ᖃᐅᔨᒋᐅᕆᑦᓯᐁ ᔩᓂ ᖃᕐᖄᔪᒃ-ᐸᒃᔅᓕᒥᒃ, 2014-ᒥ ᑯᐯᒻᒥ ᓄᓇᖃᕐᖄᓯᒪᔪᑦ ᓱᑯᐃᔦᓂᕐᒥ ᑕᑯᔭᒐᖃᕐᑎᓯᑎᓪᓗᒋᑦ ᓵᓚᖃᓚᐅᔪᔪᒥᒃ.

2019 | 04 | 4
ᐅᓂᒃᑳᑦ

ᑕᑯᒋᐊᕐᓗᒋᑦ ᑯᐯᒻᒥ ᓱᖃᑦᓯᑎᑦᓯᒍᑎᐅᓚᐅᔪᑦ ᐃᓕᓴᕐᓂᓕᕆᓂᕐᒧᑦ ᐱᓇᓱᐊᕈᓯᐅᓚᐅᔪᒥ ᑰᑦᔪᐊᒥ, ᑲᑎᓯᓚᐅᔪᕗᒍᑦ ᔨᓂ ᖃᕐᖄᔪᖅ-ᐳᒃᔅᓕᒥᒃ, ᓵᓚᖃᕐᓯᒪᔪᒥᒃ 2014-ᒥ ᑯᐯᒻᒥ ᓄᓇᖃᕐᖄᓯᒪᔪᑦ ᓱᑯᐃᔦᓂᕐᒧᑦ ᑕᑯᑦᓴᐅᑎᑦᓯᑎᓪᓗᒋᑦ. ᐃᓱᒪᒋᔭᒥᓂᒃ ᐅᖄᓚᐅᔪᖅ ᖃᓄᓪᓗᐊᑎᒋ ᐱᒻᒪᐅᓯᒪᓂᖓᓂᒃ ᐊᑑᑎᓯᒪᔭᖓ, ᖃᓄᕐᓗ ᐱᐅᔪᒥᒃ ᐊᑦᑐᐃᓂᖃᓯᒪᒻᒪᖔᑦ ᐃᓅᓯᖓᓂ ᐊᒻᒪᓗ ᐱᓇᓱᒐᕐᒧᑦ ᐱᕙᓪᓕᐊᓂᖓᓂ.

ᐅᖃᐅᑎᒍᓐᓇᕿᑎᒎ ᓇᓂ ᐃᓅᓕᕐᑐᕕᓂᐅᒻᒪᖔᕐᐱᑦ ᓱᓇᒥᓪᓗ ᐱᓇᓱᐊᕐᒪᖔᕐᐱᑦ ᐅᓪᓗᒥᐅᑎᓪᓗᒍ?

“ᐃᓅᓕᕐᑐᕕᓂᐅᕗᖓ ᐳᕕᕐᓂᑐᒥ.  ᐅᓪᓗᒥ ᒪᓐᑐᕆᐊᓪᒥᐅᖑᔪᖓ ᑭᓯᐊᓂ ᐊᐅᓪᓚᕋᓕᓲᖑᔪᖓ ᕃᒃᓚᓐ ᐅᔭᕋᓐᓂᐊᕕᒻᒥ ᐱᓇᓱᑦᑎᓴᕐᓯᐅᓂᕐᒧᑦ ᐃᓱᐊᕐᓭᔨᐅᒐᒪ.”

