ᖃᐅᔨᒪᒐᑦᓯ ᓇᑖᓴ ᒪᒃᑖᓄᓪ ᐱᓇᓱᑦᑐᓕᕆᕕᒃᑯᓂ ᑐᑭᒧᐊᕐᑎᓯᔨᐅᓯᒪᔪᖅ ᑲᑎᕕᒃ ᐃᓕᓴᕐᓂᓕᕆᓂᒃᑯᓂ. ᖃᐅᔨᒪᓕᕐᖀᑦ ᐅᓪᓘᖃᑦᑕᑐᓂ, ᓇᑖᓴ ᐱᓇᓱᐊᕈᑎᖃᖃᑦᑕᒪᑦ ᐅᖃᐅᓯᐅᑉ ᐁᑉᐹᓂ ᓴᒃᑯᐃᐸᓪᓕᐊᓂᕐᒥᒃ ᐃᓕᓐᓂᐊᑎᑕᐅᓂᐅᓲᓂ?

ᐱᓇᓱᐊᕐᓯᒪᓂᖏᑦ ᑐᓴᐅᒪᔭᐅᒋᐊᓖᑦ: ᓇᑖᓴ ᐱᓇᓱᒋᐊᖕᖓᓯᒪᔪᖅ ᖃᓪᓗᓈᑎᑐᑦ ᐅᖃᐅᓯᐅᑉ ᐁᑉᐹᓂ ᐃᓕᓐᓂᐊᑎᑦᓯᔨᐅᓂᕐᒥᒃ ᐊᒻᒪᓗ ᑌᒪ ᓅᑦᓱᓂ ᐱᓇᓱᑦᑐᓕᕆᕕᒃᑯᓄᑦ. 2021-ᖑᑎᓪᓗᒍ, ᓇᑖᓴ ᐅᑎᕐᓯᒪᔪᖅ ᐃᓕᓐᓂᐊᕕᒻᒧᑦ ᐃᓕᑕᕆᔭᐅᒍᑎᖃᓕᕐᓱᓂ ᐳᕐᑐᓂᕐᓴᐅᑉ ᐊᓪᓕᖓᓂ ᐃᓕᓐᓂᐊᑐᕕᓂᐅᑦᓱᓂ ᑲᓐᑯᐊᑎᐊ ᐃᓕᓐᓂᐊᕕᕐᔪᐊᖓᓂ, ᐃᓗᕐᕈᓯᖃᖃᑎᒌᖕᖏᑐᓄᑦ ᑐᓴᐅᒪᖃᑎᒌᑦᑎᓯᔨᐅᓂᕐᒥᒃ ᐅᖃᐅᓯᐅᑉ ᐁᑉᐱᐅᑎᖓᓂ ᐃᓕᓐᓂᐊᓂᕐᒥᒃ.

ᐃᓗᕐᕈᓯᖃᖃᑎᒌᖕᖏᑐᓂᑦ ᑐᓴᐅᒪᖃᑎᒌᑦᑎᓯᓂᖅ ᐱᒻᒪᕆᐅᑦᓱᓂ ᐃᓕᓐᓂᐊᑎᑕᐅᓂᐅᓲᖅ ᖃᓄᖅ ᐃᓗᕐᕈᓰᑦ ᓱᕐᕃᓲᖑᒻᒪᖔᑕ ᑐᓴᐅᒪᖃᑎᒌᓐᓂᐅᓲᒥᒃ. ᐃᓄᐃᑦ ᐱᐅᓯᒋᔭᖏᑎᒍᑦ ᓄᐃᑦᓯᒍᑎᒋᑦᓱᓂᒋᑦ ᑕᑯᑦᓴᐅᓱᑎᒃ ᐅᑉᐱᓂᖏᑦ, ᑭᓇᐅᓂᖏᑦ, ᖃᓄᐃᑦᑑᓂᖏᑦ ᐊᒻᒪᓗ ᖃᓄᐃᑦᑐᓂᒃ ᐃᓕᓐᓂᐊᓂᖃᕐᓯᒪᓂᖏᓐᓄᑦ ᐱᐅᓯᒋᔭᖏᑦ, ᐃᓅᖃᑎᒥᓄᑦ ᐅᕝᕙᓘᓐᓃᑦ ᐱᔪᓐᓇᐅᑎᖃᕐᓂᑯᑦ ᐃᓗᓕᖃᕐᓱᓂ. ᐊᓯᐊᒍᑦ ᐅᖃᐅᓯᕐᑎᒍᑦ, ᐃᓗᕐᕈᓯᖃᖃᑎᒌᖕᖏᑐᐃᑦ ᑐᓴᐅᒪᖃᑎᒌᓐᓂᖏᑎᒍᑦ ᑐᑭᓯᒪᒐᓱᐊᕐᓂᐅᓲᖅ ᖃᓄᖅ ᐊᑦᔨᒌᖕᖏᑐᓂ ᓄᓇᓕᕐᔪᐊᓖᑦ ᐊᒻᒪᓗ ᐃᓗᕐᕈᓯᓖᑦ ᐱᐅᓯᖃᓲᖑᒻᒪᖔᑕ, ᐅᖄᖃᑎᒌᓐᓂᖃᓲᖑᒻᒪᖔᑕ ᐊᒻᒪᓗ ᓯᓚᕐᔪᐊᒥᒃ ᑕᑯᓐᓇᕈᓯᖃᓲᖑᒻᒪᖔᑕ ᓯᓚᑎᖏᓐᓃᑐᓂ.

