ᐅᓪᓗᑐᓯᕙᓪᓕᐊᓕᕐᑎᓗᒍ ᓄᓇᓗ ᐊᐅᓚᑎᓪᓗᒍ, ᐅᐱᕐᖓᓴᐅᑉ ᕿᑎᖓᓃᓕᕐᓱᑕ. ᓄᓇᓕᑦᑎᓂ, ᐱᓇᓱᐊᕈᓯᖅ ᐃᓗᕐᕈᓯᓕᕆᓂᕐᒥᒃ ᑲᑎᖃᑎᒌᑦᑎᓯᓂᐅᕗᖅ ᐃᓕᓐᓂᐊᑎᓂᑦ, ᐱᓇᓱᑦᑎᓂ ᓄᓇᓕᑦᑎᓂᓪᓗ ᓱᖃᑦᓯᖃᑎᒌᒍᑎᐅᑦᓱᓂ ᐱᕐᕈᓯᑦᑎᓂᑦ ᐃᓕᓐᓂᐊᑎᑦᓯᒍᑎᐅᑦᓱᓂᓗ. ᑕᒪᒃᑯᐊ ᐃᕐᙯᑎᑦᓯᒋᐊᓪᓛᕈᑎᐅᓲᖑᕗᑦ ᑐᖕᖓᕕᖃᑦᓯᐊᓂᕐᒥᒃ ᓱᒧᓪᓗ ᐊᑑᑎᖃᓪᓚᕆᒻᒪᖔᑦ. ᐊᓕᐊᓲᑎᒋᓗᒍ ᐃᓗᕐᕈᓯᑐᖃᕗᑦ ᐃᓕᑕᕆᓗᒍᓗ ᑲᔪᓯᑎᑕᐅᓂᖓ ᐃᓕᓐᓂᐊᑎᕗᓐᓄᑦ ᐊᕐᕌᒍᓕᒫᖅ.
ᑖᑦᓱᒥᖓᑦᓭᓇᖅ ᐱᑦᔪᓯᖃᕐᓱᑕ ᓯᕗᓕᓲᖑᒐᑦᑕ ᐃᓕᓐᓂᐊᑏᑦ ᐱᓪᓗᒋᑦ. ᑌᒣᓕᖓᑦᓭᓇᖏᓐᓇᖁᒍᑦ ᓴᐳᑦᔨᓯᒪᓂᕐᒥᒃ ᐃᓕᓐᓂᐊᑏᑦ ᐱᔪᓐᓇᐅᑎᖏᓐᓂᑦ ᐊᑦᓱᕈᕐᓇᑐᒃᑰᓱᑕ ᐱᖁᔭᖅ 14 ᒧᑦ. ᓯᕗᓂᖃᕐᑐᒍᑦ ᐃᓄᐃᑦ ᐃᓕᓐᓂᐊᑏᑦ ᑲᔪᓯᓚᖓᑎᓪᓗᒋᑦ ᐱᔪᓐᓇᐅᑎᖃᕈᑎᒥᓂᒃ ᓅᕙᓪᓕᐊᓂᕐᒥᓂ ᐳᕐᑐᓂᕐᓴᒧᑦ ᐃᓕᓐᓂᐊᕕᒻᒧᑦ, ᐅᓚᐱᑕᐅᒍᓐᓀᓗᑎᒃ ᐱᓇᓱᑦᑐᓕᕆᔨᒃᑯᓄᑦ ᐃᓱᓕᑦᑕᓂᖃᕈᓐᓀᓗᑎᓗ ᓯᕗᓂᑦᓴᖏᑦ. ᑭᓇᓘᓐᓃᑦ ᐃᓕᓐᓂᐊᑎ ᐊᔪᐃᓐᓇᑕᐅᒋᐊᖃᑦᔭᖏᓪᓚᖅ ᐅᖃᐅᓯᕐᓂᑦ ᐊᑐᕐᑕᐅᓗᑯᐊᐱᖁᔭᕐᓄᑦ ᐃᓅᓯᖏᓐᓂᑦ ᐊᑐᕐᓂᐊᖏᑦᑕᖏᓐᓂ ᑯᐯᒻᒥᐅᖑᑦᓱᑎᒃ ᒥᑭᓪᓕᑎᕐᑕᐅᒍᓐᓀᓗᑎᓗ.
