Publications

ᐃᓕᑦᓯᑎᑦᓯᒐᓱᐊᕐᓂᖅ ᓱᒋᐊᕐᓂᑯᑦ

PHOTO: GABRIEL GAGNON
2023 | 02 | 1
ᐅᓂᒃᑳᑦ
ᐅᖄᖃᑎᒋᑦᓱᒍ ᑭᐅᒪᒍᓐᓇᓯᐊᓚᐅᕐᑐᖅ

ᐊᓐᑐᕆᐊ ᐸᕌᓲ

ᐅᖃᕐᑕᐅᒍᓯᖅ “ ᐃᓕᑦᓯᑎᑦᓯᒐᓱᐊᕐᓂᖅ ᓱᒋᐊᕐᓂᑯᑦ ” ᐱᐅᖕᖏᑐᒥᒃ ᑐᑭᓕᐅᔮᕐᑐᖅ, ᐊᓪᓚᓯᒪᔫᑎᓪᓗᒍ ᑕᑯᑦᓴᐅᓴᕋᓗᐊᓗ ᐱᐅᔫᑎᓪᓗᒍ. ᐃᓕᓐᓂᐊᑏᑦ ᐊᒥᓱᐃᑦ ᐳᒃᑭᓂᕐᓴᒦᓐᓂᓕᒫᒥᓂᒃ ᐱᐅᓯᖃᓲᑦ ᐊᑕᐅᓯᕕᑦᓱᑎᒃ ᐊᒥᓱᕕᑦᓱᑎᓪᓘᓃᑦ, ᐊᑦᔨᒌᖕᖏᑐᓂᒃ ᐃᑉᐱᓂᐊᕐᓂᐅᔪᓂᒃ ᐅᓪᓛᑯᑦ ᑐᐸᓐᓂᐅᑉ ᒥᑦᓵᓄᑦ ᐃᓕᓐᓂᐊᕆᐊᓚᖓᓗᑎᒃ.

“ ᐃᕿᐊᓇ… ᑕᒪᓐᓇ ᓱᒋᐊᕐᑕᐅᕈᑎᒋᕈᓇᑦᓴᑕᕋ? ᐆᑦᑑᑎ, ᓱᓇᒥᒃ ᐱᖁᔭᒥᒃ ᓯᖁᒥᑦᓯᓂᕋᒪ ᓵᒥ ᐃᑦᓯᕓᓐᓇᕆᐊᖃᑦᓴᕆᕗᖓ ᐊᒥᓱᓂᒃ ᑫᕙᓪᓚᒍᓯᕐᓂ?! ”

ᐅᕙᑦᑎᓄᓪᓕ, ᐃᓕᓐᓂᐊᑎᑦᓯᔨᖃᕐᓯᒪᕗᒍᑦ ᐃᑦᔭᕋᑦᓴᓯᐊᓂᒃ, ᑫᓪᓗᑐᐃᓂᖃᖃᑦᑕᓯᒪᔪᓂᒃ ᐃᓱᒪᑦᑎᓂ ᐊᒻᒪᓗ ᐃᓕᓐᓂᐊᕕᓕᐊᕈᒪᓂᕐᑖᑎᑦᓯᖃᑦᑕᓯᒪᔪᓂᒃ ᐅᕙᑦᑎᓂᒃ ᖃᐅᑕᒫᑦ. ᐊᔪᒉᑦᑐᒥᒃ ᐊᑑᑎᓲᖑᒐᑦᑕ, ᐃᓕᓐᓂᐊᑎᑦᓯᔨᒥᒃ ᑲᑎᓯᓯᒪᕗᖓ ᑕᒪᑦᓱᒥᖓ ᐱᐅᓯᖃᓲᒥᒃ: ᐋᓐᑐᕆᐊ ᐳᕌᔫ, ᐳᕐᑐᓂᕐᓴᕆᐊᓪᓚᒥ ᐱᔭᕇᒍᓯᕐᑕᐅᓯᒪᓂᓕᒃ ᖃᐅᔨᒪᓂᕐᒥᒃ ᐅᑎᕐᑎᓰᓯᒪᔪᖅ ᐊᓂᕐᕋᒥᓄᑦ!

