ᓯᕗᒧᐊᑦᑏᑦ: ᓯᕗᒧᐊᑦᑐᑦ ᐊᑕᐅᑦᓯᑯᑦ ᓄᓇᕕᐅᑉ ᐃᓕᓐᓂᐊᑎᖏᑦ ᐱᔭᖃᑦᓯᐊᖁᑦᓱᒋᑦ

ᔫᓂ 2025-ᒥ, ᑲᑎᕕᒃ ᐃᓕᓴᕐᓂᓕᕆᓂᖅ ᐅᐱᒍᓱᑦᓱᓂ ᐊᖏᓚᐅᔪᖅ ᓄᑖᒥᒃ ᑕᓪᓕᒪᓄᑦ ᐊᕐᕌᒍᓅᓕᖓᔪᒥᒃ ᐋᕐᕿᓯᒪᐅᑎᑦᓴᒥᒃ ᐸᕐᓇᓯᒪᐅᑎᒥᓂᒃ, ᓯᕗᒧᐊᑦᑏᑦ – ᓯᕗᒧᐊᑦᑐᑦ ᐊᑕᐅᑦᓯᑯᑦ, ᓇᓗᓀᕐᓯᓱᓂ ᐱᔭᕆᔭᐅᓯᒪᓪᓚᕆᑦᑐᒥᒃ ᑎᒥᐅᔫᑉ ᐱᕙᓪᓕᐊᓂᖓᓂ ᓯᕗᒧᐊᓐᓂᒥᓂ ᓲᖑᓯᒋᐊᕆᓂᕐᒧᑦ ᐃᓕᓐᓂᐊᑏᑦ ᐱᔭᖃᖃᑦᑕᓂᖏᓐᓂᒃ ᓄᓇᕕᓕᒫᒥ. ᑖᓐᓇ ᐸᕐᓇᓯᒪᐅᑎ ᓄᐃᓯᒪᔪᖅ ᐱᓇᓱᐊᖃᑎᒌᓐᓂᓚᕆᒻᒥᑦ ᐊᒻᒪᓗ ᐃᓚᓕᐅᑦᔨᓯᐊᕐᓱᑎᒃ ᐱᓇᓱᐊᕐᓂᒥᑦ. ᐃᓚᐅᑎᑦᓯᓚᐅᕐᑐᖅ 1,000-ᑲᓴᓐᓂᒃ ᓂᐱᓂᒃ ᓄᓇᓕᓕᒫᓂ, ᐃᓚᐅᑎᓪᓗᒋᑦ ᐱᓇᓱᑦᑏᑦ, ᐃᓕᓐᓂᐊᑏᑦ, ᐃᓕᓐᓂᐊᕖᑦ ᑭᒃᒐᑐᕐᑎᖏᑦ, ᐊᒻᒪᓗ ᓄᓇᓕᒻᒥᐅᑦ.

ᑌᔭᐅᒍᓯᖓ ᓯᕗᒧᐊᑦᑏᑦ, ᑐᑭᓕᒃ “ᐃᓄᐃᑦ ᓯᕗᒧᐊᑦᑐᑦ ᐊᑕᐅᑦᓯᑯᑦ,” ᑕᑯᑦᓴᐅᑎᑦᓯᔪᖅ ᐊᑕᐅᓯᐅᖃᑎᒌᓐᓂᒥᒃ ᐊᒻᒪᓗ ᐃᓘᓐᓇᑎᒃ ᐱᑦᔪᑎᖓᓂᒃ ᑕᓯᐅᕐᓯᓯᒪᔪᒥᒃ ᐋᕐᕿᓯᒪᐅᑎᑦᓴᒥᒃ ᐸᕐᓇᓯᒪᐅᑎᓕᐅᕐᓂᒥᒃ. ᐊᕐᕌᒍᓕᒫᒥ, ᖃᐅᔨᒋᐊᕐᕕᖃᕐᓃᑦ ᐊᑑᑎᔭᐅᖃᑦᑕᓚᐅᔪᑦ ᐃᓕᓐᓂᐊᕕᓐᓂ, ᑲᑎᕝᕕᐅᔪᓂ, ᐊᒻᒪᓗ ᓄᓇᓕᓐᓂ, ᐃᓚᐅᖃᑕᐅᔪᑦ ᐅᖄᖃᑦᑕᑎᓪᓗᒋᑦ ᐃᓱᒪᒋᔭᒥᓂᒃ, ᓂᕆᐅᒋᔭᒥᓂᒃ, ᐊᒻᒪᓗ ᓯᕗᓪᓕᐅᔭᐅᖁᔭᒥᓂᒃ. ᑰᑦᔪᐊᒥᑦ ᐃᕗᔨᕕᒻᒧᑦ ᐊᒻᒪᓗ ᓄᓇᓕᓕᒫᓂᑦ ᓄᓇᕕᒻᒥ, ᐱᓇᓱᐊᕐᓂᖅ ᐋᕐᕿᑕᐅᒪᓚᐅᔪᖅ ᐃᓚᐅᕕᐅᒍᓐᓇᓱᓂ ᐊᒻᒪᓗ ᐱᔪᓐᓇᓂᕐᑖᑎᑦᓯᒍᓐᓇᓱᓂ.

