ᐱᓇᓱᑦᑏᑦ ᑐᓴᕈᑎᖏᑦ ᐱᐅᓯᒋᐊᕐᑕᐅᓯᔪᑦ! ᓄᑖᖅ ᑕᐅᑦᑐᕆᓚᖓᓯᔭᖓ ᐱᐅᓴᐅᑎᓕᒃ ᑕᑯᒥᓇᕐᓴᐅᑎᓂᒃ ᓴᓇᔭᐅᓚᐅᔪᔪᓂᒃ ᐃᓚᐅᑦᓱᑎᒃ ᐊᓕᐊᓇᕐᑐᐹᓗᒻᒧᑦ ᐱᒋᐊᕐᑎᓯᒍᑎᒧᑦ ᐱᓇᓱᑦᑎᑕ ᐊᑯᓂᒐᓚᐅᓕᕐᑐᖅ ᐱᓇᓱᑦᑕᖓᓄᑦ.
ᑲᑎᕕᒃ ᐃᓕᓴᕐᓂᓕᕆᓂᕐᒥ, ᕿᓂᖏᓐᓇᓕᒫᕐᓲᖑᕗᒍᑦ ᓄᑖᓂᒃ ᐱᑐᒍᑎᑦᓴᓂᒃ ᓄᓇᕕᒻᒥᐅᓄᑦ. ᑌᒣᒻᒪᑦ ᐊᓕᐊᓱᑦᓴᖑᐊᓕᕐᖁᒍᑦ ᐃᓕᑦᓯᓄᑦ ᐅᓐᓂᓯᐅᕈᑎᖃᕆᐊᒥᒃ ᓄᑖᖑᓂᕐᐹᒥᒃ ᐱᒋᐊᕐᑎᑕᑦᑎᓂᒃ: ᑭᓗᐃᑦ | KILUIT
ᐱᒋᐊᖕᖓᓚᐅᔪᔪᖅ ᐃᓱᒪᒥᒃ: ᐊᓪᓚᓴᕈᑦᑖ ᑐᓴᕐᑎᓯᒍᑎᓂᒃ ᑎᑭᑎᑕᐅᖃᑦᑕᓛᕐᑐᓂᒃ ᐊᑐᓂ ᐊᒻᒪᓗ ᐃᓘᓐᓇᓯᐊᖏᓐᓄᑦ ᐊᓪᓚᑖᕐᕕᒥ ᐃᑦᓯᕕᓐᓄᑦ ᓄᓇᕕᐅᑉ ᐃᓗᐊᓂ? ᐱᐅᔪᒋᐊᓪᓚᐅᓂᐊᕐᒪᑦ, ᖃᓄᐃᓕᕕᖃᕈᓐᓇᑐᒍᑦ ᐃᓕᓐᓂᐊᕕᓕᒫᑦᑎᓂᒃ ᐃᓕᓐᓂᐊᑎᓂᓪᓗ ᐃᑲᔪᕐᑎᖃᕈᒪᓗᑕ ᐊᑎᑦᓴᖓᓂᒃ ᐃᓱᒪᓕᐅᖃᑎᒋᓗᒋᑦ!
ᕕᕈᐊᕆᐅᓚᐅᔪᔪᒥ, ᐃᑲᔪᕐᑎᖃᕐᓱᑕ ᐃᓕᓐᓂᐊᕖᑦ ᐊᖓᔪᕐᖄᖏᓐᓂᒃ ᐃᓕᓐᓂᐊᑎᓯᔨᓂᓪᓗ, ᐱᓕᐅᑎᒍᑎᒥᒃ ᐱᒋᐊᕐᑎᓯᓚᐅᔪᔪᒍᑦ ᐃᑲᔪᕐᓯᒍᑎᒋᑦᓱᒍ ᕿᓂᕐᓂᒥᒃ ᐊᑎᑦᓯᐊᖑᓂᕐᐹᒥᒃ ᑐᓴᕐᑎᓯᒍᑎᑦᑎᓄᑦ. ᐃᓕᓐᓂᐊᖃᑎᒌᓕᒫᑦ ᑲᑎᕕᒃ ᐃᓕᓴᕐᓂᓕᕆᓂᐅᑉ ᐃᓕᓐᓂᐊᕕᖏᓐᓂ ᓄᐃᑦᓯᒍᓐᓇᑎᑕᐅᓚᐅᔪᔪᑦ ᐊᑕᐅᓯᕐᒥᒃ ᐊᑎᑦᓴᖁᑎᒥᓂᒃ ᒪᓕᑦᑎᖃᕐᑎᓗᒍ ᐅᓕᕐᓀᕈᑎᖓᓂᒃ ᐊᒻᒪᓗ ᑐᑭᓯᒍᑎᓂᒃ ᓱᒧᑦ ᐊᑎᑦᓴᖅ ᓂᕈᐊᕐᒪᖔᕐᒥᐅᒃ.
