ᐃᓅᓯᐅᑉ ᐃᑭᐊᕐᒥᐅᑕᖓ
with Edua Jones
ᓯᑕᒪᐅᓕᖓᑦᓱᑎᒃ ᐱᓕᐅᑦᔨᖃᑎᒌᑦᑐᑦ, 2016
ᑖᓐᓇ ᐊᑦᓯᖑᐊᖅ ᑕᑯᔭᐅᒍᓐᓇᑐᖅ ᐄᑐᐊ ᔫᓐᔅ ᐊᓪᓚᕕᖓᑕ ᐊᑭᓐᓇᖓᓂᒃ, ᓱᓇᒐᓚᖃᐅᑎᑦᑎᓂᒃ ᐃᓪᓗᐊᓗᖁᑎᑦᑎᓂ ᐃᓄᑦᔪᐊᒥ. ᐃᔩᒃᑲ ᑕᒐᑕᒐᑦᓴᐅᑎᒋᐊᐱᒃ ᑕᑯᑦᓴᐅᑎᒋᓚᐅᔫᒃ ᑖᑦᓱᒥᖓ ᐊᑦᔨᖑᐊᒥᒃ ᐃᓱᒪᓯᑦᓴᐅᑎᒋᑦᓱᖓᓗ ᑲᑎᒋᐅᕐᑕᕋᓂᒃ ᐃᓄᑉᐹᓗᒻᒥᒃ ᐃᒫᖔᒃ.
“ ᐅᐊ… ᓱᖑᔪᐊᓗᕋᑕ! ” ᐃᓱᒪᓯᑦᓴᐅᑎᒋᓚᐅᔪᔪᖓ.
ᑕᕝᕙᓂ ᐅᓪᓘᔪᒥᒃ ᖃᓄᓪᓚᕆᒃ ᐃᑑᐊ ᐱᐅᓯᖃᒍᔪᓲᒍᒻᒪᖔᑕ ᑐᑭᓯᓕᓚᐅᔪᔪᖓ. ᒪᓕᑲᑕᓚᐅᔪᒐᒃᑯ ᐅᓪᓗᓕᒫᑦᓯᐊᖅ ᐱᓇᓱᐊᕐᑎᓗᒍ – ᐊᒥᓱᕋᑕᕐᓂᓗ ᐊᐱᕐᓱᑲᑦᑕᖃᑦᑕᓱᖓᓗ, ᐊᒥᓱᐃᑎᒍᓗ ᐃᓱᒪᒋᔭᕐᒥᓂ ᐅᖃᓕᒪᑦᓯᐊᕈᓐᓇᖃᑦᑕᓚᐅᔪᒻᒪ. ᐅᖃᑦᑕᓕᒫᖏᓗ ᓱᕐᖁᐃᒋᐊᒃᑲᓂᖃᑦᑕᓚᐅᔪᒻᒪᑕ ᐃᓱᓕᒪᓕᒋᐊᕋᓂᒃ ‘ᓲᖑᓗᐊᓘᒋᐊᖓᓂᒃ‘.
ᑕᑯᒋᐊᒃᑲᓂᓕᕋᒃᑯ ᐊᑦᔨᖑᐊᖅ, ᐃᓱᒪᓚᕿᖃᑦᑕᓚᐅᔪᒐᒪ ᐃᒫᒃ:
“ “ᐄᑐᐊ ᔫᓐᔅ, ᑲᒪᔨᐅᑦᓱᓂ ᐱᓇᓱᑦᑕᒥᓂᒃ ᐊᔪᐃᓐᓇᓯᑎᑲᓪᓚᒃ, ᐱᓇᓱᐊᖃᑎᒥᓂᒃ ᐊᔪᐃᓇᒍᑎᖃᓲᑦᓯᐊᖅ ᑐᖕᖓᓇᕐᑐᓯᐊᖑᑦᓱᓂᓗ ᑲᒪᔨᑦᓯᐊᕋᑕᖅ! ”
ᑲᑎᓚᐅᕐᓚᕗᑦ ᐄᑐᐊ ᔫᓐᔅ
“ ᖃᓅᖅ ᐱᒋᐊᕐᐸᐱᑦ ᐅᓪᓗᒋᔭᕐᓂ ᐱᓇᓱᕝᕕᓃᕕᑦ? ”
“ ᐱᒋᐊᕐᐸᐳᖓ ᑕᑯᒋᐊᕐᖄᓱᖓ ᐱᓇᓱᐊᕐᑕᐅᖁᔨᒍᑎᕐᑖᕆᓯᒪᓕᕐᑕᑎᓐᓂᒃ. ” ᐄᑐᐊ ᑕᑯᑎᑦᓯᔪᖅ ᓄᐊᒪᔪᓂᒃ ᓯᑯᑦᓴᔭᖁᑎᐅᔪᓂᒃ ᑎᒍᒥᐊᕐᑕᒋᔭᕐᒥᓂᒃ.