ᑫᓪᓗᑐᐃᓂᕐᐸᐅᖃᑕᐅᓚᐅᕐᑐᖅ ᓄᐃᑕᖏᓐᓂ ᖃᐅᔨᒋᐊᕐᕕᖃᕐᓃᑦ ᕿᑦᑌᖓᑦᓯᐊᓱᑎᒃ ᐃᓚᐅᓂᖏᑦ ᐃᓕᓐᓂᐊᑏᑦ. ᐅᕕᒃᑫᑦ ᓄᐃᑕᑎᑦᓯᓚᐅᕐᑐᖅ ᖁᕕᐊᓱᓐᓂᒥᒃ ᐊᒻᒪᓗ ᓇᑯᕐᓴᓂᕐᒥᓂᒃ ᑕᒪᖏᓐᓂ ᓄᓇᓕᓐᓂ ᐊᒻᒪᓗ ᐊᒥᓱᓂ ᓄᓇᓕᓐᓂ ᓱᖃᑦᓯᑎᑦᓯᓂᕐᓂ. ᑖᒃᑯᐊ ᐊᑑᑎᔪᑦ ᐱᑐᖃᑎᒌᑦᑎᓯᑐᐃᓐᓇᓚᐅᖕᖏᑐᑦ ᐃᓕᓐᓂᐊᕕᓐᓂᒃ ᑭᓯᐊᓂ ᑲᑎᑎᑦᓯᒋᐊᓪᓚᓚᐅᕐᑐᑦ ᓄᓇᕐᖃᑎᒌᖕᖏᑐᓂᒃ ᐃᓚᒌᓂᒃ, ᓄᐃᑦᓯᓱᑎᒃ ᑐᑭᖃᑦᓯᐊᑐᓂᒃ ᐊᑑᑎᔪᓂᒃ  ᓄᐃᑕᑎᑦᓯᓯᐊᕐᑐᓂᒃ ᐱᒻᒪᕆᐅᓂᖓᓂᒃ ᐃᓕᓐᓂᐊᓂᐅᑉ ᓄᓇᓕᒻᒥ ᐊᑑᑎᔭᐅᓗᓂ.

ᓯᕗᒧᐊᑦᑏᑦ ᐱᓇᓱᑦᑎᖏᑦ ᖃᐅᔨᓚᐅᔪᑦ ᐃᓚᐅᑎᑦᓯᓂᖅ ᑫᓪᓗᑐᐃᒋᐊᖓ ᐊᑦᑕᓇᕐᑐᒦᓐᓇᖏᑦᑐᒥᒃ ᐅᖄᕕᑦᓴᒥᒃ, ᐃᔨᕐᓯᒪᔪᕐᑕᖃᖕᖏᓂᓕᐅᕐᓱᓂ ᑎᒥᐅᔪᒥ, ᐊᒻᒪᓗ ᑲᔪᖏᕐᓭᓱᓂ ᐱᓇᓱᐊᖃᑎᒌᓐᓂᒥᒃ ᐊᒻᒪᓗ ᐃᑲᔪᕐᑎᒌᓐᓂᒥᒃ ᐱᓇᓱᑦᑎᓂ. ᐱᔪᓐᓇᓂᕐᑖᑎᑦᓯᓚᐅᕐᒥᔪᖅ ᐃᓚᐅᖃᑕᐅᔪᓂᒃ ᐊᒻᒪᓗ ᓲᖑᓯᒋᐊᕐᓱᒋᑦ ᐃᓗᕐᖁᓯᕐᒥᒃ ᖃᐅᔨᒪᓂᖏᑦ—ᐃᓗᓕᕆᓗᐊᖕᖑᐊᑕᖏᓐᓂᒃ ᐋᕐᕿᓱᐃᓂᐅᑉ ᐋᕐᕿᓯᒪᐅᑎᑦᓴᒥᒃ ᐸᕐᓇᓯᒪᐅᑎᒥᒃ ᑕᑯᑦᓴᐅᑎᑦᓯᓚᕆᑦᑐᒥᒃ ᐃᓪᓕᕆᔭᖏᓐᓂᒃ ᐊᒻᒪᓗ ᐱᒍᒪᔭᖏᓐᓂᒃ ᓄᓇᕕᒻᒥᐅᑦ.

