ᑕᑯᒥᓇᕐᑐᓕᐅᕐᓂᖅ: ᐅᖃᐅᓯᖅ ᐃᓕᓐᓂᐊᑎᓄᑦ ᐳᕕᕐᓂᑐᒥ ᑐᓴᕐᑕᐅᑎᑦᓯᑎᓪᓗᒋᑦ ᐃᓱᒫᓘᑎᒋᔭᒥᓂᒃ
ᑕᓴᓚᐅᕐᓯᒪᔦᑦ ᑖᓐᓇ? ᐊᒥᓱᐃᑦ 25 ᐃᓕᓐᓂᐊᑏᑦ ᐃᒍᐊᕐᓯᕕᐅᑉ ᐃᓕᓐᓂᐊᕕᖓᓂᒃ ᓵᓚᖃᕐᓯᒪᑐᐃᓐᓇᖕᖏᑐᑦ ᐱᒋᐊᕐᑎᓯᒍᑎᐅᔪᒥᒃ ᓵᓚᖃᐅᑎᒥᒃ, ᐃᓚᒋᔭᐅᔪᒥᒃ ᐃᔅᓱᐊᕐ ᐃᓕᑕᕆᔭᐅᒍᑎᒃ ᐁᑦᑑᑎᐅᑦᓱᓂ ᐊᕕᑦᑐᓯᒪᓂᐅᔪᓂᒃ, ᑭᓯᐊᓂ ᑕᑯᒥᓇᕐᑐᓕᐅᕐᓂᖏᑦᑕ ᐱᓇᓱᐊᕐᓂᖏᑦ ᑕᑯᑦᓴᐅᑎᑕᐅᒻᒥᔪᑦ ᑕᑯᔭᒐᖃᕐᕕᐅᔪᒥ ᑯᐯᒃ ᓯᑎᐅᑉ ᑕᑯᔭᒐᖃᕐᕕᒋᔭᖓᓂ ᑕᑯᒥᓇᕐᑐᐃᑦ-ᑕᑯᒥᓇᕐᑐᑦ ᑯᐯᒃᒥ (MNBAQ) ᑎᑭᓪᓗᒍ ᔫᓂ 24, 2024.
ᑲᑎᓯᓚᐅᔪᒍᑦ ᐃᑭᑦᑐᓂᒃ ᐃᓚᐅᓪᓚᕆᖃᑦᑕᓚᐅᔪᓂᒃ ᑕᕝᕙᓂ ᐱᓇᓱᐊᕐᓂᐅᔪᒥ ᑌᒫᒃ ᐃᓕᓐᓂᒃ ᐅᖃᐅᔾᔨᒍᓐᓇᓯᒋᐊᒥᒃ ᑕᒪᑦᓱᒧᖓ. ᑌᒪ ᖃᐅᔨᒍᑎᒋᓕᕐᓗᒋᑦ ᑖᒃᑯᐊ ᑕᑯᒥᓇᕐᑐᓕᐊᕕᓃᑦ ᐱᓇᓱᐊᕐᓃᑦ ᓇᒻᒥᓂᕐᓱᓗᑎᑦ, ᑐᓵᕐᓗᒋᓪᓗ ᖃᓄᐃᓘᒍᑎᖃᑦᓴᒪᖔᑕ ᐃᓕᓐᓂᐊᑎᑦ ᑖᒃᑯᓂᖓ.
ᐃᓕᓐᓂᐊᑏᑦ ᑳᓂ ᐃᑦᑐᑲᓪᓚᒃ (ᐳᕕᕐᓂᑐᖅ) ᕕᓕᓯ ᐋᑕᒻᔅ (ᐃᕗᔨᕕᒃ) ᐃᑦᓯᕙᔫᒃ ᓂᐯᑦᑐᒥᒃ ᑎᕆᕐᖁᐊᓂ ᑕᑯᔭᒐᖃᕐᕕᒥ, ᑐᓴᕋᕐᓴᓂᐊᕐᑎᖅ ᐊᐱᕐᓱᓂᔪᖅ ᑖᒃᑯᓃᖓ, “ᑭᓯᐊᓂ ᖃᓅᖅ ᕿᑦᑌᖓᔮᒍᑕᐅᒍᓐᓇᖃ ᓴᓂᒃᑯᕕᐊᓗᒃ?”
