ᓴᓇᕐᕈᑎᖃᕐᑎᓯᓂᖅ ᒪᓕᒐᖃᕐᑎᓯᓂᕐᓗ: ᖃᐅᑕᒫᑦ ᑐᓂᒪᓂᖓ ᓈᑕᓕ ᑯᓘᑦ
ᑖᑦᓱᒥᖓ ᑐᓴᕐᓯᒪᕕ? ᐊᒥᓱᐃᑦ 25 ᐃᓕᓐᓂᐊᑏᑦ ᐃᒍᐊᕐᓯᕕᐅᑉ ᐃᓕᓐᓂᐊᕕᖓᓂᒃ ᐱᓯᒪᔪᑦ ᓵᓚᖃᕐᓯᒪᑐᐃᓐᓇᖏᒻᒪᑕ ᐱᒋᐊᕐᑎᓯᒍᑎᐅᑉ ᓵᓚᐅᖃᑎᖓᓂᒃ, ᐃᓚᒋᔭᐅᔪᖅ ᐃᐊᔅᓱᐊᕐ ᐃᓕᑕᕆᔭᐅᒍᑏᑦ ᐁᑦᑑᑏᑦ ᐊᕕᑦᑐᓯᒪᔪᖏᓐᓂ, ᑭᓯᐊᓂᓕ ᑕᑯᒥᓇᕐᑐᓕᐅᕐᓂᕆᔭᖏᑦ ᑕᑯᑦᓴᐅᑎᑦᓯᕕᒻᒦᒥᔪᑦ ᑯᐯᒃ ᓯᑎᐅᑉ ᑕᑯᓐᓇᐅᔮᕐᕕᖓᑕ ᑕᑯᒥᓇᕐᑐᐃᑦ-ᑕᑯᒥᓇᕐᑐᑦ ᑯᐯᒃᒥ (MNBAQ) ᑎᑭᓪᓗᒍ ᔫᓂ 2, 2024.
ᑲᑎᓯᓚᐅᔪᒍᑦ ᐃᓚᖏᓐᓂᒃ ᐱᓇᓱᐊᓪᓚᕆᖃᑦᑕᑐᓂᒃ ᑕᕝᕙᓂ ᐱᓇᓱᐊᕐᓂᒥᒃ ᐅᖃᐅᓯᖃᒍᓐᓇᓯᕆᐊᒥᒃ ᐃᓕᓐᓄᑦ. ᐊᑏ ᖃᐅᔨᑎᑦᓯᓚᐅᕐᑕ ᐃᓕᓐᓄᑦ ᑭᓇᐅᒻᒪᖔᑦ ᐃᓕᓐᓂᐊᑎᑦᓯᔨᒃ ᑐᑭᒧᐊᕐᑎᓯᓚᐅᕐᑐᖅ ᑖᑦᓱᒥᖓ ᐱᓇᓱᐊᕐᓂᐅᓚᐅᕐᑐᒥᒃ.
ᐊᑐᓂ ᐃᓕᓐᓂᐊᑎᒃ ᐃᒍᐊᕐᓯᕕᐅᑉ ᐃᓕᓐᓂᐊᕕᖓᓂ ᐳᕕᕐᓂᑐᒥᒃ (ᓄᓇᕕᒃ), ᐱᒋᐊᕐᓱᓂ ᐳᒃᑭᓂᕐᓴᓂᒃ 5 ᑎᑭᐅᑎᑦᓱᓂ ᐳᕐᑐᓂᕐᓴᓄᑦ 5, ᑕᕝᕘᓈᓲᑦ ᑕᑯᒥᓇᕐᑐᓕᐅᕐᓂᒧᑦ ᐃᓕᓐᓂᐊᑎᑦᓯᔨᒥᒃ ᓈᑕᓕ ᑯᓘᑦ ᐃᓕᓐᓂᐊᕕᖓᑕ ᖃᕆᐊᖓᓐᓂᒃ ᐱᓯᒪᔪᖅ. ᑕᕝᕙᓂᑕᒐ ᐱᓇᓱᐊᕐᓂᐅᓲᖅ ᑌᔭᐅᓂᖃᕐᓱᓂ ᑕᕐᕋᑑᑎᖅ | ᑌᒪ ᑲᑎᐅᑎᓚᐅᕐᓯᒪᔫᒃ ᑕᒫᓂ ᐊᕐᕌᒎᑉ ᐊᑕᐅᓯᐅᑉ ᐃᓗᐊᓂ, ᐃᓕᓐᓂᐊᑏᑦ ᑲᔪᓯᑎᑦᓯᑎᓪᓗᒋᑦ ᑕᑯᒥᓇᕐᑐᓕᐅᕈᓯᒋᔭᒥᓂᒃ ᖃᐅᔨᓴᕐᓂᖃᕐᑎᓗᒋᑦ ᐊᑖᒍᑦ ᐃᓕᓐᓂᐊᑎᑦᓯᔨᒥᑕ ᓯᕗᓕᕐᓂᖓᒍᑦ.
