ᐅᖃᐅᓰᑦ ᓇᓗᓀᒃᑯᑌᓪᓗ ᑲᑎᖕᖓᓂᖏᑦ: ᐋᓚᓯ ᓴᑭᐊᒐᐅᑉ ᐃᓕᓐᓂᐊᑎᑦᓯᔨᐅᓂᖓᑕ ᐊᕐᖁᑎᖓ

ᐅᕙᑦᑎᓄᑦ ᐃᓚᐅᒋᑦᓯ ᓄᐃᑕᑎᑦᓯᒋᐊᓪᓛᑎᓪᓗᑕ ᐱᓇᓱᑦᑎᓯᐊᓪᓚᕆᐊᓗᕗᓐᓂᑦ ᐊᕗᖔᓗᑐᐃᓐᓇᖅ ᐃᓚᐅᓲᒥᒃ ᐃᑲᔪᕐᓯᓂᒃᑯᑦ ᐃᓕᓐᓂᐊᑎᓂᑦ ᐱᔭᕇᒍᓐᓇᓯᖁᔨᒧᑦ ᐊᕗᖓᒋᐊᓪᓚᖅ. ᐅᓪᓗᒥ ᐅᐱᒍᓱᒃᑯᒍᑦ ᐋᓚᓯ ᓴᑭᐊᒐᕐᒥᒃ ᑲᖏᕐᓱᔪᐊᒥᐅᒥᒃ, ᐱᔭᕇᕈᑎᑖᕐᓯᒪᔪᖅ ᐊᒡᒐᑯᑦ ᐅᖄᒍᓯᕐᓂᒃ ᐃᓕᓐᓂᐊᑎᑦᓯᔨ ᐊᑦᔨᐅᖏᑦᑐᒥᒃ ᐱᔪᓐᓇᓂᖃᕐᓱᓂ ᐃᑲᔪᕐᓯᓲᖅ ᐃᓂᖃᕐᑎᓯᑦᓯᐊᓱᓂ ᑭᓇᑐᐃᓐᓇᓕᒫᒃᑯᓂ ᐃᓕᑦᓯᖁᔨᒐᒥ ᓯᓚᕐᖃᑎᒥᓂ ᐊᒻᒪᓗ ᓇᓗᖕᖏᓯᐊᕐᓗᓂ ᐃᓕᓐᓂᐊᑎᓕᒫᑦ ᐃᓘᓐᓇᑎᒃ ᐱᔭᕇᕈᓐᓇᓯᓂᕐᒥᒃ ᐃᓂᖃᕐᒪᑕ.

ᐃᓅᓯᖅ ᐃᓕᓐᓂᐊᑎᑦᓯᔨᐅᓂᖓ ᑲᖏᕐᓱᔪᐊᒥ

ᐃᓚᖓ ᑲᑎᕕᒃ ᐃᓕᓴᕐᓂᓕᕆᓂᖅ 1989 ᒥᓂᑦ,ᐃᓕᓐᓂᐊᑎᑦᓯᔨ ᐋᓚᓯ ᐃᓚᐅᓕᕐᖁᖅ ᖁᓖᑦ ᐊᕐᕌᒍᒋᐊᓪᓓᑦ ᐅᖓᑖᓄᐊᓗᒃ ᐊᔭᐅᕐᓱᓂ ᐃᓕᓐᓂᐊᑎᓂᑦ ᐊᕐᓴᓂᖅ ᐃᓕᓐᓂᐊᕕᖓᓂ ᑲᖏᕐᓱᔪᐊᒥ. ᖃᐅᔨᒪᔭᐅᑦᓯᐊᓱᓂ ᑐᓂᒪᓪᓚᕆᓐᓂᖓ ᐊᒻᒪᓗ ᐊᑦᔨᐅᖏᑦᑐᒥᒃ ᐃᓕᓐᓂᐊᑎᑦᓯᒍᓐᓇᐅᓯᖓ ᐅᖄᓂᒃᑯᑦ ᐊᒡᒐᒥᓄᑦ ᐊᒻᒪᓗ ᐅᖃᐅᓯᑐᐃᓐᓇᒥᓄᑦ,ᐋᓚᓯᐅᑉ ᐊᕐᖁᑎᖓ ᑕᑯᒋᐊᓪᓛᓇᕐᖁᖅ ᑐᓂᒪᓪᓚᕆᒻᒪᑦ ᐊᒥᓱᐃᓕᖓᔪᓄᑦ,ᐃᓄᑦᓯᐊᓚᕆᐊᓘᑦᓱᓂᓗ ᐊᒻᒪᓗ ᓄᑭᒋᔭᐅᖃᑎᐅᑦᓱᓂ ᑐᓴᐅᒪᖃᑎᒌᑦᓯᐊᓂᒃᑯᑦ.

