ᐱᓇᓱᐊᕈᓯᓕᒫᒥ ᑲᖏᕐᓱᔪᐊᒥ ᐃᓚᒋᔭᐅᑎᓪᓗᒍ ᐊᓐᓇᐅᒪᒐᓱᐊᕐᓂᒧᑦ ᐱᓇᓱᐊᕈᓯᓕᒫᒥ. ᐊᑑᑎᓚᐅᔭᕗᑦ ᐃᔩᓐᓄᑦ ᐅᐃᓐᓴᒡᓇᑑᓚᐅᔪᕗᖅ ᐊᒻᒪᓗ ᐊᑦᑐᑕᐅᓐᓇᑑᑦᓱᓂ. ᐊᓪᓚᓂᐊᕆᑦᓯ ᓇᐅᔭ ᕕᑖᓪ, ᓯᕗᓪᓕᐹᒥ ᐊᕐᕌᒍᒥ ᓄᓇᕕᒃ ᓯᕗᓂᑦᓴᕘᒃᑯᓂ ᐃᓕᓐᓂᐊᑎ ᐊᑑᑎᔭᕕᓂᕐᒥᓂᒃ ᐃᒻᒥᓄᑦ ᐊᓪᓚᒍᑎᓕᒃ ᐱᓇᓱᐊᕈᓯᓕᒫᒥ ᐊᑐᕐᑕᕕᓂᕐᒥᓂᒃ ᑕᕐᕋᒥ, ᖃᓄᐃᑦᑑᒪᖔᑦ ᐃᓅᒋᐊᒥᒃ ᐊᒻᒪᓗ ᐃᒻᒥᓄᑦ ᐊᓯᑦᔨᓂᕕᓂᖓᓂᒃ ᐊᑑᑎᔭᕕᓂᖓ..

ᕿᑲᑫᓐᓇᓇᐅᓚᐅᕐᑎᓗᒍ ᒫᑦᔨᒥ, ᓄᓇᕕᒃ ᓯᕗᓂᑦᓴᕘᒃᑯᑦ ᐊᐅᓪᓚᓚᐅᔪᕗᑦ ᑕᕐᕋᒧᑦ, ᐊᖏᕐᕋᕋᓄᑦ ᑲᖏᕐᓱᔪᐊᒧᑦ. ᑖᓐᓇ ᐊᐅᓪᓚᓂᕗᑦ ᐃᓕᓐᓂᐊᕆᐊᕐᓂᐅᓚᐅᔪᕗᖅ ᐃᙯᓕᓴᕐᓂᒥᒃ ᐃᓕᓐᓂᐊᓂᖃᓚᐅᔪᒍᑦ ᓄᓇᒦᒍᓐᓇᓂᕐᒥᒃ. ᐃᓕᑦᓯᓚᐅᔪᒍᑦ ᐱᒍᓐᓇᑎᑦᓯᖃᑦᑕᑐᕕᓂᕐᓂᒃ ᐊᓐᓇᓯᒪᓂᖏᓐᓂᒃ ᐃᓄᐃᑦ ᑭᖑᕚᕆᓄᑦ ᑎᑭᑦᓱᒍ ᐱᒍᓐᓇᐅᑎᓂᒃ. ᐅᓪᓗᒥᐅᓕᕐᑐᖅ, ᐃᓅᓯᕗᑦ ᐊᓯᑦᔨᓯᒪᓕᕐᑐᖅ ᐊᒻᒪᓗ ᐊᒥᓱᐃᑦ ᑖᒃᑯᐊ ᐱᒍᓐᓇᐅᑏᑦ ᐊᑐᕐᑕᐅᕆᐊᑐᕈᓐᓀᑐᑦ ᖃᐅᑕᒫᕐᓯᐅᑎᖏᓐᓂ ᐊᓐᓇᐅᒪᒐᓱᐊᕐᓂᒧᑦ ᐃᓄᐃᑦ. ᓄᐃᑎᑕᖓ ᑖᑦᓱᒪᐅᑉ, ᐃᓚᖏᑦ ᑖᒃᑯᐊ ᐱᒍᓐᓇᐅᑏᑦ ᐃᓕᓐᓂᐊᑎᑦᓯᒍᑎᐅᓲᖑᒍᓐᓀᑐᑦ ᐊᒥᓱᓄᑦ ᐅᕕᒐᕐᑐᓄᑦ ᐃᓄᓐᓄᑦ. ᐱᒍᓐᓇᑎᑕᐅᒋᐊᒥᒃ ᐃᓕᓐᓂᐊᓂᕐᒥᒃ ᖃᓄᐃᓘᕈᓯᕕᓂᖏᓐᓂᒃ ᐃᓄᐃᑦ ᖃᐅᔨᒪᐅᓯᖓᓂᒃ ᐊᕐᕌᒍᓂ ᐊᒥᓱᓂ ᐊᓂᒍᕐᑐᓂ ᐊᓕᐊᓇᕐᑑᓚᐅᔪᖅ.