“ᑰᑦᔪᐊᕌᐱᒻᒥᐅᓴᔭᐅᕗᖓ, ᐊᓈᓇᒃᑰᑲ ᐃᓕᓐᓂᐊᑎᑦᓯᔨᐅᕕᒋᓯᒪᔭᖓᓂ. ᐊᑖᑕᒐ ᖃᓪᓗᓈᖑᓯᒪᔪᖅ, ᐊᒻᒪᓗ ᐊᓈᓇᒐ ᐃᓅᑦᓱᓂ, ᑌᒣᑦᓱᒍ ᑕᒪᓐᓇ ᐊᓕᐊᒋᔭᕋ ᐊᑦᔨᒌᖕᖏᑐᓂᒃ ᐃᓗᕐᕈᓯᖃᖃᑎᒌᖕᖏᓂᕐᒧᑦ ᑐᓴᐅᒪᖃᑎᒌᓐᓂᖅ ᐱᒻᒪᕆᐅᔪᖁᑎᒋᑦᓱᒍ. ᑌᒪᖕᖓᑦ ᑭᓇᐅᓂᕋᓂᒃ ᐃᓕᖓᓲᑐᖃᖅ; ᒪᕐᕉᒃ ᐃᓅᒃ ᐊᑯᓐᓂᖓᓃᑦᑐᑎᑐᑦ, ᐅᖃᐅᓯᐅᑉ ᐁᑉᐹᓅᔦᔪᑦᑎᑐᑦ ᑕᒪᒋᒃ ᖃᓪᓗᓈᑎᑐᑦ ᐅᖄᖃᑎᒌᕈᓐᓇᕋᓗᐊᕐᑎᓗᒋᑦ. ᑌᒣᒻᒪᑦ ᑕᒪᓐᓇ ᐅᕙᓐᓄᑦ ᐊᓐᓂᓇᕐᑐᒪᕆᒃ, ᑭᓯᐊᓂ ᐱᕙᓪᓕᐊᕋᓱᐊᒋᐊᖃᕐᒥᔪᒍᑦ ᓴᒃᑯᐃᐸᓪᓕᐊᓂᕐᒥᒃ ᐅᖃᐅᓯᐅᑉ ᐁᑉᐹᓂ ᐃᓕᓐᓂᐊᓂᕐᒥᒃ.”