2014-ᖑᑎᓪᓗᒍᓵᓚᖃᓚᐅᔪᒐᕕᑦ ᑯᐯᒻᒥ ᓄᓇᖃᕐᖄᓯᒪᔪᑦ ᓱᑯᐃᔦᓂᕐᒥ ᑕᑯᔭᒐᖃᕐᑎᓯᑎᓪᓗᒋᑦ ᐊᓱᐃᓛᓪᓗ ᑲᓇᑕᓕᒫᒥ ᓱᑯᐃᔦᓂᕐᒥᒃ ᑕᑯᔭᒐᖃᕐᑎᓯᓂᖓᓅᕐᓯᒪᓚᐅᔪᑦᓱᑎᒃ ᑌᑲᓂᓗ ᐊᒥᓱᒐᓚᓐᓂᒃ ᓵᓚᖃᐅᑎᑖᓚᐅᔪᑦᓱᑎᑦ.  ᐃᓅᑦᓱᑎᑦ ᐃᓅᓱᑦᑑᓱᑎᒃᑕᒪᓐᓇᓕ ᐃᓕᓐᓄᑦ ᖃᓄᖅ ᑐᑭᖃᓚᐅᔪᕙ?

“ᖁᕕᐊᓱᑦᑐᒪᕆᐅᓚᐅᔪᕗᖓ ᓯᕘᕋᕐᓱᖓᓗ.  ᑭᓯᐊᓂ ᐅᑉᐱᕆᔭᖃᓚᐅᔪᒐᒪ ᓵᓚᓐᓃᑐᐃᓐᓇᕆᐊᖃᕆᐊᒥᒃ.  ᐱᓯᑎᐅᓂᕐᐹᕌᓘᔪᕆᖕᖏᑲᓗᐊᕐᓱᖓ ᑭᓯᐊᓂ ᖁᓚᖕᖏᓯᐊᓚᐅᔪᒐᒪ ᐱᓇᓱᐊᕐᓯᒪᔭᕐᒪ ᐱᐅᔪᓪᓚᕆᐅᓂᖓᓂᒃ ᖁᓚᕆᓇᖓᓗ ᐃᒻᒥᓂᒃ.”

ᓱᓀᑦ ᐃᓱᒪᒋᕐᖄᓚᐅᔪᕕᒋᑦ ᑎᑭᒋᐊᖕᖓᓕᕐᓱᑎᑦ ᑕᑯᔭᒐᖃᕐᑎᓯᔪᓄᑦ?  ᖃᓄᖅ ᐃᑉᐱᓂᐊᕐᓇᓚᐅᔪᕙ ᐱᓕᐅᑎᖃᑎᖃᕆᐊᒥ ᐃᓕᓐᓂᐊᑎᓂᒃ ᓇᑭᑐᐃᓐᓇᓕᒫᖅ ᑲᓇᑕᒥ ᐱᓯᒪᔪᓂᒃ?

“ᐅᖃᐅᓯᑦᓭᕈᑎᓯᒪᓐᓇᓚᐅᔪᔪᖅ ᐱᓕᐅᑎᖃᑎᐊᓗᒋᔦᑦ!  ᐃᓚᖏᑦ ᐱᓇᓱᐊᕐᑕᐅᓯᒪᔪᐃᑦ ᑐᑭᓯᒐᓱᒋᐊᑐᔪᓪᓚᕆᐅᓚᐅᔪᒻᒪᑕ ᐃᒻᒥᓂᒃ ᖁᓚᓕᕐᓯᒪᒐᓚᖃᑦᑕᓯᑦᓱᖓ.  ᑭᓯᐊᓂ ᐊᓯᖏᓐᓂᒃ ᐃᓄᓐᓂᒃ ᓄᓇᖃᕐᖄᓯᒪᔪᓂᓪᓗ ᐃᓕᓐᓂᐊᑎᓂᒃ ᑲᑎᓯᒐᒪ:  ᐅᕙᓐᓂᒃ ᐃᑲᔪᕐᓯᒪᓪᓚᕆᓚᐅᔪᔪᐃᑦ, ᐅᕙᓐᓂᒃ ᖃᓄᐃᒍᓐᓀᓕᐅᒥᑎᑦᓯᓚᕿᑦᓱᑎᒃ ᐃᓱᕐᕆᓕᐅᒥᑎᑦᓯᓚᐅᔪᒻᒪᑕ.  ᐃᑉᐱᒋᓕᓚᐅᔪᕗᖓ ᐃᓂᖃᑦᓯᐊᕆᐊᒥ ᐱᓕᐅᑎᓂᕐᒥ.”