ᑲᖏᕐᓱᔪᐊᖅ ᐱᐅᔪᓪᓚᕆᐅᕗᖅ ᓄᓇᓕᐅᑦᓱᓂ ᐊᕙᓗᔭᐅᒪᑦᓱᓂ ᐃᓐᓈᕈᓄᑦ. ᓄᓇᓕᒋᒐᓗᐊᕐᓱᒍ, ᐃᓚᖏᓐᓂᒃ ᐊᑐᓚᐅᕐᓯᒪᖕᖏᑐᖓ ᐱᕈᕐᓴᓱᖓ, ᐆᑦᑐᑎᒋᓗᒍ ᖃᕐᖃᒧᑦ ᒪᔪᕋᕐᓂᒥᒃ. ᐊᒥᓱᓄᒃ ᒪᔪᕋᕐᓯᒪᒐᓗᐊᕐᓱᖓ ᐱᐊᕋᐅᑦᓱᖓ, ᑭᓯᐊᓂ ᐱᒍᓐᓇᓯᓚᐅᕐᓯᒪᖕᖏᑐᖓ ᑖᑦᓱᒧᖓᓪᓗᑐᖅ ᐃᓐᓈᕈᒧᑦ ᑭᖑᓂᕐᒥ. ᐃᓅᑦᓱᖓ ᓱᒐᓚᒋᐊᒥᒃ ᐊᓕᐊᒋᔭᖃᕐᓱᖓ, ᐊᓕᐊᒋᔭᖃᕐᓱᖓᓗ ᒪᔪᕋᕆᐊᒥᒃ ᖃᕐᖃᒥ, ᐊᓕᐊᓇᕐᑑᓱᓂ ᐊᑑᑎᓚᐅᔪᔭᕗᑦ. ᐃᒃᑮᓇᕐᑐᒥ ᒪᔪᕋᕋᓱᐊᓚᐅᕐᓯᒪᖕᖏᑐᖓ, ᐊᓐᓄᕌᕐᓯᒪᑦᓯᐊᖂᓚᐅᔪᖕᖏᑐᖓ. ᐊᖏᔪᐊᓗᒻᒥ ᐊᑎᒋᓯᒪᓚᐅᔪᖓ ᑕᓯᔪᐊᕐᓯᒪᑦᓱᖓᓗ ᐊᖏᔪᒥᒃ, ᐊᐅᒃᑲᓂᑲᑦᑕᖃᑦᑕᓚᕿᓚᐅᔪᖓ, ᑕᐃᒪ ᐅᓕᑲᑦᑕᕋ ᐲᕐᓱᒍ, ᑕᐃᒪ ᐄᒃᑭᓯᑦᓴᐅᑎᒋᑦᓱᖓ ᓄᕐᖃᖓᑫᓐᓇᑐᐊᕋᑦᑕ ᑕᐃᒪ ᐊᑎᒌᐊᓗᒐᓂᒃ ᐊᑎᒋᐊᓪᓚᕆᐊᖃᕐᓂᐊᓕᕋᒪ. ᑕᐃᒪᐃᓘᑲᑕᑐᐃᓐᓇᓚᐅᔪᖓ.

ᐳᕐᑐᔪᒦᒋᐊᒥᒃ ᓇᖏᐊᕆᔭᖃᕋᓗᐊᕐᓱᖓ, ᐃᓐᓈᕈᓕᐊᕆᐊᒥᒃ ᖃᓄᐃᒋᔭᐅᔪᖕᖏᑕᕋ. ᐃᑉᐱᒋᑦᓱᒍ ᑎᒥᒻᒪ ᐱᓇᓱᐊᕐᓂᖓ, ᐊᒻᒪᓗ ᑕᑯᓐᓇᕆᐊᖓ ᐅᐸᑦᑕᕗᑦ ᐱᐅᔪᓪᓚᕆᐅᓚᐅᔪᖅ, ᐊᐳᑎᑐᐃᓐᓇᒥᒃ ᑕᑯᓐᓇᒐᑐᐊᖃᕋᓗᐊᕋᑦᑕ ᐊᒻᒪᓗ ᐊᐳᑎᒋᐊᓪᓚᒥᒃ. ᐊᓕᐊᓇᕐᑐᓚᕆᐅᓚᐅᔪᖅ ᖁᓛᓄᑦ ᑎᑭᒋᐊᒥᒃ, ᐃᓄᑦᓱᑕᓕᒻᒪᑦ, ᐊᒻᒪᓗ ᑕᑯᒋᐊᒥᒃ ᓄᓇᓕᒻᒥᒃ ᑕᐅᓇᓂ ᐊᑖᓂ ᐱᐅᔫᓚᐅᔪᖅ ᐱᔭᕆᐊᑐᔫᒐᓗᐊᕐᑎᓗᒍ ᑎᒥᒃᑯᑦ ᑕᑉᐸᐅᖓᕐᓱᓂ. ᐊᒻᒪᓗ ᓯᑐᒋᐊᒥᒃ ᑕᐅᓄᖓ ᒪᔪᕋᕐᓂᑕ ᖃᕐᖃᒧᑦ ᐱᐅᔫᒍᑎᒋᓚᐅᔪᒻᒥᔭᖓ, ᓱᑲᑦᑑᒍᓐᓇᓚᐅᔪᖓ ᖃᕐᓕᑲᔮᒃᑲᓄᑦ. ᒪᔪᕋᕆᐊᒥᒃ ᐃᓐᓈᕈᕐᒧᑦ ᐊᑐᕈᒪᔭᕐᒪ ᐃᓚᒋᓯᒪᔭᖓ.