ᐱᓇᓱᐊᕐᑕᐅᖁᔨᒍᑏᑦ, ᑕᑕᕐᓴᑕᐅᕙᑦᑐᑦ ᑲᑎᕕᒃ ᐃᓕᓐᓂᐊᓕᕆᓂᕕᐅᑉ ᐱᓇᓱᑦᑎᖏᓐᓄᑦ, ᐱᔭᑦᓴᐅᔪᐃᑦ ᐱᓇᓱᐊᕐᑕᐅᒋᐊᖃᕐᓂᐊᓱᑎᓗ. ᑕᒪᒃᑯᐊ ᐱᓇᓱᐊᒐᑦᓴᖑᕐᑎᑕᐅᒪᔪᖅ ᓯᕗᓪᓕᐅᔭᐅᒐᑦᓴᐅᓂᖏᑦ ᓇᓗᓀᔭᕐᑕᐅᒋᐊᖃᓲᑦ, ᐊᕐᕿᓱᕐᑕᐅᒋᐊᓕᓐᓂᓗ ᑲᒪᔨᐅᒧᑦ, ᐄᑐᐊ ᓱᕐᖁᐃᓯᒋᐊᖃᕐᐸᑐᖅ ᓇᓪᓕᐊᖏᑦ ᓯᕗᓪᓕᐅᔭᐅᒋᐊᖃᕐᐸᓂᐊᕐᒪᖔᖔᑕ. ᓯᕗᓪᓕᐅᔭᐅᒋᐊᓖᑦ ᓄᑖᑦ ᐊᒥᓱᖕᖑᑐᐊᕐᒪᑕ, ᐄᑐᐊ ᓱᕐᖁᐃᓯᓇᓱᐊᓯᕙᑦᑐᑦ ᓇᓪᓕᐊᑦ ᐅᐃᒪᓇᕐᓂᐸᐅᒻᒪᖔᑕ ᐱᒻᒪᕆᐅᓂᕐᐸᐅᒪᖔᑕᓘᓐᓂ ᐱᓇᓱᐊᓚᖓᔪᓂᓗ ᐃᓂᓪᓚᑎᕆᓯᕙᑦᓱᓂ.
“ ᖃᓄᐃᑦᑐᔭᕐᓂᒃ ᐱᓇᓱᐊᕐᕕᖃᕐᐸᐱᑦ? ”
“ ᓱᓇᒐᓚᖃᐅᑎᒥᒃ ᐃᓪᓗᐊᔪᐊᑦᑐᓂᒃ, ᑎᑭᖁᔭᐅᒪᔪᓂᒃ ᐊᐅᓚᑦᓯᕙᑉᐸᐳᖓ ᐋᕐᕿᓱᐃᒍᑎᑦᓴᐅᓂᐊᕐᑐᓂᒃ. ᑭᖑᓂᖓᓂᒃ, ᐊᓯᓕᒫᖏᑦ ᐱᒻᒥᑎᓪᓗᒋᑦ… ”
“ᐊᓯᓕᒫᖏᑦ”
ᐄᑐᐊ ᐊᑕᐅᑦᓯᑰᑦᓯᔨᐅᕙᒻᒥᔪᒃ ᐃᓕᒌᒃ/ᐱᓇᓱᐊᖃᑎᒌᕝᐸᑐᓂᒃ ᒫᓐᓇᓯᐅᑎᐅᔪᓂᒃ ᐅᖄᓚᕕᒋᒍᓐᓇᑕᕐᒥᓂᒃ ᐱᓇᓱᐊᕐᑕᐅᒐᑦᓴᖁᑎᖃᓕᕈᓂ. ᓴᓇᑐᔫᒍᓐᓇᓂᖅ ᖃᖓᑐᐃᓐᓇᓗ ᐊᑐᐃᓐᓇᐅᓯᐊᕿᒍᓐᓇᓂᖅ ᐱᒻᒪᕆᐅᕗᖅ; ᐃᓚᖓᓂ ᐱᓇᓱᑦᑎᖏᑦ ᐃᒐᓓᔭᕐᑕᐅᒪᔪᓕᕆᓯᐊᕿᕙᑦᑐᑦ ᓱᒃᑯᒪᔪᓕᕆᓯᕙᑦᓱᑎᓘᓐᓃᑦ ᖃᐅᓕᕐᒥᒪᓗ ᓱᒃᑯᓇᕐᑐᓕᕆᓯᐊᕿᒍᓐᓇᓱᑎᒃ ᐆᑦᑐᕋᐅᑎᒋᓗᒍ ᓯᕐᒥᒃ ᐅᕐᓱᐊᓗᔭᒧᑦ/ᓱᒃᑯᓇᕐᑐᔭᒧᓘᓐᓃᑦ ᑯᕕᕕᓂᖅ, ᐅᕐᓱᐊᓗᔦᑦ, ᐊᑦᑕᓀᓐᓂᐹᑎᒍᑦ ᐊᕙᑎᑦᑎᓂᓗ ᐱᕕᓕᒫᑎᒍᑦ ᓴᓗᒪᓂᕐᐹᑎᒍᑦ.
“ ᐱᓇᓱᐊᕐᑐᖃᓕᕋᒥ ᓱᓇᒐᓚᖃᐅᑎᒥᒃ ᐃᓪᓗᔪᐊᒥᒃ, ᐊᑕᐅᓯᕐᒥᒃ ᐱᓇᓱᐊᑐᐃᓐᓇᓇᓲᒍᖕᖏᑐᖅ, ᓱᓇᓕᒫᑦᓯᐊᓂᒃ ᐱᓇᓱᐊᒋᐊᖃᕐᓇᒪᑦ. ᐱᒋᐊᓪᓚᕕᖃᕐᓇᖏᑦᑐᖅ ᓱᓇᓕᒫᑦᓯᐊᓕᕆᒋᐊᖃᕐᓇᐸᒻᒪᑦ. ”
“ ᐱᔭᑦᓴᓕᕋᑕᐅᕙᓗᑦᑐᖅ ᐊᑕᐅᓯᖅ! ”
“ ᓯᕗᓕᕗᑎᑦ ᐱᔭᑦᓴᓕᕋᑕᐅᔪᖅ ᐊᑕᐅᓯᖅ. ᑭᓯᐊᓂ ᐃᓪᓗᖁᑎᓕᒫᕗᖅ ᐃᓘᓐᓇᓯᐊᑎᒃ ᐊᑦᑕᓀᑦᑐᒦᑦᓯᐊᒋᐊᓖᑦ ᑐᖕᖓᓇᕐᑐᐃᓇᑦᓭᓇᕐᓗᑎᒃ ᐃᑎᕐᑐᓕᒫᓄᑦ. ᓂᕆᐅᑦᑐᒍᑦ ᐊᒥᓱᐃᑦ ᓄᓇᓕᓐᓂᒥᐅᑦ ᐱᓇᓱᒐᑦᓴᐅᔪᓂᒃ ᐱᓇᓱᒐᑦᓴᑖᒐᓱᐊᓛᒋᐊᖏᓐᓂᒃ ᓯᕗᓂᕐᒥᒃ. ”
ᐄᑐᐊ ᐱᓇᓱᒐᒋᔭᕐᒥᓂᒃ ᐱᒻᒪᕆᐅᓘᔪᖁᑎᓕᒃ ᐃᓅᓯᖓᓅᖓᑦᓯᐊᑎᑦᓱᒍᓗ ᐊᔪᐃᓐᓇᒍᑎᖃᕐᐸᓱᓂᓗ ᓱᓇᓕᒫᑦᓯᐊᑦ ᐊᐅᓚᑦᓯᐊᑎᓇᓱᐊᕐᓱᒋᑦ. ᐄᑐᐊ ᐱᓇᓱᐊᕐᐸᑕᒥᓂᒃ ᐅᐱᒍᓲᑎᓕᒻᒪᕆᒃ.
ᐊᑖᑕᒐ ᐃᑦᔪᐊᒐᑦᓴᖁᑎᒐ. ᓇᓗᕐᖁᑎᓇᕐᑐᑰᓕᕋᒪ ᓱᓇᑐᐃᓐᓇᓯᐊᒥᒃ, ᐃᒻᒥᓂᑦ ᐃᕐᙯᑎᑦᓯᒋᐊᕐᐸᑐᖓ ᐊᑖᑕᒐᓂᒃ ᖃᓄᕐᑑᖃᑎᖃᕐᑐᓴᐅᓕᒋᐊᕋᓂᒃ. ᐃᒫᙰᒋᐊᖃᑦᓴᖁᑎᖃᑐᐃᓐᓇᒋᐊᖃᕐᒪᑦ. ᓴᐳᒻᒥᔨᑦᓯᐊᒪᕆᐊᓗᑎᒋᓲᒋᒐᒃᑯ. ᐊᓪᓛᑦ, ᐃᓚᓕᒫᑦᓯᐊᑲ ᓴᐳᒻᒥᔨᑦᓯᐊᒪᕆᐊᓗᐃᓐᓀᑦ. ᓇᑯᓲᖅ ᐸᐸᑦᓯᔨᖃᑦᓯᐊᕈᓐᓇᒋᐊᖅ ᓴᐳᒻᒥᔨᑦᓯᐊᖃᕈᓐᓇᒋᐊᕐᓗ.
ᑲᑎᕕᒃ ᐃᓕᓐᓂᐊᓂᓕᕆᐅᑉ ᐃᓪᓗᖁᑎᓕᒫᖏᑦ ᓴᓇᒪᑦᓯᐊᖏᓐᓇᓂᐊᖁᓄᑦ, ᐃᓄᑦᔪᐊᑉ ᐊᕐᕿᓱᐃᔨᖁᑎᖏᑦ ᖃᐅᔨᓭᓐᓇᒋᐊᖃᕐᐸᑐᑦ ᓱᒃᑯᑐᖃᓕᕐᒪᖔ ᐅᓪᓗᑕᒫᑦ ᐊᑐᕐᑕᐅᒧᑦ.
“ ᐆᑦᑐᕋᐅᑎᒋᓗᒍ, ᓯᑕᒪᐅᔪᕐᑐᖅ ᐅᕐᓱᐊᓗᖃᐅᑏᑦ ᐃᓂᖏᑦ ᓱᒃᑯᖓᔪᕋᑕᐅᔪᑦ, ᒪᖕᖏᑐᐃᓐᓇᓕᕐᓱᑎᒃ ᐅᕐᓱᐊᓗᖃᐅᑏᑦ ᕿᔪᑦᑕᖏᓗ ᓱᕐᔪᓕᕐᓱᑎᒃ. ᐊᓯᑕᕐᑕᐅᒋᐊᓖᑦ ᐃᓘᓐᓇᓯᐊᑎᒃ. ”
ᐅᕐᓱᐊᓗᖃᐅᑎᒃ ᐃᓂᑦᓴᖏᑦ ᑕᐸᓀᑦᑐᑲᓪᓚᕋᑌᑦ; ᓴᕕᕋᔭᑦᓴᔮᓘᑦᓱᑎᒃ ᑭᑭᐊᒃᑐᑕᐅᓂᖃᒋᐊᖃᕐᓱᑎᒃ. ᐃᓂᑦᓴᖏᓐᓂ ᓱᕐᖁᐃᓯᒐᓱᐊᕐᓃᓗ ᐱᔭᕆᐊᑐᔫᒍᓐᓇᓱᑎᒃ, ᐱᓗᐊᕐᑐᒥ ᐊᖏᔪᕐᓚᐅᑎᐊᓗᓂᒃ ᐅᑭᐅᕐᑕᑐᒨᔦᒐᓱᐊᕐᑐᖃᓕᕋᒥ.