ᐃᓚᐅᔪᑦᓯᐊᖑᓚᐅᔪᒻᒪᑕ ᐊᓕᐊᑦᓱᑎᓪᓗ ᐃᓕᓐᓂᐊᑎᕗᑦ, ᐊᒥᓱᒐᓛᓄᑦ ᐊᑎᑦᓴᓄᑦ ᑎᑭᑕᐅᓚᐅᔪᔪᒍᑦ! ᑭᖑᓪᓕᐹᖓᓂ, ᐃᓕᓐᓂᐊᑎᑦᓯᔨᐅᑉ ᑳᑉᕆᐊᓪ ᐱᐊᔅᓇ ᐃᓕᓐᓂᐊᑎᖏᑦ ᐅᖂᑕᖅ ᐃᓕᓐᓂᐊᕕᒻᒥ ᐃᓄᒃᔪᐊᒥ ᓂᕈᐊᕐᑕᐅᓚᐅᔪᔪᑦ ᐊᑦᓰᓚᖓᑎᓪᓗᒋᑦ ᓄᑖᓂᒃ ᑐᓴᕐᑎᓯᒍᑎᑦᑎᓂᒃ: ᑭᓗᐃᑦ | KILUIT. ᐊᑎᑦᓯᐊᕌᓗᕋᑕᖅ, ᑭᓯᐊᓂ ᖃᓄᑦᓯᐊᖅ ᑭᓗᐃᑦ
ᑭᓗᐃᑦ ᐅᕝᕙᓗ kiluit, ᒥᕐᓱᓂᐅᕗᑦ ᐊᑐᓲᖒᑦᓱᑎᒃ ᐃᓄᐃᑦ ᐃᓐᓄᕌᑦᓴᔭᖏᓐᓂᒃ ᒥᕐᓱᑐᖃᓕᕐᒪᑦ. ᑕᒪᓐᓇ ᐃᓱᒪᑦᑎᓃᑦᑎᓗᒍ, ᑐᓴᕐᑎᓯᒍᑎᕗᑦ ᑭᓗᐃᑦ ᐅᕝᕙᓗ Kiluit ᑐᕌᖓᔪᑦ ᑲᑎᕐᓱᐃᓂᕐᒧᑦ ᐊᒥᓱᓂᒃ ᐱᓇᓱᑦᑕᐅᓯᒪᔪᓂᒃ ᐊᒻᒪᓗ ᐱᓇᓱᑦᑕᐅᔪᓂᒃ ᑲᑎᕕᒃ ᐃᓕᓴᕐᓂᓕᕆᓂᕐᒧᑦ! ᑐᓴᕐᑎᓯᒍᑎᕗᑦ, ᑕᕐᕿᖅ ᑖᓐᓇ ᐱᒋᐊᕋᑖᕐᑎᓗᒍ ᑎᑭᑎᑕᐅᓚᐅᔪᔪᑦ ᐊᓪᓚᑖᕐᕕᓂ ᐃᑦᓯᕕᓕᒫᓄᑦ ᓄᓇᕕᒻᒥ, ᓄᐃᑦᓯᔪᑦ ᐊᑯᓂ ᐱᓇᓱᑦᑎᒋᓕᕐᑕᑎᓐᓂᒃ, ᐊᑦᔨᐅᖏᑦᑐᓂᓪᓗ ᐊᒻᒪᓗ ᐊᓕᐊᓇᕐᑐᓂᒃ ᑐᓴᒃᑲᓂᕈᑎᓂᒃ, ᐱᓇᓱᒐᕐᑖᖑᒍᓐᓇᑐᓂᒃ ᐊᒻᒪᓗ ᐊᓯᖏᓐᓂᒃ ᐊᒥᓱᒋᐊᓪᓚᓂᒃ!
ᐊᓕᐊᒍᑎᓕᕋᑕᐅᕗᒍᑦ ᑖᑦᓱᒥᖓ ᓄᑖᒥᒃ ᐱᒋᐊᕐᑐᒥᒃ ᓂᕆᐅᑦᓯᐊᓱᑕᓗ ᐃᓕᑦᓯᓂᒃ ᑐᓴᕐᓂᓴᑦᑎᓂᒃ!
ᑎᑭᑕᐅᓯᒪᓕᕐᖀᑦ ᑐᓴᕈᑎᑎᓐᓄᑦ ᑭᓗᐃᑦ | KILUIT? ᐊᑦᔨᖑᐊᒥᒃ ᑎᑭᑎᑦᓯᒍᓐᓇᓯᐊᕐᑐᑎᑦ ᐅᕗᖓ ✉