ᐊᓕᐊᒋᓂᕐᐹᕆᓚᐅᔭᕋ ᐊᐅᓪᓚᓯᒪᓂᑦᑎᓂ ᖁᓪᓕᒥᒃ ᐃᑭᑦᓯᒋᐊᒥᒃ. ᐃᔪᒃᑲ ᐱᖕᖑᐊᑐᒧᑦ ᐃᓕᓐᓂᐊᑎᑕᐅᓚᐅᔪᒍᑦ ᖃᓄᖅ ᖁᓪᓕᒥᒃ ᐃᑭᑦᓯᒍᓐᓇᓂᕐᒥᒃ, ᐊᒻᒪᓗ ᐅᓂᒃᑳᓚᐅᔪᖅ ᐱᐅᓯᕆᓯᒪᔭᖏᓐᓂᒃ ᐱᒻᒪᕆᐅᓯᒪᓂᖓᓂᓪᓗ ᖁᓪᓕᐅᑉ ᑭᖑᓂᕐᒥ. ᑐᓵᑦᓱᒍ ᐅᖄᑎᓪᓗᒍ ᖁᓪᓗᒥᒃ ᐱᖕᖑᐊᓱᓂ, ᐅᕝᕙᓘᓐᓃᑦ ᐃᓕᓐᓂᐊᑎᐅᖃᑎᒃᑲᓂᒃ ᑕᑯᓐᓇᕆᐊᒥᒃ ᖁᓪᓕᒥᒃ ᐃᑭᑦᓯᑎᓪᓗᒋᑦ ᐊᓕᐊᒋᓪᓚᕆᓚᐅᔭᕋ ᓴᐃᒪᓇᕐᑑᓱᓂᓗ, ᓯᓂᓰᓐᓇᕈᓐᓇᓚᐅᔪᖓ. ᐃᔪᒃᑲ ᐅᖄᓚᐅᔪᖅ ᖃᓄᖅ ᐊᕐᓀᑦ ᐃᑯᒪᑎᑦᓯᓲᖑᓂᕕᓂᖏᓐᓂᒃ ᖁᓪᓕᒥᒃ ᐅᑭᐅᓕᒫᒥ, ᖃᓄᖅ ᐱᒻᒪᕆᐅᓂᕆᓯᒪᔭᖓᓂᒃ ᐃᓄᐃᑦ ᐊᓐᓇᓯᒪᓂᖏᓐᓄᑦ, ᐊᒻᒪᓗ ᖃᓄᓪᓗᐊᖅ ᖁᓪᓕᖅ ᐱᒻᒪᕆᐅᓂᖓᓂᒃ ᐃᓗᕐᖁᓯᕗᓐᓄᑦ. ᑖᓐᓇ ᒥᑭᔪᕈᓗᒃ ᖁᓪᓕᓴᔭᖅ ᐱᒻᒪᕆᐊᓗᒻᒥᒃ ᐱᑦᔪᑎᐅᓯᒪᔪᖅ ᐃᓄᐃᑦ ᐊᓐᓇᓯᒪᓂᖏᓐᓄᑦ ᐃᒃᑮᓇᕐᑐᒥ ᑕᕐᕋᒥ ᑭᖑᕚᕇᓄᑦ. ᐅᖄᑦᓱᓂᓗ ᐊᖑᑏᑦ ᒥᑭᓂᕐᓴᒥᒃ ᑎᒍᒥᐊᖃᑦᑕᓂᕕᓂᖏᓐᓄᑦ ᓂᕈᒥᒍᑎᑦᓴᒥᓂᒃ, ᐃᑯᒪᑦᓴᒥᓂᒃ ᐊᒻᒪᓗ ᐃᒐᒍᑎᑦᓴᒥᓂᒃ ᐆᒪᔪᕐᓯᐅᓂᕐᒥᓂ ᐅᓪᓗᓂᒃ ᐊᒥᓱᓂᒃ ᐱᓇᓱᐊᕈᓯᓂᐊᓪᓛᑦ ᐊᒥᓱᓂᒃ. ᒥᑭᔪᒋᐊᓕᕕᓂᖅ ᐱᔭᕆᐊᑭᓐᓂᓴᐅᓐᓂᒪᑦ ᐅᕿᓐᓂᓴᐅᑦᓱᓂᓗ ᐅᓯᒋᐊᖓ ᖃᓱᑎᖏᓐᓂ ᕿᒧᑦᓯᖏᑦᑕ. ᐅᐱᒍᓱᓐᓂᕋ ᐃᑉᐱᒋᓚᐅᔭᕋ ᐃᑭᑦᓯᓱᖓ ᖁᓪᓕᒥᒃ ᐃᓅᑦᓱᖓ ᐊᕐᓇᐅᓱᖓ ᐱᒻᒪᕆᓪᓚᕆᐅᓚᐅᔪᖅ ᐅᕙᓐᓄᑦ. ᕿᓚᓈᓚᐅᔪᖓ ᐊᓈᓇᒐᓂᒃ ᐅᖃᐅᑦᔨᓛᕆᐊᒥᒃ. ᑖᓐᓇ ᐊᑐᕈᒪᓯᒪᒻᒥᔭᕐᒪ ᐃᓚᒋᓯᒪᒻᒥᔭᖓ.

