ᓴᐅᑦᔪᐃᑦ ᐃᓕᓐᓂᐊᕕᖓ/ᐃᓕᓴᕐᕕᖓ ᑲᖏᕐᓱᒥ ᑐᓂᔭᐅᓚᐅᔪᕗᖅ $20,000ᓂᒃ MusiCounts ᑮᓇᐅᔭᕐᓯᐅᕈᕐᔨᓲᓂ 2021 ᐅᐱᕐᖔᖓᓂ

2020-2021ᒧᑦ ᐃᓕᓴᕐᓇᐅᑉ ᐊᕐᒑᒍᖓ ᐃᓱᓕᒋᐊᕕᑦᑎᓗᒍ, ᑲᑎᓯᓚᐅᔪᕗᒍᑦ ᑫᓚ ᑕᕐᕿᐊᐱᒻᒥᒃ, ᓴᐅᑦᔪᐃᑦ ᐃᓕᓐᓂᐊᕕᖓᓂ/ᐃᓕᓴᕐᕕᖓᓂ ᐃᓕᓵᒥᒃ ᑐᓂᔭᐅᔪᕕᓂᕐᒥᒃ $20,000ᓂᒃ MusiCountsᑯᓄᑦ. ᐃᓕᓭᔨᑯᒥᓄᑦ ᑫᓗᑐᐊᐱᑦᑕᐅᓱᓂ, ᑫᓚ ᐊᓪᓚᓚᐅᔪᕗᖅ ᑐᑦᓯᕋᐅᑎᓂᒃ ᑐᓂᔨᑦᓱᓂᓗ ** ᓴᐳᒻᒥᔭᐅᑦᓱᓂ ᐃᓕᓐᓂᐊᕕᐅᑉ/ᐃᓕᓴᕐᕕᐅᑉ MusiCountsᑯᓄᑦ ᑮᓇᐅᔭᓂᒃ ᑐᑦᓯᕋᐅᑎᓂᒃ.

ᐃᓄᒻᒪᕆᑦᑕᖃᕐᑎᓗᒍ ᑐᓴᕐᓂᔮᕐᑐᐃᑦ ᐊᕙᑎᖓᓂ, ᑫᓚ ᓄᓇᕐᖃᑎᓕᒫᑦᓯᐊᒥᓂᒃ ᐊᑑᑎᖃᑎᖃᕈᒪᓚᐅᔪᕗᖅ ᑐᓴᕐᓂᔮᕐᑎᓯᓕᑐᐊᕋᒥ ᐊᑑᑎᓲᕐᒥᓂᒃ ᐃᓅᓯᕐᒥᓂ ᖃᕝᕙᑎᑕᐅᓲᒍᒐᒥ ᐱᖕᖑᐊᓕᑐᐊᕋᒥ:

ᐱᑦᓯᐊᓱᓂ, ᑫᓚ ᑕᑯᓐᓇᑐᖅ ᐱᔫᒥᓚᖓᓂᕐᒥᓂᒃ ᑐᓴᕐᓂᔮᕈᑎᑕᑐᐊᕈᓂ. “ᑲᑎᓕᐅᒥᑎᑦᓯᒍᑕᐅᓂᕐᑐᕆᑦᓯᓱᓂᓗ ᓄᓇᕐᖃᑎᒌᓄᑦ”, “ᑲᔪᖏᕐᓭᒍᑎᐅᓗᑎᓪᓗ ᐅᕕᒃᑲᓄᑦ ᑐᓴᕐᓂᔮᕐᑎᓯᔨᖕᖑᒐᓱᐊᕐᑎᓗᒋᑦ” ᐊᓯᑦᔩᓗᑎᓪᓗ “ᐅᕕᒃᑫᑦ ᓯᓚᕐᔪᐊᒥ ᑕᑯᓐᓇᕈᓯᖏᓐᓂᒃ”. ᐅᖃᒋᐊᓪᓚᓱᒍ, ᐳᕐᑐᓂᕐᓴᒥ ᐃᓕᓐᓂᐊᒌᕐᓯᒪᑦᓱᓂ/ᐃᓕᓴᕇᕐᓯᒪᑦᓱᓂ, ᑫᓚ ᐅᑉᐱᕆᔭᖃᕐᐳᖅ ᑐᓴᕐᓂᔮᕐᓂᖅ ᐃᓅᖃᑎᒋᓐᓂᒥᒃ ᓱᕐᕃᓱᓪᓚᕆᐅᓂᖓᓂᒃ