ᐃᓱᒪᒐᓱᐊᓲᖑᕗᖓ ᐃᑲᔪᕐᓯᓯᒪᒐᒪ ᐃᓕᓐᓂᐊᑎᖁᑎᒻᒪ ᐱᐅᓯᖏᓐᓂᒃ ᖁᕝᕙᐅᒥᑎᑦᓯᓯᒪᓂᕋᓂᓗ ᐃᓕᓐᓂᐊᓇᐅᑉ ᐊᕐᕌᒍᖓᓂ. ᑕᒪᓐᓇ ᐱᒻᒪᕆᐅᓂᕐᐸᐅᖃᑎᐅᔪᖅ ᐱᕕᑦᓴᖃᕐᑎᓯᒍᓐᓇᓂᕋ ᑌᒣᑦᑐᒥᒃ ᖃᕆᐊᑉ ᐃᓗᐊᓂ ᐊᓂᒎᑎᑎᑦᓯᓂᖃᓲᖑᒻᒪᑦ ᐃᓕᓐᓂᐊᑕᖏᓐᓂ.

ᐋᓐᑐᕆᐊ ᐳᕌᔫ ᐃᓕᓐᓂᐊᑎᑦᓯᔨ ᐅᓪᓗᕆᐊᖅ ᐃᓕᓐᓂᐊᕕᖓᓂ, ᑲᖏᕐᓱᐊᓗᑦᔪᐊᒥ

ᐃᓕᓐᓂᐊᑎᑦᓯᔨᐅᕆᐊᖕᖓᓱᓂ ᐋᓐᑐᕆᐊ ᐱᓇᓱᒐᕐᑖᓯᒪᔪᖅ ᐳᕐᑐᓂᓕᓐᓂᒃ ᓯᑕᒪᓂᑦ ᐃᓕᓐᓂᐊᑎᑦᓯᔨᐅᓂᕐᒥᒃ ᑲᖏᕐᓱᐊᓗᑦᔪᐊᒥ. ᖃᕆᐊᒥ ᐊᐅᓚᑦᓯᒍᓐᓇᓂᕐᒥᒃ ᐃᓕᓐᓂᐊᑎᑦᓯᓂᒃᑯᑦ ᑲᔪᓯᒃᑫᒍᓐᓇᓯᔪᕕᓂᖅ, ᐊᑐᓕᕐᑎᓯᒍᓐᓇᓯᑦᓱᓂ, ᐱᐅᓯᐅᒦᒋᐊᕐᓱᓂᓗ ᐃᓕᑦᓯᓯᒪᔭᒥᓂᒃ ᐃᓕᓐᓂᐊᓱᓂ ᒪᑭᐊᓪ ᐃᓕᓐᓂᐊᕕᕐᔪᐊᖓᓂ ᑕᑯᒥᓇᕐᑐᓕᐅᕐᓂᒧᑦ ᐃᓕᑕᕆᔭᐅᒍᑎᑖᕕᓂᕐᒥᓂᒃ.

  ᖃᕆᐊᒥ ᐊᐅᓚᑦᓯᒍᓐᓇᓂᖅ ᐊᑐᕐᓂᖃᓪᓚᕆᑦᑐᖅ. ᑌᑲᖕᖓ ᐱᒋᐊᕐᓱᒍ, ᐃᓕᓐᓂᐊᑏᑦ ᐱᔪᓐᓇᓂᖏᓐᓂᒃ ᐱᕈᕐᐸᓕᐊᑎᑦᓯᒍᓐᓇᑐᖅ ᐊᒻᒪᓗ ᐃᒻᒥᓂᒃ ᐅᑉᐱᒋᔭᖃᕐᑎᓯᓕᕐᓗᓂ ᑌᒪ ᐱᔪᓐᓇᓯᓂᐊᓕᕋᒥ ᐱᓇᓱᐊᕆᐊᓕᒻᒥᓂᒃ ᐱᔭᕇᒐᓱᐊᕐᓂᑯᑦ.   ᐅᖃᕐᑐᕕᓂᖅ ᐋᓐᑐᕆᐊ. ᐊᓕᐊᓱᑦᓱᖓ ᑐᑭᓯᐊᑦᓱᖓ ᐊᖏᕐᓯᒪᕗᖓ, ᖃᐅᔨᒪᓂᖃᓪᓗᐊᖏᒃᑲᓗᐊᕐᓱᖓ ᖃᕆᐊᒥᒃ ᐊᐅᓚᑦᓯᒍᓐᓇᓂᐅᑉ ᒥᑦᓵᓄᑦ.