ᐃᓱᒪᒋᑦᓱᒋᑦ ᐃᓄᐃᑦ, ᐃᒡᓗᕕᒐᖅ ᐃᓱᒪᓇᕐᑑᒥᔪᖅ. ᐊᐅᓪᓚᓚᐅᕋᑕ ᑖᑦᓱᒧᖓ, ᐃᒡᓗᕕᒐᓕᐅᓚᐅᕐᓯᒪᖕᖏᑐᖓ, ᐅᕝᕙᓘᓐᓃᑦ ᐃᒡᓗᕕᒐᕐᒦᓚᐅᕐᓯᒪᓇᖓ. ᑲᖏᕐᓱᔪᐊᒥ ᐊᕐᕌᒍᑕᒫᑦ ᐊᒥᓱᓂᒃ ᐃᒡᓗᕕᒐᓕᐅᓲᑦ ᐊᒻᒪᓗ ᐃᓚᖏᑦ ᐃᓄᐃᑦ ᓯᓂᓲᑦ, ᑕᑯᓯᒪᔭᕋ ᓴᓇᔭᐅᑎᓪᓗᒍ ᑭᖑᓂᕐᒥ, ᑭᓯᐊᓂ ᖃᓄᑎᒋ ᐱᔭᕆᐊᑐᔫᒻᒪᖔᑦ ᐃᒡᓗᕕᒐᓕᐅᕆᐊᒥᒃ ᖃᐅᔨᒪᓯᒪᖕᖏᑐᖓ. ᓇᐅᒥ ᑯᐊᑕ ᐅᕙᖓᓗ ᐆᑦᑐᕋᓚᐅᔪᒍᒃ ᐃᒡᓗᓕᐅᕐᓂᒥᒃ. ᐃᓕᓐᓂᐊᑎᑦᓯᔨᕗᒃ ᐱᓇᓱᐊᕐᑐᒪᕆᐅᓚᐅᔪᑦ ᐃᒡᓗᓕᑦᓱᑎᒃ ᓯᓂᕝᕕᒋᒪᖓᔭᖓᓂᒃ ᑖᕗᖕᖓᖃᑎᒌᓚᐅᔭᑦᑕ, ᐃᑲᔪᕐᑕᐅᒋᐊᖃᓚᐅᔪᒍᒃ ᐃᓕᓐᓂᐊᑎᐅᖃᑎᑦᑎᓄᑦ. ᐊᒡᒐᑲ ᐊᒻᒪᓗ ᐊᒡᒐᐅᑎᒐ ᑕᖃᓚᐅᔪᑦ ᐸᓇᒥᒃ ᑎᒍᒥᐊᕐᓱᖓ ᖁᐊᖑᓕᕐᑑᓄᑦ ᐊᒡᒐᔮᓐᓄᑦ, ᓂᑭᓕᒫᒃᑲ ᑎᒥᒐᓂ ᑕᖃᓚᐅᔪᑦ ᑭᕝᕓᑲᑕᑦᓱᖓ ᓴᕕᐅᔭᕐᑐᐊᓂᒃ, ᐅᖁᒣᓐᓂᓴᐅᓚᐅᔪᑦ ᓂᕆᐅᒋᔭᕋᓂᑦ ᐊᒻᒪᓗ ᑕᖃᓪᓚᕆᓚᐅᔪᖓ ᐱᓇᓱᐊᒻᒪᕆᓐᓂᑎᓐᓂ. ᐱᓇᓱᐊᒻᒪᕆᑦᑐᕕᓂᐅᒐᓗᐊᕋᑦᑕ ᐅᓪᓗᓕᒫᖅ ᐃᒡᓗᕕᒐᓕᐅᕐᓱᑕ, ᐱᔭᕇᓚᐅᔪᒍᑦ ᕿᑎᕐᖃᑐᐃᓐᓇᖓᓂᒃ ᐃᒡᓘᑉ. ᐃᒡᓗᕕᒐᓕᐅᕐᓂᖅ ᕿᑎᕐᖃᖓ ᐊᑐᕈᒪᔭᒃᑲᓂ ᐲᒥᔪᖅ, ᓇᑯᕆᑐᐃᓐᓇᑕᕋ.

