ᐅᑭᐊᖅ ᐃᓱᒪᑦᓴᓯᐅᕐᓇᐅᕗᖅ, ᑕᒪᖏᑎᒍᑦ ᑎᓕᔭᐅᒪᓂᕐᒪ ᑐᑭᐊᒍᑦ ᐊᖓᔪᕐᖃᐅᓂᕐᒧᑦ ᐃᓕᓐᓂᐊᓂᕐᒥᒃ ᑭᒡᒐᑐᕐᑏᑦ ᑲᑎᒪᔨᖏᓐᓂ ᐊᒻᒪᓗ ᑲᑎᕕᒃ ᐃᓕᓴᕐᓂᓕᕆᓂᐅᑉ ᐱᓇᓱᓐᓂᕆᕙᑦᑕᖓᑕ ᑐᑭᐊᒍᑦ ᑖᒃᑯᓇᓂ ᐅᓪᓗᖏᓐᓂ. ᐊᕐᕌᒍᐃᑦ ᐊᓂᒍᕐᖃᒥᓚᐅᕐᑐᑦ ᑕᕐᓯᕈᑕᐅᓚᐅᔪᔪᑦ ᐊᓯᑦᔨᕈᑎᓄᑦ ᐊᒻᒪᓗ ᓴᖑᒋᐊᕈᑎᓄᑦ; ᑰᕕᑦ-19-ᒥᒃ ᕿᒪᑦᓯᒋᐊᓯᓂᕐᒧᑦ, ᖁᓅᒻᒥᓂᕐᒧᑦ ᐱᖁᔭᖅ 96-ᒥᒃ, ᐊᔭᐅᕐᑐᓂᕐᒧᑦ ᐃᓕᓐᓂᐊᓂᒃᑯᑦ ᐃᒻᒥᓂᕐᓱᕈᓐᓇᓂᕐᒥᒃ ᐊᒻᒪᓗ ᐱᕙᓪᓕᑎᑦᓯᓂᕐᒥᒃ ᐱᓇᓱᑦᓱᑎᒃ ᐃᓂᓪᓚᖓᐅᑎᖏᓐᓂᒃ ᐱᓇᓱᑦᑎᓐᓄᑦ ᐃᓚᐅᕗᑦ ᐊᖏᓂᕐᐹᓄᑦ ᐱᔪᓐᓇᓚᐅᔪᔭᒃᑲᓄᑦ.

ᑰᕕᑦ 19-ᒥᒃ ᕿᒪᑦᓯᓂᖅ

ᑌᒣᓚᐅᔪᒻᒥᒪᑕ ᑯᐯᒻᒥᐅᓂ ᐊᓯᓂ, ᓯᓚᕐᔪᐊᒥᐅᑦ ᖃᓂᒪᒍᑎᒋᓚᐅᔪᔭᖓᑦ ᑭᐱᐅᕐᖃᑎᑦᓯᓚᐅᔪᕗᖅ ᐃᓕᓐᓂᐊᑎᑦᓯᓂᒃᑯᑦ ᐱᒍᑦᔨᒍᑎᓂᒃ. ᐅᖓᓯᑦᑐᒥᒃ ᐅᖃᓕᒪᐅᑎᒍᑎᒐᓓᑦ ᓇᑉᐸᑎᕐᓯᒪᔪᖏᑦ ᓈᒻᒪᖏᒻᒪᑕ, ᐱᔭᕆᐊᑦᑐᑎᑦᓯᒍᑎᖏᑦ ᓴᐱᕐᓇᕇᔭᓕᓚᐅᔪᔪᑦ. ᑌᒣᒐᓗᐊᕐᒪᑦ, ᐃᓕᓐᓂᐊᑎᑦᓯᕕᓕᒫᑦ ᓄᐃᑦᓯᖃᑦᑕᓚᐅᔪᔪᑦ ᖃᓄᕐᑑᓯᒪᔪᓂᒃ ᓴᓇᕐᕈᑎᑦᓴᓂᒃ, ᒪᓂᔨᒍᑎᑦᓴᓂᒃ ᐊᒻᒪᓗ ᐃᓱᐊᖁᑎᑦᓴᓂᒃ ᐃᓄᒃᑎᑐᑦ ᓂᒍᕐᓯᓱᑎᒃ ᓈᓚᒍᓐᓇᐅᑏᓐᓂᐊᓂᐅᑉ ᖃᕆᑕᐅᔭᓄᑦ ᐃᓱᐃᓗᑕᐅᓂᖓᓂᒃ ᓄᓇᕕᒻᒥ. ᓯᕗᓂᖃᓪᓚᕆᑉᐳᒍᑦ ᖃᓄᓕᒫᖅ ᐊᔪᐃᓐᓇᓚᖓᑦᓱᑕ ᐱᖕᖏᕖᕐᓂᐊᓗᑕ ᓄᓇᕕᒻᒥᐅᑦ ᐱᕙᓪᓕᐊᓂᖓᓂᒃ, ᑲᔪᓯᖕᖏᓈᓂᖓᓂᒃ ᐊᒻᒪᓗ ᐱᔭᖃᑦᓯᐊᓂᖓᓂᒃ.