“ ᑲᒪᕙᑉᐲᑦ ᐅᕐᓱᐊᓗᑦᑕᓯᔭᐅᑦᑕᓂᖏᓐᓂᒃ? ” ᐊᐱᕆᔭᕋ
“ ᐊᐅᑲ, ᐊᓯᑦᑎᓂ ᑲᑉᐸᓂᐅᔪᒧᑦ ᑕᒪᓐᓇ ᑲᒪᒋᔭᐅᓲᖅ. ᐅᕐᓱᐊᓗᔭᖃᐅᑎᖃᕐᑐᐃᓐᓇᐅᒻᒪᑕ ᐃᓪᓗᖁᑎᓕᒪᕗᑦ, ᓄᑕᐅᓯᓖᖏᓐᓇᓯᐊᓲᖑᑦᓱᑕᓗ ᐊᓪᓚᓯᒪᔪᕐᑎᒍᑦ ᐅᕐᓱᐊᓗᐃᕈᖁᔨᖕᖏᒧᑦ. ”
ᐄᑐᐊ ᐅᖃᐅᑏᔪᖅ ᐱᖓᓱᓪᓗᑐᐊᓗᐃᑦ ᐃᓪᓗᐃᑦ ᐊᑕᐅᑦᓯᑯᑦ ᖁᐊᕐᑐᕕᓂᐅᒋᐊᖏᓐᓂᒃ ᐅᑭᐅᖑᑎᓪᓗᒍ, ᑐᕐᓱᐊᖁᑎᖏᑦ/ᓱᓪᓗᓕᖏᑦ ᓯᒃᑭᓚᕿᑦᓱᑎᒃ ᐱᓇᓱᐊᕐᑕᐅᒪᕆᓚᕿᑦᓱᑎᒃ. ᓱᒨᑦ ᑌᒣᑦᑐᑰᓚᕿᓐᓂᖃᑦ? ᐃᑑᐊᑉ ᐊᓪᓚᓯᒪᖁᑎᖏᑦ ᐸᓯᔭᑦᓴᐅᖏᑦᑐᑦ! ᐅᕐᓱᐊᓗᔭᕐᑕᓯᔭᐅᔪᐃᑦᑐᕕᓂᐅᑐᐃᓐᓇᑐᑦ ᐅᕐᓱᐊᓗᔭᕐᑕᓰᔨᐅᓲᓄᑦ.
“ ᐊᐅᓚᕐᖃᔭᖏᑕᒋᔭᖃᕐᐸᒐᑦᑕ ᐃᓚᖏᓐᓂᒃ, ᐱᓇᓱᑦᑕᐅᒋᐊᓕᓕᒫᓂᓗ ᓱᕐᕃᓂᖃᕈᓐᓇᓱᑎᓗ. ᐅᐱᓐᓇᕋᓂ ᑲᒪᒋᒐᑦᓴᖃᒋᐊᖃᕐᓂᒃ ᐱᒻᒪᕆᐅᓘᓚᕿᕗᖅ. ”
ᓱᒃᑯᐊᑎᕐᑕᐅᑎᑦᓯᑌᓕᓂᖅ/ᐃᑖᕐᑕᐅᑎᑦᓯᑌᓕᓂᖅ
ᖃᐅᔨᓴᕐᓭᓇᒋᐊᖃᕐᐸᑐᑦ ᐅᓐᓄᐊᒥᒃ ᐃᓄᓕᒻᒥ ᓱᒃᑯᐊᑎᕐᑕᐅᖁᔨᖕᖏᒧᑦ ᐃᓪᓗᓕᒫᑦᑎᓂᒃ ᐱᓗᐊᕐᑐᒥᒃ ᓇᔪᕐᑕᐅᒪᖕᖏᑐᑦ ᐃᓪᓗᐃᑦ. ᐊᐅᔭᐅᓂᖓᓂ, ᐃᓚᖏᑦ ᐃᓪᓗᐃᑦ ᐅᕕᒐᕐᑐᓄᑦ ᓇᔪᕐᑕᐅᒐᔪᓯᓲᖑᒻᒪᑕ, ᐃᑐᐊᓗ ᑕᒪᑐᒥᖓ ᐃᑉᐱᒋᔭᒐᖃᑦᓯᐊᒪᕆᒋᐊᖃᓲᖅ. ᐃᓄᐃᑦ ᓱᒃᑯᐃᑎᕆᖃᑦᑕᓯᒪᒻᒪᑕ ᐃᑖᖃᑦᑕᓯᒪᒻᒪᑕ ᑲᑎᕕᒃ ᐃᓕᓐᓂᐊᓂᓕᕆᓂᓕᐅᑉ ᐃᓪᓗᖁᑎᖏᓐᓂ/ᐱᐅᓕᓂᐊᒐᖁᑎᖏᓐᓂᒃ ᐃᒐᓓᔦᓂᑎᒍᑦ ᐊᑭᓐᓇᖏᓐᓂᓗ ᒥᖑᐊᖑᕕᖃᕐᓂᑎᒍᑦ.