ᑕᒐ ᓱᓇᐅᕙ ᓴᒃᑯᐃᐸᓪᓕᐊᒐᓱᐊᕐᓂᖅ ᐅᖃᐅᓯᐅᑉ ᐁᑉᐹᓂ ᐃᓕᓐᓂᐊᓂᕐᒥᒃ? ᓇᑖᓴᐅᑉ ᐃᓱᒪᒋᔭᖓᑎᒍᑦ, ᐃᓄᐃᑦ ᓲᖑᓂᕐᑖᐸᓪᓕᐊᖁᓪᓗᒋᑦ ᐊᒻᒪᓗ ᓇᒻᒥᓂᒃ ᒪᑭᑕᒐᓱᐊᕐᐸᓕᐊᖁᓪᓗᒋᑦ, ᐊᒻᒪᓗ ᐃᓱᒪᒋᒐᓱᐊᕐᓗᒍ ᐃᓗᕐᕈᓯᒋᔭᐅᔪᖅ ᓅᑉᐸᓕᐊᑦᑎᓗᒍ ᓲᖑᓂᖃᕐᓂᑯᑦ ᐃᓕᓐᓂᐊᓕᕈᑎᒃ ᐅᖃᐅᓯᐅᑉ ᐁᑉᐹᓂ. ᖃᕆᑕᐅᔭᑎᒍᑦ ᑐᓴᐅᒪᖃᑎᒌᕝᕕᒥ ᐊᑐᕐᓱᓂ, ᓇᑖᓴ ᐱᓇᓱᐊᖃᑦᑕᑐᖅ ᐃᑲᔪᕐᓯᒐᓱᐊᕐᓱᓂ ᐃᓗᕐᕈᓯᑎᒎᕐᑐᓂᒃ ᐃᓕᓐᓂᐊᕋᑦᓴᓂᒃ ᐃᓕᓐᓂᐊᑕᐅᒐᔭᕐᑐᓂᒃ ᐅᖃᐅᓯᐅᑉ ᐁᑉᐹᓂ ᓱᓕᑦᓯᐊᑐᒥ – ᑕᒪᓐᓇᓗ ᐊᑐᓕᕐᑎᑕᐅᖁᓪᓗᒍ ᓄᓇᕕᒻᒥᐅᑦ ᐃᓅᓯᖏᓐᓂ ᐊᒻᒪᓗ ᓲᖑᓂᕐᑖᐸᓪᓕᐊᑎᓪᓗᒋᑦ ᐃᓄᐃᑦ ᐃᓗᕐᕈᓯᖓᑦ.

ᓄᕐᕋᓕᐅᖑᓚᐅᔪᒥ, ᓇᑖᓴ ᐃᓚᐅᒐᓱᐊᕐᓯᒪᔪᖅ ᐊᒻᒪᓗ ᓵᓚᖃᕐᓱᓂ ᑲᓇᑕᒥ ᐱᔭᕇᒍᓯᕐᑕᐅᔪᕕᓃᑦ ᐊᑭᓕᐅᑦᔭᐅᓂᕐᒧᑦ ᓄᓇᐅᑉ ᐊᕕᑦᑐᓯᒪᔪᖏᑦᑕ ᐃᓅᑦᔪᓯᓕᕆᓂᕐᒥᒃ ᐊᒻᒪᓗ ᐃᓄᓕᕆᓂᕐᒥᒃ ᖃᐅᔨᓴᕐᓂᒧᑦ ᑲᑎᖕᖓᔨᖏᑦᑕ ᑲᓇᑕᒥ (SSHRC) ᐊᑖᒍᑦ ᐳᕐᑐᓂᕐᐹᒥ ᐃᓕᑕᕆᔭᐅᒍᑎᖃᕐᓂᒧᑦ ᐱᓕᐅᑦᔨᓂᖅ ᖃᐅᔨᓴᕈᑎᖃᕐᓂᒧᑦ ᐅᓐᓂᑑᑦᔨᒍᑎ ᐊᓪᓚᓯᒪᔭᖓᓄᑦ ᐃᓗᕐᕈᓯᖃᖃᑎᒌᖕᖏᑐᓂᒃ ᑐᓴᐅᒪᖃᑎᒌᑦᑎᓯᓂᖅ ᐊᒻᒪᓗ ᓴᒃᑯᐃᐸᓪᓕᐊᑎᑦᓯᓂᖅ ᐅᖃᐅᓯᕐᒥᒃ ᐃᓕᓐᓂᐊᓂᐅᔪᓂᒃ. ᓇᑖᓴ ᑕᑯᑦᓴᐅᑎᑦᓯᓂᖃᕐᓯᒪᔪᖅ ᖃᐅᔨᓴᕈᑎᕕᓂᕐᒥᓂᒃ ᖃᐅᐋᔩᒥᒃ ᖃᐅᐋᔩ ᓄᓇᓕᕐᔪᐊᑦ ᐊᕕᑦᑐᓯᒪᔪᐃᑦ ᑲᑎᖕᖓᓂᒻᒪᕆᖓᓂ ᐃᓕᓐᓂᐊᓂᕐᒥᒃ ᐊᒻᒪᓗ ᕃᒃᔭᕕᒃ ᐁᔅᓚᓐᒥ, ᐊᒻᒪᓗ ᐊᖏᕐᑕᐅᓯᒪᑦᓱᓂᓗ ᐊᓪᓚᓯᒪᔭᖏᑦ ᑐᓴᕋᑦᓴᓂᐊᕐᕕᒨᕐᑕᐅᖁᓪᓗᒋᑦ AlterNative-ᑯᓐᓄᑦ, ᓄᓇᓕᕐᔪᐊᖑᖃᑎᒌᖕᖏᑐᐃᑦ ᑐᓴᕋᑦᓴᓂᐊᕐᕕᖓ ᓄᓇᖃᕐᖄᓯᒪᔪᔦᑦ ᐃᓄᖁᑎᖏᑦᑕ.

