ᒑᑎᓅ (ᓇᑦᓯᐊᓕᐅᑦ 15, 2018) – ᓯᑕᒪᖓᓐᓂᐅᑎᓪᓗᒍ ᓇᑦᓯᐊᓕᐅᑦ 8-ᒥ, ᕿᑦᑌᖓᔮᕈᑎᓕᒻᒪᕆᐅᓚᐅᕐᑐᑦ ᐃᓕᓐᓂᐊᑏᑦ ᐅᓪᓗᕆᐊᖅ ᐃᓕᓐᓂᐊᕕᒻᒥ ᑲᖏᕐᓱᐊᓗᒃᔪᐊᒥ, ᓄᓇᕕᒻᒥ, ᑐᖕᖓᓱᑦᑎᓯᑦᓱᑎᒃ ᒑᑎᓅ-ᒥᐅᖑᑦᓱᑎᒃ ᖄᖏᕐᓂᑯᓕᐅᕐᑎᐅᒐᑎᒃ I Love First Peoples-ᑯᓐᓂᒃ ᐅᓪᓗᓕᒫᕐᑐᒥᒃ ᐃᓕᓐᓂᐊᕕᒻᒥ ᖁᕕᐊᓱᒍᑎᖃᕐᑎᓗᒋᑦ.

ᐅᑭᐊᖑᓚᐅᔪᔪᒥ, I Love First Peoples-ᑯᑦ ᑲᑎᕐᓱᐃᓚᐅᔪᕗᑦ 10,000 ᐅᖓᑖᓃᑦᑐᓂᒃ ᑲᒥᖃᐅᑎᕕᓂᕐᓂᒃ ᑐᓂᕐᕈᑎᓂᒃ-ᑕᑕᑦᑐᓂᒃ, ᐊᒥᓱᑦ ᑖᒃᑯᐊ ᐃᓗᓪᓕᑐᕐᑕᐅᓯᒪᔪᑦ ᐃᓕᓐᓂᐊᑎᓄᑦ ᐃᓕᓐᓂᐊᕕᒻᒥᓃᑦᑐᓄᑦ ᖃᓪᓗᓈᓃᑦᑐᓂᑦ, ᐁᑦᑐᑑᑎᐅᓛᕐᑎᓗᒋᑦ ᐅᐸᒋᐊᑐᔪᕐᒥᐅᓄᑦ ᐅᐸᒋᐊᑐᔪᒐᓚᒻᒥᐅᓄᓪᓗ ᓄᓇᖃᕐᖄᓯᒪᔪᑦ ᓄᓇᓕᖏᓐᓂᑦ ᑲᓇᑕᓕᒫᒥ ᑕᕐᕿᓂᑦ ᓇᑦᓯᐊᓕᐅᒻᒥᑦ ᓄᕐᕋᓕᐅᕐᕕᒧᑦ 2018-ᒥ.