ᐃᓕᓐᓂᐊᑎᑦᓯᔨᐅᒋᐊᖕᖓᓕᕐᓱᓂ ᐋᓚᓯ ᐃᓕᓐᓂᐊᑎᑦᓯᕙᑦᑐᕕᓂᖅ ᐃᓕᓐᓂᐊᕆᐊᖕᖓᑐᓂ ᑲᔪᓯᒋᐊᓚᐅᕋᓂ ᐱᒍᒪᓪᓚᕆᓯᒪᔭᒥᓂᒃ ᐱᓇᓱᑦᑎᐅᓂᕐᒥᒃ ᑐᓵᖕᖏᑐᓄᑦ ᐃᓕᓐᓂᐊᑎᓄᑦ. ᑖᓐᓇ ᐱᒍᒪᓯᒪᔭᖓ ᑐᓂᓯᒪᕕᒋᒐᒥᐅᒃ ᐊᓱᐃᓛ ᐱᔭᕇᓕᕐᓂᖁᖅ ᐱᒋᐅᕐᓴᓂᕐᒥᒃ ᐊᒡᒐᑯᑦ ᐅᖄᒍᓐᓇᓂᕐᒥᒃ ᐃᓕᓐᓂᐊᑎᑕᐅᓂᕐᒥᒃ,ᐱᔭᕇᕈᓯᕐᑕᐅᓕᓚᐅᕐᓯᒪᔪᖅ 2004 ᖑᑎᓪᓗᒍ,ᒫᓐᓇ ᐱᔭᕇᕈᑎᖃᓕᕐᖁᖅ ᐊᒡᒐᒥᑎᒍᑦ ᐅᖄᓗᓂ ᐃᓕᓐᓂᐊᑎᓯᔨᐅᒍᓐᓇᓕᕐᑐᖅ ᐊᒻᒪᓗ ᑐᓵᔨᐅᓗᓂ. ᐅᑎᕐᑐᕕᓂᐅᓕᕋᓗᐊᕋᒥ ᐃᓕᓐᓂᐊᑎᓄᑦ ᑐᓵᑦᓯᐊᑐᓄᑦ ᑲᔪᓯᖏᓐᓇᓚᐅᔪᖅ ᐃᓕᓐᓂᐊᑎᑦᓯᖃᑦᑕᓚᖓᒋᐊᒥᓂ ᐃᓕᓐᓂᐊᑎᒥᓂᒃ ᐅᖄᒍᓐᓇᓯᖁᔨᓗᓂ ᐊᒡᒐᖏᓐᓄᑦ- ᑖᓐᓇ ᐃᓱᒣᓐᓇᖅ ᐊᑑᑎᖃᕐᒥᔪᖅ ᐃᓕᑦᓯᓯᕇᑦᑑᓂᕐᓴᓄᑦ ᐃᑲᔪᕐᓯᓯᒪᓪᓚᕆᒻᒥᒪᑦ ᐃᓕᑦᓯᒋᐊᒥᒃ ᐊᒻᒪᓗ ᐃᓕᓐᓂᐊᑎᓂᑦ ᖃᐅᔨᓴᕈᓐᓇᓯᑎᑦᓯᓯᒪᑦᓱᓂ ᐊᑦᔨᒌᖕᖏᑐᓂᑦ ᐅᖃᐅᓯᕐᓂᒃ ᐃᓚᐅᒻᒥᔪᑦ ᐃᓄᒃᑎᑐᑦ ᐊᒻᒪᓗ ᖃᓪᓗᓈᑎᑐᑦ.

ᐊᕗᖓᒋᐊᓪᓚᖅ ᐊᑦᑐᓯᓂᕆᔭᐅᕙᑦᑐᑦ ᐊᒻᒪᓗ ᓯᕗᓂᕐᒧᑦ ᑐᕌᒉᑦ

ᐋᓚᓯᐅᑉ ᑐᓂᒪᓂᖓ ᐃᓕᓐᓂᐊᑎᑦᓯᓂᕐᒧᑦ ᐃᒻᒥᒍᑦ ᐱᒻᒪᕆᐅᑎᓪᓚᕆᒃᑲᐅᒃ. ᒫᓐᓇ ᐃᓕᓐᓂᐊᑎᑦᓯᓲᖑᓕᕐᑐᖅ 1990 ᒥ ᐃᓕᓐᓂᐊᑎᒋᐊᖕᖓᓚᐅᓯᒪᔭᒥᑦᑕ ᕿᑐᕐᖓᖏᓐᓂᑦ ,ᓴᓇᒪᔪᖅ ᑕᒐ ᑫᕙᓪᓚᕇᑦᓯᐊᓱᓂ ᐊᑦᑐᐃᓯᒪᓂᖓ. ᑌᒪᖕᖓᑦ ᐃᓕᓐᓂᐊᑎᒥᓂᒃ ᐊᐱᕐᓲᔭᓲᖅ ᓱᓇᒥ ᐅᓪᓗᒥ ᐃᓕᑦᓯᑫᓐᓇᒪᖔᑕ,ᑲᔪᖏᕐᓴᓱᒋᓪᓗ ᐃᓗᕐᕈᓯᒥᓂᒃ ᑕᑯᓐᓇᓯᐊᖁᑦᓱᒋᑦ ᐱᕈᑦᓯᐊᓗᑎᓗ.ᐃᓕᓐᓂᐊᑎᑦᓯᒍᓯᖓ ᑐᕌᖓᓂᖃᕐᖁᖅ ᐃᓄᑦᓯᐊᖑᓂᕐᒥᒃ,ᐃᓕᒌᑦᓯᐊᓂᕐᒥᒃ ᐊᒻᒪᓗ ᐃᒻᒥᓂ ᐱᒍᓐᓇᓯᐊᕐᓂᒥᒃ.