“ᐱᔾᔪᑎᒋᑦᓱᒍ ᐊᑦᓱᐃᑑᓂᑯᖓᓄᑦ!” ᑳᓂ ᑭᐅᔪᖅ ᑕᒡᒐᓴᐅᑎᒋᐊᐱᒃ ᓇᓗᕐᖁᑎᒐᓛᒐᓂ.
ᑐᑭᓯᓐᓇᑎᑦᓯᔪᖅ ᖃᓄᖅ ᐃᓗᓐᓇᓕᒫᑎᒃ ᐃᒋᑕᐅᓲᑦ ᑖᕗᖓ ᑎᑭᐅᑎᕕᖃᓲᖑᒻᒪᖔᑕ ᓄᓇᓕᐅᑉ ᐱᑐᖃᖃᐅᑎᒋᔮᕐᑕᖓᓄᑦ. ᐃᓚᖏᑦ ᐱᖁᑏᑦ ᑌᑦᓱᒪᓂᑕᐅᔪᑦ, ᐊᓯᖏᑦ ᐊᑐᕐᑕᐅᒋᐊᓕᕐᕿᒍᓐᓇᑐᓱᓕ; ᖃᐅᔨᒪᓇᖕᖏᑐᖅ ᑕᑯᑐᐃᓐᓇᕆᐊᓕᓐᓂᒃ. ᑭᓯᐊᓂᓕ ᐊᓯᖏᑦ ᐱᖁᑏᑦ ᑌᒫᓪᓗᑐᖅ ᑕᑯᒥᓇᕐᑐᑦ… ᐃᓚᖏᑦ ᐱᖁᑏᑦ ᓄᐃᑦᓯᔪᑦ ᓱᓕᔪᒥᒃ ᑕᑯᒥᓇᕐᑑᓱᓂ ᑭᐅᒍᑎᒥᒃ, ᐆᑦᑑᑎᒋᓗᒍ ᐊᐅᓂᕈᕐᓯᒪᔪᖅ ᑭᑭᐊᑦᓴᔭᒦᑦᑐᑦ ᑕᐅᑦᑐᒐᓵᓗᖏᓪᓗ ᖃᓄᐃᑦᑐᔭᐅᓂᖏᓪᓗ… ᑖᒃᑯᐊ ᐃᓗᓐᓇᑎᒃ ᐃᓚᐅᑎᑦᓯᓂᓖᑦ ᕿᑦᑌᖓᔮᒍᑎᒋᔭᐅᔪᑦ ᐃᓚᖏᑦᑕ ᐃᓕᓐᓂᐊᑏᑦ ᐊᔾᔨᓕᐊᖏᓐᓄᑦ.
ᑌᒪᓕ, ᓴᓂᒃᑯᕕᐊᓗᒃ ᐱᑕᓕᐊᓘᒻᒥᔪᖅ ᑕᑯᑦᓴᐅᖏᑦᑐᓂᒃ ᐳᔪᕐᓗᓂᒃ. “ᐱᐅᓂᕐᓴᖃᕆᐊᓕᐅᒐᓗᐊᖅ ᑲᒪᒋᔭᖃᕐᓂᒥᒃ ᑖᒃᑯᓂᖓᓕᒫᖅ ᐃᒋᑦᑕᑯᐊᓗᓐᓂᒃ!” ᑳᓂ ᐅᖃᕐᑐᖅ.