ᓱᓀᑦ ᐃᕐᖃᐅᒪᓇᕐᓂᐸᐅᕙᑦ ᐃᓚᐅᓂᕆᓚᐅᔪᔭᕐᓂᑦ ᑲᓇᑕᓕᒫᒥ ᓱᑯᐃᔦᓂᕐᒥᒃ ᑕᑯᔭᒐᖃᕐᑎᓯᓂᕐᒥ?

“ᑲᑎᓯᒋᐊᒥ ᐊᓯᖏᓐᓂᒃ ᐃᓄᓐᓂᒃ ᓄᓇᖃᕐᖄᓯᒪᔪᓂᓪᓗ ᐃᓕᓐᓂᐊᑎᓂᒃ ᐅᕙᓐᓄᑦ ᐃᕐᖃᐅᒪᓇᕐᓂᐹᖏᑦᑕ ᐃᓚᖓᑦ.  ᖃᐅᔨᒪᐅᑎᖃᑦᑕᖏᓐᓇᑐᒍᑦ ᖃᕆᑕᐅᔦᑦ ᑐᓴᕈᑎᖏᑦ ᐊᑐᕐᓱᒋᑦ.  ᖁᕕᐊᒋᓂᕐᐹᒪ ᑐᖓᓕᐊ ᐱᓂᐊᕐᓂᖃᕐᑎᓯᓚᐅᔪᒻᒪᑕ ᓴᓇᓂᒻᒪᕆᓐᓄᑦ ᖃᐅᔨᒪᔨᐅᓂᕐᒨᓕᖓᔪᓂᒃ.  ᐃᓚᖓᑦ ᓱᖃᑦᓯᑎᑦᓯᒍᑏᑦ ᐱᖕᖑᐊᓂᐅᓚᐅᔪᔪᖅ:  ᐱᖕᖑᐊᖃᑎᐅᓯᓚᐅᔪᒐᒪ ᐱᑦᓯᐊᓱᖓᓗ, ᐱᔭᕆᐊᑭᑦᑐᐹᓘᑦᓱᓂ, ᐃᓱᒪᒋᐊᓪᓚᖏᒻᒪᕆᑦᓱᖓᓘᓐᓃᑦ ᓱᒋᐊᖃᕐᒪᖔᕐᒪ ᑲᔪᓯᑐᐃᓐᓇᓱᖓ.  ᐊᓱᐃᓛ ᐅᖃᐅᑎᔭᐅᓯᒻᒥᓱᖓ ᓱᓂᒃᑲ ᑌᒣᓕᖓᓪᓗᑐᕐᓂᖏᓐᓂᒃ ᓴᓇᓂᒻᒪᕆᓐᓄᑦ ᖃᐅᔨᒪᔨᐅᓂᕐᓅᓕᖓᑦᓱᑎᒃ – ᐱᓇᓱᐊᒐᒋᕋᔭᕐᓗᒋᑦ ᐅᓇᒻᒥᒋᖏᓐᓇᓲᕆᑦᓱᒋᑦ ᑭᓯᐊᓂ ᐃᓕᓐᓂᐊᓚᐅᕐᓯᒪᓇᒋᑦ.  ᐅᐱᒍᓱᓪᓚᕆᓚᐅᔪᕗᖓ ᑕᒪᑦᓱᒥᖓ ᐱᔭᖃᕆᐊᒥᒃ!”

ᖃᓄᓪᓗᐊᑎᒋ ᐃᓕᓐᓄᑦ ᐱᒻᒪᕆᐅᕙ ᑯᐯᒻᒥ ᓄᓇᖃᕐᖄᓯᒪᔪᑦ ᓱᑯᐃᔦᓂᕐᒥᒃ ᑕᑯᔭᒐᖃᕐᑎᓯᓂᖏᑦ?