2022-ᒥ, ᐱᑦᓱᓂ ᐱᓇᓱᐊᕐᓂᐅᔪᒥᒃ ᑕᕝᕙᓂ ᑕᑯᒥᓇᕐᑐᓕᐅᕐᓂᐅᑉ ᐃᓕᓐᓂᐊᑎᑕᐅᓂᖓᑕ ᑳᓇᑕᒥ ᐊᑑᑎᓕᓂᐅᓂᕐᑎᒍᑦ ᓴᓇᓂᕐᒥᒃ ᐱᖕᖑᐊᓂᕐᑎᒍᑦ ᐱᓇᓱᐊᕐᓃᑦ ᓇᐅᓕᒫᓄᑦ ᐃᓂᐅᔪᒥᒃ ᒪᓐᑐᔨᐊᒥ, ᙯᑎᒥ, ᒧᕌᑰᒥ ᓂᑭᕌᑯᐊᒥᓪᓗ, ᓈᑕᓕ ᑎᑭᓚᐅᔪᖅ ᐳᕕᕐᓂᑐᒧᑦ. ᑎᓕᔭᐅᒪᐅᑎᖓ ᑕᒫᓂ ᐃᓕᓐᓂᐊᑎᑦᓯᓂᐊᕐᓗᓂ ᑕᑯᒥᓇᕐᑐᓕᐅᕐᓂᒥᒃ ᐃᓕᓐᓂᐊᑎᓄᑦ ᐅᑭᐅᓕᓐᓂᒃ 10-ᓂᒃ 17-ᓄᑦ ᑎᑭᑦᑐᓂᒃ – ᐃᓕᓐᓂᐊᑎᑦᓂᒃ ᑌᒫᒃ ᖃᓪᓗᓈᑎᑑᕐᓂᖅ ᒍᐃᒍᐃᑎᑑᕐᓂᓗ ᐅᖃᐅᓯᐅᑉ ᐁᑉᐱᑎᖓᓅᓕᖓᑎᓪᓗᒍ ᐅᕝᕙᓘᓐᓃᑦ ᐱᒐᑦᓯᐅᑎᖓᓅᓕᖓᑎᓪᓗᒍ. ᑌᒪ MNBAQ ᐱᒋᐊᕐᑎᓗᒍ ᕿᓂᔭᕐᓂᒥᒃ ᓄᓇᕕᒻᒥ ᐃᓕᓐᓂᐊᑎᑦᓯᔨᓂᒃ ᐅᓇᒻᒥᓱᓐᓂᖃᕋᔭᕐᑐᓂᒃ ᐱᓇᓱᐊᕐᓂᒥᒃ ᑐᖕᖓᕕᓕᒻᒥᒃ ᐱᓇᓱᐊᕐᓂᐅᔪᓂᒃ ᓄᐊᑦᓯᓂᕆᔭᖓᓄᑦ, ᑭᐅᒍᑎᒋᔭᖓ ᑕᒡᒐᓴᐅᑎᒋᐅᓚᐅᕐᑐᖅ.
ᑌᒪ ᑎᑭᒋᐊᖕᖓᓱᓂ ᓄᓇᕕᒻᒧᑦ, ᓈᑕᓕ ᑕᑕᒥᓐᓂᖃᓚᐅᔪᕗᖅ ᐅᑭᐅᕐᑕᑑᔪᒥᒃ. ᑌᒪᓗ ᓄᐃᑕᕿᑐᐃᓐᓇᓛᕆᑦᑐᒥᒃ ᓴᓂᖃᐅᑎᐊᓗᒻᒥᒃ ᓄᓇᓕᐅᑉ ᓴᓂᐊᓃᑦᑐᒥᒃ, ᑌᒫᒃ ᐃᓱᕐᓗᒃ ᐃᓱᕐᓗᓲᖑᑦᓱᓂ ᖃᖓᑐᐃᓐᓇᓕᒫᖅ ᐃᒋᑦᑕᑯᐃᑦ ᐃᑯᐊᓚᑦᓯᔭᐅᓕᑐᐊᕐᒪᑕ.