ᑌᑲᓂ ᐅᓐᓄᐊᒥ ᓯᓂᒍᓐᓇᓯᓚᐅᔪᒍᑦ ᐃᒡᓗᒥ ᐃᓕᓐᓂᐊᑎᑦᓯᔨᐅᑉ ᓴᓇᔭᕕᓂᖓᓂ, ᒪᓕᑦᑎᕗᑦ ᑐᑉᐱᑎᓚᐅᔪᒻᒥᔪᑦ, ᓯᓂᕝᕕᓴᕗᓐᓂ ᕈᒪᑐᐊᕈᑦᑕ. ᖃᐅᔨᒪᓚᐅᔭᒃᑲ ᐃᓕᓐᓂᐊᑎᐅᖃᑎᒃᑲ ᐅᕙᖓᒐᓴᒃ ᓯᓂᒍᒪᓚᐅᔪᒍᑦ ᐃᒡᓗᒥ ᐃᒪᐃᓕᓯᒪᒍᒪᑦᓱᑕ ᐃᒡᓗᒥ ᓯᓂᑦᓯᒪᓂᑦᑎᓂᒃ. ᒪᕐᕉᓄᑦ ᐃᒡᓗᕕᒑᓐᓄᑦ ᓄᐊᓚᐅᔪᒍᑦ ᐊᒻᒪᓗ ᓯᓂᑦᓱᑕ ᓂᓐᓂᐅᕋᓚᐅᑎᑦᓱᑕ ᐃᓗᐊᓂ. ᐃᒡᓗᕕᒐᕗᑦ ᖁᓪᓕᖃᓚᐅᔪᖕᖏᑐᖅ ᐊᒻᒪᓗ ᒥᑭᔪᐊᐲᓐᓂᒃ ᕿᐱᖃᓚᐅᔪᖓ, ᕿᐅᔭᔪᓪᓚᕆᐅᓚᐅᔪᖓ ᐅᓐᓄᐊᓕᒫᖅ. ᐃᓄᒐᖑᐊᒃᑲ, ᕿᖓᕋ ᐱᓗᐊᕐᑐᒥ ᐃᑎᒐᒃᑲ ᖁᐊᓚᐅᔪᑦ; ᓯᓂᑦᓯᐊᓚᐅᔪᖕᖏᑐᖓ. ᓱᓕᑦᓯᐊᓱᖓ ᐳᑐᒍᒃᑲᓂᒃ ᐃᓱᒫᓗᓚᐅᔪᖓ, ᑭᓯᐊᓂ ᓴᖑᑦᓴᕃᑦᑑᓚᐅᔪᖓ ᐃᓅᑉ ᐱᐅᓯᖓᑎᑐᑦ ᑐᐱᓕᐊᕈᒪᓇᖓ ᑭᐊᑦᓴᐅᑎᑕᓕᒻᒧᑦ ᐅᕐᖁᔪᒥᒃ ᑌᒣᒻᒪᑦ ᐃᒡᓗᕕᒐᕐᒦᑐᐃᓐᓇᓚᐅᔪᖓ. ᑖᒃᑯᐊ ᐅᖃᕐᓱᒋᑦ, ᐅᒡᒍᐊᖏᑦᑐᖓ. ᐅᐱᒍᓱᓪᓚᕆᓚᐅᔪᒐᒪ ᐃᒻᒥᓂᒃ. ᓴᓇᓚᐅᔪᖕᖏᑲᓗᐊᕐᓱᖓ ᐃᒡᓗᕕᒐᕐᒥᒃ ᐅᓐᓄᐊᓯᐅᕐᕕᒋᓚᐅᔭᑦᑎᓂᒃ, ᓯᓂᑐᐃᓐᓇᓂᕋ ᐊᓪᓛᑦ ᑐᖕᖓᓂᕋᓂᒃ, ᐱᑐᑦᓯᒪᓂᕋᓂᒃ ᓯᕗᓪᓕᕕᓂᑦᑎᓄᑦ ᐊᒻᒪᓗ ᐃᓗᕐᖁᓯᕗᓐᓄᑦ ᐃᑉᐱᒋᓚᐅᔭᕋ. ᐊᑕᐅᓯᒋᐊᓪᓚᖅ ᐊᑐᕈᒪᓯᒪᔭᕋ ᐲᓚᐅᔪᖅ ᐊᓪᓚᓯᒪᔭᒃᑲᓂ.

