ᑯᐯᒻᒥ ᑲᓇᑕᒥᓪᓗ ᐃᕐᖃᓇᕐᑐᖁᑎᖏᓐᓂᒃ ᐃᓕᓐᓂᐊᕈᑎᑦᓴᓕᐊᕆᔭᐅᓯᒪᔪᑦ ᓄᑖᑦ ᓈᒻᒪᖏᓪᓚᕆᑦᑐᑦ
ᑰᒃᔪᐊᖅ (ᒣ 2, 2017) – ᓄᑖᓂᒃ ᑯᐯᒻᒥ ᑲᓇᑕᒥᓪᓗ ᐃᕐᖃᓇᕐᑐᖁᑎᖏᓐᓂᒃ ᐃᓕᓐᓂᐊᕈᑎᑦᓭᑦ ᐋᕐᕿᓱᕐᑕᐅᕙᓪᓕᐊᓂᖏᓐᓄᑦ ᐃᓚᒋᔭᐅᑎᓪᓗᒋᑦ, ᑲᑎᕕᒃ ᐃᓕᓐᓂᐊᓂᓕᕆᓂᒃᑯᑦ ᐱᑕᖃᕐᑎᓯᓯᒪᔪᑦ ᐱᓇᓱᒍᑎᑦᓴᓂᒃ ᖃᐅᔨᒪᔨᖁᑎᒋᔭᕐᓂᓗ ᐱᓇᓱᐊᕐᑕᐅᕙᓪᓕᐊᓂᖏᓐᓂᑦ ᑕᑯᑦᓴᐅᓚᕿᑎᑦᓯᔪᓂᑦ ᓲᓱᒋᔭᖃᖕᖏᓗᑐᑦᓯᐊᓂᖏᓐᓂᒃ ᐃᒫᙰᕈᑎᐅᓯᒪᔪᓂᒃ ᐃᓕᓴᕆᐊᕐᑎᑕᐅᕙᓚᐅᕐᑐᕕᓃᑦ ᖃᐅᔨᓴᕐᑎᒋᓚᐅᔪᔭᖏᓐᓄᑦ ᐊᒻᒪᓗ ᓇᓗᓇᖕᖏᓯᐊᕐᑐᒥᒃ ᑯᐯᒃ ᑲᕙᒪᖓᑕ ᐅᓇᒻᒥᒋᔭᖃᖕᖏᓂᖓᑕ ᐱᓇᓱᐊᖃᑎᖃᕐᓂᒥᒃ ᓄᓇᓕᑐᖃᑦᓴᔭᓂᒃ ᓴᓇᔭᐅᕙᓪᓕᐊᑎᓪᓗᒋᑦ ᓄᓇᓕᑐᖃᑦᓴᔦᑦ ᐃᓕᓐᓂᐊᕈᑎᓕᐊᕆᔭᑦᓴᓄᑦ ᐅᓂᒃᑲᐅᓯᐅᓂᖏᑦ.
“ᓄᑖᑦ ᑯᐯᒻᒥ ᑲᓇᑕᒥᓪᓗ ᐃᕐᖃᓇᕐᑐᖁᑎᖏᓐᓂᒃ ᐃᓕᓐᓂᐊᕈᑎᑦᓭᑦ ᓈᒻᒪᖏᓪᓚᕆᑦᑐᑦ. ᓄᓇᓕᑐᖃᑦᓴᔭᕐᓂᒃ ᐅᓂᒃᑲᐅᓯᖃᒃᑳᓗᑐᑐᐃᓐᓇᕋᑎᒃ, ᑭᓯᐊᓂᓗ ᐋᕐᕿᓱᕐᑕᐅᒍᓯᖃᓚᐅᕐᐳᑦ ᖃᐅᔨᓂᐊᕐᕕᖃᕈᓯᕐᒥᒃ ᐊᑑᑎᔪᕕᓂᐅᑦᓱᑎᒃ ᐅᑎᕐᑕᐅᔭᕈᑎᐅᑐᐃᓐᓇᑐᒥᒃ ᓱᓇᖁᑎᖃᖕᖏᓂᒃᑯᑦ ᐊᖏᕐᑎᓯᒍᓗᑐᐃᓐᓇᕋᓱᐊᕐᓂᑯᑦ, ᑲᔪᓯᑎᑦᓯᓱᓂᓗ ᑕᒪᓐᓇ ᓂᐯᕐᑎᓯᓂᕐᒥᒃ ᐃᓄᐃᑦ ᓂᐱᖓᓂᒃ” ᐅᖃᓚᐅᔪᕗᖅ ᐋᓚᓯ ᓈᓚᒃᑑᔭᒃ, ᐊᖓᔪᕐᖄᖓᑦ ᑲᑎᕕᒃ ᐃᓕᓐᓂᐊᓂᓕᕆᓂᒃᑯᑦ.