ᐊᓪᓚᕕᒻᒥ, ᐸᕐᓇᓯᒪᐅᑎᓕᐊᕗᑦ ᓯᕗᒧᐊᕐᐸᓕᐊᖏᓐᓇᑐᖅ. ᐊᕐᕌᒎᓛᕐᑐᒥ, ᐱᒻᒪᕆᐅᑎᓪᓚᕆᑦᑕᕗᑦᑕ ᐃᓚᖓ ᓲᖑᓰᒋᐊᕐᓂᖅ ᐃᑲᔪᕐᓯᓂᑦᑎᓂ ᐱᓇᓱᑦᑎᓂ. ᓄᐃᑦᓯᕙᓪᓕᐊᕗᒍᑦ ᐊᒥᓱᓂ ᐊᑐᕐᑕᐅᔪᑦᓴᒫᓂᑦ ᐱᓇᓱᖃᑎᖃᕐᓂᓂᑦ ᐅᒃᑯᐃᖔᕐᓂᒥᓪᓗ ᐅᖄᖃᑎᒌᓐᓂᒥᒃ ᐱᓇᓱᕝᕕᐅᔪᓕᒫᓄᑦ, ᐱᓇᓱᐊᖏᓐᓇᒥᑦᓱᑕᓗ ᐱᓇᓱᑦᑎᑖᕙᓪᓕᐊᓂᕐᒥᒃ, ᑭᖕᖒᒪᒋᔭᑦᑎᓂ, ᐱᒋᐅᕐᓴᕆᐊᓕᖏᓐᓂᓗ ᐃᓂᒥᓂ ᐱᔭᕇᕈᓐᓇᓯᓂᕐᒧᑦ. ᐱᓇᓱᑦᑎᓕᒫᓂᑦ ᓴᐳᑦᔨᐅᓯᒪᓂᕐᒥᒃ ᐃᑉᐱᒍᓱᖁᔨᕗᒍᑦ, ᑭᖕᖒᒪᓇᕐᓂᒥᒃ, ᐊᑐᐃᓐᓇᐅᓯᐊᕐᓗᑕᓗ ᐊᕕᖃᑎᒌᑦᓯᐊᓂᕐᒥᒃ ᓇᒧᖕᖓᕙᓪᓕᐊᓂᕗᓐᓂ.