ᐅᑦᑐᕋᕋᓱᐊᓚᐅᔪᒍᑦ ᐃᖃᓪᓕᐊᕋᓱᐊᕐᓱᑕ, ᑭᓯᐊᓂ ᑭᓇᓘᓐᓃᑦ ᐃᑲᓗᓚᐅᔪᖕᖏᑐᖅ ᐃᓕᓐᓂᐊᖃᑎᒃᑲᓂᑦ. ᐆᑦᑐᕋᓚᐅᔪᒻᒥᔪᒍᑦ ᖁᓪᓕᓂᕐᓯᐅᕆᐊᕐᓱᑕ ᐅᕕᓗᕐᑕᕆᐊᕋᓱᐊᕐᓱᑕ ᑭᓯᐊᓂ ᐅᐸᑦᑕᕗᑦ ᖁᐊᕐᓯᒪᓪᓚᕆᓚᐅᔪᖅ ᐅᕕᓗᕐᑕᕕᒋᒍᓐᓇᓚᐅᔪᖕᖏᑕᕗᑦ. ᑕᒪᕐᒥᒃ ᐆᑦᑐᕋᓱᐊᕐᑕᕗᑦ ᓱᓚᐅᔪᖕᖏᑲᓗᐊᕐᑎᓗᒋᒃ, ᐊᓕᐊᒋᖏᓐᓇᓚᐅᔭᕋ ᐅᓪᓘᒃ ᒪᕐᕉᒃ ᒪᙯᓐᓂᕆᓚᐅᔭᕗᑦ. ᓯᑭᑑᒃᑯᓚᐅᔪᒍᑦ ᒪᕐᕉᓂ ᑫᕙᓪᓚᒍᓰᓐᓂ ᐊᐅᓚᒋᐊᓕᒻᒥ ᓄᓇᓕᐅᑉ ᓯᓚᑖᓂ ᐃᖃᓪᓕᐊᓱᑕ, ᐊᒻᒪᓗ ᑫᕙᓪᓚᒍᓯᓕᒫᒥ ᓄᓇᓕᐅᑉ ᓯᓚᑖᓄᑦ ᐅᕕᓗᕐᑕᕆᐊᕋᓱᐊᕐᓱᑕ. ᑌᑲᓂ ᐃᓐᓈᕈᕐᓃᓱᑕ, ᓄᓇᖓ, ᓄᓇᓕᕐᔪᐊᑉ ᓯᓚᑖᓂᑐᐃᓐᓇᕆᐊᒥᒃ, ᓯᓚᒥ ᓇᓂᐅᔮᖕᖏᑐᖅ ᓄᓇᒦᑦᓱᑕ ᐊᕙᓗᔭᐅᒪᑦᓱᑕ ᓄᓇᑐᐃᓐᓇᒥ ᐊᓕᐊᓇᓚᐅᔪᖅ. ᖃᓪᓗᓈᓂᒥᐅᖑᑦᓱᓂ, ᓄᓇᓕᕐᔪᐊᒥᐅᖑᑦᓱᓂ, ᑕᖃᓇᓲᖅ ᑕᑯᔭᑕᐊᖃᖃᑦᑕᓱᓂ ᐃᓪᓗᔪᐊᓂᒃ ᐃᓄᓐᓄᑦ ᓴᓇᔭᐅᓯᒪᔪᓂᒃ. ᓄᓇᓕᕐᔪᐊᒥᐅᖑᑦᓱᓂ, ᓄᓇᒨᕈᓐᓇᓯᓚᐅᕐᓯᒪᖕᖏᑐᖓ. ᑖᒃᑯᐊ ᐅᓪᓘᒃ ᒪᕐᕉᒃ ᐱᒻᒪᕆᐊᓘᓚᐅᔫᒃ ᐅᕙᓐᓄᑦ. ᐃᓐᓈᕈᖏᓐᓂᒃ ᑕᑯᒋᐊᒥᒃ ᑲᖏᕐᓱᔪᐊᒥ ᐆᒻᒪᑎᒐᓂᒃ ᑕᑕᐃᓲᖅ ᑕᐃᒪᖕᖓᑦ ᐊᓕᐊᓱᓐᓂᒥᒃ ᓱᖑᓯᒋᐊᓪᓚᓂᕐᒥᒃ ᐃᑉᐱᓂᐊᑎᑦᓯᓲᖅ ᐅᕙᓐᓂᒃ.