ᐱᓇᓱᑦᑎᓂᒃ ᐃᓚᐅᑎᑦᓯᓂᖅ ᓲᖑᔫᓚᐅᕐᑎᓗᒍ ᐊᒻᒪᓗ ᓱᓕᑦᓯᐊᓱᓂ, ᐱᓇᓱᑦᑏᑦ ᖃᐅᔨᓚᐅᔪᑦ ᐃᓚᐅᖃᑕᐅᓂᖓ ᓄᓇᓕᒻᒥᐅᑦ ᓯᑕᒪᓂ ᓱᓂᒻᒪᕆᐅᔪᓂ ᐃᑭᑦᑑᓚᐅᕆᐊᖏᑦ. ᑌᒣᒐᓗᐊᕐᑎᓗᒍ, ᑕᒪᓐᓇ ᐊᑦᔨᒌᓕᑎᑕᐅᒋᐊᓚᐅᕐᑐᖅ ᐊᒥᓱᑦ ᐱᓇᓱᑦᑏᑦ ᖃᐅᔨᒋᐊᕐᕕᐅᔪᑦ ᓄᓇᕕᒻᒥᐅᖑᓚᐅᕐᒪᑕ, ᐊᒻᒪᓗ ᐃᓱᒪᒋᔭᖏᑦ ᑕᑯᑦᓴᐅᑎᑦᓯᓱᑎᒃ ᓄᓇᓕᓐᓂᒃ ᐱᒍᑦᔨᔭᖏᓐᓂᒃ.

ᐱᔭᕇᕐᓯᒪᔪᖅ ᐋᕐᕿᓯᒪᐅᑎᓴᒥᒃ ᐸᕐᓇᓯᒪᐅᑎ, ᐊᖏᕐᑕᐅᒪᔪᖅ ᐃᓕᓐᓂᐊᕖᑦ ᑭᒃᒐᑐᕐᑎᖏᓐᓄᑦ, ᐋᕐᕿᓯᒪᔪᖅ ᐊᕙᓗᐊᓂ ᐱᖓᓱᑦ ᑕᓯᐅᕐᓯᒍᑏᑦ: ᓅᓱᐃᑦᑐᖅ, ᓯᕗᒧᑦ, ᐊᒻᒪᓗ ᐊᑏ.

• ᓅᓱᐃᑦᑐᖅ ᓱᓇᐅᓂᖓᓂᒃ ᓀᓪᓕᑎᕆᔪᖅ ᐃᓘᓐᓇᑕ ᓯᕗᒧᑦ ᑕᑯᓐᓇᑕᑦᑎᓂᒃ ᐃᓕᓐᓂᐊᑏᑦ ᐱᔭᖃᖃᑦᑕᓂᖏᓐᓄᑦ, ᐃᑉᐱᒋᔭᐅᖁᔨᓗᐊᖕᖑᐊᓱᓂ ᐃᓗᕐᖁᓯᒃᑯᑦ ᑭᓇᐅᓂᕐᒥᒃ, ᓴᐱᓕᑦᓯᕇᑦᑐᓂᕐᒥᒃ, ᐊᒻᒪᓗ ᓄᓇᓖᑦ ᐃᑲᔪᕐᓯᓂᖓᓂᒃ.
• ᓯᕗᒧᑦ ᐋᕐᖀᔪᖅ ᐋᕐᕿᓯᒪᐅᑎᑦᓴᐅᑉ ᓯᕗᓪᓕᐅᔨᒋᐊᓕᖁᑎᖏᓐᓂᒃ ᐊᒻᒪᓗ ᐱᓂᐊᕐᓂᖏᓐᓂᒃ ᑕᓯᐅᕐᓯᓚᖓᔪᓂᒃ ᑎᒥᐅᔪᒥᒃ ᐊᕐᕌᒍᖅ 2030 ᑎᑭᓪᓗᒍ.
• ᐊᑏ ᐱᓇᓱᐊᓗᐊᖕᖑᐊᑐᖅ ᖃᓄᖅ ᑎᒥᐅᔪᖅ ᐱᓇᓱᖃᑎᒌᓚᖓᒻᒪᖔᑦ ᐊᑐᓕᕐᑎᓯᓗᓂ ᐸᕐᓇᓯᒪᐅᑎᒥᒃ.