  ᖃᐅᔨᒪᓂᖃᓪᓚᕆᒃᑯᑎᑦ ᖃᓄᐃᓘᕆᐊᒥᒃ ᐱᐊᕋᕐᓂᒃ ᐱᓇᓱᐊᖃᑎᖃᓕᕋᕕᑦ.  

  ᐊᓕᐊᒋᓪᓚᕆᑦᑕᕋ ᐱᐊᕋᕐᓂᒃ ᐱᓇᓱᐊᖃᑎᖃᕐᓱᓂ! ᐱᓇᓱᐊᖃᑎᒌᓐᓇᓕᒫᓯᒪᔭᒃᑲ ᑌᒪᖕᖓᑦ. ᖃᐅᑕᒫᑦ ᐱᒍᓐᓇᕕᓕᒫᒃᑯᑦ ᐱᓇᓱᐊᕐᓂᖃᓪᓚᕆᕆᐊᓕᒃ. ᐱᐊᕋᕐᓂᒃ ᐱᓇᓱᐊᖃᑎᖃᓕᕈᕕᑦ, ᕿᑦᑌᖓᒋᐊᖃᕐᖁᑎᑦ ᐊᓕᐊᓇᕋᓱᐊᕐᓗᑎᓪᓗ!   ᐅᖃᕐᑐᕕᓂᖅ ᐊᓕᐊᓱᐊᑦᓱᓂ.

ᐊᓕᐊᓇᕐᑐᒥᒃ ᐊᑐᕐᑕᐅᑎᑦᓯᓱᓂ ᐃᓅᑉ ᐱᐅᓯᖓᓂᒃ ᐱᐅᔪᒧᑦ ᐊᓯᑦᔩᐸᓪᓕᐊᒍᓐᓇᑐᖅ. ᐃᓕᑦᓯᒐᓱᐊᕐᑎᓗᒋᑦ ᐊᓕᐊᓇᕐᑑᑎᑦᓯᒐᓱᐊᕐᓱᓂ ᓱᓕᑦᓯᐊᑑᑎᓪᓗᒍᓗ ᐱᐅᔪᒥᒃ ᓱᕐᕃᓲᖅ ᐃᓕᓐᓂᐊᑕᖏᓐᓂ ᐊᒻᒪᓗ ᐋᓐᑐᕆᐊ ᖃᐅᔨᒪᓪᓚᕆᑦᑐᖅ ᐊᓕᐊᓇᕐᑐᒥᒃ ᐅᑎᕐᑎᓰᒐᓱᕆᐊᒥᒃ ᐃᓕᓐᓂᐊᕕᐅᑉ ᐃᓗᐊᓂ. ᐳᕐᑐᓂᕐᓴᒦᑦᓱᓂ, ᐋᓐᑐᕆᐊ ᐊᔫᑦᑕᑎᐅᓯᒪᔪᖅ ᐱᒋᐅᕐᓴᑎᑦᓯᓲᖑᑦᓱᓂᓪᓗ ᐱᐊᕋᕐᓂᒃ Atom-ᓚᔭᐅᔪᓂ ᐊᒻᒪᓗ Pee Wee-ᓚᔭᐅᔪᓂ ᐊᔫᑦᑕᒋᐅᕐᓴᑐᓂ.

