ᐃᑉᐸᓴᖅ, ᑯᐯᒃᑯᑦ ᑲᕙᒪᒃᑯᖏᑦ ᖃᐅᔨᑎᑦᓯᓚᐅᕐᑐᑦ ᓄᑲᒃᓯᓂᑦ ᐃᓕᓴᕐᕕᖏᑦ ᐊᒻᒪᓗ ᐯᕆᑦᓯᕖᑦ ᐅᒃᑯᐃᑕᐅᒋᐊᓪᓚᖁᑦᓱᒋᑦ ᒣ 11-ᒍᓕᕐᐸᑦ ( ᒪᓐᑐᔨᐊᓪ ᓯᓚᑖᓂᑦ) ᐊᒻᒪᓗ ᒣ 19-ᒍᓕᕐᐸᑦ (ᒪᓐᑐᔨᐊᓪ). ᓄᓇᕕᒻᒥ, ᐃᓕᓴᕐᕕᓕᒫᑦ ᐊᒻᒪᓗ ᐃᓄᒻᒪᕇᑦ ᐃᓕᓴᕐᕕᓕᒫᖏᑦ ᐱᒍᑦᔨᕕᓕᒫᖏᑦ ᐅᒃᑯᐊᓯᒣᓐᓇᓚᖓᔪᑦ ᐃᓕᓴᕐᓇᐅᓕᕐᒥᐸᑦ ᐊᕐᕌᒎᓛᕐᑐᖅ ᑎᑭᒐᑕᓪᓗᒍ.

ᑐᑭᑖᕆᔭᐅᔪᑦ ᑭᒡᒐᑐᕐᑎᓄᑦ ᑲᑎᖕᖓᔨᓄᑦ ᒫᕆ 24-ᒍᑎᓪᓗᒍ ᒪᓂᔭᐅᑦᓱᓂ ᐃᓕᓴᕐᕕᑕ ᐊᕐᕌᒍᖓ ᐃᓱᓕᑎᓪᓗᒍ ᒣ 29-ᒥᑦ. ᑕᒪᓐᓇ ᐃᓱᒪᒋᑦᓱᒍ ᐊᑑᑎᔭᐅᔪᑦ ᓄᓇᕕᒻᒥᑦ, ᐃᓕᓴᕐᓇᐅᑉ ᐊᕐᕌᒍᖓ ᐃᓱᓕᑦᑎᓗᒍ ᒣ 29-ᒍᑎᓪᓗᒍ. ᐊᒥᓱᒻᒪᕇᑦ ᐃᓕᓭᔨᖁᑎᕗᑦ ᐊᒻᒪᓗ ᐱᓇᓱᑦᑎᕗᑦ ᐱᓯᒪᒻᒪᑕ ᓄᓇᕕᐅᑉ ᓯᓚᑖᓂᑦ ᐊᒻᒪᓗ ᐊᓃᑦᑌᓕᒋᐊᖃᒐᔭᕐᓱᑎᒃ ᐅᓪᓗᓂᑦ 14-ᓂᑦ ᑎᑭᑐᐊᕈᑎᒃ, ᐱᕕᖃᒐᔭᖕᖏᑐᑦ ᐃᓕᓴᕐᕖᑦ ᐅᒃᑯᐃᑕᐅᒐᓗᐊᕐᐸᑕ ᒣ-ᒥᑦ.

ᐅᑎᕐᑎᖔᑦᔭᒍᓐᓀᓗᒋᑦ ᐃᓘᓐᓇᑎᒃ ᓄᓇᕕᒻᒧᑦ ᐱᓇᓱᐊᕈᓯᕐᓂᑦ ᐱᖓᓱᓂᑦ, ᑭᒡᒐᑐᕐᑏᑦ ᑐᑭᑖᕐᑐᕕᓂᐅᕗᑦ ᐃᑉᐱᒋᔭᑐᐊᖃᒍᒪᑦᓱᑎᒃ ᐱᕕᑦᓴᑖᕐᕕᐅᒍᓐᓇᑐᓂᑦ ᐊᒻᒪᓗ ᐊᔪᐃᓐᓇᓂᕐᒥᑦ ᐸᕐᓇᓂᕐᒥᑦ ᐃᓕᓴᕐᓇᐅᓕᕐᒥᐸᑦ ᐊᕐᕌᒍᖓᓂᑦ. ᓴᐳᒻᒥᓂᑦ ᐃᓕᓵᓂᑦ ᒪᓂᔭᐅᒋᕗᒃ ᐃᓕᑕᕆᔭᐅᒍᑎᖓᒍᑦ ᐊᒻᒪᓗ ᐱᕙᓪᓕᐊᑎᑦᓯᓂᕐᒥᑦ ᐃᓕᓴᐅᑎᓂᑦ ᐱᕕᑦᓴᑖᕐᕕᐅᒍᓐᓇᑐᓂᑦ ᐊᑐᕐᑕᐅᒍᓐᓇᑐᓂᑦ ᐊᓂᕐᕋᒥᑕ ᐃᓗᐊᓂ, ᐃᓚᒌᑎᒍᓪᓗ ᐋᕐᕿᓯᒪᓂᐊᕐᓗᑎᒃ.