ᐅᑕᕐᕿᓂᕐᒥᓂ, ᑫᓚ ᐃᓕᓭᓲᒍᕗᖅ ᐃᓄᑦᑎᑐᖅ ᐃᖏᕈᓯᓂᒃ ᐃᓕᓭᔨᒥᓂᑦ- ᑲᒃᑲᓛᑦ ᐅᕕᑫᓗ ᖃᓄᐃᑦᑐᖂᕐᒪᖔᑕ ᐃᖕᖏᕈᓯᓂᒃ. ᑲᑐᑦᔭᕈᓯᒍᓗᑐᐃᓐᓇᓂᓗ ᐃᓕᓭᓲᒍᑦᓱᓂ, ᖃᓪᓗᓈᑎᑐᑐᐃᓐᓇᖅ ᑐᓴᕐᓂᔮᕐᓂᖃᖁᔨᒐᓂ.

ᐃᒫᒋᐊᓪᓚᖅ, ᑐᑭᓯᑲᓪᓚᒍᒪᒻᒥᓱᑕ ᑮᓇᐅᔦᑦ ᖃᓄᖅ ᐊᑐᕐᑕᐅᒍᒫᕐᓂᐊᒪᖔᑕ ᐃᓕᓴᕐᕕᒧᑦ MusiCountsᑯᓂᓂᑌᑦ. ᑐᓴᕐᑎᓯᓛᕆᕗᒍᑦ ᖃᓄᐃᓕᓐᓂᒪᖔᑕ.

ᐊᐱᕐᓱᑐᖅ: ᓱᓇᑐᐃᓐᓇᒥᒃ ᐅᖃᕐᑕᐅᖁᔨᕕᑦ ᑕᒪᑦᓱᒥᖓ ᐱᓇᓱᐊᕈᑕᐅᔪᒥᒃ ᐊᓪᓚᒍᑎᖃᑐᐊᕈᑦᑕ?

ᑫᓚ: ᐋᐊ

ᐊᐱᕐᓱᑐᖅ: ᓱᓇᒥᒃ ᐅᖃᒍᒪᒐᔭᕐᕿᑦ?

ᑫᓚ: ᐃᒪᑐᐃᓐᓇᑐᖃᑦᑕᕆᑦ. ᐊᑦᑕᓇᕐᑐᒦᑦᑌᓕᒋᑦ, ᐊᒡᒐᓂᐊᖃᑦᑕᓗᑎᑦ.

* MusiCountsᑯᑦ ᑲᓇᑕᒥ ᑐᓴᕐᓂᔮᕐᑎᓯᓂᕐᒥ ᐃᓕᓴᕕᐅᕗᑦ ᑮᓇᐅᔭᕐᓯᐅᕈᑦᔨᓲᒍᑦᓱᑎᒃ ᔫᓄ ᐃᓕᑕᕆᔭᐅᒍᑎᓂᒃ ᐱᓇᓱᐊᖃᑎᖃᓲᒍᑦᓱᑎᒃ. ᐊᕐᒑᒍᑕᒫᑦ, MusiCountsᑯᑦ ᓴᐳᑦᔨᓲᒍᕗᑦ ᐅᕕᒃᑲᓂᑦ ᐊᒥᓱᐃᑎᒍᑦ ᐱᕕᑦᓴᑖᕐᕕᓂᒃ, ᑮᓇᐅᔭᕐᑎᒍᑦ ᐃᓕᓴᕈᑎᓂᓪᓗ ᐊᑭᓕᕐᑐᐃᓂᒃᑯᑦ.  ᐃᑲᔪᕐᓯᓱᑎᒃ ᑐᓴᕐᓂᔮᕐᑎᓯᔨᓂᒃ ᐃᑲᔪᕐᓯᒪᐅᑎᒥᑎᒍᑦ, MusiCountsᑯᑦ ᑮᓇᐅᔭᓂᒃ ᑐᓂᔨᓲᒍᕗᑦ ᐃᓕᓴᕐᕕᓄᑦ ᓂᐅᕕᐅᑎᑦᓴᓂᒃ ᑐᓴᕐᓂᔮᕐᑎᓯᐅᑎᓂᒃ, ᐱᕕᑦᓴᑖᕐᕕᓴᓂᒃ ᐱᐅᒃᑯᑎᑖᕐᕕᓴᕐᓂᓗ ᑐᓴᕐᓃᓵᑎᓯᓂᕐᒥ ᐃᓕᓴᕐᕕᑖᖁᔨᒧᑦ.