ᑕᒐᓖ ᓯᕗᓂᕐᒥ ᐊᓛᓯ ᓱᓛᓯᒋᕙ? ᒪᕐᕈᐃᓇᐅᓕᕐᑑᒃ ᐱᔭᕇᒋᐊᓕᖏᑦ ᐱᔭᕇᕈᑎᑖᕈᓐᓇᐅᑎᑦᓴᖏᑦ bachelor’s degree ᒥ.

ᐃᓱᒪᓕᕇᕐᑐᓕ ᓱᓇᒥᒃ ᐊᓪᓗᕆᐊᓛᕐᓂᒥᓂᒃ- ᐱᒋᐅᕐᓴᕆᐊᓪᓛᓂᕐᒥᒃ,ᐃᓕᓐᓂᐊᑎᑦᓯᒋᐊᓪᓛᓂᕐᒥᒃ. “ᐅᑕᕐᕿᖃᓪᓚᑐᐃᓐᓇᓚᖓᑦᔭᖏᓪᓚᖓ 65 ᑖᕐᓗᖓ ᓄᕐᖃᓂᕐᒥᒃ” ᐃᔪᕐᓱᓂ ᓚᔪᖅ “ᑎᒥᒐ ᐱᖁᔨᑉᐸᑦ,ᐱᓇᓱᓛᕐᖁᖓ 90 ᖃᓕᕋᑕᕐᓗᖓ!” ᑕᑕᑦᑐᖅ ᓂᒪᒍᒪᑦᓯᐊᓂᕐᒧᑦ,ᖃᐅᔨᒪᒍᒪᑦᓯᐊᓂᕐᒧᑦ ᐊᒻᒪᓗ ᓇᓪᓕᒍᓱᓐᓂᒧᑦ ᐃᓕᓐᓂᐊᑎᒥᓂᒃ,ᐋᓚᓯᐅᑉ ᐊᕐᖁᑎᖓ ᓱᓕ ᓈᓂᐅᔭᑦᔭᖏᓪᓚᖅ- ᐊᒻᒪᓗ ᖃᕆᐊᖓ ᐊᓕᐊᒋᔭᐅᓂᕐᐸᐅᖏᓐᓇᓱᓂ ᐅᐸᒋᐊᖓ. ᓇᑯᕐᒦᒃ ᐋᓚᓰ ᐅᓂᒃᑳᕈᓐᓇᓚᐅᕋᕕᑦ ᐅᕙᑦᑎᓄᑦ!

ᐃᓕᓐᓂᐊᑎᑦᓯᓂᖅ ᐱᒻᒪᕆᐅᕗᖅ ᐊᒻᒪᓗ ᑐᑭᖃᑦᓯᐊᓱᓂ ᐱᓇᓱᒐᕆᑦᓱᒍ,ᓄᓇᕕᒻᒥᓗᐊᖕᖑᐊᖅ ᐊᑦᑐᐃᓯᒪᓪᓚᕆᓲᖅ ᐃᓕᓐᓂᐊᑎᓂᑦ,ᐃᓚᒌᓂᑦ ᐊᒻᒪᓗ ᓄᓇᓕᒻᒥ. ᐃᓕᓐᓂᐊᑎᑦᓯᔩᑦ ᑕᑯᓐᓇᓱᒋᑦ ᐃᓚᐅᒍᒪᓕᕐᓂᕈᕕᑦ ᐃᓚᐅᒐᓱᒍᓐᓇᓯᐊᕐᖁᑎᑦ ᐃᓕᓐᓂᐊᑎᑦᓯᔨᖕᖑᓂᕐᒥᒃ.

ᐃᓕᓐᓂᐊᑎᑦᓯᔨᐅᑉ ᐃᓂᖏᑦ ᐅᒃᑯᐃᖔᕐᑐᑦ ᐊᒻᒪᓗ ᐱᔪᒥᓇᕐᑐᓂᑦ ᑮᓇᐅᑦᔭᓴᕐᓱᓂ!

ᐃᓕᒐᓱᒍᓐᓇᖁᑎᑦ ᐅᓪᓗᒥ ᐃᓚᐅᓯᓗᑎᓪᓗ ᐱᓇᓱᑦᑎᐅᖃᑎᑦᑎᓄᒃ.

ᐃᓕᒐᓱᐊᕆᑦ ᒫᓐᓇ ➔

ᑐᓴᕋᑦᓴᓕᕆᓂᕐᒥ ᐱᕙᓪᓕᖁᑏᑦ ➔