“ ᐃᓚᓐᓂ, ᐃᓄᐃᑦ ᐱᑦᓯᐊᕕᖃᒐᓱᐊᒋᐊᕐᒥᓂᒃ ᓇᓗᓲᑦ. ”
ᑕᒪᓐᓇ ᓇᓗᓇᕐᑑᑰᒍᑎᒋᓲᖓᑦ ᐱᓇᓱᒐᕐᒥᑎᒍᑦ, ᒐᓗᐊᕐᑐᓗᒍᓗ, ᐅᖑᕆᒍᑎᐅᒍᓐᓇᑐᓂᒃ ᐊᑑᑏᓐᓇᒐᓱᐊᕐᐸᑐᖅ, ᓂᕆᐅᓂᖃᒐᓱᐊᕐᓱᓂ ᐅᕕᒐᕐᑐᐃᑦ ᐱᐅᔪᔭᐅᓂᕐᓴᑯᑦ ᐊᕐᖁᓵᕐᑎᓇᓱᐊᕐᓱᒋᑦ.
ᐊᑦᓱᕈᐊᓪᓚᕈᑎᐅᓲᓕᒫᓂᒥᒃ ᓵᖕᖓᓯᕙᒃᑲᓗᐊᕐᓱᓂ, ᐄᑐᐊ ᑲᑦᓱᙰᑐᓯᐊᖑᑦᓯᐊᑐᐃᓐᓇᓲᖅ. ᐱᓇᓱᒐᕐᒥᓂᑎᒍᑦ ᓄᓇᓕᒻᒥᓂᒃ ᐃᑲᔪᕐᓯᓂᖃᒐᓱᐊᕐᐸᑐᖅ ᓇᐅᓕᒫᓂᓗ ᐊᑦᑕᓀᕐᑐᒦᑦᑎᓯᒐᓱᐊᕐᓂᒥᓂᑎᒍᑦ. ᐅᐃᒪᔭᕐᑎᐅᒐᓂ ᓵᖕᖓᓯᒍᓐᓇᓲᑦ ᑕᐸᓀᑦᑐᑰᓇᕐᑐᓂᒃ ᖃᓄᐃᑦᔪᑎᐅᔪᓂᒃ ᑕᒪᓐᓇᓗ ᐱᐅᓯᖓᑦ ᐃᑦᔪᐊᒍᒥᓇᓪᓚᕆᑦᓱᓂ. ᐃᓕᑦᓯᒍᑎᒋᓚᐅᓚᕗᑦ ᑖᓐᓇ ᐱᓇᓱᑦᑎᓯᐊᒻᒪᕆᐅᓗᒃ ᐱᓪᓗᒍ ᐊᔪᐃᓐᓇᓂᕆᓲᖓᑦ ᑲᔪᓯᐅᒐᕐᓂᕆᓲᖓᓗ ᐱᓇᓱᐊᕐᑕᖓᑦ ᐱᔭᕆᖕᖏᓂᓕᒫᖓᓂᒃ.
ᐱᓇᓱᑦᑐᓴᕐᓯᐅᐳᒍᑦ! ᐱᓇᓱᐊᖃᒌᑦᑐᓄᑦ ᐃᓚᐅᒋᑦ ᐅᕙᑦᑎᓄᑦ ᐱᓇᓱᒐᕐᒧᑦ ᐃᓕᒐᓱᐊᕈᑎᓕᐅᕐᓗᑎᓗ ᐅᓪᓗᒥ.
ᐃᓕᒐᓱᐊᕆᑦ ᒫᓐᓇ ➔