2025–2026 ᐃᓕᓐᓂᐊᓇᐅᑉ ᐊᕐᕌᒍᖓ ᐱᒋᐊᕐᑎᓗᒍ, ᑲᑎᕕᒃ ᐃᓕᓴᕐᓂᓕᕆᓂᖅ ᐱᓇᓱᐊᕐᑎᓯᔪᖅ ᐱᓇᓱᑦᑎᒥᓂᒃ ᐊᕙᓗᖏᓐᓂ ᐱᕙᓪᓕᐊᑎᑕᐅᓂᖏᑦᑕ ᐊᒻᒪᓗ ᐊᑐᓕᕐᑎᑕᐅᓂᖏᑦᑕ ᐱᓂᐊᕐᓂᖃᕐᓂᒧᑦ ᐸᕐᓇᓯᒪᐅᑏᑦ ᓈᒻᒪᓈᕐᑐᑦ ᐋᕐᕿᓯᒪᐅᑎᑦᓴᐅᑉ ᓯᕗᓪᓕᐅᔭᐅᒋᐊᓕᖁᑎᖏᓐᓄᑦ. ᐃᓕᓐᓂᐊᕕᐅᑉ ᐱᔭᖃᕐᓂᖓᓄᑦ ᐸᕐᓇᓯᒪᐅᑎᖏᑦ ᐊᒻᒪᓗ ᐱᒍᑦᔨᕖᑦ ᐱᓂᐊᕐᓂᖃᕐᓂᒧᑦ ᐸᕐᓇᓯᒪᐅᑎᖏᑦ ᓴᓇᕐᕈᑎᐅᓪᓚᕆᓚᖓᔪᑦ ᑐᑭᓯᓇᕐᑎᓯᓂᕐᒧᑦ ᓯᕗᒧᑦ ᑕᑯᓐᓇᑕᑦᑎᓂᒃ ᐱᕙᓪᓕᐊᓂᓪᓚᕆᕈᕐᓂᒧᑦ.

ᓯᕗᒧᐊᑦᑏᑦ ᐋᕐᕿᓯᒪᐅᑎᑦᓴᒥᒃ ᐸᕐᓇᓯᒪᐅᑎᖓ ᐊᓪᓚᖁᑎᑐᐃᓐᓇᐅᖏᑦᑐᖅ—ᐃᓘᓐᓇᑕ ᐊᖏᕐᓯᒪᒍᑎᕗᑦ ᐃᓕᓐᓂᐊᑏᑦ ᐱᔭᖃᕐᓂᖏᓐᓄᑦ, ᐃᓗᕐᖁᓯᕐᒥᒃ ᐅᐱᒍᓱᓐᓂᒧᑦ, ᐊᒻᒪᓗ ᓄᓇᓕᐅᑉ ᖃᓄᐃᖕᖏᓯᐊᕐᓂᖓᓄᑦ. ᑕᑯᑦᓴᐅᑎᑦᓯᔪᖅ ᓂᐱᖏᓐᓂᒃ ᓄᓇᕕᒻᒥᐅᑦ ᐊᒻᒪᓗ ᐋᕐᖀᓱᓂ ᐊᕐᖁᑎᑦᓴᓯᐊᒥᒃ ᓯᕗᒧᑦ, ᑐᖕᖓᕕᓕᒻᒥᒃ ᐱᓇᓱᖃᑎᒌᓐᓂᒥᒃ, ᓲᓱᑦᓴᓂᕐᒥᒃ, ᐊᒻᒪᓗ ᓂᕆᐅᓐᓂᖃᕐᓂᒥᒃ.

ᐱᔭᕇᕐᓯᒪᔪᖅ ᐸᕐᓇᓯᒪᐅᑎ ᐃᓕᓐᓂᐊᕖᑦ ᑭᒃᒐᑐᕐᑎᖏᑦᑕ ᐊᖏᕐᑕᕕᓂᖓ ᔫᓂᒥ ᓄᐃᑕᐅᓪᓚᕆᓛᕐᑐᖅ ᐅᑭᐊᖑᓚᖓᔪᒥ—ᑐᓴᐅᒣᓐᓇᕋᓱᐊᕆᑦᓯ ᐅᖃᕆᐊᖕᖓᕈᑎᐅᓂᖓᓂᒃ.

ᐊᓪᓚᓂᐊᕆᐊᓪᓚᓗᒍ, ᕿᒥᕐᕈᕈᒪᒍᕕᐅᒃ ᐃᓗᐃᑦᑐᖅ ᐋᕐᕿᓯᒪᐅᑎᑦᓴᐅᑉ ᐸᕐᓇᓯᒪᐅᑎᖓ ᐊᒻᒪᓗ ᖃᐅᔨᒋᐊᑦᓯᐊᕈᒪᒍᕕᑦ ᖃᐅᔨᒋᐊᕐᕕᖃᕐᓂᕕᓂᐅᑉ ᒥᑦᓵᓄᑦ.