“ᑐᒑᕋᒐ ᐃᑲᔪᕐᓯᒐᓱᐊᖁᓪᓗᖓ ᐊᓪᓚᓯᒪᔪᓕᕆᓂᕐᒥᒃ ᐊᒻᒪᓗ ᖃᐅᔨᓴᕐᓂᒥᒃ ᐅᖃᐅᓯᐅᑉ ᐁᑉᐱᐅᑎᖓᓂ ᐃᓕᓐᓂᐊᓂᕐᒥᒃ ᐃᓄᐃᑦ ᓄᓇᓕᖏᓐᓂ, ᐱᓗᐊᕐᑐᒥ ᓄᓇᕕᒻᒥ. ᖃᐅᔨᓴᕐᓂᖅ ᑕᑯᓐᓇᖑᐊᕐᑕᕋ ᐊᐳᑎᕐᑎᑐᑦ ᓄᑖᑦᓯᐊᖅ, ᐊᒻᒪᓗ ᐊᓪᓗᕆᐊᖃᑦᑕᓱᖓ ᑐᒥᓕᐅᕐᓱᖓ, ᖃᐅᔨᓴᕐᑎᓚᕆᖃᖃᑦᑕᓛᕐᒪᑦ ᐃᓄᓐᓂᒃ ᖃᐅᔨᓴᕐᑎᓂᒃ ᐃᑲᔪᕐᓯᖃᑦᑕᓛᕐᑐᓂ ᑕᒪᑦᓱᒧᐊᖓᓕᐊᔪᓂᒃ.”

ᐅᐱᕐᖓᓴᐅᓚᐅᔪᒥ, ᓇᑖᓴ ᒪᓂᔭᐅᓯᒪᔪᖅ ᐱᓇᓱᒐᕐᒥᒃ ᐃᓕᓐᓂᐊᑎᑦᓯᔨᒻᒪᕆᐅᓂᕐᒧᑦ ᒪᑭᐊᓪ ᐃᓕᓐᓂᐊᕕᕐᔪᐊᖓᓄᑦ ᒪᓐᑐᔨᐊᓪ, ᑯᐯᒃᒥ. ᓄᓇᕕᒻᒥᐅᖑᑦᓱᓂ ᐃᓕᓐᓂᐊᑎᑦᓯᔨᖕᖑᑐᖅ ᓯᕗᓪᓕᐅᓱᓂ ᒪᑭᐊᓪ ᐃᓕᓐᓂᐊᕕᕐᔪᐊᖓᓂ ᐊᒻᒪᓗ ᐱᓇᓱᐊᖃᑎᖃᖃᑦᑕᓛᕐᓱᓂ ᐊᓪᓚᕕᒻᒦᑎᓂᒃ ᓄᓇᖃᕐᖄᓯᒪᔪᐃᑦ ᐊᒻᒪᓗ ᐃᓄᐃᑦ ᐃᓕᓐᓂᐊᓂᖏᓐᓄᑦ.
ᐅᐱᓐᓇᖁᑎᑦ ᓇᑖᓵ!

ᐆᑦᑐᕋᓱᐊᕈᒪᕖᑦ ᐳᕐᑐᓂᕐᓴᕆᐊᓪᓚᒥ ᐃᓕᓐᓂᐊᓂᕐᒥᒃ?

ᑐᑭᓯᒋᐊᓪᓚᕋᓱᐊᕆᑦ ᐃᑲᔪᕐᓯᕈᑎᒋᓲᑦᑎᓂ ➔