ᐱᖁᔭᖅ 96: ᐊᑐᕈᓐᓇᓂᖅ ᐊᒻᒪᓗ ᐱᔭᖃᕐᓂᖅ

ᓱᒃᑫᓗᑌᑦ ᐊᒻᒪᓗ ᐊᕝᕕᐊᓗᑌᑦ ᓄᓇᕕᐅᑉ ᐃᓕᓐᓂᐊᑎᖏᑦᑕ ᐱᔭᖃᕐᓂᖓᓄᑦ ᐊᒥᓲᕗᑦ ᐊᒻᒪᓗ ᓇᐅᒃᑯᑐᐃᓐᓈᐳᑦ. ᐱᖁᔭᖅ 14 (ᓯᕗᓂᖓᓂ ᐱᖁᔭᖅ 96-ᖑᓚᐅᔪᔪᖅ) ᐊᓯᑦᔨᕈᑕᐅᑦᔭᖏᑦᑐᖅ; ᐃᓚᔨᒋᐊᓪᓚᑐᐃᓐᓇᑐᖅ ᐃᓕᓐᓂᐊᕇᕐᓂᐊᓗᓂ ᓂᐳᕐᑎᒋᐊᓕᓐᓂᒃ ᐊᑐᕐᑐᓂᒃ ᓄᓇᕕᒻᒥ ᐃᓕᓐᓂᐊᑎᓄᑦ ᓂᕈᐊᕐᓯᒪᔪᓄᑦ ᐃᓕᓐᓂᐊᕕᒻᒪᕆᒻᒥ ᐃᓕᓐᓂᐊᕆᐊᕐᓂᐊᓗᑎᒃ ᖃᓪᓗᓈᑎᑐᑦ ᐅᖃᐅᓯᕐᒧᑦ.

ᑕᒪᓐᓇ ᐱᑦᔪᑎᒋᑦᓱᒍ, ᑲᑎᕕᒃ ᐃᓕᓴᕐᓂᓕᕆᓂᖅ (KI) ᐱᓇᓱᖃᑎᖃᓯᓚᐅᔪᔪᖅ ᑎᒥᓂᒃ ᐊᓯᒥᓂᒃ ᑕᓂᕿᖃᑎᒋᑦᓱᒋᑦ ᐊᖓᔪᕐᖄᒪᕆᒻᒥᒃ ᓕᑰ, ᑕᒪᑐᒥᖓ ᐊᑐᖕᖏᑑᑎᑦᓯᖁᑦᓱᒍ ᐃᓘᓐᓇᖏᓐᓄᑦ ᐃᓄᓐᓄᑦ ᐃᓕᓐᓂᐊᑎᓄᑦ ᐃᓕᓐᓂᐊᕆᐊᕐᓯᒪᔪᓄᑦ ᐃᓕᓐᓂᐊᕕᒻᒪᕆᓐᓂ ᐃᓕᓐᓂᐊᓱᑎᒃ ᑯᐯᒃ ᓄᓇᖓᓂ. ᐅᓪᓗᒥᒧᑦ ᑎᑭᑦᓱᒍ, ᑭᒡᒐᑑᑎᒋᒐᓱᐊᕐᑕᕗᑦ ᑐᓵᖕᖏᑐᑦ ᓯᐅᑎᖏᓐᓄᑦ ᑐᑦᓯᒪᑐᐃᓐᓇᑐᑦ.