ᑕᕐᕿᓂᑦ 10-ᓂᑦ ᖄᖏᕐᑐᓂᑦ, ᑲᑎᕕᒃ ᐃᓕᓐᓂᐊᓂᓕᕆᓂᒃᑯᑦ ᐃᓚᐅᓪᓚᕆᓚᐅᔪᕗᑦ ᑯᐯᒻᒥ ᐃᓕᓐᓂᐊᓂᕐᒧᑦ ᑐᕐᖃᑕᕐᕕᑯᓐᓄ ᑲᑎᒪᔨᓕᐊᕆᔭᐅᓯᒪᔪᑦ ᐱᓇᓱᐊᕐᑎᓗᒋᑦ ᓄᑖᑦ ᑯᐯᒻᒥ ᑲᓇᑕᒥᓪᓗ ᐃᕐᖃᓇᕐᑐᖁᑎᖏᓐᓂᒃ ᐃᓕᓐᓂᐊᕈᑎᑦᓴᓕᐊᕆᔭᐅᓯᒪᔪᑦ ᕿᒥᕐᕈᒋᐊᓪᓛᓱᒋᑦ ᐋᕐᕿᒋᐊᕐᑕᐅᒋᐊᓕᓐᓂᓗ ᒪᓂᔨᒍᑎᑦᓴᒥᓂᒃ. ᕕᑉᕗᐊᕆ 2017-ᖑᓕᕐᑎᓗᒍ, ᐃᓕᓐᓂᐊᓂᓕᕆᓂᒃᑯᑦ ᐊᒥᓱᑲᓪᓚᓂᒃ ᐅᖃᐅᓯᑦᓴᖃᕐᕕᖃᓚᐅᔪᕗᑦ ᐃᓓᒋᐊᕈᑎᐅᒋᐊᖃᕐᓯᒪᔪᓄᑦ ᐃᓕᓐᓂᐊᕈᑎᑦᓴᓄᑦ, ᑐᖕᖓᕕᒋᔭᐅᓗᐊᕐᓂᖏᓐᓂᓗ ᐃᓚᒋᔭᐅᑎᑕᐅᔪᑦᓴᓄᑦ ᐃᓄᐃᑦ ᐃᕐᖃᓇᕐᑐᖁᑎᖏᓄᑦ ᑯᐯᒻᒥ ᑲᓇᑕᒥᓪᓗ.
“ᑲᑎᒪᑎᓪᓗᒋᑦ ᑲᑎᒪᔨᖏᑦ ᕕᑉᕗᐊᕆ 2017-ᒥ, ᓇᓗᓇᕈᓐᓀᕕᐅᑦᓯᐊᓚᐅᔪᕗᒍᑦ ᐃᓕᓐᓂᐊᕈᑎᑦᓭᑦ ᐱᔭᕇᕐᑕᐅᓯᒪᓕᕇᕆᐊᖏᑦ. ᑭᖑᓪᓕᐹᑦ ᐋᕐᕿᑕᐅᓯᒪᔪᕕᓃᑦ ᑕᑯᒍᓐᓇᕈᑎᒋᓚᐅᔪᔭᕗᑦ ᐅᖃᐅᓯᕆᓯᒪᔭᕗᑦ ᐃᒫᙰᕈᑎᒋᓚᐅᔪᔭᕗᓪᓗ ᓄᐃᑕᑎᑕᐅᖕᖏᒪᑕ. ᐃᒣᓕᖓᒻᒪᑕᒐ ᐅᓪᓗᒥ, ᐃᓕᓐᓂᐊᕋᑦᓭᑦ ᐱᑕᖃᖕᖏᑐᑦ ᐃᓕᓭᒍᑎᑦᓴᓂᑦ ᑯᐯᒻᒥᐅᓂᒃ ᑕᒪᒋᑦᑕ ᓄᓇᓕᑐᙯᓪᓗ ᓄᓇᓕᑐᖃᐅᖕᖏᑐᐃᓪᓗ ᑯᐯᒻᒥ ᑲᓇᑕᒥᓗ ᐊᑑᑎᖃᑎᒌᑦᓯᒪᔭᖏᓐᓂᒃ ᐃᕐᖃᓇᕐᑐᓂᑦ,” ᑌᒣᓕᑦᓱᓂ ᐅᖃᐅᓯᖃᓚᐅᔪᕗᖅ ᐋᓚᓯ ᓈᓚᒃᑑᔭᖅ. “ᑭᖕᖒᒪᓇᕐᓂᖓᑕ ᐅᐃᒪᓇᕐᑐᒥᒃ ᐃᓕᓴᕐᑕᐅᒋᐊᖃᕐᓂᖏᑦᑕ ᑯᐯᒻᒥᐅᑦ ᑲᓇᑕᒥᐅᓪᓗ ᓄᓇᓕᑐᖃᕐᓄᐊᖓᔪᓂᒃ ᓇᓗᓀᕐᑕᐅᓯᒪᑦᓯᐊᒪᑦ ᐃᓕᓴᕆᐊᕐᑎᑕᐅᕙᑦᑐᕕᓃᑦ ᖃᐅᔨᓴᕐᑎᒋᓚᐅᔪᔭᖏᑦᑕ 2015-ᒥ ᑐᓴᕐᑎᓯᒍᑎᒋᓯᒪᔭᖏᓐᓂᑦ. ᓲᑭᐊᖑᒐᓗᐊᖅ, ᕿᒥᕐᕈᔭᐅᓂᖏᑦ ᑯᐯᒻᒥ ᐃᕐᖃᓇᕐᑐᖁᑎᖏᑦᑕ ᐃᓕᓐᓂᐊᒐᑦᓴᖏᑦ ᐱᕕᑦᓴᓯᐊᕆᔭᐅᓯᒪᖕᖏᒪᑦ ᑌᒣᓘᕐᓂᒧᑦ,” ᑌᒫᒃ ᐅᖃᕆᐊᓪᓚᓱᓂ.
ᖃᐅᔨᓂᐊᕈᑎᖃᕐᑎᓗᒋᑦ ᓄᑖᑦ ᐃᕐᖃᓇᕐᑐᖁᑎᖏᓐᓂᒃ ᐃᓕᓭᒍᑎᑦᓭᑦ ᐃᓗᓕᒋᒋᐊᓕᖏᓐᓂᒃ ᓄᓇᓕᑐᙯᑦ ᑭᒡᒐᑐᕐᑎᖏᑦᑕ ᐃᓚᐅᑎᑕᐅᓂᖏᑦ ᐱᒋᐊᓯᓕᑌᓐᓇᓚᐅᔪᕗᑦ ᐱᓇᓱᐊᕐᑐᑐᖃᐅᓕᕐᒪᑕ ᑭᓯᐊᓂ ᐊᒻᒪᓗ ᖃᐅᔨᒪᔨᓪᓚᕆᓐᓄᑦ ᐃᓕᓭᔨᓄᓪᓗ ᖃᕿᐊᕐᑕᐅᓕᕐᐸᓕᐊᓕᕐᒪᑕ ᑭᓯᐊᓂ ᐱᑦᔪᑎᖃᕐᓱᑎᒃ ᐃᓕᓐᓂᐊᒐᑦᓭᑦ ᐱᑕᖃᖕᖏᓗᐊᕈᑎᖏᓐᓂᒃ ᐊᒻᒪᓗ ᓄᐃᑕᑎᑦᓯᖏᓗᐊᕐᓂᖏᓐᓄᑦ ᑯᐯᑉ ᐃᓄᖏᑦᑕ ᐊᑦᔨᒌᖕᖏᓕᕇᖑᓂᖏᓐᓂᒃ. “ᐊᑕᓐᓂᐅᕕᐅᓚᐅᔪᔪᒍᑦ ᖃᐅᔨᒪᔨᓪᓚᕆᖁᑎᑦᑎᓂᒃ ᐃᑲᔪᕐᑎᓯᖁᔭᐅᑦᓱᑕ; ᐃᑲᔪᕆᐊᑦᓴᐅᑎᒋᓚᐅᔪᔪᒍᑦ ᐅᑉᐱᕈᓱᑦᓯᐊᓱᑕ. ᑭᓯᐊᓂ, ᖃᐅᔨᓂᐊᕐᕕᖃᕈᑎᓂᒃ ᐱᓇᓱᐊᕐᓃᑦ ᐋᕐᕿᓱᕐᑕᐅᓯᒪᑦᓱᑎᒃ ᑯᐯᒻᒥ ᐃᓕᓐᓂᐊᓂᓕᕆᓂᕐᒥᒃ ᑐᕐᖃᑕᕐᕕᑯᓐᓄᑦ ᑐᑭᓯᓇᕐᑎᓯᓯᒪᓪᓚᕆᓐᓂᖏᑦᑐᑦ ᐃᓕᓭᒍᑎᑦᓴᓕᐅᕐᓂᒥᒃ. ᐱᓇᓱᐊᕐᑕᐅᔪᕕᓃᑦ ᐱᑕᖃᕐᑎᓯᓐᓂᖏᑦᑐᑦ ᐱᕕᑦᓴᓕᐅᕆᒍᓐᓇᕋᑎᒃ ᖃᐅᔨᑦᓯᐊᕈᑎᑦᓴᖏᓐᓂᒃ ᑭᐅᒍᑎᑦᓴᕆᒍᓐᓇᑕᖏᓐᓂᓘᓃᑦ ᓄᓇᓗᑐᙯᑦ ᑭᒡᒐᑐᕐᑎᖏᓐᓂᒃ ᐃᑲᔪᕆᐊᕐᓯᒪᒍᓐᓇᓚᐅᔪᔪᓂᒃ ᑐᕐᖃᑕᕐᕕᑯᑦ ᐃᑲᔪᕐᑕᐅᒍᒪᓕᕐᑎᓗᒋᑦ,” ᐅᖃᕆᐊᓪᓚᓱᓂ ᐋᓚᓯ ᓈᓚᒃᑑᔭᖅ.
ᑕᒪᓐᓇ ᐊᑑᑎᒻᒪᑦ, ᑲᑎᕕᒃ ᐃᓕᓐᓂᐊᓂᓕᕆᓂᒃᑯᑦ ᐃᓱᒫᓗᒍᑎᖃᓪᓚᕆᑉᐳᑦ ᑯᐯᑉ ᑲᕙᒪᖓᑕ ᑐᓂᓯᒪᓪᓚᕆᒐᓗᐊᕐᒪᖔᑕ ᐊᑐᓕᕐᑎᑕᐅᓂᑦᓴᖏᓐᓄᑦ ᐃᒫᙰᕈᑎᒋᓯᒪᔭᖏᑦᑕ ᐃᓕᓴᕆᐊᕐᑎᑕᐅᕙᓚᐅᕐᑐᕕᓃᑦ
ᖃᐅᔨᓴᕐᑎᖏᓐᓂᒃ ᐃᓕᓴᕐᓂᖅ ᐱᓪᓗᒍ. ᐅᖃᓪᓗᑐᒋᐊᕐᓗᒍ, ᐃᓕᓐᓂᐊᓂᓕᕆᓂᒃᑯᑦ ᐃᓱᒫᓘᑦᑐᑦ ᐊᑐᓕᕐᑎᑕᐅᓂᖏᓐᓂᒃ 12, 62, 63 ᐊᒻᒪᓗ 64, ᑖᒃᑯᐊ ᐃᓕᖓᓪᓗᑐᕐᒪᑕ ᐃᓕᓐᓂᐊᓂᕐᒧᑦ ᐊᒻᒪᓗ ᑲᕙᒪᒃᑯᓄᑦ ᑯᐯᒻᒥ ᖃᓄᐃᓘᕈᑎᐅᒋᐊᓕᕐᑕᖃᕐᓱᑎᒃ.