ᐱᒋᐅᕐᓴᑎᑦᓯᔨ ᐳᕌᔫ, ᐊᓪᓚᕕᐊᓗᒃ ᖃᑯᕐᑕᖅ ᓄᐃᑎᒍᒃ! ”

ᐊᓪᓕᑐᖃᑕᒫᑦ, ᐋᓐᑐᕆᐊ ᐊᑐᐃᓐᓇᕈᕐᑎᓲᖅ ᐱᒋᐅᕐᓴᑎᑦᓯᓂᕆᓛᕐᑕᒥᓂᒃ ᐃᒻᒥᓂᒃ ᐊᐱᕆᑦᓱᓂ :

  ᓱᓇᒥᒃ ᑐᕌᒐᖃᕐᖁᖓ ᐱᓇᓱᐊᕈᓯᕐᒥ?  

ᑖᑦᓱᒥᖓ ᐊᓪᓚᒐᓱᐊᕐᑎᓗᖓ ᐃᒻᒥᓂᒃ ᐊᐱᕆᕗᖓ ᑖᑦᓱᒥᖓᑦᓭᓇᖅ ᐊᐱᕐᓲᑎᒥᒃ. ᓱᓇᒥᒃ ᑐᕌᒐᖃᕐᖁᖓ ᑖᑦᓱᒪ ᓈᓂᖓᓄᑦ? ᐋᓐᑐᕆᐊᐅᑉ ᒥᑦᓵᓄᑦ ᐅᖄᓚᖓᕗᖓ ᐅᓪᓗᕆᐊᑉ ᐃᓕᓐᓂᐊᕕᖓᓄᑦ ᓄᐃᑦᓯᓂᕆᓲᖓᓄᑦ ᐱᓇᓱᐊᖃᑎᒌᑦᑐᓂ? ᖃᓄᖅ ᑕᒪᓐᓇ ᐊᑑᑎᓚᖓᔭᕋ? ᑕᒪᒃᑯᐊ ᐊᐱᕐᓲᑏᑦ ᑭᐅᒐᓱᐊᓚᐅᕐᓚᕗᑦ ᓄᐃᑦᓯᓗᑕ ᐃᓕᑦᓯᒍᑎᑦᓴᒥᒃ ᑖᑦᓱᒪᖕᖓᑦ ᐊᓪᓚᖁᑎᓕᐊᕕᓂᕐᒥ. ᐊᓪᓚᕕᐊᓗᒃ ᖃᑯᕐᑕᖅ ᑕᑯᓐᓇᖑᐊᕐᓗᒍ ᓯᐊᕐᕆᔭᕐᕕᐅᑉ ᓇᑎᖓᓂᒃ ᐊᓪᓚᖑᐊᕐᓯᒪᑎᓪᓗᒍ ᑕᑯᑦᓴᐅᑎᑦᓯᒍᑎᐅᓂᐊᕐᓱᓂ ᐋᓐᑐᕆᐊᐅᑉ ‘ᐱᖕᖑᐊᑕᐅᑎᓚᖓᔭᖓᓂᒃ’ ᐅᕝᕙᓘᓐᓃᑦ ᐊᔫᑦᑕᑏᑦ ᐃᓂᕆᓂᐊᕐᑕᖏᓐᓂᒃ ᐃᓕᓐᓂᐊᑎᑦᓯᒍᑎᒋᓂᐊᕐᓱᒋᑦ.

ᑕᒪᒃᑯᐊ ᐱᐊᕃᑦ ᐃᓕᓐᓂᐊᕕᒻᒥᒃ ᐃᓱᒪᒋᔭᖃᓲᖅ ᐱᐅᖕᖏᑑᑎᓪᓗᒍ ᓱᒋᐊᕈᑎᐅᑦᓱᓂ ᐊᖓᔪᕐᖄᒥᓄᑦ (ᐆᑦᑑᑎᒋᓗᒍ ᐊᔫᑦᑕᓂᕐᒥᒃ ᐳᓖᓰᑦ), ᑎᒍᔭᐅᑎᓚᐅᕐᓚᕗᑦ ᑐᑭᓯᒋᐊᓪᓛᓂᐊᕐᒪᑕ ᐱᖕᖑᐊᑎᓪᓗᒋᑦ.