“ᒪᑐᐃᕐᑎᕆᓕᕋᒥᒃ ᑲᒥᖃᐅᑎᕕᓂᕐᓂᒃ ᐁᑦᑑᓯᐊᕐᑕᓕᓐᓂᒃ, ᐃᓕᓐᓂᐊᑏᑦ ᐅᓪᓗᕆᐊᖅ ᐃᓕᓐᓂᐊᕕᒻᒥ ᖁᕕᐊᒋᔭᓕᒻᒪᕆᐅᓚᐅᕐᑐᑦ ᑕᑯᒋᐊᒥᒃ ᐊᑦᔨᖑᐊᓂᒃ ᑕᕐᕋᓕᔮᓂᓪᓗ ᑐᔫᓯᐊᕐᒥᓂᑦ. ᐃᑉᐱᒋᔭᖃᓪᓗᑐᓚᐅᕐᑐᑦ ᐊᑦᑐᑕᐅᒍᑎᓂᒃ ᑖᑦᓱᒪ ᐃᓚᓐᓈᕇᓐᓂᑯᑦ ᐊᐅᓚᑦᔭᕆᐊᕐᓂᐅᑉ ᓄᐃᑕᖏᓐᓂᒃ,” ᐅᖃᕐᑐᖅ ᔫᓭ ᓘᓯᒃᓇᓐ, ᐊᖓᔪᕐᖄᖅ ᐊᒻᒪᓗ ᓄᐃᑦᓯᖃᑎᐅᓯᒪᔪᖅ ᑖᑦᓱᒥᖓ I Love First Peoples-ᒥᒃ. ᐃᓕᓐᓂᐊᑏᑦ ᑲᒥᖃᐅᑎᕕᓂᕐᓂᒃ ᐴᕐᑐᐃᓚᐅᔪᕕᓃᑦ ᐃᓕᓐᓂᐊᓲᑦ St. Edmunds ᐳᒃᑭᓂᕐᓴᓄᑦ ᐃᓕᓐᓂᐊᕕᒻᒥ Beaconsfield-ᒦᑦᑐᒥ ᐊᒻᒪᓗ Symmes-D’Arcy McGee ᐳᕐᑐᓂᕐᓴᓄᑦ ᐃᓕᓐᓂᐊᕕᒻᒥ ᒑᑎᓅᒥ. ᕿᓚᓈᕈᑎᓖᑦ ᑲᖏᕐᓱᐊᓗᒃᔪᐊᒥᒃ ᐃᓕᑦᓯᓂᐊᕆᐊᒥᒃ ᓇᖕᒥᓂᕐᓗ ᐊᓪᓚᑖᓛᕐᓂᒥᓂᒃ ᓴᓇᖕᖑᐊᓯᒪᔪᕐᑖᓛᕐᓂᒥᓂᓪᓗ ᓇᑦᓴᑕᐅᓛᕐᑐᓂᒃ ᑖᒃᑯᓄᖓ I Love First Peoples-ᑯᓐᓄᑦ ᐱᓇᓱᐊᕈᓯᐅᓚᖓᔪᒥ.

“ᖁᕕᐊᓱᒍᑎᖃᓪᓚᕆᑉᐳᖓ ᑖᑦᓱᒥᖓ ᐱᓇᓱᐊᖃᑎᖃᕐᓂᒥᒃ I Love First Peoples-ᑯᓐᓂᒃ. ᐃᓕᓐᓂᐊᑎᑦᓯᒍᑎᑦᓯᐊᒪᕆᐊᓗᒃ ᓄᓇᕐᔪᐊᒥᐅᓂᒃ ᑭᓇᐅᓂᑦᑎᓂᒃ ᐃᓅᑦᓱᑕ, ᐱᐅᓂᖏᓐᓂᒃ ᓲᖑᔫᓂᖏᓐᓂᓗ ᐃᓄᐃᑦ.” ᐅᖃᕐᑐᖅ ᓈᓐᓯ ᐃᑦᑐᒃ, ᐃᓕᓐᓂᐊᑎᑦᓯᔩᑦ ᐊᖓᔪᕐᖄᖓᑕ ᑐᖓᓕᖓ ᐅᓪᓗᕆᐊᖅ ᐃᓕᓐᓂᐊᕕᒻᒥ. “ᐃᓕᓐᓂᐊᑎᕗᓐᓄᑦ ᐱᕕᑦᓴᐅᕗᖅ ᐱᐅᔪᒥᒃ ᑕᐅᕐᓰᖃᕐᓂᑯᑦ ᐃᓅᓱᑦᑐᓂᒃ ᓇᓂᑐᐃᓐᓇᖅ ᑲᓇᑕᒥ ᐊᑑᑎᓗᑎᒃ ᐊᒻᒪᓗ ᑖᒃᑯᓄᖓ ᐃᑉᐱᓂᐊᕈᓐᓇᓚᕿᒍᑎᐅᑦᓱᓂ ᐱᒻᒪᕆᐅᓂᕐᒥᓂᒃ ᐃᓪᓕᓇᕐᑑᓂᕐᒥᓂᓪᓗ ᐃᓚᒋᔭᐅᑦᓯᐊᓱᑎᒃ ᓄᓇᕐᔪᐊᒥᐅᓄᑦ,” ᐅᖃᕆᐊᓪᓚᓱᓂ.

I Love First Peoples-ᑯᑦ ᐱᓇᓱᖃᑎᖃᓚᐅᔪᒻᒥᔪᑦ ᐃᓄᒻᒥᒃ ᓱᓕᔪᖕᖑᐊᓂ ᐱᖕᖑᐊᑎᒥᒃ ᐅᑭᐅᕐᑕᑐᒥᓪᓗ ᐱᖕᖑᐊᓂᕐᔪᐊᑐᓂ ᓵᓚᓐᓃᒍᑎᑖᕐᓯᒪᔪᒥᒃ ᔮᓂ ᐄᓴᓗᒻᒥᒃ ᓄᒃᑭᑎᑕᐅᓐᓇᑐᒻᒪᕆᒻᒥᒃ ᑲᑎᒪᓂᐊᕈᓯᖃᕐᑎᓯᓚᐅᕐᓱᓂᓗ ᐃᓕᓐᓂᐊᑎᓂᒃ. ᓇᖕᒥᓂᕐᒥᒍᑦ ᐱᓇᓱᐊᒐᕐᒥᒍᓗ ᐃᓅᓯᕐᒥᓂᑦ ᐊᑑᑎᔭᒥᓂ, ᖃᓄᐃᓘᕐᑎᐅᓂᖓ ᐅᖃᕐᑎᒋᔭᐅᑦᓱᓂ ᐃᓄᐃᑦ ᐃᓗᕐᕈᓯᖓᓄᑦ ᐅᓄᒃᑳᑕᖏᓪᓗ ᐅᖃᐅᓯᖃᕐᓱᑎᒃ ᐊᓂᒍᐃᓂᕐᒥᒃ ᐅᑭᐅᕐᑕᑐᒥᐅᖑᓗᓂ ᓱᓕᑦᓯᐊᑐᒥᒃ ᖁᕝᕙᑎᑕᐅᓐᓇᑑᓚᐅᕐᑐᑦ.

ᐅᓪᓗᖅ ᓈᒍᓯᖃᕐᑎᑕᐅᓚᐅᕐᑐᖅ ᓄᓇᕐᖃᑎᒌᓄᑦ ᐱᓂᐊᕐᓂᖃᕐᑎᓯᑎᓪᓗᒋᑦ ᑕᕐᕋᓕᔮᒥᒃ Indian Horse-ᒥᒃ ᓄᐃᑕᑎᑕᐅᒋᐊᖕᖓᑐᖃᕐᑎᓗᒍ, ᓯᕗᓕᐅᕆᑦᓱᓂ ᓄᐃᑕᐅᒋᐊᖕᖓᓂᕆᓛᕐᑕᖓᓂᒃ ᑕᕐᕿᒥ ᑎᕆᓪᓗᓕᐅᒦᓕᕐᐸᑦ ᑲᓇᑕᓕᒫᒥ ᑕᕐᕋᓕᔮᕐᕕᓂᑦ. ᑕᕐᕋᓕᔮᖅ ᑖᓐᓇ ᔮᓂ ᐄᓴᓘᑉ ᐃᓚᐅᕕᒋᔭᖓ.

“ᐅᑉᐱᕆᔭᖃᓪᓚᕆᑉᐳᒍᑦ ᑲᑎᒪᓂᐅᑉ ᖁᕕᐊᓱᒍᑎᖃᕐᓂᐅᓗ ᓄᒃᑭᓇᕐᑑᓂᖏᓐᓂᒃ,” ᐅᖃᓚᐅᕐᑐᖅ ᔫᓭ ᓗᓯᒃᓇᓐ. “ᐱᒋᐊᓯᑎᓪᓗᑕ ᐊᕐᕕᑕᕐᓂᒥᒃ 20-ᓄᑦ ᓄᓇᓕᓐᓄᑦ, ᓄᓇᖃᕐᖄᓯᒪᔪᓂᒃ ᐃᓕᓐᓂᐊᑎᓂᒃ ᖃᐅᔨᒪᖁᔨᕗᒍᑦ ᐅᐱᒋᒐᑦᓴᓕᒻᒪᕆᐅᒋᐊᖏᑦ ᐊᒻᒪᓗ ᑲᓇᑕᒥᐅᑦ ᕿᓚᓈᕐᒪᑕ ᑐᓴᕐᕕᖃᕈᒪᑦᓱᑎᒃ ᐃᓕᑦᓯᕕᖃᕈᒪᑦᓱᑎᓗ,” ᐃᓱᓕᒍᑎᓂᒃ ᐅᖃᕆᐊᓪᓚᓱᓂ.