ᑲᔪᓯᑎᑦᓯᖏᓐᓇᕆᕗᒍᑦ ᐱᕈᕐᓭᓂᕐᒥᒃ ᐃᓕᓐᓂᐊᕈᑎᓕᐊᖑᓯᒪᔪᓂᑦ. ᐱᒻᒪᕆᓪᓚᕆᓚᐆᒻᒥᔪᖅ ᐅᓇ ᐱᓇᓱᐊᕐᓂᖅ ᓇᓪᓕᖁᐊᒌᓕᕐᑎᕆᓂᕐᒥᒃ ᐃᓕᓐᓂᐊᕈᑎᑦᓴᓄᑦ ᐅᖃᐅᓰᑦ ᐊᑦᔨᒌᙱᓂᖏᓐᓄᑦ, ᓲᓱᑦᓴᓯᐊᖏᓐᓇᓱᑕᓗ ᐅᖃᐅᓯᖏᓐᓂᑦ ᓄᓇᓗᓐᓂᑦ ᐊᑐᓂ ᐊᑦᔨᒌᑦᑎᓯᑦᓯᐊᓗᑕᓗ ᐃᓕᓐᓂᐊᑎᓂᑦ. ᐱᓇᓱᖃᑎᒌᑦ ᒫᓐᓇ ᐱᓇᓱᐊᖃᑦᑕᑐᑦ ᓲᖑᓰᒋᐊᕐᓂᒥᒃ ᐃᓕᓐᓂᐊᕆᐊᖕᖓᑐᓂ ᐳᕐᑐᓂᓕᓐᓄᑦ ᐱᖓᓲᔪᕐᑐᓂ, ᐃᑉᐱᒍᓱᑦᓯᐊᕋᓱᒻᒥᓱᑎᓗ ᐅᖃᐅᓯᕐᖄᒥᓂ ᐃᓕᓐᓂᐊᑎᑦᓯᔩᑦ ᓴᐳᒻᒥᔭᐅᑦᓯᐊᒪᖔᑕ. ᐊᑕᐅᑦᓯᑯᑦ, ᑐᓂᒪᓪᓚᕆᒻᒥᔪᒍᑦ ᓲᖑᓰᒋᐊᕐᓂᒥ ᐳᕐᑐᓂᕐᓴᒋᐊᓪᓚᒥ ᐱᒍᑦᔨᒍᑎᓂ ᐊᕐᖁᓯᐅᕐᓂᒧᑦ, ᐃᓚᐅᑎᓪᓗᒋᑦ ᓄᓇᕕᒃ ᓯᕗᓂᑦᓴᕗᑦ, ᑌᒫᒃ ᐊᑌᓐᓇᖃᑦᑕᓚᖓᒻᒪᑕ ᑲᔪᓯᑦᓯᐊᓗᑎᓗ ᐊᑐᐃᓐᓇᐅᓗᑎᒃ ᐅᕕᒃᑲᓄᑦ ᐃᓂᖃᑦᓯᐊᖁᓪᓗᒋᑦ ᓄᓇᓕᒻᒥᓂ.
ᑭᖑᓪᓕᐹᖅ, ᑲᔪᓯᖏᓐᓇᖁᒍᑦ ᐱᕈᕐᑎᓯᒐᓱᑦᓱᑕ ᐃᓂᒋᔭᑦᑎᓂ. ᐃᓚᐅᑎᓪᓗᒋᑦ ᐱᓇᓱᑦᑏᑦ ᐃᓪᓗᖏᑦ, ᓱᓇᒐᓚᖃᐅᑏᑦ, ᐃᓕᓐᓂᐊᕕᓐᓂ ᓴᓇᒋᐊᓪᓛᓃᑦ, ᓄᑖᕐᓗ ᐃᓕᓐᓂᐊᕕᑦᓴᖅ ᖁᐊᕐᑕᒥ $122.5M ᕌᕐᑐᖅ. ᐱᑐᐃᓐᓇᐅᖏᒻᒥᔪᑦ ᐃᓪᓗᓕᐅᕐᓃᑦ ᐱᔭᑦᓴᖏᑦ, ᑕᒪᒃᑯᐊ ᓄᐃᑕᑎᑦᓯᕗᑦ ᐱᒻᒪᕆᐊᓗᓐᓂᑦ ᐱᕈᕐᑎᕙᓪᓕᐊᔭᕗᓐᓂᑦ ᓴᓇᓂᒃᑯᑦ ᓄᓇᕕᓕᒫᕐᒥ.
ᑕᙯᕐᓯᓯᐊᖁᕙᑦᓯ ᐅᐱᕐᖔᑯᑦ ᓄᓇᒦᓪᓗᑎ ᐃᓚᓯᓪᓗ.
ᓇᑯᑦᒦᒃ ᐱᓇᓱᐊᑦᓯᐊᖏᓐᓇᓕᒫᖃᑦᑕᕋᑦᓱ ᓄᓇᕕᒻᒥ ᐃᓕᓐᓂᐊᑎᓄᑦ.