ᑕᑕᒥᓐᓂᖃᓪᓚᕆᓚᐅᔪᕗᖓ ᑕᒪᑦᓱᒥᖓᓕᒫᖑᔪᒥᒃ, ᑕᑯᒥᓇᕐᓂᖓᓂᒃ ᓄᓇᐅᑉ ᓱᕐᕋᑕᐅᒪᖕᖏᑑᒋᐊᖓᓂᓪᓗ… ᑌᒪᓗᑦᓭᓇᕐᑕᐅᖅ, ᑕᑕᒥᓐᓇᑐᕐᑎᒍᑦ ᒧᒥᖕᖓᓯᐊᕐᑑᔮᕐᑐᒥᒃ ᑕᒫᓃᓐᓇᕿᔪᒥᒃ ᓴᓂᒃᑯᕕᐊᓗᖃᕐᓱᓂ ᓯᓚᑖᐱᐊᓂ ᓄᓇᓕᐅᑉ ᐳᔪᕐᑐᐊᓘᑦᓱᓂ ᒪᒣᑦᑐᐊᓗᒻᒥᒃ ᐃᓯᕐᓗᒥᒃ ᐃᓄᖁᑎᒋᔭᒥᓄᑦ ᓄᓇᓕᒻᒥ. ᐊᐱᕆᓚᐅᔪᖓ ᐃᓕᓐᓂᐊᑎᒃᑲᓄᑦ ᑕᒪᑦᓱᒪ ᒥᑦᓵᓄᑦ; ᖃᐅᔨᒍᒪᓚᐅᔪᖓ ᖃᓄᖅ ᐃᓱᒪᒻᒪᖔᑕ.
ᑌᒪ ᐱᒋᐊᓯᑦᓴᖁᖅ ᓄᐃᑦᓯᓂᕐᒨᓕᖓᔪᖅ.
“ᐱᓇᓱᐊᕋᒐ ᐃᒣᑦᑐᓚᕆᐅᔪᖅ ᒪᓕᒋᐊᒥᒃ ᐃᓕᓐᓂᐊᑎᓂᒃ ᐱᕕᖃᕐᑎᓯᓂᕐᒥᓗ ᑕᑎᒋᔭᐅᒍᓐᓇᓯᕆᐊᒥᒃ ᑖᒃᑯᓄᖓ, ᑌᒫᒃ ᐃᓱᕐᕿᓯᒍᓐᓇᓯᑎᑦᓯᒋᐊᒥᒃ ᕿᓂᕐᑎᓗᒋᑦ ᐊᔾᔨᒌᖕᖏᑐᓂᒃ ᑐᓴᕋᕐᓴᐅᔪᕐᑎᒍᑦ ᑌᒫᖅ ᖃᓄᐃᓕᒍᓐᓇᓯᖁᓪᓗᒋᑦ ᐃᒻᒥᓂᒃ ᐊᓯᐊᒍᒋᐊᓪᓚᒃ ᐅᖃᐅᓯᕐᑎᒎᖕᖏᑐᖅ”. ᐅᖃᕐᑐᖅ ᓈᑕᓕ. “ᐊᓕᐊᓱᓐᓂᖃᕆᐊᖃᕐᖁᑎᑦ ᐊᑑᑎᓕᓂᕐᒥᒃ ᓄᐃᑦᓯᓂᕐᒥᒃ, ᐊᒻᒪᓗ ᐃᔪᕿᑕᕐᓂᒃ ᐱᒻᒪᕆᐊᓘᕗᖅ!”
ᑕᑯᒥᓇᕐᑐᓕᐅᕈᓐᓇᓂᖏᑦ ᐃᓕᓐᓂᐊᑏᑦ ᑌᒫᓪᓗᑐᖅ ᑕᑕᒥᓇᕐᑐᐃᑦ. ᓄᐃᑦᓯᓴᑐᐊᕐᒪᑦ ᓈᑕᓕ ᐊᔾᔨᖑᐊᓂᒃ ᓯᕗᓪᓕᓂᑕᕐᓂᒃ ᑕᑯᒥᓇᕐᑐᓕᐊᕕᓂᕐᓂᒃ ᐃᓕᓐᓂᐊᑎᒥᓄᑦ, MNBAQ-ᑯᑦ ᐱᓇᓱᐊᖃᑎᒌᑦᑐᑦ ᐅᓇᒻᒥᒋᔭᕐᑖᓴᐅᑎᒋᓚᐅᔪᑦ ᐱᔪᒪᓂᖃᓕᕐᓱᑎᓪᓗ ᐊᖏᓖᒋᐊᒍᓐᓇᕋᔭᕐᓂᒥᒃ ᐱᔪᓐᓇᓂᖏᓐᓂᒃ ᐃᓕᓐᓂᐊᑏᑦ ᑕᑯᑦᓴᐅᑎᑦᓯᒍᓐᓇᓂᖏᓐᓂᒃ ᒪᓂᔨᓂᕐᑎᒍᑦ ᑖᒃᑯᓂᖓ ᓇᐅᓕᒫᓄᑦ.