ᐃᓕᓐᓂᐊᕈᑎᓂᒃ ᑲᔪᓯᑦᓯᐊᓂᖅ ᐊᒻᒪᓗ ᐃᒻᒥᓂᕿᒍᓐᓇᓂᖅ

ᐊᕐᕌᒍᑕᒫᑦᓯᐊᖅ ᑐᖓᓕᕇᓂ ᐊᕐᕌᒍᓂ, ᓄᓇᕕᒃ ᐱᕙᓪᓕᖁᑎᖃᓲᖑᕗᖅ ᓄᑖᑦ ᐃᓕᓐᓂᐊᕇᖃᑎᒌᑦ ᓯᕗᓕᕈᓐᓇᓕᕐᓂᖓᓂᒃ, ᐱᓯᑎᐅᓂᖓᓂᒃ ᐊᒻᒪᓗ ᓱᕐᖁᐃᕆᐊᓪᓚᓯᒪᔪᒥᒃ ᐃᓗᕐᖁᓯᕐᒥᓂᒃ. ᐱᒋᐊᓚᐅᕐᓂᕋᒥ ᑌᒪᖕᖓᑦ 2017-ᒥ, ᓄᓇᕕᒃ ᓯᕗᓂᒃᓴᕗᑦ ᐃᓕᓐᓂᐊᕈᑎ ᓱᓕ ᓴᐳᒻᒥᐅᑕᐅᖏᓐᓇᑐᖅ ᐃᓕᓐᓂᐊᕈᑎᑎᒍᑦ ᑲᔪᓯᑦᓯᐊᓂᕐᒥᒃ ᐳᕐᑐᓂᕐᓭᑦ-ᑐᖔᓂ ᐃᓕᓐᓂᐊᑐᓄᑦ. ᐱᕙᓪᓕᖁᑎᖏᑦ ᐳᕐᑐᓂᕐᓭᑦ-ᑐᖔᒍᑦ ᐃᓕᓐᓂᐊᓂᕐᒥᒃ ᓵᖕᖓᓯᓂᕐᒧᑦ ᑕᑯᓐᓇᓱᒍ ᐃᓄᐃᑦ ᐃᓗᕐᖁᓯᖓᓐᓂᒃ ᐊᒻᒪᓗ ᓯᓚᕐᔪᐊᑉ ᐅᑭᐅᕐᑕᑐᓕᒫᖓᓂ ᓯᕗᓪᓕᖃᕐᓯᒪᓂᖓᓐᓂᒃ ᓇᖏᕐᓱᓂ ᐸᔪᒍᑕᐅᓯᒪᒻᒥᔪᖅ ᓄᑖᒥᒃ ᑫᑦᓴᐅᒥᑎᑦᓯᓂᕐᒥᒃ ᐅᖃᖃᑎᒌᒍᑎᓂᒃ ᐊᑦᑐᐊᔪᓂᒃ ᐱᒋᐊᖃᕐᓂᒧᑦ ᐳᕐᑐᓂᕐᓭᑦ-ᑐᖔᓂ ᐃᓕᓐᓂᐊᕕᒻᒥᒃ ᓄᓇᕕᐅᑉ ᐃᓗᐊᓂ.