** ᐊᓪᓚᑕᕕᓂᖅ ᑐᔫᑎᒋᑦᓱᒍ MusiCountsᑯᓄᑦ ᑫᓚ ᑕᕐᕿᐊᐱᒻᒧᑦ :

“ᑐᓴᕐᓂᔮᕐᓂᖅ ᑕᕝᕙᓂ ᓄᓇᓕᒻᒥ ᑲᑎᑎᑦᓯᓚᕆᓲᒍᕗᖅ ᐃᓅᖃᑎᒌᓂᑦ ᖃᓂᑦᑕᕇᑦᑎᓯᓲᒍᑦᓱᓂᓗ ᐃᓄᓐᓂᒃ. ᐃᓱᒪᑖᕆᕐᖄᕆᓲᒍᔭᕗᑦ ᓄᓪᓕᐅᑎᓂᕐᓂᑦ ᐸᕐᓀᓯᑐᐊᕋᑦᑕ, ᕿᑲᕐᓇᓂ ᐃᓅᖃᑎᑦᑎᓂᓪᓗ ᖁᕕᐊᓲᑎᖃᕐᓂᐊᓕᑐᐊᕈᑦᑕ. ᐅᕕᒃᑲᓂᑦ, ᐃᓄᓕᒫᓂᓪᓗ, ᑐᓴᕐᓂᔮᕐᓂᖅ ᐃᑲᔪᕐᓯᓲᒍᕗᖅ ᑐᑭᓯᒐᓱᐊᕐᓂᑎᓐᓂ ᐃᓗᕐᕈᓯᕐᑎᓂ ᐃᓕᑕᕐᓯᖃᑦᑕᐅᑎᓂᕐᑎᓂᓪᓗ ᐅᖓᓯᑦᑐᒥᐅᒍᒐᓗᐊᕐᒪᑕ ᐅᖓᑖᓂᓗ ᐊᕙᑎᑎᓂᓘᓐᓃᑦ, ᖃᓂᑦᑕᕇᑦᑎᓯᓱᑦᓂ ᓴᕐᕙᑎᒍᑦ ᑕᕐᓂᑎᒍᓪᓗ. ᓱᓕᔪᕐᓴᓂᑯᑦᑎᓄᑦ ᑭᓇᐅᓂᑦᑎᓂ, ᐱᑐᖃᑎᖃᓲᒍᕗᒍᑦ ᑐᑭᓯᒪᑦᓱᒍᓗ ᑐᓴᕐᓂᔮᕈᑎᒃ ᖃᓄᐃᑦᑐᑐᐃᓐᓇᐅᒐᓗᐊᕐᒪᑦ, ᑐᓴᕐᓂᔮᕐᓂᖅ ᐊᑦᑐᐊᓂᕐᐸᐅᒥᒻᒪᑦ ᐃᓄᓕᒫᑦ ᐃᓅᓯᖓᓄᑦ. ᓂᓪᓕᒍᑎᒋᓗᒍ, ᖃᐅᔨᒐᓱᐊᕐᓗᒍ ᑐᑭᓯᒐᓱᐊᕈᑎᒋᓗᒍ ᐃᑉᐱᓂᐊᕈᑎᒋᓗᒍᓗ; ᐅᓂᒃᑳᕈᑕᐅᓂᕐᐸᐅᕗᖅ ᐊᑦᔨᒌᓂᒃ ᐃᓱᓕᒍᑎᓕᓐᓂᒃ “ᓄᐃᑕᕗᖓ  ᓄᐃᑕᒋᕗᑎᑦ, ᓂᐱᕆᑦᑑᓗᑎᑦ ᓂᐱᑭᑦᑑᒐᓗᐊᕈᕕᓪᓘᓃᑦ, ᓱᑲᑦᑐᒥᒃ, ᓱᒃᑫᑐᒥᓪᓘᓃᑦ, ᐊᓕᐊᓐᓂᑯᑦ ᓄᓪᓚᖓᓂᒃᑯᓘᓐᓃᑦ ᐃᓱᓕᒍᑎᒋᓗᒍ ᖃᑎᑭᑦᑐᖅ (ᐃᔪᕐᓵᕆᔪᖅ), ᑐᓴᕐᓂᔮᓂᖅ ᐱᒻᒪᕆᐅᕗᖅ ᐃᓕᓐᓂᐊᕕᑦᑎᓂ/ᐃᓕᓴᕐᕕᑎᓐᓂ: ᐱᑐᑦᓯᒪᐅᑎᑦᓯᐊᑫᒍᓐᓇᕋᒥ ᓄᓇᓕᒥᓪᓗ ᓲᖑᔫᑎᑦᓯᒍᓐᓇᓱᓂ.”