“ᐃᓅᓯᕋᓂᒃ ᐊᖏᔪᒥᒃ ᐱᕙᓪᓖᓯᒪᔪᖅ.  ᐃᓄᓐᓃᒍᒪᓲᖑᒐᒪ, ᑕᑯᕐᖓᓲᖑᓇᖓ, ᑭᓯᐊᓂ ᖃᐅᔨᓚᐅᕐᓯᒪᓚᐅᔪᖕᖏᓇᒪ ᐊᒥᓱᓄᑦ ᐃᓄᓐᓄᑦ ᐅᖃᓕᒪᒍᓐᓇᕆᐊᒥ ᖃᓄᐃᒋᓇᒍ.  ᐱᓇᓱᒐᕋᓂ ᒫᓐᓇ ᐅᕙᓐᓂᒃ ᐃᑲᔪᕐᓯᓯᒪᔪᖅ ᑕᒪᓐᓇ.  ᐱᓇᓱᑦᑎᓴᕐᓯᐅᓂᕐᒨᓕᖓᔪᓂᒃ ᐃᓱᐊᕐᓭᔨᐅᑦᓱᖓ, ᐊᒥᓱᕕᑦᓱᖓ ᓇᐅᓕᒫᑐᐃᓐᓇᓄᑦ ᐅᖃᓕᒪᒋᐊᖃᓲᖑᒐᒪ:  ᑕᒪᓐᓇ ᐊᕐᓱᕈᐊᓚᒍᑎᒋᓲᕆᖕᖏᒪᕆᑦᑕᕋ, ᐅᑉᐱᕆᔭᖃᕋᒪ ᐃᒻᒥᓂᒃ ᐱᔪᓐᓇᓂᒃᑲᓂᓗ.

ᑲᓇᑕᓕᒫᒥ ᑕᑯᔭᒐᖃᕐᑎᓯᔪᓂ, ᓵᓚᖃᐅᑎᑖᓚᐅᔪᕗᖓ Weizmann ᑲᓇᑕᒥ ᓱᑯᐃᔦᓂᕐᒥ ᐱᔭᖃᕈᑎᓄᑦ ᓵᓚᖃᐅᑎᒥᒃ.  ᑖᓐᓇ ᐱᕕᖃᓚᕿᒍᑎᒋᓚᐅᔪᔭᕋ ᐅᐱᕐᖔᑯᑦ ᓱᑯᐃᔦᓂᕐᒥ ᐱᓇᓱᐊᕐᑕᐅᔪᓄᑦ ᐃᓚᐅᒍᓐᓇᓚᕿᒍᑎᒋᑦᓱᒍ Weizmann Institute-ᒥ ᑎᒥᐅᔪᖁᑎᖓᓂ Israel-ᒥ! ᖁᓕᓪᓗ ᓯᑕᒪᐅᔪᖏᒐᕐᑐᓂᒃ ᐅᑭᐅᖃᓚᐅᔪᕗᖓ, ᐃᓄᑑᑦᓱᖓ ᐊᐅᓪᓚᕆᐅᕐᓱᖓ ᐊᒻᒪᓗ ᓄᓇᒐᓂᑦ ᐅᖓᓯᑦᑐᐊᓗᓕᐊᕐᓯᒪᑦᓱᖓ.  ᐃᓗᕐᕈᓯᖃᑎᒋᖕᖏᑕᒃᑲᓂᒃ ᖃᐅᔨᒋᐅᕐᓇᑐᐊᓗᒻᒦᓚᐅᔪᕗᖓ; ᐃᓘᓐᓈᓗᖏᑦ ᓱᖏᐅᓐᓂᑲᓂᑦ ᐊᑦᔨᐅᖏᑦᑐᐊᓘᑦᓱᑎᒃ.  ᖄᔫᖃᓕᕆᐊᖓ ᖃᐅᔨᑎᑦᓯᒍᑏᑦ ᖁᖁᐊᔫᕌᓗᖃᕐᓱᑎᒃ:  ᓯᕗᓪᓕᐹᒥ ᐊᑑᑎᑦᓱᒍ, ᑲᑉᐱᐊᓱᓐᓂᒧᑦ ᑎᑭᑕᐅᓚᐅᔪᕗᖓ.  ᐃᓘᓐᓇᑕ ᓄᓇᐅᑉ ᐊᑖᓃᑦᑐᓕᐊᕆᐊᖃᕐᓱᑕ ᐊᓐᓇᐅᒪᕕᓕᐊᖑᔪᒧᑦ – 100-ᒐᓚᖏᓐᓃᓱᑕ ᐃᓕᓐᓂᐊᑎᐅᑦᓱᑕ ᓇᑭᑐᐃᓐᓇᓕᒫᖅ ᓄᓇᕐᔪᐊᒥᑦ ᐱᓯᒪᑦᓱᑕ ᐅᑕᕐᕿᖃᑎᒌᑦᓱᑕ ᖃᐅᔨᑎᑦᓯᒍᑎᐅᑉ ᐊᓂᒍᕐᓂᓴᖓᓂᒃ!