ᐱᓐᓇ ᑕᑯᔦᑦ ᑕᖁᐊᖃᐅᑎ ᓇᑎᕐᒦᑐᖅ ᐃᑦᓯᕙᕕᐅᑉ ᐊᑖᓃᑦᓱᓂ? ᐃᓗᐊᓂ ᓇᓂᓯᓐᓂᐊᖁᑎᑦ ᐊᔫᑦᑕᕈᑏᑦ ᐸᑦᑕᖏᓐᓂᒃ ᖁᐊᕐᓯᒪᔪᓂᒃ. ”

ᐱᒋᐊᖕᖓᐅᑎᖃᓚᐅᕐᑕ ᓇᓪᓕᑐᐃᓐᓇᖏᓐᓂ ᐋᑦᑐᕆᐊᐅᑉ ᐃᓕᓐᓂᐊᑎᑦᓯᒍᑎᖏᓐᓂ. ᐃᓱᒪᒋᖕᖑᓗᒍ ᑕᖁᐊᖃᐅᑎ. ᐃᓕᓐᓂᐊᑎᑦᓯᒍᑎ ᐊᕕᑦᑐᓗᒍ ᐊᒥᓱᐃᓕᖓᔪᒥᒃ ᐊᔫᑦᑕᕈᑏᑦ ᐸᑦᑕᖓ ᐊᑕᐅᓯᖅ ᑖᓐᓇᐅᖑᐊᕐᑎᓗᒍ. ᐋᓐᑐᕆᐊ ᐊᐱᕆᓕᑐᐊᕐᒪᑦ – ᐊᔫᕆᐊᕐᑐᑎᑐᑦ ᐱᐅᓯᖃᕐᓗᓂ – ᓄᑖᒥᒃ ᐊᔫᑦᑕᕈᑎᒥᒃ ᐸᑦᑕᒥᒃ ᓄᐃᑦᓯᓱᓂ, ᐃᓕᓐᓂᐊᑎᒨᕐᓯᒍᓐᓇᓯᑦᓱᓂ. ᑖᓐᓇᐅᖏᑦᑐᖅ ᑭᐅᑦᔪᑎ ᑭᐅᒍᑎᐅᑦᓱᓂ ᓄᓗᐊᑉ ᓯᓚᑖᓅᕐᑐᖅ ᐅᕝᕙᓘᓐᓃᑦ ᓄᓗᐊᑉ ᑭᑭᐊᑦᓴᔭᖓᓅᕐᑐᖅ ᐊᔫᒐᓂ. ᑭᐅᑦᔪᑎ ᓈᒻᒪᓈᕐᐸᑦ ᐊᔫᒋᐊᕐᓱᓂ ᐃᓗᐊᓅᕐᓯᔪᖅ. ᐊᔫᕐᖁᖅ!

ᑕᓕᖅ ᖁᒻᒧᐊᑕᐅᔪᖅ, ᖁᒻᒧᑦ… ᐃᓕᓐᓂᐊᑎ ᐋᓐᑐᕆᐊᐅᑉ ᐊᐱᕆᐅᑎᖓᓂ ᐃᓄᑑᑦᔨᓗᓂ ᐊᔫᒍᓐᓇᖃ?  ”

  ᑌᒪᖕᖓ ᐊᓪᓚᕕᐊᓗᒻᒥ ᖃᑯᕐᑕᒥ ᐱᓇᓱᐊᓕᑐᐊᕋᑦᑕ, ᐃᓕᓐᓂᐊᑏᑦ ᐊᑐᓂ ᑭᐅᒍᓐᓇᕕᓖᑦ, ᖃᐅᔨᒪᓂᖃᓪᓚᕆᒃᑯᖓ ᑭᓇ ᖃᐅᔨᒪᒐᓗᐊᕐᒪᖔᑦ ᐱᓇᓱᐊᕐᑕᒥᓂᒃ.   ᐋᓐᑐᕆᐊ ᐅᖃᕐᑐᕕᓂᖅ.

