚᕆᐅᓂᖃᓚᖓᒻᒥᔪᖅ ᐅᕕᒃᑲᐅᓂᕐᓭᑦ ᐅᖄᓂᖏᓐᓂᒃ ᐊᓪᓚᓂᖏᓐᓂᓗ ᐃᓄᒃᑎᑐᑦ ᐃᓱᕐᖂᑎᓂᒃ ᐊᑐᓕᕈᑎᒃ ᐃᓅᖃᑎᒌᒍᑎᖃᕐᓂᒧᑦ,” ᐅᖃᕆᐊᓪᓚᑐᖅ ᐅᔩᑕ ᓄᕙᓕᖕᖓᖅ.

iNaqittaq ᐃᓄᓐᓂᒃ ᐊᑐᕐᑐᓂᒃ ᓇᕿᑦᑕᕈᓐᓇᑎᑦᓯᖃᑦᑕᓚᖓᕗᖅ ᐃᓄᒃᑎᑑᕐᑐᓂᒃ iPad-ᒥᓂ, iPhone-ᒥᓂ iPod-ᒥᓂᓪᓗ. ᖃᕆᑕᐅᔮᕈᕈᑎ ᐊᑐᕐᑕᐅᕈᓐᓇᓯᐊᕐᑐᖅ ᖃᕆᑕᐅᔭᕈᑎᓄᑦ iOS 8-ᓄᑦ (ᓄᕕᐱᕆ 2014-ᒥ ᓄᐃᒋᐊᖕᖓᓚᐅᔪᓂ). ᐊᒡᒐᒧᑦ ᐊᓪᓚᓗᓂ ᖃᕆᑕᐅᔮᕈᕐᒥ ᐃᓕᑕᕆᔭᐅᒐᔭᕐᑐᑦ ᐱᓇᓱᐊᕈᑕᐅᒻᒥᔪᑦ ᐊᑐᐃᓐᓇᐅᒋᐊᖃᕐᓱᑎᒃ ᐃᓕᓐᓂᐊᓇᐅᑉ ᐊᕐᕌᒍᖓᑕ ᑭᖑᓂᖓᓂᒋᐊᖅ.

ᐱᓇᓱᐊᕐᑕᐅᔪᖅ ᐊᐅᓚᑕᐅᔪᖅ ᐄᑐᐊ ᓯᓅᐸᒧᑦ, ᐃᓕᓐᓂᐊᕈᑎᓕᕆᕕᒻᒥ ᑐᑭᒧᐊᑦᑎᓯᔨ ᐱᓇᓱᑦᑎᖏᓐᓄᓗ ᐃᓄᒃᑎᑐᑦ ᐃᓕᓐᓂᐊᕈᑎᑦᓴᓕᐅᕐᑎᓄᑦ. ᐃᓘᓐᓈᒍᑦ ᑮᓇᐅᔭᖃᕐᑎᑕᐅᔪᖅ ᑲᑎᕕᒃ ᐃᓕᓐᓂᐊᓂᓕᕆᓂᕐᒧᑦ. iNaqittaq ᐱᔭᐅᒍᓐᓇᑐᖅ ᐅᕙᓂ.

ᐅᕙᑦᑎᓅᓕᖓᔪᑦ:

ᑲᑎᕕᒃ ᐃᓕᓐᓂᐊᓂᓕᕆᓂᖅ ᐱᖕᖑᑎᑕᐅᓯᒪᔪᖅ 1975-ᒥ, ᔦᒥᓯ ᐯᑉ ᑯᐯᓪᓗ ᑕᕐᕋᖓᑕ ᐊᖏᖃᑎᒌᒍᑎᖏᑦ ᒪᓕᑦᓱᒋᑦ. 1978-ᒥᓂᑦ, ᓄᓇᕕᒻᒥᐅᓄᑦ ᐃᓕᓐᓂᐊᓂᕐᒥᒃ ᐱᒍᑦᔨᔨᑐᐊᖑᓲᖑᓕᕐᑐᖅ. ᑲᑎᕕᒃ ᐃᓕᓐᓂᐊᓂᓕᕆᓂᐅᑉ ᐃᓕᓐᓂᐊᕈᑎᓕᐊᕕᓂᖏᑦ ᐃᓕᓐᓂᐊᕕᓐᓂ ᐊᑐᕐᑕᐅᓲᑦ ᓄᓇᓕᓕᒫᓂ ᓄᓇᕕᒻᒥ, ᐃᓄᒃᑎᑐᑦ ᐅᖃᐅᓯᕐᖄᒥ ᐃᓕᓐᓂᐊᑎᑦᓯᒍᑎᐅᑎᓪᓗᒍ ᐊᒻᒪᓗ ᐅᐃᒍᐃᑎᑐᑦ ᖃᓪᓗᓈᑎᑐᓪᓗ ᐅᖃᐅᓯᐅᑉ ᐁᑉᐱᐅᑎᖏᓐᓂ. ᑐᑭᓯᒋᐊᕐᕕᐅᕈᓐᓇᑐᖅ: www.kativik.qc.ca

— 30 —

ᑐᑭᓯᒋᐊᕐᕕᐅᕈᓐᓇᑐᖅ:

ᔮᑦ ᑐᔅᓅ-ᐱᐊᕐᓃ

ᑭᓇᒃᑯᑐᐃᓐᓇᓄᑦ ᑐᓴᐅᒪᖃᑎᒌᑦᑎᓯᔨ, ᑲᑎᕕᒃ ᐃᓕᓐᓂᐊᓂᓕᕆᓂᖅ

(514) 482-8220;

publicrelations@kativik.qc.ca