KI ᐱᒋᐊᕐᑎᓯᓚᐅᔪᔪᖅ ᑐᖓᓕᕇᓂᒃ ᐃᓱᒪᑦᓴᓯᐅᕐᕕᖃᕈᑎᓂᒃ ᐁᕆᓕ 2023-ᒥ ᑐᑭᓯᑦᓯᐊᕈᒪᒧᑦ ᓄᓇᕕᒻᒥᐅᑦ ᑕᐅᑐᒐᖓᓂᒃ ᐳᕐᑐᓂᕐᓭᑦ-ᑐᖔᓂ ᐃᓕᓐᓂᐊᕕᖃᕐᓂᐅᑉ ᑐᑭᐊᒍᑦ ᓄᓇᕕᒻᒥ. ᐊᑕᐅᑦᓯᑯᑦ, ᑕᒪᑐᒪ ᐱᕕᖃᕐᓂᖓᓂᒃ ᖃᐅᔨᓴᐅᑎ ᐃᓕᓐᓂᐊᓂᕐᒧᑦ ᑐᕐᖃᑕᕐᕕᐅᑉ ᑎᓕᔨᒍᑎᒋᓯᒪᔭᖓ ᐱᔭᕇᕐᑕᐅᓚᐅᔪᒻᒥᔪᖅ ᐅᐱᕐᖔᖅ. ᖃᓄᐃᓕᖓᑦᓯᐊᓗᓂ ᑖᓐᓇ ᐃᓕᓐᓂᐊᕕᒃ ᓄᐃᒐᔭᕐᒪᖔᑦ ᓇᓗᓀᕐᑕᐅᕋᑕᖕᖏᑲᓗᐊᕐᑎᓗᒍ, ᐊᓕᐊᓇᕐᑐᕋᑕᐅᖏᓐᓇᑐᖅ ᑐᓴᕐᓱᒍ ᓄᓇᕕᒻᒧᑦ.

ᓄᑖᑦ ᐊᑕᖏᕐᑐᑦ ᐊᖏᖃᑎᒌᒍᑎᖏᑦ

ᐊᑦᔨᒌᓂᒃ ᐱᕙᓪᓕᖁᑎᖃᕐᓂᖅ ᐊᑐᕐᑐᐹᓘᑦᓱᓂ ᐅᐊᕈᑕᐅᕗᖅ ᐱᓇᓱᑦᑎᓴᕐᓯᐅᓂᕐᒧᑦ ᐊᒻᒪᓗ ᐱᓇᓱᑦᑎᓂᒃ ᐊᓀᑲᑦᑕᖏᓐᓂᒧᑦ. ᐊᑐᓪᓗᑐᑦᓯᐊᒥᔪᖅ ᓇᕆᐊᕆᑦᓱᒍ ᓄᑖᓄᑦ ᐱᓇᓱᖃᑎᑦᓴᑎᓐᓄᑦ ᑎᒥᑦᑎᓂ. 2022-ᒥ, ᐊᖏᔪᒥᒃ ᓯᕗᒧᑦ ᐊᓪᓗᕆᐊᕐᓂᖃᓚᐅᔪᔪᒍᑦ ᓄᖑᑎᕆᓂᒃᑯᑦ ᑲᓱᖕᖏᒍᑎᒥᒃ ᐱᓇᓱᓐᓂᐅᑉ ᐃᓂᓪᓚᖓᐅᑎᖏᓐᓂ ᐊᑯᓐᓂᒥ ᐱᓇᓱᑦᑎᓄᑦ ᐱᓇᓱᑦᑎᑖᖑᓯᒪᔪᓄᑦ ᓄᓇᓕᓐᓂᒃ (ᑖᒃᑯᐊᓗ ᐊᒥᓲᓂᕐᓴᒪᕆᐊᓗᖏᑦ ᐃᓅᑦᓱᑎᒃ), ᑌᒃᑯᓄᖓᓗ ᐱᓇᓱᑦᑎᑖᖑᓯᒪᔪᓄᑦ ᓄᓇᕕᐅᑉ ᓯᓚᑖᓂᒃ.