  ᑌᒫ ᑕᒡᒐ ᒪᓕᑦᓯᐊᒍᓐᓇᖁᑎᑦ, ᐱᐅᔪᖅ.  

  ᐋ, ᓱᓇᑐᐃᓐᓇᒥᒃ ᑲᒪᓪᓚᕆᒋᐊᖃᕐᓇᑐᖅ, ᑭᓯᐊᓂ ᓈᓂᖓᓂ, ᖃᐅᔨᒪᓲᖑᕗᖓ ᖃᓄᓪᓗᐊᑎᒋ ᐃᓕᑦᓯᓯᒪᓕᕐᒪᖔᑕ.  

  ᓱᓇᓂᒃ ᑐᕌᕐᓂᖃᕐᕿᑦ ᐃᓕᓐᓂᐊᑎᑦᓯᔨᐅᑦᓱᑎᑦ?   ᐊᐱᕆᔭᕕᓂᕋ.

  ᐃᓕᓐᓂᐊᑎᖁᑎᒃᑲᓂᒃ ᐃᓕᑦᓯᓕᐅᒥᖁᔨᕗᖓ ᐊᑐᐊᕐᓯᓂᕐᒥᒃ. ᐃᓕᓐᓂᐊᑏᑦ ᐊᑐᐊᕐᓯᒍᓐᓇᕈᑎᒃ ᐊᓪᓚᕈᓐᓇᕈᑎᓪᓗ, ᓱᓇᑐᐃᓐᓇᓂᒃ ᐊᑑᑎᒍᓐᓇᓯᓛᕐᑐᑦ ᐃᓅᓯᕐᒥᒃ. ᒫᓐᓇ ᐊᑦᔨᖑᐊᓂᒃ ᐊᑐᕐᑐᐹᓘᓲᖑᕗᖓ ᖃᐅᔨᓴᕐᓂᖃᓕᑐᐊᕐᒪᑕ ᐃᑲᔪᕐᓯᔭᐅᖁᓪᓗᒋᑦ ᐅᖃᐅᓯᐅᑉ ᐁᑉᐱᐅᑎᖓᓄᑦ ᓅᑉᐸᓕᐊᑎᓪᓗᒋᑦ.  

ᐃᓕᓐᓂᐊᑎᑦᓯᔨᐅᑦᓱᓂ ᐃᓕᓐᓂᐊᕕᒋᓯᒪᔭᒥᓂᒃ ᐃᓕᓐᓂᐊᑎᐅᑦᓱᓂ, ᐋᓐᑐᕆᐊ ᐱᓂᐊᕐᓂᖃᓲᖅ ᐱᑐᑦᑎᓯᒐᓱᐊᕐᓱᓂ ᐅᖃᐅᓯᒋᔭᐅᔪᒥᒃ ᐊᒻᒪᓗ ᐅᖃᐅᓯᐅᑉ ᐁᑉᐱᐅᑎᖓᓂᒃ. ᖃᐅᔨᒪᓪᓚᕆᑦᑐᖅ ᓱᓇᐅᓂᖓᓄᑦ ᐊᕕᑦᑐᓯᒪᐅᑎᐅᓲᖅ… ᑌᑲᖕᖓ ᐱᒋᐊᓱᓂ, ᐱᓇᓱᐊᕐᓂᖃᓲᖅ ᑐᑭᓯᒪᔭᒥᓂᒃ ᐊᑑᑎᓯᒪᔭᒥᓂᒃ ᓄᐃᑦᓯᒐᓱᐊᕐᓱᓂ ᐃᓕᓐᓂᐊᑎᖁᑎᖏᑦ ᓅᑉᐸᓕᐊᑦᓯᐊᖁᓪᓗᒋᑦ.