ᑭᓇᒃᑰᓂᕗᑦ:

I Love First Peoples ᓇᓗᓀᒃᑯᑕᖃᕐᓱᓂ ᑲᓇᑕᒥ ᖄᖏᕐᓂᑯᓕᐅᕐᑎᐅᒐᓂ ᑎᒥᐅᔪᖅ ᐱᒍᓐᓇᓯᓚᖀᓲᖑᑦᓱᓂ ᓄᓇᖃᕐᖄᓯᒪᔪᓂᒃ ᐃᓅᓱᑦᑐᓂᒃ ᐃᓕᓐᓂᐊᕕᒻᒥ ᐱᔭᖃᕈᑎᓂᒃ, ᐊᑐᕐᓱᒋᑦ ᐱᓇᓱᐊᕐᑌᑦ ᐱᕈᕐᓭᔪᑦ ᓭᒻᒪᖃᑎᒌᒍᑎᓂᒃ. 30-ᓂᒃ ᐱᓇᓱᐊᕐᕕᖃᕐᓱᓂ ᑲᓇᑕᒥ ᐊᒻᒪᓗ ᐊᒥᓱᒐᓚᓐᓂᒃ ᖃᐅᔨᒪᔭᐅᒍᑎᓕᓐᓂᒃ ᐃᓚᓐᓈᖃᕐᓱᓂ, ᖃᐅᔨᒪᔭᐅᑎᑦᓯᒍᑎᓂᒃ ᐱᓇᓱᐊᒻᒪᕆᓲᖑᔪᒍᑦ ᐃᓅᓱᑦᑐᓂᓪᓗ ᐊᑐᐃᓐᓇᖃᕐᑎᓯᑦᓱᑕᓗ ᑐᓴᕐᓴᐅᒍᑎᒋᓂᐊᕐᑕᖏᓐᓂᒃ. ᑐᑭᓯᒋᐊᓪᓚᕈᑎᑦᓭᑦ ᖃᐅᔨᒋᐊᕈᒪᑐᐊᕈᕕᒃᑭᑦ ᐅᕗᖕᖓᓗᑎᑦ www.ilfp.ca.