ᑕᑯᓐᓇᓱᒍ ᐊᐅᓪᓚᓂᕆᓚᐅᕐᑕᕗᑦ ᐱᓇᓱᐊᕈᓯᓕᒫᒥ, ᐅᑉᐱᓂᕋᓂᒃ ᓱᓕᓕᐅᒥᑎᑦᓯᔪᖅ ᐃᓄᐃᑦ ᓲᖑᔫᓂᖏᓐᓂᒃ ᑌᒣᑦᑑᓯᒪᓂᖏᓐᓂᒃ ᑌᒪᖕᖓᓂᑦ. ᖃᓄᖅ ᐊᑦᓱᕈᕐᓯᒪᓂᖏᓐᓂᒃ ᐆᒪᒐᓱᐊᕐᓱᑎᒃ ᑕᕐᕋᒥ ᒫᓐᓇᓂᑕᕐᓂᒃ ᐱᐅᒃᑯᑎᓂᒃ ᐱᑕᖃᕋᑎᒃ ᒥᑭᔫᖕᖏᑐᖅ ᑕᒪᓐᓇ. ᐱᓇᓱᐊᒻᒪᕆᓚᐅᔪᖓ ᐃᒡᓗᕕᒐᕐᒥᒃ, ᐱᔭᕇᕈᓐᓇᓯᓚᐅᔪᖓ ᕿᑎᕐᖃᑐᐃᓐᓇᖓᓂᒃ. ᐆᑦᑐᕋᓱᐊᓚᐅᔪᒍᑦ ᓂᕿᑦᓭᑐᕋᓱᐊᕐᓱᑕ ᒪᕐᕈᕕᑦᓱᑕ, ᐅᑏᓐᓇᓚᐅᔪᒍᑦ ᓱᓇᑦᓯᒪᖕᖏᓱᑕ ᑕᒪᖏᓐᓂ. ᐃᓄᐃᑦ ᑭᖑᓂᕐᒥ ᐆᒪᔪᕐᓯᐅᖃᑦᑕᓯᒪᔪᑦ ᐅᓪᓗᑐᕐᓱᑎᒃ ᐊᒥᓱᓂᒃ. ᐱᓇᓱᐊᕈᓯᓂᓪᓘᓃᑦ, ᕿᓂᕐᓱᑎᒃ ᓂᕿᑦᓴᒥᓐᓂᒃ, ᐅᕙᒍᑦᑎᑐᑦ ᐊᓐᓂᑐᖃᑦᑕᓯᒪᖕᖏᑐᑦ. ᐊᕐᓇᖅ ᐊᖏᕐᕋᓯᒪᔪᖅ ᓂᕿᑦᓴᓂᒃ ᐊᕕᑦᑐᓯᐊᖃᑦᑕᑐᕕᓃᑦ ᐅᓪᓗᓄᑦ ᐊᒥᓱᓄᑦ, ᐅᕐᓱᒥᓂᒃ ᐊᒻᒪᓗ ᒪᓂᕐᓂᒃ ᓄᖑᑎᑦᑌᓕᑦᓱᒋᑦ ᐅᑎᖕᖏᓂᖏᓐᓂ ᐊᖑᑎᖏᑦ. ᓄᐃᑕᓪᓚᕆᑦᑐᖅ ᐃᓄᐃᑦ ᐊᔪᐃᓐᓇᓯᑎᐅᓂᖏᓐᓂᒃ ᓄᐃᑕᑎᑦᓯᔪᖅ.