ᒪᓕᒋᑦᓯ ᐅᕙᓐᓂ ᐱᐊᕃᑦ! ᒪᓂᕐᕋᓭᖃᑕᐅᓯᕗᖓ ᐊᕐᖁᑎᒋᓚᖓᔭᑦᓯᓂᒃ ᓯᕗᓂᕐᒥ.  ”

  ᐃᓕᓐᓂᐊᑎᑦᓯᓕᑐᐊᕋᒪ ᓱᓇᑐᐃᓐᓇᒥᒃ ᐊᕐᓱᕈᕐᓇᑐᒥᒃ, ᐃᓄᑦᑎᑐᑦ ᐅᖃᕆᐊᓪᓚᓲᖑᕗᖓ ᑐᑭᓯᑦᓯᐊᖁᓪᓗᒋᑦ ᑐᑭᖏᓐᓂᒃ ᑌᒪ ᐅᖃᕆᐊᓪᓚᓂᐊᓕᕋᒪ ᖃᓪᓗᓈᑎᑐᑦ.  

  ᑌᒪ ᐅᖃᐅᓯᐅᑉ ᐊᓯᐊᒍᑦ ᐅᖃᕆᐊᓪᓚᓂᖅ ᐊᒻᒪᓗ ᖃᓄᐃᓕᖓᓕᕇᑦᓯᐅᑎᓪᓗᒋᑦ. ᑐᑭᓯᕗᖓ!  

  ᐊᒻᒪᓗ ᐃᒻᒥᓂᒃ ᐅᑉᐱᒋᔭᖃᕐᓂᒨᓕᖓᒻᒥᔪᖅ, ᑐᕌᒐᕆᒻᒥᔭᕋ ᐃᓕᓐᓂᐊᑏᑦ ᑫᓪᓗᑐᒐᓱᐊᓲᒃᑲ ᐃᓄᑦᓯᐊᖑᖁᓪᓗᒋᑦ. ᓲᓱᒋᔭᖃᕐᓂᖅ ᐊᓯᒥᓂᒃ ᐊᒻᒪᓗ ᐃᑉᐱᒋᔭᖃᑦᓯᐊᓂᖅ ᐃᓄᓐᓂᒃ. ᑭᖑᓂᐊᒍᑦ, ᐃᑉᐱᒋᔭᖃᕋᓱᐊᓲᖑᕗᖓ ᐃᓕᓐᓂᐊᑎᑦᓯᒐᓱᐊᕐᓱᖓ ᐃᓄᑦᓯᐊᖑᓂᕐᒥᒃ ᐊᒻᒪᓗ ᐃᓅᓯᕐᒥᒃ ᐱᔪᓐᓇᐅᑎᖃᕐᓂᒥᒃ.  

  ᐊᓕᐊᓇᕐᑐᖅ. ᓱᓇᑐᐃᓐᓇᒥᒃ ᐅᖃᕆᐊᓪᓚᕈᒪᕕᑦ ᓈᓚᐅᕐᑎᓇᒍ ᐅᖄᖃᑎᒌᓐᓂᕗᑦ?  

  ᐅᑎᕐᕕᐅᓇᕐᑐᖅ ᐃᓕᓐᓂᐊᑎᑦᓯᔨᐅᑦᓱᓂ, ᐃᓱᒪᒋᔭᕋᓐᓄᓕ. ᐃᓕᓐᓂᐊᑎᑦᓯᔨᐅᑦᓱᓂ ᐱᓇᓱᐊᕆᐊᖃᓐᓇᑐᐸᐅᔮᓗᖅ ᑭᓯᐊᓂ ᐅᑎᒧᑦ ᐱᐅᔪᒥᒃ ᓄᐃᑦᓯᔪᖅ ᑕᒪᓐᓇᓗ ᓇᑖᒍᑦᔨᓱᓂ.   ᐋᓐᑐᕆᐊ ᐅᖃᕆᐊᓪᓚᑐᖅ.