“ᖃᐅᔨᓂᐊᕐᕕᖃᕈᑎᖏᓐᓂᑦ ᓄᑖᓂᒃ ᑯᐯᒻᒥ ᐃᕐᖃᓇᕐᑐᖁᑎᓂᒃ ᐃᓕᓭᒍᑎᑦᓭᑦ ᐱᓪᓗᒋᑦ, ᓄᐃᑕᐅᔪᖃᕋᔭᕐᓂᐸᑦ ᐱᓇᓱᑦᑎᒪᕆᐅᑉ ᐃᓂᖓᓂᒃ ᑐᕐᖃᑌᔨᐅᑉ ᑐᖓᓕᖓᑕ ᐃᑲᔪᕐᑎᖓᓂᒃ ᐅᕝᕙᓘᓐᓃᑦ ᐳᕐᑐᓂᕐᓴᒋᐊᓪᓚᒥᒃ ᐃᓂᒦᑦᑐᒥᒃ ᑖᒃᑯᓂᖓᑐᐊᑦᓯᐊᖅ ᓄᓇᓕᑐᙯᑦ ᐃᕐᖃᓇᕐᑐᖁᑎᖏᓐᓂᑐᐊᖅ ᑲᒪᒋᔭᖃᕐᑎᓯᔪᕕᓂᐅᑉᐸᑕ ᑐᑭᖃᑦᓯᐊᕈᑎᐅᒋᐊᓪᓚᕋᔭᕐᑐᕕᓂᖅ”, ᐅᖃᕆᐊᓪᓚᑐᖅ ᐋᓚᓯ ᓈᓚᒃᑑᔭᖅ. ᓄᐃᑕᐅᓂᕆᒐᔭᕐᑕᖓ ᑌᒣᑦᑑᑉ ᐃᓂᐅᑉ ᐃᒫᙰᕈᑎᒋᓯᒪᔭᖓ ᐃᓕᓴᕆᐊᕐᑎᑕᐅᕙᓚᐅᕐᑐᕕᓃᑦ ᖃᐅᔨᓴᕐᑎᖏᑦᑕ ᔫᓂ 2015-ᖑᑎᓪᓗᒍ (ᐃᒫᙰᕈᑎᒃ 62, iv).
ᐱᑦᔪᑎᒋᑦᓱᒋᑦ ᓄᑖᑦ ᐃᕐᖃᓇᕐᑐᖁᑎᖏᓐᓂᒃ ᐃᓕᓭᒍᑎᑦᓭᑦ, ᑲᑎᕕᒃ ᐃᓕᓐᓂᐊᓂᓕᕆᓂᖅ ᓱᓕᒋᐊᓪᓚᒃ ᐅᖃᐅᑏᓪᓚᕆᓕᕐᑐᑦ ᐃᒫᒃ ᑯᐯᒃ ᑲᕙᒪᖓ ᐱᓇᓱᐊᑦᓴᐅᑎᒋᐊᐱᖁᓕᕐᓱᒍ:
- ᐃᓚᒋᔭᐅᓕᕐᑎᓯᓗᑎᒃ ᓄᑖᓄᑦ ᐃᕐᖃᓇᕐᑐᖁᑎᖏᓐᓂᒃ ᑯᐯᒻᒥ ᑲᓇᑕᒥᓪᓗ ᐃᓕᓐᓂᐊᕈᑎᑦᓴᓄᑦ ᑌᒃᑯᓂᖓ 10-ᓂᒃ ᐃᓚᒋᔭᐅᓪᓗᑐᕆᐊᖃᕐᓂᕋᕐᑕᐅᓯᒪᔪᓄᑦ ᑐᖕᖓᕕᖏᓐᓂ ᐃᕐᖃᓇᕐᑐᖁᑎᖏᑦᑕ ᐃᓄᐃᑦ ᑯᐯᒻᒥ ᑲᓇᑕᒥᓪᓗ;
- ᓴᓇᓗᑎᒃ ᐃᓓᒋᐊᕆᒍᑎᑦᓴᓂᒃ ᐃᓕᓐᓂᐊᑎᑦᓯᒍᑎᑦᓴᓂᒃ ᑕᑯᑦᓴᐅᑫᔪᓂᒃ ᐃᒫᙰᕈᑎᐅᓯᒪᔪᓂᒃ, ᖃᐅᔨᒪᔭᐅᓕᕐᑐᓂᒃ ᑭᐅᒍᑎᒋᓯᒪᔭᖏᓐᓂᓗ ᐃᓄᓐᓄᑦ ᐊᓯᖏᓐᓄᓗ ᓄᓇᓕᑐᖃᑦᓴᔭᕐᓄᑦ;