ᐱᔭᕆᐊᑐᔫᓂᖓᓄᑦ ᑕᕐᕋᒥᐅᖑᒋᐊᒥᒃ, ᐃᓄᐃᑦ ᐊᓐᓇᑐᐃᓐᓇᓂᖕᖏᑐᑦ ᑕᕐᕋᒥ, ᐱᕙᓪᓕᐊᓯᐊᕐᑐᕕᓃᑦ ᓄᓇᒥᓐᓂ. ᐃᓄᐃᑦ ᖃᐅᔨᓯᒪᔪᑦ ᖃᓄᖅ ᐃᓅᒋᐊᒥᒃ ᐃᒃᑭᓇᕐᑐᒥ, ᖃᓄᐃᓘᕐᓗᑎᒃ ᐃᒃᑭᓇᕐᓂᖓᓂᒃ ᐅᓚᐱᑦᓯᒍᓐᓇᓂᕐᒥᒃ ᐊᒻᒪᓗ ᑳᓐᓂᒥᓂᒃ, ᐃᓕᑦᓯᓯᒪᔪᑦ ᒪᓕᒋᐊᒥᒃ ᐆᒪᔪᐃᑦ ᐊᐅᓚᒍᓯᖏᓐᓂᒃ, ᐅᓪᓗᒥᒧᑦ, ᖃᔭᖅ, ᐅᕝᕙᓘᓐᓃᑦ ᑲᔮᒃ ᐃᓄᓐᓄᑦ ᓴᓇᔭᐅᒪᔪᖅ ᐊᑐᕐᑕᐅᓲᖅ ᓇᓂᓕᒫᖅ ᓯᓚᕐᔪᐊᒥ. ᐃᓱᒪᒋᔭᕋ ᓯᓚᕐᔪᐊᒥᐅᑦ ᐃᓕᑦᓯᒍᓐᓇᕆᐊᖓᓂᒃ ᐃᓄᓐᓂᑦ. ᐊᑐᕋᑦᓴᓂᒃ ᓴᓇᒐᖏᓐᓂᒃ ᐃᓄᐃᑦ ᐊᓐᓇᐅᒪᒍᑎᒋᑦᓱᒋᑦ ᓱᓇᑦᓴᖃᑦᓯᐊᔭᒐᑎᒃ ᑕᒪᓐᓇ ᑕᑕᒥᓐᓇᑐᖅ. ᐃᓱᒪᒋᐊᓕᒻᒪᕆᒃ ᐊᓐᓇᐅᒪᒐᓱᒋᐊᒥᒃ ᑕᕐᕋᒥ ᓱᓇᖃᑦᓯᐊᖏᑦᑐᒥ, ᐃᓱᒪᒋᑦᓱᒍᓗ ᓇᐹᕐᑐᑕᖃᖕᖏᑐᖅ ᑲᖏᕐᓱᔪᐊᒥ ᕿᔪᑦᓴᖃᖃᑦᑕᓂᖕᖏᑐᐃᓪᓘᓃᑦ ᐃᑯᐊᓚᒍᑎᑦᓴᒥᒃ ᓄᓇᕕᓕᒫᒐᓚᒻᒥ. ᐊᑐᖃᑦᑕᓯᒪᔪᑦ ᓱᓇᒐᓛᐱᓕᒫᒥᓂᒃ ᑕᐃᒪ ᐱᒍᓐᓇᑎᑦᓯᖃᑦᑕᓱᑎᒃ.

ᒫᓐᓇᓂᑕᐅᑦᓱᖓ ᐊᕐᓇᐅᓱᖓ, ᐃᓱᒪᒋᑦᓱᒍ ᑕᐃᒫᒃ ᐃᓅᒋᐊᒥᒃ ᑲᑉᐱᐊᒋᔭᕋ, ᐱᑦᔪᑎᑦᓴᓯᐊᒥᒃ ᐱᑦᔪᑎᖃᕐᓱᖓ. ᐃᓄᖃᖏᓐᓇᑐᖅ ᐃᓄᓐᓂᒃ ᓄᓇᒥ ᐊᓐᓇᐅᒪᒍᑎᓕᓐᓂᒃ; ᐆᒪᔪᕐᓯᐅᖔᕈᒪᔪᑦ ᐃᓅᒍᑎᑦᓴᒥᓂᒃ ᐱᓇᓱᐊᖕᖏᖔᕐᓱᑎᒃ ᖃᓪᓘᓈᑦ ᐱᐅᓯᖏᑎᒍᑦ. ᑕᒪᓐᓇ ᐆᒻᒪᑎᒐᓂᒃ ᐊᓕᐊᓱᑦᑎᓯᔪᖅ. ᐱᓯᑎᓪᓚᕆᐅᒋᐊᖃᕐᑐᑎᑦ ᐅᑭᐅᕐᑕᑐᒥᐅᖑᒍᒪᒍᕕᑦ ᐃᓄᐃᑦ ᑌᒣᓯᒪᒻᒪᑕ ᑭᖑᓂᕐᒥ. ᖃᐅᔨᒪᑦᓯᐊᕆᐊᖃᕐᑐᑎᑦ ᖃᐅᔨᑦᓯᐊᓗᑎᑦ ᓱᑯᐃᔦᒍᓯᕐᒥᒃ ᓄᓇᒥ, ᐆᒪᔪᓂᒃ, ᑕᕐᖀᑦ ᐊᓯᑦᔨᑕᕐᓂᖓᓄᑦ, ᐆᒪᔪᓂᒃ ᐱᓚᒋᐊᒥᒃ ᐋᑦᑐᕆᐊᒥᒃ ᐊᒻᒪᓗ ᐊᒥᓱᒋᐊᓪᓓᑦ.