ᑕᒪᓐᓇ ᐅᖃᕐᒪᑦ ᑕᒐ, KI-ᑯᑦ ᐱᕕᓕᐅᕐᓯᒪᒻᒥᔪᑦ ᐃᒻᒥᒍᑦ ᒪᓂᔨᒍᑎᑦᓴᒥᓂᒃ ᐱᕙᓪᓕᖁᑎᓂᒃ ᐱᐅᓂᕐᓴᐅᓕᕐᑐᓂᒃ ᑌᒃᑯᓂᖓ ᐱᖕᖏᕖᕐᓯᒪᔪᓂᒃ ᓄᑕᐅᓯᓕᑎᕐᓯᒪᔪᓂ ᐊᑕᖏᕐᑐᑦ ᐊᖏᖃᑎᒌᒍᑎᖏᓐᓂ ᐊᑐᕐᑐᓂ ᐃᓕᓐᓂᐊᑎᑦᓯᔨᖏᓐᓄᑦ, ᐃᑲᔪᕐᑎᓄᑦ ᐱᓇᓱᑦᑎᖏᓐᓄᑦ ᐊᒻᒪᓗ ᐱᔪᓐᓇᐅᑎᓕᖁᑎᖏᓐᓄᑦ. ᐱᔪᒪᕗᒍᑦ ᐱᓇᓱᕝᕕᓯᐊᖁᑎᒋᔭᐅᓂᕐᒥᒃ ᓂᕈᐊᕐᑕᐅᖃᑦᑕᓗᑕ ᐱᓇᓱᑦᑎᓴᓄᑦ ᓄᓇᕕᒻᒥ.

ᓂᕈᐊᕐᓃᑦ ᐃᓕᓐᓂᐊᓂᕐᒧᑦ ᑭᒡᒐᑐᕐᑎᓂᒃ ᑲᑎᒪᔨᓂᒃ

ᓂᕈᐊᕐᓃᑦ ᑭᖑᓪᓕᓂᒃ ᑲᑎᒪᔨᑦᓴᓂᒃ ᑎᑭᒋᐊᕕᑦᓯᐊᐳᑦ. ᐃᓱᒪᖁᓇᕐᖁᑎᑦ ᓂᕈᐊᕐᑕᐅᑎᒐᓱᐊᕋᔭᕐᓂᒥᒃ ᑭᒡᒐᐅᒐᔭᕐᓗᑎ ᓄᓇᓕᓯᓐᓄᑦ. ᓂᕈᐊᕐᑏᑦ ᐃᓚᐅᖁᒻᒥᔭᒃᑲ ᑕᒪᑐᒧᖓ ᐱᒻᒪᕆᒻᒧᑦ ᐱᔪᓐᓇᓂᖃᖃᑎᒌᑦ ᐱᐅᓯᖓᓄᑦ.

ᑖᓐᓇ ᐱᔪᓐᓇᓯᒍᑕᐅᕗᖅ ᓄᓇᕕᒻᒥᐅᓄᑦ ᐃᓘᓐᓀᓄᑦ ᑎᒍᓯᓂᕐᒥᒃ ᐊᐅᓚᑦᓯᔨᐅᓂᕐᒥᒃ ᓴᓇᕐᕈᑎᓂᒃ ᐋᕐᕿᓱᐃᓚᖓᔪᓂᒃ ᐃᓕᓐᓂᐊᑎᑦᓯᒍᑎᓕᒫᓂᒃ ᓯᕗᓂᑦᓴᑎᓐᓂ.

ᓯᐊᔭ ᐋᓗᐸ

ᐊᖓᔪᕐᖄᖅ