ᑕᒪᓐᓇ ᐊᐅᓪᓚᓯᒪᓂᕆᓚᐅᔪᔭᕋ ᓇᑯᕐᒪᑦ, ᖃᐅᔨᒪᓕᕐᑐᖓ ᓇᒧᑐᐃᓐᓇᖅ ᐃᓄᑑᓗᖓ ᐊᐅᓪᓚᕈᓐᓇᓂᕋᓂᒃ ᖃᓄᐃᑦᑐᑐᐃᓐᓇᓂᓪᓗ ᐃᓄᓐᓂᒃ ᓇᓂᒥᐅᑐᐃᓐᓇᓂᒃ ᑲᑎᓯᖃᑦᑕᓯᒪᓕᕐᓱᖓ ᙯᕐᖁᔨᓯᒪᓕᕐᑐᓂᒃ ᓂᐅᕐᕈᖁᔨᑦᓱᑎᒃ ᓄᓇᒥᓄᑦ China-ᒧᑦ, Switzerland-ᒧᑦ, Australia-ᒧᑦ, ᐊᓯᖏᓐᓄᓗ.”

ᓱᓇᓱᐊᕐᓯᒪᕕᑦ ᑌᒪᖕᖓᓂᑦ ᐳᕐᑐᓂᕐᓴᒥ ᐃᓕᓐᓂᐊᕇᓚᐅᔪᑦᓱᑎᓂᑦ?

“ᐃᓕᓐᓂᐊᕕᒻᒪᕆᒻᒥ ᐃᓕᓐᓂᐊᓚᐅᔪᕗᖓ CEGEP Marie-Victorin-ᒥ ᒪᓐᑐᕆᐊᓪᒥ.  ᐱᔭᕇᓚᐅᔪᕗᖓ ᐃᓘᓐᓈᒎᕐᑐᓂᒃ ᐃᓕᓐᓂᐊᒐᖏᓐᓂᒃ ᐊᓱᐃᓛ ᐃᓕᓐᓂᐊᓯᒻᒥᓱᖓ ᐃᓕᒃᑯᑦ ᐱᓪᓗᑯᒋᐊᓕᓕᕆᓂᕐᒥᒃ ᑭᓯᐊᓂ ᖃᐅᔨᑦᓴᐅᑎᒋᓚᐅᔪᒐᒃᑭᑦ ᐅᕙᓐᓅᓕᖓᑦᓯᐊᖏᒋᐊᖏᑦ ᑖᒃᑯᐊ ᐃᓕᓐᓂᐊᒉᑦ.  ᐃᓓᓐᓇᖏᑦ ᐃᓕᓐᓂᐊᒐᑦᓴᖏᑦ ᐅᕙᓐᓅᓕᖓᓚᐅᔪᔪᑦ.  ᑌᒪ, ᐊᓯᑦᔩᓕᓚᐅᔪᕗᖓ CEGEP Montmorency-ᒧᑦ ᓅᑦᓱᖓ ᐃᓕᓐᓂᐊᓯᑦᓱᖓ ᐃᓅᖃᑎᒌᓅᓕᖓᔪᓂᒃ ᐃᓕᓐᓂᐊᒐᕐᓂᒃ. ᓲᑭᐊᖑᒐᓗᐊᖅ, ᓄᕐᖃᕆᐊᖃᓚᐅᔪᕗᖓ ᐅᑎᕆᐊᖃᕐᓱᖓᓗ ᐊᓂᕐᕋᒧᑦ ᓴᓪᓗᓄᑦ ᓇᖕᒥᓂᕐᒨᓕᖓᔪᓂᒃ ᐱᑦᔪᑎᖃᕐᓱᖓ.”