- ᓄᑕᐅᓯᓕᕐᓗᒋᑦ ᑐᕐᖃᑕᕐᕕᑯᑦ ᐃᓕᓐᓂᐊᑐᓂᒃ ᓇᐅᑦᓯᑐᕈᑎᒋᓲᖏᓐᓂᒃ ᑕᑯᑦᓴᐅᑫᓕᕐᑎᓯᑎᓪᓗᒋᑦ ᐃᓕᓐᓂᐊᒍᑎᑦᓴᓃᓐᓂᐊᑐᓂᒃ ᐃᓕᑦᓯᔭᐅᓂᐊᕐᑐᓂᓪᓗ ᐃᓕᖓᔪᓂᒃ ᐃᓄᓐᓄᑦ ᐊᓯᖏᓐᓄᓗ ᓄᓇᓕᑐᖃᕐᓄᑦ;
- ᑲᒪᑦᓯᐊᓗᑎᒃ ᓱᓕᑦᓯᐊᒪᖔᑕ ᐃᓕᓐᓂᐊᕈᑎᑦᓭᑦ ᐊᒻᒪᓗ ᑐᕐᖃᑕᕐᕕᑯᑦ ᓇᐅᑦᓯᑐᕈᑎᖏᑦᑕ ᐃᓕᑦᓯᓯᒪᔭᐅᒋᐊᓕᖏᓐᓂᒃ ᐃᓕᑦᓯᔭᓂᓪᓗ ᐃᓕᖓᔪᓂᒃ ᐃᓄᓐᓄᑦ ᐊᓯᖏᓐᓄᓗ ᓄᓇᓕᑐᖃᕐᓄᑦ ᐱᐅᓯᕐᑖᕆᓯᒪᓗᒍ ᓱᓪᓕᑎᖏᓐᓂᒃ ᖃᐅᔨᓴᕐᕕᖃᕐᐸᓗᑎᒃ ᐃᓄᓐᓂᒃ ᐊᓯᖏᓐᓂᓗ ᓄᓇᓕᑐᖃᕐᓂᒃ.
- ᑲᒪᑦᓯᐊᓗᑎᒃ ᒥᑦᓯᖃᑦᓯᐊᑐᓂᒃ ᖃᐅᔨᓂᐊᕈᑎᓂᒃ ᐱᓇᓱᐊᖃᑎᖃᑦᓯᐊᓂᕐᒥᓗ ᐃᓄᓐᓂᒃ, ᐊᓯᖏᓐᓂᒃ ᓄᓇᓕᑐᖃᕐᓂᒃ ᐃᓕᓭᔨᓂᓪᓗ ᐱᑦᔪᑎᒋᓗᒋᑦ ᐋᕐᕿᓱᕐᑕᐅᕙᓪᓕᐊᓂᖏᑦ ᓄᓇᓕᑐᖃᕐᓅᓕᖓᔪᑦ ᐃᓕᓐᓂᐊᕈᑎᑦᓴᓅᔭᕐᑕᐅᓂᖏᑦ.
ᐃᓕᓴᕆᐊᕐᑎᑕᐅᕙᓚᐅᕐᑐᕕᓃᑦ ᖃᐅᔨᓴᕐᑎᖏᑦ ᓄᐃᑦᓯᓚᐅᔪᒻᒪᑕ ᑐᓴᕐᑎᓯᒍᑎᒥᓂᒃ ᔫᓂ 2015-ᖑᑎᓪᓗᒍ. ᑌᑲᓂ, ᑯᐯᑉ ᓯᕗᓕᕐᑎᖓ ᑯᐃᔮᕐ ᐅᖃᒻᒪᕆᓚᐅᔪᕗᖅ ᐃᒫᒃ ᖃᓄᐃᓕᖓᔪᒦᖃᑎᖃᕐᓂᖓ ᓄᓇᓕᑐᖃᕐᓂᒃ ᕿᒥᕐᕈᔭᐅᒋᐊᓪᓚᕆᐊᖃᕐᓂᕋᕐᓱᒍ. ᐅᖃᓚᐅᔪᕗᖅ ᐊᖏᖃᑎᖃᕐᓯᒪᓂᕋᕐᓱᓂ ᑌᓯᒍᓯᐅᓲᑉ “ᐃᓗᕐᕈᓯᕐᒥᒃ ᑐᖁᑦᓯᒋᐊᕐᓂᖅ” ᐊᑐᕐᑕᐅᓂᖓᓂᒃ ᐅᖃᐅᓯᕆᑦᓱᒋᑦ ᑲᓇᑕᐅᑉ ᐃᓕᓐᓂᐊᕆᐊᕐᑎᓯᓂᕆᕙᓚᐅᕐᑕᖓᓂᒃ ᐅᖃᕆᐊᑦᓯᐊᒪᕆᒻᒥᓱᓂᓗ ᐱᒻᒪᕆᐅᓂᖓᓂᒃ ᓄᓇᓕᑐᖃᑦᓴᔦᑦ ᓄᓇᓕᖏᓐᓂ ᐃᑲᔪᕐᓯᒍᑎᐅᓗᓂ ᐱᕙᓪᓕᐊᔭᐅᓂᖓᓂᒃ ᑯᐯᑉ ᑮᓇᐅᔭᕐᑎᒍᑦ ᒪᑭᑕᒐᓱᐊᕐᓂᖓᓂᒃ.