ᐁᕆᓕ 15-ᒥᑦ, ᐃᓕᓴᕐᓂᓕᕆᓂᖅ ᓄᐃᑦᓯᔪᕕᓂᐅᕗᒃ ᓄᓇᕕᒃ-ᐃᓕᓴᕐᓂᑎᒍᑦ ᑐᖕᖓᕕᖓᑎᒍᑦ ᐃᓕᓴᕐᓂᒥᑦ, ᖃᕆᑕᐅᔭᕐᑎᒍᑦ ᐱᑐᕝᕕᐅᒍᓐᓇᑐᖅ ᐃᓕᓴᕐᓂᑎᒍᑦ ᐱᕕᑦᓴᑖᕕᐅᒍᓐᓇᑐᓂᑦ ᐃᓄᑦᑎᑐᑦ, ᐅᐃᒍᐃᑎᑐᑦ, ᖃᓪᓗᓈᕐᑎᑐᓪᓗ. ᐃᓕᓴᕐᓂᓕᕆᓂᖅ ᒪᓂᔨᓚᖓᕗᒃ ᒣᑉ ᐱᓇᓱᐊᕈᓯᖓᑕ ᓯᕗᓪᓕᐹᖓᓂᑦ ᐃᒫᙰᒍᑎᓂᑦ ᐃᓕᓴᐅᑎᓂᑦ ᐳᕐᑐᓂᕐᓴᒦᑦᑐᓄᑦ ᐃᓕᓵᓄᑦ ᐸᕐᓇᓯᒪᔪᓄᑦ ᐃᓕᓴᕐᕕᔪᐊᒧᑦ ᐊᕐᕌᒎᓕᕐᒥᐸᑦ. ᐃᒫᙰᕐᑕᐅᓯᒪᔪᑦ ᐃᓕᓵᑦ ᒪᓂᔭᐅᓚᖓᔪᑦ ᐃᓕᓴᕐᓂᑎᒍᑦ ᐊᕐᖁᑎᑦᓴᖓᓂᑦ, ᑐᑭᒧᐊᕐᑎᑕᐅᓗᑎᒃ ᐊᒻᒪᓗ ᓴᐳᒻᒥᔭᐅᓗᑎᒃ ᑭᖕᖒᒪᒋᔭᖏᑦᑎᒍᑦ ᒪᓕᓪᓗᒋᑦ. ᑖᓐᓇ ᐃᓕᓴᐅᑎᒃ ᐊᑐᓕᕐᑎᑕᐅᓚᖓᔪᖅ ᐃᓚᒋᔭᐅᑎᓪᓗᒋᑦ ᐃᓕᓴᕐᓂᓕᕆᓂᑦᑕ ᐊᐅᓚᑦᓯᔨᖏᓐᓂᑦ ᐊᒻᒪᓗ ᐃᓕᓭᔨᓂᑦ ᐊᒻᒪᓗ ᐱᓇᓱᖃᑎᖃᕐᓂᒥᑦ Frontier ᐃᓕᓴᕐᕕᔪᐊᑉ ᐃᒻᒥᒎᓈᕐᑎᑎᒍᑦ ᐃᓕᑦᓯᑎᑦᓯᓲᑦ.

ᐊᐅᓚᑦᓯᓂᓕᕆᕖᑦ ᐊᓪᓚᕖᑦ ᐅᒃᑯᐃᖔᕐᑐᑦ. ᐱᓇᓱᑦᑏᑦ ᑕᒪᒃᑯᓂᖓ ᐊᓪᓚᕕᓂ ᐊᓂᕐᕋᒦᑦᓱᑎᒃ ᐱᓇᓱᐊᕐᑐᑦ. ᐃᓕᓐᓂᐊᕖᑦ ᐊᒻᒪᓗ ᐃᓄᒻᒪᕇᑦ ᐃᓕᓐᓂᐊᕕᖏᑦᑕ ᐊᐅᓚᑦᓯᔨᖏᑦ ᐊᓂᕐᕋᒦᑦᓱᑎᒃ ᐱᓇᓱᐊᕐᑐᑦ ᒫᓐᓇ ᐊᒻᒪᓗ ᐱᓇᓱᐊᕐᓱᑎᒃ ᐱᓇᓱᐊᕆᐊᓕᒻᒥᓂᒃ ᐱᓇᓱᒐᕐᒥᓂᒃ ᐅᐃᒪᓇᕐᑐᒐᓚᓐᓂᒃ ᐊᒻᒪᓗ ᐱᒍᑦᔭᐅᒋᐊᓕᓐᓂᒃ ᐱᒍᑦᔨᓱᑎᒃ.