ᐃᓕᓐᓂᐊᕕᒻᒪᕆᒻᒥ ᐃᓕᓐᓂᐊᓂᕕᓂᑎᓐᓂᒃ ᓱᓇᒥᒃ ᐱᑖᕐᕕᖃᕐᓯᒪᕕᑦ?

“ᐃᓕᑦᓯᓚᐅᔪᕗᖓ ᐃᒻᒥᓂᕐᓱᓗᖓ ᐃᓅᓂᕐᒥᒃ, ᑮᓇᐅᔭᒃᑲᓂᒃ ᑐᕌᒐᖃᕐᑎᓯᓂᕐᒥᒃ, ᐃᓄᑑᓗᖓ ᐱᒍᓐᓇᓂᕐᒥᒃ…ᐃᓄᑭᑦᑐᒥ ᓄᓇᓕᒻᒥᐅᔭᐅᒐᒪ ᐃᑲᔪᕐᑎᒌᓐᓂᒥᒃ ᐃᓅᓯᓕᓐᓂᑦ.  ᐃᓄᑑᔪᖃᓕᑐᐊᕋᒥ, ᐊᒥᓲᕗᑦ ᐱᓂᐊᕐᓂᕆᒍᓐᓇᑕᑎᑦ:  ᑲᒪᒍᓐᓇᓚᕆᒋᐊᖃᕐᑐᑎᑦ ᐱᔭᖃᕈᑎᓂ ᐱᑦᔪᑎᒋᑦᓱᒍ ᐅᓇ ᑭᓇᒥᓪᓘᓃᑦ ᐃᑲᔪᕐᑎᓴᖃᕐᓂᐊᖏᓐᓇᕕᑦ.  ᑲᒪᑦᓯᐊᑐᔭᐅᒌᕐᓯᒪᑦᓱᖓ ᑭᓯᐊᓂ ᖃᐅᔨᒋᐅᖃᑦᑕᓚᐅᔪᕗᖓ ᐱᒍᓐᓇᐅᑎᒋᔪᕆᓯᒪᖕᖏᑕᒃᑲᓂᒃ.  ᐃᓕᓐᓂᐊᕕᒻᒪᕆᒻᒦᓱᖓ ᐊᑑᑎᔭᕕᓂᒃᑲ ᐱᕈᒋᐊᓪᓚᕈᑎᒋᓯᒪᔭᒃᑲ.  ᑭᓇᑐᐃᓐᓇᒧᑦ ᐅᓐᓂᑑᑎᒋᕙᒃᑲ!  ᐅᕙᖓᓕ, ᐅᑎᕈᒪᔪᖓ ᐃᓕᓐᓂᐊᕕᒻᒧᑦ ᐃᓕᓐᓂᐊᒐᒃᑲᓂᓗ ᐱᔭᕇᕐᓗᖓ.”