ᒫᑦᔨᐅᓚᐅᔪᒥ 2-ᒥᑦ 8-ᒧ, ᓯᑕᒣᑦ ᐳᕐᑐᓂᕐᓴᒋᐊᓪᓚᒥ ᐃᓕᓐᓂᐊᑏᑦ ᐃᑲᔪᕐᑕᐅᒍᑎᓂᒃ ᑮᓇᐅᔭᑎᒍᑦ ᐱᑖᕐᑎᑕᐅᓲᑦ ᑲᑎᕕᒃ ᐃᓕᓴᕐᓂᓕᕆᓂᕐᒥ ᖃᑎᖃᕐᓱᑎᒃ ᖁᓕᓪᓗ ᒪᕐᕈᓗᓐᓂᒃ ᐃᓕᓐᓂᐊᑎᓂᒃ ᐃᓕᓐᓂᐊᕕᕐᔪᐊᖓᓂ ᒫᑦᒧᐊᔨᓐᓯᒥ ᐊᑑᑎᒍᓐᓇᓚᐅᔪᕗᑦ ᐃᓅᓯᖃᕐᓂᒥᒃ 55 ᖁᓛᓂ ᓄᓇᓕᖓᓂ ᐅᒥᐅᔭᐅᑉ. ᐃᑲᔪᕐᑕᐅᓱᑎᒃ ᐱᓇᓱᐊᖃᑎᖃᕐᓂᒧᑦ ᑲᑎᕕᒃ ᐃᓕᓴᕐᓂᓕᕆᓂᕐᒥ ᐃᓕᓐᓂᐊᓂᓕᕆᓂᕐᒥ ᖃᐅᔨᒋᐊᕐᕕᒥᒃ ᒫᕆ-ᐃᓕᓐ ᒧᕇᓐᒥᒃ, ᐱᓇᓱᐊᕐᑕᐅᔪᖅ ᓯᕗᓂᖅ 2018 ᐱᒍᓐᓇᑎᑦᓯᓚᐅᔪᖅ ᐱᖓᓲᔪᕐᑐᓂᒃ ᑕᕐᕋᓕᔮᓕᐅᕐᓂᒥᒃ ᐃᓕᓐᓂᐊᑎᓂᒃ, ᐱᖓᓲᔪᕐᑐᓂᒃ Momo-Écoute-ᒥ ᐃᓕᓐᓂᐊᑎᓂᒃ ᐊᒻᒪᓗ ᓯᑕᒪᓂᒃ ᐃᓄᓐᓂᒃ ᐃᓕᓐᓂᐊᑎᓂᒃ ᐊᑐᕐᑎᓯᓂᕐᒥᒃ ᐊᑦᔨᐅᖏᑦᑐᒥᒃ ᐃᓗᕐᖁᓯᕐᒧᑦ ᑕᐅᕐᓯᑲᑦᑕᐅᑎᓂᕐᒧᑦ. ᑖᒃᑯᐊ ᒪᓕᑦᑕᐅᓚᐅᔪᑦ ᑌᕕᑦ ᓚᒪᖕᑌᓐᒧᑦ, ᑕᕐᕋᓕᔮᓕᐅᕐᓂᒥᒃ ᐃᓕᓐᓂᐊᑎᑦᓯᔨ, ᐊᒻᒪᓗ ᕕᑎᕆ ᓚᐳᐁᑦᒧᑦ, ᐃᓄᓕᕆᔨᒧᑦ. ᒫᕆ-ᐃᓕᓐ ᒧᕇᓐ ᐊᒻᒪᓗ ᐊᒥᓖ ᐱᐊᓘ ᐊᐅᓪᓚᖃᑕᐅᓚᐅᔪᒻᒥᔪᑦ. ᐃᓄᓕᕆᔨ ᐊᒥᓖ ᐱᐊᓘ ᐱᓇᓱᐊᕐᑎᑕᖅ ᑲᑎᕕᒃ ᐃᓕᓴᕐᓂᓕᕆᓂᕐᒥ. ᐱᓇᓱᐊᖃᑎᓕᒃ ᐃᓕᓐᓂᐊᑎᓂᒃ ᐃᑲᔪᕐᑕᐅᒍᑎᑖᓲᓂᒃ ᑮᓇᐅᔭᑎᒍᑦ ᐃᓕᓴᕐᓂᓕᕆᓂᕐᒥ ᐃᓕᓐᓂᐊᕆᐊᓪᓚᑐᓄᑦ ᐳᕐᑐᓂᕐᓴᒋᐊᓪᓚᒥ ᐃᓕᓐᓂᐊᓂᕐᒥᒃ.