ᑲᑎᕕᒃ ᐃᓕᓐᓂᐊᓂᓕᕆᓂᖅ ᑎᒥᖕᖑᑎᑕᐅᔪᕕᓂᖅ 1975-ᖑᑎᓪᓗᒍ, ᔦᒻᔅ ᐯ ᐊᒻᒪᓗ ᑯᐯᒃ ᑕᕐᕋᖓᑕ ᐊᖏᖃᑎᒌᓐᓂᖓᒍᑦ (ᐊᖏᖃᑎᒌᓐᓂᖅ). 1978-ᒥᓂᑦ ᐱᑕᖃᕐᑎᓯᔪᑐᐊᖑᓯᒪᕗᖅ ᐃᓕᓐᓂᐊᓂᕐᒨᓕᖓᔪᓂᒃ ᐱᒍᑦᔨᐅᑎᓂᒃ ᓄᓇᕕᒻᒥᐅᓄᑦ. ᔦᒻᔅ ᐯ ᐊᒻᒪᓗ ᑯᐯᒃ ᑕᕐᕋᖓᑕ ᐊᖏᖃᑎᒌᓐᓂᖓᒍᑦ, ᐃᓕᓐᓂᐊᓂᓕᕆᓂᖅ ᐱᔪᓐᓇᓂᖃᕐᑎᑕᐅᔪᖅ ᐊᐅᓚᑦᓯᔨᐅᕕᖃᕐᑎᑕᐅᑦᓱᓂᓗ ᐃᓄᐃᑦ ᐃᓗᕐᕈᓯᖓᓂᒃ ᒪᓕᑦᓯᐊᑐᓂᒃ ᐃᓕᓐᓂᐊᕈᑎᑦᓴᓕᐅᕐᓂᒥ ᐃᓕᓐᓂᐊᑎᑦᓯᓂᕐᒥᓗ. ᑐᕌᒐᖓ ᑎᓕᔭᐅᒪᒍᑎᒋᑦᓱᒍ ᑲᑎᕕᒃ ᐃᓕᓐᓂᐊᓂᓕᕆᓂᐅᑉ ᑌᒣᒻᒪᑦ ᒪᕐᕈᐃᓕᕿᖓᕗᖅ. ᓯᕗᓪᓕᖅ, ᓄᓇᓕᓕᒫᓂ ᐃᓕᓐᓂᐊᓂᓕᕆᔨᐅᑦᓱᓂ ᓄᓇᕕᒻᒥᐅᓕᒫᓄᑦ. ᐁᑉᐹᒍᓪᓗ, ᑎᒥᖁᑎᒋᔭᐅᕗᖅ ᐊᑦᔨᒋᔭᐅᖕᖏᑐᓂᒃ ᐱᔪᓐᓇᐅᑎᖃᕐᓱᓂ ᐊᐅᓚᑦᓯᔨᐅᕕᖃᕐᓱᓂᓗ ᓴᐳᑦᔨᒍᑎᐅᒋᐊᕐᑐᓂᒃ, ᐱᑕᖃᕐᑎᓯᖏᓐᓇᕈᑎᐅᒋᐊᕐᑐᓂᒃ, ᐊᒻᒪᓗ ᐱᕙᓪᓕᐊᑎᑦᓯᒍᑎᓂᒃ ᐃᓄᐃᑦ ᐅᖃᐅᓯᖓᓂᒃ, ᐃᓗᕐᕈᓯᖓᓂᒃ, ᐃᓅᑦᔪᓯᖓᓂᓪᓗ. ᐃᓕᓐᓂᐊᕈᑎᑦᓭᑦ ᑲᑎᕕᒃ ᐃᓕᓐᓂᐊᓂᓕᕆᓂᕐᒧᑦ ᐃᓕᓐᓂᐊᕈᑎᓕᐊᑦ ᐃᓕᓐᓂᐊᑎᑦᓯᒍᑎᐅᕗᑦ ᐃᓘᓐᓇᖏᓐᓂᑦ ᑖᒃᑯᐊ 14-ᐃᑦ ᓄᓇᓖᑦ ᐃᓕᓐᓂᐊᕕᖏᓐᓂᑦ, ᐃᓄᒃᑎᑐᑦ ᐅᖃᐅᓯᕐᖄᖓᓂᒃ ᐊᒻᒪᓗ ᐅᐃᒍᐃᑎᑐᑦ ᖃᓪᓗᓈᑎᑐᓪᓗ ᐅᖃᐅᓯᐅᑉ ᐁᑉᐱᐅᑎᖓᓂᒃ. ᐃᓕᓐᓂᐊᓂᓕᕆᓂᖅ ᐊᐅᓚᑦᓯᔪᖅ 17-ᓂᒃ ᐳᒃᑭᓂᕐᓴᓂ ᐳᕐᑐᓂᕐᓴᓂᓪᓗ ᐃᓕᓐᓂᐊᕕᓐᓂᒃ ᐊᒻᒪᓗᑦᑕᐅᖅ 5-ᓂᒃ ᐃᓄᒻᒪᕇᑦ ᐃᓕᓐᓂᐊᕕᖏᓐᓂᒃ. ᑐᑭᓯᒋᐊᓪᓚᕈᑎᑦᓭᑦ ᑕᑯᔭᐅᒍᓐᓇᑐᑦ ᐅᕙᓂ: www.kativik.qc.ca

— 30 —

ᑐᑭᓯᒋᐊᑦᓯᐊᕈᒪᒍᕕᑦ, ᐅᒥᖓ ᐅᖄᕕᖃᕐᓗᑎᑦ:

Iain Speirs
Vice-president
I Love First Peoples
613.790.9118
ilovefirstpeoples@gmail.com

or

ᔮᑦ ᑐᓯᓅ-ᐱᐊᕐᓃ
ᐅᖄᖃᑎᒌᓐᓂᒥ ᐊᑕᐅᑦᓯᑰᕐᑎᓯᔨ
514-482-8220 ext. 309
publicrelations@kativik.qc.ca