ᑕᑯᒥᓇᕐᑐᓕᐅᓂᒥᒃ ᐃᓕᓐᓂᐊᑎᑕᐅᔪᒥ ᓈᑕᓕ ᑯᓘᑦᒧᑦ, ᓯᓚᐅᑉ ᐊᓯᔾᔨᐸᓪᓕᐊᓂᖓ ᐳᔪᕐᓗᐃᓗ ᓱᒃᑫᑐᒥᒃ ᐱᒻᒪᕆᐅᑎᑕᐅᕙᓪᓕᐊᔪᖅ ᐃᓱᒫᓘᑎᒋᔭᐅᑦᓱᓂ ᐃᓕᓐᓂᐊᑎᓄᑦ. ᑖᒃᑯᐊ ᐱᓀᓗᑌᑦ ᐋᕐᖀᔪᑦ ᐱᓇᓱᐊᒐᑦᓴᐅᓂᐊᕐᑎᓗᒋᑦ ᑕᕝᕘᓇ ᑕᑯᒥᓇᕐᑐᓕᐊᒥᑕ ᐆᑦᑐᕋᕐᓂᖏᓐᓄᑦ, ᑐᑭᓯᓐᓇᑎᑦᓯᓱᑎᓪᓗ ᑖᒃᑯᓂᖓ ᑕᒪᐅᓇ ᑕᑯᓐᓇᐅᔮᕐᑕᐅᓂᒃᑯᑦ, ᑐᓴᕐᓂᔮᕐᓂᖁᑦ ᑕᑯᑦᓴᐅᑎᑦᓯᓂᒃᑯᑦ ᑕᑯᒥᓇᕐᑐᓕᐅᕐᓂᓂᒃ, ᐊᔾᔨᓕᐅᕆᓂᕐᑎᒍᓪᓗ.
ᓄᓇᕕᒻᒥ, ᓱᕋᑕᐅᓂᖓ ᓯᓚᐅᑉ ᐊᓯᔾᔨᕙᓪᓕᐊᓂᖓ ᐃᑉᐱᒋᔭᐅᓲᖅ ᖃᐅᑕᒫᖅ. “ᐃᓅᓯᕆᔭᕗᑦ ᑌᒫᑦᓯᐊᖃᑦᑕᓯᒪᔪᖅ ᓭᒪᓂᕐᑎᒍᑦ ᐊᕙᑎᑦᑎᓂᒃ. ᐅᓪᓗᒥᓕ, ᖃᐅᔨᒪᓇᕈᓐᓀᑐᖅ ᖃᓄᐃᓕᖓᑦᓴᓂᐊᓕᕐᒥᒪᖔᑦ ᓯᕗᓂᕗᑦ, ᐱᓗᐊᕐᑐᒥᒃ ᐊᖑᓇᓱᒃᑎᕗᓐᓄᑦ. ᓯᓚᓗ ᖃᐅᔨᒪᓇᕈᓐᓀᓱᓂ…” ᐅᖃᕐᑐᖅ ᑳᓂ, ᐅᖄᑦᓱᓂ ᐊᒥᓱᐃᓄᑦ ᑲᑎᑦᓯᒪᔪᓄᑦ ᐱᓂᐊᕐᓂᐅᑎᑕᐅᔪᒥᒃ ᑖᑦᓱᒧᖓ MNBAQ-ᒧ ᒫᔾᔨ 2024 ᓄᐃᑕᑎᑦᓯᓂᕐᒧᑦ ᑖᑦᓱᒥᖓ ᑕᕐᕋᑑᑎᖅ | ᑌᒪ ᑕᑯᑦᓴᑎᑕᐅᓂᒋᓐᓂᒃ.
ᐱᔪᕆᐅᑎᖃᑦᓯᐊᖁᖓ ᑖᑦᓱᒥᖓ ᐱᓇᓱᐊᕐᓂᒥᒃ ᐱᕕᑦᓴᖃᕆᐊᒥᓪᓗ ᐅᖄᒍᑎᖃᕆᐊᒥᒃ ᖃᓄᐃᓘᕐᓂᐅᓕᕐᑐᒥᒃ ᓄᓇᓕᐊᕈᑦᑎᓂ […] ᐅᐱᒋᔭᖃᑦᓯᐊᖁᖓ […] ᐃᓂᖃᒍᓐᓇᕆᐊᒥᒃ ᐅᖄᒍᑎᒋᓗᒍ, ᐱᔾᔪᑎᒋᓗᒍ ᐃᓂᖃᓪᓗᐊᕌᓗᖕᖏᒪᑦ ᑐᓵᔭᐅᒍᓐᓇᕆᐊᒧᑦ ᑐᑭᓯᔭᐅᑎᑦᓯᒍᒪᓕᑐᐊᕋᑦᑕ ᐃᓱᒫᓗᑎᒋᔭᑦᑎᓂᒃ ᓄᓇᓕᑦᑎᓂ.
ᐃᓕᓐᓂᐊᑏᑦ ᑕᑯᒥᓇᕐᑐᓕᐅᕐᓂᖏᑦ ᑕᑯᑦᓴᐅᑎᑕᐅᔪᑦ ᓯᓚᒥ ᐳᕕᕐᓂᑐᒥ, ᐊᑭᓐᓇᒦᑦᓱᑎᒃ ᐊᔾᔨᒌᖕᖏᑐᓂ ᐃᓂᐅᔪᓂᒃ ᓄᓇᓕᒻᒥ, ᑌᒫᒃ ᐃᓄᐃᑦ ᑭᓇᒃᑯᑐᐃᓐᓇᓕᒫᑦᓯᐊᑦ ᐱᕕᑦᓴᖃᕐᑎᑕᐅᑦᓱᑎᒃ ᑕᑯᒍᓐᓇᓯᒋᐊᒥᒃ. ᐊᒥᓱᑦ ᐊᐱᕆᐅᑏᑦ ᓄᐃᑦᑕᐅᓚᐅᔪᑦ, ᐱᕕᑦᓴᖃᕐᑎᓯᓚᐅᔪᑦᓱᑎᒃ ᐃᓕᓐᓂᐊᑎᓂᒃ ᐅᖄᖃᑎᒌᒍᓐᓇᓂᕐᒥᒃ ᓵᖕᖓᔪᓂᒃ ᐃᓱᒫᓗᑎᒋᔭᒥᓂᒃ ᑕᒪᑦᓱᒥᖓ ᓯᓚᐅᑉ ᐊᓯᔾᔨᕙᓪᓕᐊᓂᖓᓅᓕᖓᔪᓂᒃ.
ᑳᓂ ᐅᖃᕐᑐᖅ ᐊᔪᒉᓪᓕᐅᑐᕕᓂᐅᓂᕋᕐᓱᓂ ᑖᑦᓱᒥᖓ ᐱᓇᓱᐊᕐᓂᐅᑉ ᐱᔪᓐᓇᓂᖓᓂᒃ ᐃᓚᐅᑎᑦᓯᒍᓐᓇᓂᕐᒥᒃ ᐃᓄᐃᑦ ᐅᓇᒻᒥᒋᔭᖏᓐᓂᒃ. “ᑲᑎᑎᑦᓯᒍᓐᓇᓚᐅᔪᖅ ᐊᒥᓱᓂᒃ ᐃᓄᖕᓂᒃ ᓄᓇᓕᑦᑎᓂᒃ. ᐃᓚᖏᑦ ᐃᓚᐅᓚᐅᔪᑦ ᓂᕆᐅᒋᓯᒪᖕᖏᑕᒃᑲ.”
ᑖᒃᑯᐊᑎᑐᑦ ᐃᓄᐃᑦ, ᑕᑯᒥᓇᕐᑐᓕᐊᖑᓯᒪᔪᑦ ᓴᓇᔭᐅᑦᓱᑎᒃ ᐃᓕᓐᓂᐊᑎᓄᑦ ᐃᒍᐊᕐᓯᕕᐅᑉ ᐃᓕᓐᓂᐊᕕᖓᓂ ᓄᓇᖃᕐᓯᒪᔪᑦ ᓄᓇᒥᒃ. ᑌᒣᖏᓐᓇᓚᖓᑦᓱᑎᓪᓗ ᑌᒫᒃ, ᑖᒃᑯᓇᓂ ᑕᕐᕿᓂ ᙯᔪᓂ, ᐊᐅᓪᓚᑲᑦᑕᖃᑦᑕᓚᖓᑦᓱᑎᓪᓗ ᐅᐸᐅᑎᑲᑦᑕᓗᑎᒃ ᐊᓯᖏᓐᓂᒃ ᓄᓇᓕᓐᓂᒃ ᓄᓇᕕᒻᒥ.