ᑭᓇᒃᑰᓂᕗᓐᓄᐊᖓᔪᖅ:
ᑲᑎᕕᒃ ᐃᓕᓐᓂᐊᓂᓕᕆᓂᖅ (ᑲᑎᕕᒃ) ᑎᒥᖕᖑᑎᑕᐅᓯᒪᔪᖅ 1975ᒥ, ᔦᒻᔅ ᐯ ᐊᒻᒪᓗ ᑯᐯᒃ ᑕᕐᕋᖓᑕ ᐊᖏᖃᑎᒌᓐᓂᖓᑎᒍᑦ ᓄᐃᑕᐅᑦᓱᓂ. ᑌᒪᖕᖓᓂᑦ 1978ᒥᓂᑦ, ᑖᓐᓇᑑᑦᓱᓂ ᐃᓕᓐᓂᐊᓂᕐᒥᒃ ᐱᒍᑦᔨᐅᑎᓂᒃ
ᐱᑕᖃᕐᑎᓯᔪᑑᓯᒪᔪᖅ ᓄᓇᕕᒻᒥᐅᓄᑦ. ᐃᓕᓐᓂᐊᓂᕐᒥᒃ ᐱᓇᓱᐊᕐᓃᑦ ᐱᕙᓪᓕᐊᑎᑕᐅᓯᒪᔪᑦ ᑲᑎᕕᒃᑯᓄᑦ ᒪᓂᔭᐅᕗᑦ ᐃᓕᓴᕐᕕᓕᒫᖏᓐᓂ 14-ᓂᑦ ᓄᓇᕕᒻᒥ ᓄᓇᓕᓐᓂ, ᐅᖃᐅᓯᕐᖄᕆᔭᐅᑎᓪᓗᒍᑦ ᐃᓄᒃᑎᑐᑦ ᐊᒻᒪᓗ ᒍᐃᒍᐃᑎᑐ ᖃᓪᓗᓈᑎᑐᓪᓗ ᐅᖃᐅᓯᕐᒧᑦ ᐁᑉᐱᒍᑎᐅᑎᓪᓗᒋᒃ. ᐃᓕᓐᓂᐊᓂᓕᕆᓂᖅ ᐊᐅᓚᑦᓯᔪᖅ 17-ᓂᒃ ᐳᒃᑭᓂᕐᓴᓃᑦᑐᓂᒃ ᐳᕐᑐᓂᕐᓵᓃᑦᑐᓂᓪᓗ ᐃᓕᓴᕐᕕᓂᒃ ᐊᒻᒪᓗᑦᑕᐅᖅ 5-ᓂᒃ ᐃᓄᒻᒪᕆᓄᑦ ᐃᓕᓴᕐᕕᓂᒃ. ᑐᑭᓯᒋᐊᓪᓚᕕᑦᓭᑦ ᐅᕙᓂ: www.kativik.qc.ca
— 30 —
ᑐᑭᓯᒋᐊᓪᓚᕈᒪᒍᕕᑦ, ᐅᓇ ᐅᖄᓚᕕᒋᓗᒍ:
Jade Duchesneau-Bernier
ᑐᓴᐅᒪᖃᑎᒌᓐᓂᓕᕆᓂᕐᒥ ᐊᑕᐅᑦᓯᑰᕐᑎᓯᔨ
(514) 482-8220