ᐊᐅᓪᓚᓂᖏᑦ ᐊᑦᔨᒌᖕᖏᑐᓂᒃ ᑐᕌᒐᖃᓚᐅᔪᕗᑦ, ᐃᓚᐅᑎᓪᓗᒍ ᓀᑦᑐᒥᒃ ᑕᕐᕋᓕᔮᓕᐅᕐᓂᒥᒃ ᐅᓂᒃᑳᑐᒥᒃ (ᑕᕐᕋᓕᔭᐅᓕᕐᓂᖅ ᐃᓕᓐᓂᐊᑎᓂᒃ), ᐃᓕᓐᓂᐊᕕᓐᓂ ᖃᕆᐊᒥ ᐃᓕᓐᓂᐊᑎᑦᓯᓂᕐᒥᒃ ᐊᒻᒪᓗ ᐅᓪᓛᕈᒥᑕᕐᓂᒧᑦ ᑲᑐᑦᔨᖃᑎᒌᑦ (Momo Écoute) ᐊᒻᒪᓗ ᑐᓴᕐᑎᓯᓂᖅ ᐊᕐᖁᓯᐅᕐᓂᒥᒃ ᐳᕐᑐᓂᕐᓴᒋᐊᓪᓚᒥ ᐃᓕᓐᓂᐊᓂᕐᒧᑦ (ᐃᓄᐃᑦ ᐃᓕᓐᓂᐊᑏᑦ). ᐱᒍᒪᔭᖓ ᐋᕐᕿᓱᐃᓯᒪᔪᐃᑦ ᑖᑦᓱᒥᖓ ᐊᒻᒪᓗ ᐃᓚᐅᔪᐃᑦ ᓴᓇᓂᕐᒥᒃ ᑲᑎᐅᑎᓂᖏᓐᓂᒃ ᓄᓇᓕᖓᑕ ᐊᒻᒪᓗ ᐱᒍᒪᔭᐅᓕᕐᑎᓯᓂᕐᒥᒃ ᐱᐅᔪᓂᒃ ᐱᓇᓱᐊᕐᑕᐅᔪᓂᒃ, ᑐᑭᓕᓐᓂᒃ ᐊᑐᕐᑕᐅᔪᓂᒃ ᐊᒻᒪᓗ ᐃᓅᓯᖏᓐᓂᒃ ᐃᓄᖏᑦᑕ ᐅᑭᐅᕐᑕᑐᒥᐅᑦ.

ᑌᒣᒻᒪᑦ, ᑐᔪᕐᒥᐅᓂᖓ ᐃᓚᒌᓂ ᐱᐅᓂᕐᐸᐅᓚᐅᔪᖅ ᐃᓕᓐᓂᐊᑏᑦ ᑖᕙᓃᓐᓂᖏᓐᓂ. ᑐᕐᓱᖅ ᒥᕐᖑᐃᓯᕐᕕᖓᓅᕈᓐᓇᓯᓚᐅᔪᒻᒥᔪᑦ, ᐊᖏᓂᕐᐹᖅ ᑯᐯᒻᒥ.

ᓄᐊᑕᐅᒪᔪᖅ ᓀᑦᑐᐃᑦ ᑕᕐᕋᓕᔮᓕᐊᕕᓃᑦ ᓴᓇᔭᐅᒪᔪᑦ ᐃᓕᓐᓂᐊᑎᓄᑦ ᓄᐃᑎᑕᐅᓛᕐᑐᖅ ᒣᖑᓛᕐᑐᒥ. ᒫᓐᓇᐅᔪᕐᓕ, ᑕᑯᑐᐊᕈᑦᓯᐅᒃ, ᐊᐱᕆᓛᕐᖃᓯᐅᒃ ᐅᓂᑳᖁᓗᒋᑦ ᐊᒪᕈᕐᓂᒃ ᑐᑦᑐᓂᓪᓗ ᑲᑎᓯᓂᕕᓂᖏᑦ ᐳᐃᒍᑦᓴᐅᖏᑦᑐᖅ….

ᐋᕐᕿᓱᐃᔪᕕᓃᑦ ᓇᑯᕐᒦᕈᒪᔪᑦ ᐃᓄᐃᑦ ᖃᖓᑦᑕᔫᖏᓐᓂᒃ, ᓄᑖᓂᒃ ᐊᕐᖁᓯᐅᕐᓂᒧᑦ ᐃᓕᓐᓂᐊᑎᑕᐅᓂᖓᑦ – ᐃᓕᓐᓂᐊᑎᑦᓯᓂᕐᒧᑦ ᓄᓇᖃᕐᖄᓯᒪᔪᓂᒃ ᐊᒻᒪᓗ ᑕᕐᕋᒥ ᑲᓇᑕᒥ, ᑲᑎᕕᒃ ᐃᓕᓴᕐᓂᓕᕆᓂᖅ, ᐃᓚᒌᓴᒃᑯᑦ ᐊᒻᒪᓗ ᐃᓕᓐᓂᐊᕕᒻᒪᕆᖓᓂ ᒫᑦᒧᐊᔭᓐᓯᒥ ᑮᓇᐅᔭᖃᕐᑎᓯᔨᖏᑦ – ᐃᑲᔪᕐᓯᓯᒪᓂᖏᓐᓄᑦ ᑮᓇᐅᔭᑎᒍᑦ.